Ol Voes blong Ol Lata–dei Sent

God i Gat Samting We I Moa Gud blong Yumi

I Kam long Ronald Baa, Northern Mindanao, Philippines

Taem ol misinari oli tijim mi se mi mi pikinini blong God, mi save se Hem i gat moa blesing i stap blong famli blong mi mo mi.

Pikja i kam long man we i raetem stori ia

Mi groap long wan smol, vilej we i stap aotsaed long taon long Philippines. Famli blong mi oli pua. Long Philippines, taem yu no gat mane, yu no save go long skul. Nomata long problem ia, mi wan yangfala we i laekem tumas blong stadi had.

Mi talem long ol paren blong mi, mi wantem blong kam wan dokta o wan tija o save kam gud long wan samting, be oltaem oli talem long mi blong mi stop blong stap drim. Mifala i no gat mane blong mi go long wan yunivesiti. Ol paren blong mi oli wantem blong mi stap glad mo no stap filim se mi no stap mekem gud long laef blong mi.

“Blong skul gud from wan wok, i no blong mifala,” oli talem. Oli bilif se mifala i nomo nidim eni samting we i moa gud bitim wanem we mifala i gat finis i stap.

Be hemia i bin hapen bifo mifala i joenem Jos Ia blong Jisas Kraes blong Ol Lata-dei Sent.

Mifala i stap longwe long ol siti, be ol misinari oli faenem mifala mo oli gohed blong stap kambak. Oli mekem plante sakrifaes blong tijim famli blong mi, be oli jenisim laef blong mifala blong oltaem.

Taem mifala i joenem Jos, mi lanem se mi wan pikinini blong God wetem paoa ia blong gro mo lan mo kam wan samting (luk long Moses 1:39; “Famle: Wan Ofisol Toktok I Go long Wol,” Gospel Laebri). Wetem save blong gospel, mi save i taem blong leftemap famli blong mi long wea ples oli stap. Mifala i nomo ol pua pipol blong wan smol vilej—mifala i kam ol Pikinini boe mo gel blong God we oli klin inaf blong kasem ol blesing Hem i bin mekem promes from, long olgeta we oli fetful blong folem Hem.

Ol misinari oli karem gospel i kam long laef blong mi, gospel i karem miusik i kam long laef blong mi, mo miusik i givim skolasip long mi blong atendem yunivesiti. Mi kasem wan bajela digri long sekendri edukesen mo afta wan digri long miusik, mo stadi from kwaea kondakting. Naoia mi tijim miusik long Liceo de Cagayan Yunivesiti mo kondaktem Liceo U High School Glee Club. Mo tu, mi lidim wan kwaea blong ol memba blong Jos. Misin blong mifala i blong serem trutok blong God tru long miusik.

Graduet long yunivesiti i givim wan niu laef long mi. Mi no save bae mi stap wea tedei sapos mi no gat gospel blong Jisas Kraes.

Evriwan oli gat raet long janis ia blong lanem samting, olsem mi, mo oli gat wan Papa long Heven mo we Hem i blesem olgeta wetem paoa ia blong gro mo lanem samting, mo kam gud long wan samting.