“Gamen blong Tabu Prishud,” Liahona, Septemba 2024.
Gamen blong Tabu Prishud
Olsem pat blong tempol endaomen, oli bin givim long yumi wan tabu rimaenda blong kavenan blong yumi long saed blong bodi —wan simbol we i ripresentem Sevya Hemwan.
Pikja blong Adam mo Iv,, i kam long Douglas Frye
Nomata we oli bin mekem tufala i rere mo givim long tufala ol toktok blong hop we oli traem blong stap tingbaot, Adam mo Iv oli bin sek bigwan taem oli lego paradaes Garen blong Iden mo wokbaot i go insaed long wol we i foldaon i stap.
Wetem tru mo klia save we tufala i gat, tufala i luksave wanem i minim blong jenisim wan gudfala laef we i kwaet mo i fri, wetem wan wol we i gat oposisen mo swet, ol gras nil mo sore—mo wan samting we oli singaotem ded, bae i kam long en. Oli no bin save long stat wanem evri samting ia i minim, be kwiktaem oli lanem se evri dei i save karem i kam wan niu harem nogud. Wanem we tufala i harem moa nogud from, i we tufala i save se bae tufala i fesem evri samting ia we Papa blong tufala long Heven i no stap—“tufala i no bin stap long ples we hem i stap long hem,” Moses i bin raetem daon hemia afta.
Wetem filing ia blong stap seperet mo stap tufalawan insaed long wan kolkol wol we i tudak, Adam mo Iv i bin kasem kamfot taem tufala i tingbaot wan samting: se oli bin mekem ol promes—wan samting we i tabu mo i no save finis, we oli singaotem ol kavenan. Tufala i bin promes se bae tufala i obei long Papa blong ful laef blong tufala mo Hem i bin promes blong givim wan Sevya we bae i givim rilif long harem nogud blong tufala, aton from ol rong blong tufala mo karembak olgeta i gobak sef long ples blong Hem.
Be ?olsem wanem nao olgeta long wol ia bae oli tingbaot wanem we oli bin mekem promes from? ?Long wanem wei nao bae oli gohed blong save abaot situesen we i gat denja—save evri taem, dei mo naet?
Wan Rimaenda long Ol Kavenan blong Olgeta
Olsem wan rimaenda, Hem i givim long tufala “ol klos wetem ol skin blong animol.” Hem i wan presen mo i folem stret taem. Afta we tufala i kaekae long frut ia we i no blong kakae, Adam mo Iv kwiktaem tufala i save se tufala i neked. Faswan, tufala i traem blong kavremap neked blong tufala wetem lif blong figtri. Mo afta, tufala i fraet se hemia i no inaf, tufala i traem blong haed long Lod. (!Kaen krangke wok olsem, i stap soemaot se ded i stat tekem ples blong hem long laef ia!) Stat long taem ia kasem naoia, wan Papa we i gat lav i invaetem ol pikinini blong Hem blong kam, kamaot long ples blong haed, i go long Hem. Mo olsem wetem ol klos wetem skin blong animol bifo, mo ol nara defren kaen klos blong taem ia, God long sore blong Hem i no bin lego yumi neked be i bin putum klos long olgeta we oli obei, wetem wan “klos blong stret mo gud fasin,” wan rimaenda blong ol promes mo kavenan blong yumi. “Ol gamen blong fasin blong sevem man” i saen blong bigfala presen we i bitim evri samting, Atonmen blong Jisas Kraes.
Gamen i wan Saen blong Sevya
Yes, evri tingting ia abaot Adam mo Iv mo ol kavenan mo klos oli no wan eksasaes blong maen nomo. Hem i no had blong tingting long maen olsem wanem Adam mo Iv i bin filim, from yumi tu yumi fesem ol trabol long wol ia we i foldaon i stap. Yumi tu yumi seperet aot long ples we God i stap long hem, mo yumi stap longwe moa evri taem we yumi brekem loa. Olsem Adam mo Iv, oli bin givim long yumi semmak Sevya ia nomo, Jisas Kraes blong Nasaret, Alfa mo Omega, Pikinini blong God we i stap laef. Olsem Adam mo Iv, yumi bin mekem ol kavenan wetem God. Mo, olsem pat blong tempol endaomen, oli bin givim long yumi wan tabu rimaenda blong kavenan blong yumi long saed blong bodi—wan simbol we i ripresentem Sevya Hemwan. Long taem blong yumi tedei, yumi singaotem gamen blong tabu prishud.
Yumi werem gamen ia andanit long ol nara klos blong yumi. I no mata wanem kaen responsabiliti mi gat, wanem kaen rol mi plei long laef, i no mata wanem kaen diuti we laef i nidim evri dei, andanit long evri samting ia ol kavenan blong mi i stap——oltaem mo blong oltaem. Andanit long evriwan ia, i gat ol tabu promes ia we mi wantem tumas blong holemtaet. Gamen i no blong soemaot bifo long wol, mo i semmak long ol kavenan blong mi. Be mi kipim tufala tugeta i stap kolosap long mi—kolosap long mi olsem we mi save mekem. Oli blong miwan mo oli tabu tumas.
Blong stap tingbaot ol kavenan ia, tufala wei blong promes ia, yumi werem gamen long ful laef blong yumi. Praktis ia i soem tingting blong hat blong yumi i gat long Sevya blong stap wan paoa oltaem long laef blong yumi. Ol nara simbol we yumi lavem tumas oli folem taem. Yumi kasem baptaes wantaem long laef blong yumi. Yumi tekem mo kakae long sakramen wantaem long wan wik. Yumi go long tempol folem ol situesen we i letem yumi blong go. Be gamen blong tabu prishud i defren: hemia i simbol we yumi givim ona long hem evri dei mo naet.
