“Buk blong Momon I Karem Pis I Kam Long Mi,” Liahona, Sept. 2024.
Ol Voes blong Ol Lata–dei Sent
Buk blong Momon I Karem Pis I Kam Long Mi
Mi kam blong andastanem se Buk blong Momon i bin wan gudfala buk we bae i save jenisim laef blong mi mo karem mi i go kolosap long Jisas Kraes.
Pikja i kam long Allen Garns
Long en blong 2013, tu yang man oli werem ol waet sot mo nektae oli stat blong visitim sista blong mi tu taem long wan wik. Mi save nomo se tufala i mas kam long wan jos. Mi, blong stap pat long wan jos i no plan blong mi, so mi disaed blong no toktok long tufala.
Wetem wanwan visit blong tufala, mi mekemsua mi no stap long haos taem tufala i kam. Be wan spesel samting i pulum tingting blong mi. Oltaem oli stap holem wan blu buk. Mi neva bin luk buk ia bifo, mo i luk lelebet defren long mi.
Wan dei insaed long salong, sista blong mi i stat blong talem long mi abaot buk ia. I no longtaem, tufala yang man ia i kam. Sore tumas, mi nomo save haed long tufala. Oli luk mifala wetem blu buk ia—Buk blong Momon—mo oli stat blong askem wanem nao mi save abaot Jisas Kraes.
Taem mi stat blong lisin long ol misinari long taem ia i go, mi sapraes olsem wanem oli konektem ol tijing blong olgeta wetem Buk blong Momon. Olsem wan risal, blu buk ia i nomo defren long mi.
Mi gat tu tingting yet abaot buk ia, be mi stat blong ridim. Mi kam blong andastanem se Buk blong Momon i no kam blong tekem ples blong Baebol be hem i blong jenisim laef blong mi mo tekem mi go moa kolosap long Jisas Kraes. Mi lanem se Buk blong Momon i lukluk nomo long Sevya. Ol tijing blong buk ia i helpem mi save huia Hem mo huia i Papa long Heven.
I no longtaem, Buk blong Momon i bin helpem mi kam wan gudfala man, wan tru disaepol blong Jisas Kraes. I bin helpem mi tu blong jenisim fasin blong mi taem mi stap fesem evri dei jalenj. Tru long eksperiens blong mi blong stadi long hem, mi save se i helpem ol pipol blong kam long Kraes mo laef folem gospel (luk long Moronae 10:32). I leftemap tingting blong yumi blong folem tijing blong Kraes mo folem ol tijing ia long evri dei laef blong yumi. I givim long yumi save ia se yumi ol pikinini boe mo gel blong God. I givim pis.
Afta sam wik we mi mitim ol misinari mo rid long Buk blong Momon, mi bin baptaes. Mi serem testemoni blong mi wetem ful hat blong mi se Buk blong Momon i tru mo se taem yu ridim i givim hop mo laet long taem blong tudak, i helpem yumi filim lav blong Lod mo proteksen blong Hem. Mi glad blong gat Buk blong Momon long laef blong mi.