“O Le Lelei na Aumai ia te A’u e le Talalelei,” Liahona, Sete. 2024.
O Leo o le Au Paia o Aso e Gata Ai
O Le Lelei na Aumaia ia te A’u e le Talalelei
Ona o tagata i le lotu, sa ou lagona ai le Agaga Paia.
A o ou tuputupu ae, o la’u toa manumanu o lo’u tamamatua, o lo’u acheii. Sa malosi o ia i lona faatuatua. Sa ou alu i le tele o lotu eseese faatasi ma ia, ae o le lotu sa le mo a’u.
Ina ua ou feiloai ia Gina, o lē ua avea ma o’u toalua, o ia o se tagata faamaoni O Le Ekalesia a Iesu Keriso o le Au Paia o Aso e Gata Ai. Sa manao o ia ia ou aoao e uiga i le Ekalesia ina ia mafai ona ma faaipoipo i le malumalu. Ae ou te le’i manao i lena mea. E le o a’u o se tagata lotu.
Na i’u lava ina ma faaipoipo faalemalo. Ina ua maua se ma tama, sa ou le fiafia lava i le Ekalesia, ae sa auai pea Gina.
Mulimuli ane, sa ou filifili o le a ou faamaonia atu e sese lana lotu e ala i le alu i isi lotu. Sa faaauau pea lenei mea mo ni nai tausaga, ae e tusa lava po o fea ou te alu i ai, sa ou le toafimalie lava.
Ona, oo lea i se tasi Aso Sa a o sauni e Gina lo ma afafine mo le lotu, sa amata foi ona ou sauni mo le lotu. Sa tilotilo mai o ia ia te a’u ma fesili mai, “O le a lau mea o loo fai?” Sa ou tali atu, “O le a ou alu i le lotu faatasi ma oulua.” Sa tilotilo o ia i le ma tama teine ma fai atu, “Sauni vave! Ta te le mananao ia sui lona mafaufau!”
O lea, sa matou o ai loa. Ona sa ou lagonaina le Agaga Paia e ala i tagata i le lotu, sa taua i latou i lo’u liua. Ina ua mavae lena, na o mai faifeautalai i lo matou fale. Sa maoae i laua, o aoaoga na la faasoa mai sa matagofie ia te a’u, ma sa faatumulia lo’u loto i le Agaga (tagai Moronae 10:4–5).
Ina ua ou asiasi atu i lo’u tamamatua e ta’u atu ia te ia le mea na ou mauaina, sa lei fiafia o ia. Ae ou te iloa e tatau lava ona ou mulimuli i lou loto.
Sa ou auai i le Ekalesia, ma e lei umi ae faamauina i maua ma Gina i le malumalu. Sa faamauina le ma tama teine ia i ma’ua, ma ua i ai nei le ma fanau e toatolu o e na fananau i totonu o le feagaiga.
E 10 tausaga na alu mo lo’u acheii na iu ai ina faaaloalo i mea matou te talitonu i ai i le Ekalesia. I le faauuga o le aoga maualuga a lou atalii, sa ia ta’u atu ai i tagata uma i Navajo, “Ou te fiafia i lenei aiga. Ou te lagolagoina mea latou te talitonu i ai. E iloa lelei lava e le la fanau le auala e tatalo ai.
Ua na o a’u le tagata o le Ekalesia i lo’u aiga lautele, ae ou te iloa ua latou taliaina o lo’u liua sa moni, ma ua latou vaaia le lelei ua aumaia e le talalelei i lo’u toalua, le ma fanau, ma a’u.