“Mauaina o le Toomaga i la Tatou Sootaga Faalefeagaiga ma le Atua,” Liahona, Sete. 2024.
Mauaina o le Toomaga i la Tatou Sootaga Faalefeagaiga ma le Atua
O Iesu Keriso o le punavai o le alofa mama, faamalologa, fiafia, ma le toomaga.
Faamatalaga auiliili mai le E Toe Afio Mai o Ia e Pule ma Nofotupu, saunia e Mary R Sauer
O le mauaina o le toomaga e ala i la tatou sootaga faalefeagaiga ma le Atua sa i ai i lo’u mafaufau ma lo’u loto mo sina taimi. E pei ona sa aoao mai e le perofeta a le Alii ma apoapoa’iina i tatou e aoao e uiga i feagaiga, malumalu, ma le mana o le perisitua, sa ou sailia ai e a’u lava ia, fiafia i ai, ma mafaufau loloto i upumoni faafouina ua tuufaatasia i feagaiga.
Na tatau ona tatou faipaaga ma le Alii i se ala mamana e ala i a tatou feagaiga. E finagalo o Ia e faatasi ma i tatou i o tatou popolega ma a tatou faaiuga. E le moomia ona tatou faatautaia na o i tatou luitau, faanoanoaga, atuatuvalega, ma lototiga o le olaga. O le a i ai o Ia i o tatou autafa. Na fetalai mai o Ia: “Ou te le tuua outou o matuaoti: ou te sau ia te outou” (Ioane 14:18).
Sa faamatala e Peresitene Russell M. Nelson le uiga o le Atua ma Lona alofa tele mo i tatou ina ua ia aoao mai e faapea “o le ala o feagaiga e faatatau uma lava i la tatou sootaga ma le Atua.” Na ia saunoa: “O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē vaivai ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou. Ua tofu i tatou uma ma se nofoaga faapitoa i le loto o le Atua. E i ai Ona faamoemoega maualuluga mo i tatou.”
O La’u Punavai Sili o le Filemu
I le avea ai ma se tuafafine e lei faaipoipo lava, o lenei sootaga alofa ma le alofa mutimutivale o feagaiga ma lo’u Tama i le Lagi ma le Faaola e i ai se nofoaga mamana i lo’u olaga ma sa avea ma o loo avea pea ma o’u punavai aupito silisili o le toomaga ma le filemu. Po o le a lava lo tatou tulaga faalefaaipoipoga po o le talaaga, e finagalo le Alii ia i tatou e faipaaga ma Ia i se ala mamana—ia “tasi” (3 Nifae 19:23) ma Ia i “a [tatou] mea uma e fai” (Alema 37:37). A o tatou tagi atu i le Alii mo lo tatou tausiga, ma “tuu atu alofaaga o [tatou] loto i [Ona] luga e faavavau” (Alema 37:36; faaopoopo le faamamafa), e mafai ona faatumuina o tatou olaga i lenei sootaga faalefeagaiga matagofie.
E ala mai i lo tatou Faaola, o Iesu Keriso, e mafai ai ona tatou maua le toomaga mai le faatautaiga o luitau o le olaga lava ia.
E tofu uma i tatou ma popolega ma manaoga e mafai ai ona tatou lagona le tuuatoatasi i totonu. E popole o Ia i o tatou popolega e tusa lava po o le a le tele po o le itiiti. Ua ou lagonaina le manaomia o Lana fesoasoani pe a popole i mea laiti e pei o le uo o loo i ai i le taimi nei, ou te ta’ua o le “lipea fale.” E aunoa ma se toalua e feutagai, e mafai ona ou popole na o au e uiga i le konekarate sa’o, tau talafeagai, alu ese mai le galuega ina ia i ai i le fale, ma avea ma se tausimea lelei i au mea tautupe ma le aiga. O se manumalo i le isi aso ina ua faaleleia lo’u faitotoa o le fale taavale! Sa faafofogaina e le Alii lo’u popolega. Ma e ui ina itiiti i le fuafuaga tele o mea, ae sa Ia tali mai i la’u tatalo. E faapefea? E ala i se tuaoi agalelei, le fesoasoani a le Agaga, ma se vitio i luga o le YouTube, sa faamanuiaina ai au i le iloa o le mea e fai e faaleleia ai le faitotoa.