Mo ol kavenan oli olsem nao—oli no putum long saed from i no go stret wetem situesen blong yumi o from yumi no kea long hem, mo oli no jenisim blong i folem ol stael mo wei blong dresap blong sosaeti. Long laef blong wan disaepol blong Jisas Kraes, ol wei blong wol oli mas mekem i go stret wetem ol kavenan blong yumi, be i no long nara wei.
Taem yumi werem gamen, olsem ol Fas Presidensi i tijim, yumi stap putum long yumi wan tabu simbol blong Jisas Kraes. Hemia nao risen, from wanem yumi no mas mekem eskius blong tekemaot simbol ia. ?From wanem bae yumi no wantem yumi blong kasem long yumiwan promes blong paoa, proteksen mo sore we gamen i ripresentem? Long nara wei, taem yumi karemaot gamen blong sot taem nomo, yumi mas wantem tumas blong werem bak kwiktaem from yumi tingbaot tugeta ol promes mo jalenj we i gat mining long ol kavenan blong yumi. Antap long evri samting, yumi tingbaot kros mo emti ston blong gref blong Kraes.
Bae sam oli talem, “mi gat ol nara wei blong tingbaot Jisas.” Mo bae mi ansa, se hem i gud tumas. I moa gud blong gat plante wei blong tingbaot Hem. Letem yumi tingting long plante wei blong yumi save kipim komitmen blong yumi blong “oltaem tingbaot Hem.” Be taem yumi stap mekem olsem, bae i wan fasin blong stap giaman blong jusum blong no save yusum rimaenda we Lod Hemwan i givim long olgeta we oli kasem endaomen blong olgeta, gamen blong tabu Prishud.
Jisas Kraes mo gospel blong Hem i minim evri samting long mi. Evri hop blong mi we i no save finis mo evri samting we mi laekem tumas i hang long Hem. Hem i “ston blong fasin blong sevem man blong mi,” rod blong mi blong mi i go long Papa blong mi long Heven, wei ia nomo blong mi blong wanem we mi bin gat long wan taem mo naoia wantem blong gat bakegen, mo i gat plante moa. Presen blong Hem we i givim mo we mi kasem i moa bigwan—i pemaot mi wetem safaring we i no gat en, joenem long wan namba we i no gat en, i givim long mi wetem lav we i no gat en. Ol nil gras mo wael gras, ol soa mo harem nogud, sore mo sin blong wol ia we i foldaon i stap, evriwan “i lus long Kraes.”
Mi bin werem gamen blong tabu prishud—evri dei mo naet olsem we i stret stat long taem mi bin endao 64 yia i pas, taem mi gat 19 yia—from mi lavem Hem mo from mi nidim ol promes we i ripresentem.
?Ol Kwestin abaot Fasin blong Werem Gamen?
Sam long yufala bae oli ridim atikol ia mo hop se bae mi ansarem wan stret kwestin abaot gamen. Maet bae yu gat hop from wan “I tru, olsem ia nao Lod i talem”—o iven wan “I tru olsem ia nao wok man blong Hem i talem”—long wan topik we yu wantem tumas blong harem. Kwestin blong yu maet i gro aot long wan situesen blong yuwan we i go wetem wok, eksasaes, stap klin long bodi, long saed blong weta, fasin blong dresap, ol ples long haos o iven wan medikol kondisen.
Sam ansa long ol kaen kwestin ia yu save faenem long temples.ChurchofJesusChrist.org mo long seksen 38.5 blong Jeneral Hanbuk. Ol memba blong famli mo lida we yu gat tras long olgeta bae yu save askem olgeta abaot wan impoten samting olsem blong yuwan. I gat, daereksen we i klia oli givim long taem blong fas odinens, mo i gat oltaem mo oltaem Papa blong yu long Heven we i save yu mo lavem yu mo andastanem evri samting abaot ol situesen blong yu. Bae Hem i glad tumas blong harem yu askem ol kwestin ia long Hem.
Foto blong spae blong sent Joj Yuta Tempol
Plis no andastanem rong. Taem yu lukaotem tabu gaed, Spirit bae i no givim insperesen long yu blong mekem i smol bitim blong folem instraksen yu kasem insaed long tempol mo kaonsel blong profet we Fas Presidensi i bin serem long toktok blong olgeta we i jes pas. Wan Papa we i gat lav bae i no helpem yu akseptem blong mekem smol bitim we yu save mekem blong go wetem ol standet blong divosen mo modesti we bae i blesem yu naoia mo blong oltaem. Be ?Hem i andastanem ol kwestin blong yu, mo bae Hem i helpem yu kasem ol blesing blong stap respektem gamen mo kipim ol kavenan blong yu? !Yes! ?Bae yu nidim tu blong toktok wetem gud medikol mo ol helt profesonol taem i gat nid? !Yes! ?Bae yu no lisin long tru simpol save o lukluk i go ova long mak? Mi prea se bae yu no mekem.
Mi no save ansarem evri kwestin we yu gat. Mi no iven save ansarem evri kwestin we mi gat. Be mi save, olsem wan Aposol blong Lod Jisas Kraes, promesem yufala help blong wan God we i gat lav, we i lukaotem evri sakses blong yu mo blesing, long ol wei we yu no save andastanem naoia o luk, taem yu kipim ol kavenan we yu mekem wetem Hem.