Mifala i Testifae long Profet blong Mifala we i Stap Laef.

Tangkyu, Papa God, Yu givim Profet

Foto blong Presiden Russell M. Nelson

mi save se Presiden Russell M. Nelson i wan profet blong God, mo glad se God i stap toktok long hem. Lav blong Presiden Nelson long yumi i soem lav blong God long yumi. Mi lavem Presiden Nelson. Ol promes we hem i stap talem oli kam long God.

Justine Hinautan, Filipin

Ryan Hulme

Presiden Nelson i tijim mi se samting we i moa impoten tedei, hem i blong jusum Kraes taem yu lavem mo ona long olgeta kavenan.

Ryan Hulme, Niu Silan

Mi glad tumas from Profet, Presiden Russell M. Nelson. Mi talem testemoni blong mi se man ia, God i singaotem hem blong lidim ,o mekem yumi kam strong long ol las dei ia. Sapos yumi folem ol kaonsel blong hem, evri samting bae i oraet.

Nelson Almeida, Cabo Verde

Brenda Boyle

Tangkyu, Presiden Nelson, tangkyu ia i kamaot long ful hat blong mifala, from ol toktok blong waes we i kam long Papa long Heven. God i blesem yu, dia profet blong mifala!

Brenda Boyle, Scotland

Thuong Putheary

Tangkyu, Presiden Nelson, long ol tijing blong insperesen, mo blong leftemap tingting. Mifala i lavem yu.

Thuong Putheary, Kambodia

Mi glad from lav mo ol tingting we i kam long Presiden Nelson we hem i givim olsem profet. Ol toktok blong hem abaot tempol i pusum mi blong kasem endaomen blong miwan, ol divosen blong hem wetem ol yang adalt i rimaenem mi blong luksave huia mi stret olsem wan pikinini blong God, mo strong toktok blong hem blong karem Isrel i kam tugeta i wan long ol mein topik long medel blong famli mo wod komuniti blong mi. Wanem we i moa impoten, i we hem i helpem mi blong kam moa kolosap long Sevya blong mi.

Grace Burt, Yunaeted Stet

Ana Montoya

Mi tingting hevi long ol tijing blong profet blong yumi we yumi lavem tumas, Presiden Russell M. Nelson. Ol tijing blong hem i givim insperesen long laef blong mi. Ol toktok blong hem olsem wan profet i mekem mi blong mi wantem blong gogohed blong muv i go long fored mo blong stap laef folem gospel fulwan long wol ia we i fulap long raorao. Mi filim i sef blong save se yumi gat wan profet long dei blong yumi tedei we i toktok strong long yumi blong gat wan spirit blong pis, blong no lukaot raorao wetem ol fren blong yumi. Mi laekem ol gudfala tijing blong hem.

Ana Montoya, Honduras

David G. Fernandes

Mi gat wan strong testemoni se Presiden Russell M. Nelson i wan profet blong ol las dei ia. Mi gat janis blong witnesem tingting blong hem we i stap daon, hem i simpol, mo lav we hem i gat blong pipol. Yes, hem i man we oli jusum blong lidim kingdom blong God long wol ia long spesel taem ia. Mi bin lisin mo folem kaonsel blong hem, we i lidim mi blong laef long wan laef we i stret moa gud, mo fesem ol jalenj blong wol ia. Mi filim lav blong Presiden Nelson, mo mi save long bigfala kontribusen blong hem blong muvum wok blong kingdom blong God, mo karem Isrel i kam tugeta tru long ol insperesen blong hem, mo ol anaonsmen blong ol tempol konstraksen raon long wol.

David G. Fernandes, Brasil

Saúl Alfredo Rojas de León

Long 24 Ogis 2019, profet i toktok long Spanis mo givim long mifala instraksen blong gohed mo kipim olgeta komanmen blong Lod. Mi filim strong lav blong Jisas Kraes long traehad blong profet blong lanem lanwis blong mifala. Mi save se tru long profet we i stap laef, God i leftemap tingting, Hem i givim instraksen, Hem i givim proteksen, Hem i lidim mo blesem yumi.

Saúl Alfredo Rojas de León,