Afai e gauai atu le Alii i nai manaoga laiti, vaai faalemafaufau i Lona finagalo e faamanuia ma lagolagoina i tatou i mataupu silisili atu o le loto ma le agaga, lea e le itiiti le aofai: sauaga faatautala, vaisu, sootaga faigata faaleaiga, leiloa ma le le fiafia, luitau faifai pea o le soifua maloloina faalemafaufau ma faaletino, faanoanoaga tautupe, popolega faifai pea o se mātua, popolega faifai pea i le tausiga o se matua, popolega faifai pea mo tauiviga ma le faatuatua patino, o se tamaitiiti po o se toalua e filifili e le auai i le talalelei.
I le taimi o faigata ma vaivaiga o le olaga, sa ou faalagolago tele ai ma pipiimau ma le toto’a i la’u sootaga faalefeagaiga ma le Atua. A o ou faalagolago i Lana tausiga alofa ma taumafai i le mea sili ou te mafaia e faapaiaina lou olaga ia te Ia, ua Ia tuuina mai le toomaga e ala i Lona mana o le perisitua ma sa avea ma ou Talimanao i o’u manaoga faaleagaga ma faaletino. Ua Ia tuuina mai le toomaga mai le fefe, toomaga mai le le mautonu, toomaga mai le faamaualuga, toomaga mai le agasala, toomaga mai le tuuatoatasi, toomaga mai le faanoanoa.
Na aoao mai ma le manino ma le mautinoa e Peresitene Nelson e faapea “o le taui mo le tausiga o feagaiga ma le Atua, o le mana faalelagi—o le mana e faamalosia ai i tatou e onsaia lelei ai o tatou tofotofoga, faaosoosoga, ma lototiga.”
E ala mai ia Iesu Keriso, e mafai ai ona tatou maua le toomaga mai le faatautaiga o luitau o le olaga lava ia.
O Sister Yee ma ni tuafafine se toalua i Maikolenisia o loo tausia ni fanau ua tuulafoaiina e matua.
Tuafafine “i Motu o le Moana”
A o ou tomanatu i faamanuiaga o le sootaga o le feagaiga ua tatou maua ma le Atua, sa ou mafaufau e uiga i lo’u tofiga e asiasi atu i le Eria o Asia i Matu.
Sa ou maua le avanoa e malaga ai i motu laiti o Chuuk i Maikolenisia, pe tusa ma le 1,500 maila (2,400 km) i sautesasae o Iapani. O le toalua o uso i Luga o Weno, Chuuk, ua tuuina atu o laua ola e tausi ai fanau o e ua tuulafoaiina e o latou matua. Sa lagona e nei uso e toalua e taua le tausia o nei fanau i le talalelei. O se tasi o nei tuafafine e nofotoatasi ma e faigaluega i le taimi atoa o se faufautua i le aoga.
Sa ou faasoa atu ia i laua le savali a Peresitene Nelson i tuafafine o le Ekalesia, o outou tuafafine e alofagia, manaomia, ma taua.
O le tuafafine nofofua aulelei o loo tausia fanau teine ma tama a ona tei sa tagi ma fai mai na te lei lagonaina le faapelepele talu ai nei; sa ia lagonaina le faagaloina. Ae sa ia molimau atu sa ia lagonaina le alofa ma le silafia e le Atua mo ia i upu a le perofeta e faapea, e moni lava sa “faapelepele,” o ia ma sa ia iloaina e moni. Sa ia lagonaina le alofa faamalolo o le Atua; sa ia lagonaina le toomaga.
Na fetalai mai le Alii, “Tou te lē iloa ea o Aʼu, o le Alii lo outou Atua, na faia tagata uma, ma Ou te manatua i latou o e o i motu o le sami?” (2 Nifae 29:7)
O nei uso ua silafia e lo latou Tama Faalelagi ma le Faaola. E le tuua lava na o i laua. Ma e faapena foi oe ma a’u i o tatou tofotofoga ma luitau. Na auina mai au e le Alii pe tusa ma le 8,500 maila (13,700 km) i le vaalele, nofoaafi, taavale, ma le vaa e aumai ai le alofa ma le toomaga o le Atua i “le tasi” i motu o le sami. Ma o lea o le a Ia maua ai oe ma au i o tatou motu patino lea atonu tatou te lagona ai le tuuatoatasi i atugaluga ma avega o loo tatou tauaveina i o tatou loto. O loo i ai o Ia ma saunia e faamanuia, taiala, ma faamafanafana i tatou.
“E Mafai ona Ou Sau ia te Oe”
Sa faamatala e Peresitene Gordon B. Hinckley (1910–2008) i se tasi taimi le aafiaga o se faaipoipoga talavou ua tatala “o se tina o se fanau e toafitu o le matutua i lena taimi e amata i le 7 i le 16 tausaga. Fai mai o ia, i se tasi afiafi sa ia alu atu ai i le isi itu o le auala e momoli atu se mea i se tuaoi. O ana upu nei e pei ona ia manatuaina:
“Ina ua ou faliu e toe savali atu i le fale, sa ou vaaia moli o lo’u fale o ola mai. Sa ou faalogoina siuleo o la’u fanau a o ou savali ese mai le faitotoa i nai minute ua mavae. Sa latou fai mai: ‘Tina, o le a le tatou meaai o le afiafi?’ ‘E mafai ona e aveina a‘u i le faletusi?’ ‘E tatau ona ou aumaia ni pepa lautele e fai ai se savali i le po nei.’ Sa ou vaivai ma lelavā, ae sa ou tilotilo atu i lena fale ma vaaia le ola o moli i potu taitasi. Sa ou mafaufau i na tamaiti sa faatalitali mai i le fale mo au, ma mea sa latou manaomia. Sa atili ai ona mamafa la’u avega nai lo le mea sa ou gafataulimaina.
“Ou te manatua lo’u tilotilo a’e i le lagi a o maligi o’u loimata, ma faapea atu, ‘Lo’u Tama e, ua le mafai ona ou faia i le po nei. Ua ou matua lelavā lava. Ua le mafai ona ou tatalia. E le mafai ona ou alu i le fale ma tausia na o a’u na fanau. Pe mafai lava ou alu atu ia te Oe ta te nonofo ma Oe tau lava o se po se tasi? …’
“Ou te lei faalogo moni i upu o le tali, ae sa ou lagonaina i lo’u mafaufau. O le tali o le: ‘Leai, la’u pele, e le mafai ona e sau nei. … Ae e mafai ona ou alu atu ia te oe.’”
E mafai ona ou alu atu ia te oe.” Sa afio mai o Ia ia te ia, ma o le a afio mai o Ia ia te oe ma a’u, e pei lava ona afio mai le Faaola i le fafine i le vaieli lea sa ia galue ai ma galueaiina i ona aso (tagai i le Ioane 4:3–42). Sa Ia faamalosiau atu ia te ia, aoao o ia, folafola atu Lona finagalo ia te ia, ma alofa ia te ia lea atonu sa le alofa o ia ia te ia lava. I le fafine i le vaieli, i le tina talavou o le toafitu, ia te oe ma a’u, ua saunia Iesu Keriso e tuuina atu le toomaga. Ou te molimau atu e mafai ona tatou maua le toomaga e ala i a tatou sootaga faalefeagaiga ma se Atua alofa.
Atonu e pei o a’u, ua e aioi atu mo se fesoasoani ia aua nei tuua na o oe i nisi o vaitau sili ona faigata faalelagona, faaletino, ma faaleagaga o lou olaga. O nei vaitau faigata o le tuputupu ae ua tuua ai le mea ua ou ta’ua o “mailaila faaleagaga” i luga o le agaga. Ae ou te molimau atu na Ia tauaveina au, ma o le a Ia tauaveina oe. Ua Ia tusia i tatou i Ona alofilima (tagai Isaia 49:16; 1 Nifae 21:16). Sa i ai o Ia iina a o e saili “ia amiotonu i le pogisa.” Na te lei tuulafoaiina lava au, na te le tuulafoaiina foi oe. Ma o le a ou alofa ia te Ia e faavavau mo lena mea.
Uso e ma tuagane pele, o le puna o le alofa mama, faamalologa, fiafia, ma le toomaga ua maua ia Iesu Keriso. Ou te molimau atu o Iesu Keriso o le toomaga.
E finagalo o Ia e tausi oe, e faamanuia ma faamagalo oe. Sa afio mai o Ia mo lenei lava faamoemoega, e tuuina atu ia te oe le toomaga sa matua manaomia o loo e sailia. O Ia o le Togiola o le lalolagi, ma ou te molimau atu o loo soifua o Ia ma e alofa o Ia ia te oe.
Mai se lauga o le Konafesi a Tamaitai i le Iunivesite o Polika Iaga na tuuina atu i le aso 3 o Me, 2023.