?Olsem Wanem Nao Mi Save Rere blong Akseptem Sevya? Liahona,, Septemba 2024.
Kam Folem Mi
Hileman 10; 3 Nifae
?Olsem Wanem Nao Mi Save Rere blong Akseptem Sevya?
Hemia fo wei we yu save akseptem Sevya insaed long laef blong yu.
Ol Man blong Nifae oli nid blong mekem rere olgetawan blong akseptem Sevya wetem bodi long taem blong olgeta bifo. ?Wanem nao yumi save lanem aot long eksampol blong olgeta blong helpem yumi akseptem Sevya long laef blong yumi long saed blong spirit?
Tingting Hevi long Ol Samting blong God
Afta: Taem we profet Nifae i bin filim se hem i “harem nogud plante,” hem i tingting hevi “long ol samting we Lod i bin soem long hem.” (Hileman 10:2–3).
Naoia: Blong stap tingbaot wanem we God i bin mekem blong yumi, tugeta, long gud mo nogud taem, bae i givim paoa long yumi mo paoa long tingting blong stap kolosap long Hem mo fesem fiuja wetem fet.
Presiden Henry B. Eyring, Seken Kaonsela long Fas Presidensi i givim advaes se yumi tingtingbak evri dei mo raetemdaon ol tingting mo filing blong yumi. Hem i talem: “Maet yu prea mo tingting hevi, mo askem kwestin ia: ?God i sendem wan mesej we i blong miwan nomo? ?Mi mi luk han blong Hem long laef blong mi, o long laef blong ol pikinini blong mi?”
?Olsem wanem nao yu luk lav, insperesen, o ol blesing blong God long laef blong yu?
Tekem nem blong Jisas Kraes long yu.
Afta: we Momon i bin talemaot strong se hem i “wan disaepol blong Jisas Kraes” (3 Nifae 5:13).
Naoia: Elda Jonathan S. Schmitt blong olgeta Seventi i tokbaot se yumi save lukluk nomo long Jisas Kraes taem yumi tekem long yumi ol defren taetol blong Hem. Eksampol, Jisas i “semmak yestedei, tedei, mo blong oltaem” (1 Nifae 10:18). Elda Schmitt i tokbaot se yumi save tekem long yumi taetol ia taem yumi stap tru blong stap laef folem gospel.
?Wanem ol nara nem o taetol blong Jisas Kraes we yumi tingting long hem mo i wok long yuwan?
Letem Sevya i Karem Yu i Kam long Hem
Afta: Insaed long 3 Nifae 10:4–6, Jisas Kraes i komperem Hemwan long wan faol we i stap karem i kam tugeta ol pikinini faol blong hem´. Hemia i wan naesfala pikja long tingting from Hem i oltaem invaetem yumi blong kam long Hem blong Hem i save protektem mo fidim yumi. Be yumi mas jusum blong kam long Hem. Hem i talem, “Hamas taem bae mi bin karem yufala i kam olsem wan faol i karem ol pikinini blong hem, mo yufala i no wantem (ves 5).
Naoia: Jisas i gohed blong karem yumi i kam tugeta tedei, be yumi mas letem yumiwan i go long Hem. ?Yu yu stap letem yuwan blong kam long Sevya mo faenem proteksen wetem Hem, o yu yu stap sakemaot Hem mo stap go kolosap long denja?
?Wanem invitesen nao Sevya i givim long yu mo wanem nao yu nid blong mekem blong akseptem?
Lukluk i go long Heven
Afta: I tekem tri taem blong Ol Man blong Nifae oli harem voes blong God. “Nambatri taem oli harem voes ia, mo oli openem ol sora blong olgeta blong harem hem; mo oli tanem ol ae blong olgeta blong lukluk i go long ples we saon ia i stap kam long hem; mo oli lukluk gud i go long heven” (3 Nifae 11:5).
Naoia: Wan wei we yumi save “lukluk gud i go long heven” i blong, “tingting selestial” insaed long toktok blong Presiden Russell M. Nelson, Hem i eksplenem wan long ol wei blong tingting selestial i “blong gat tingting we i folem fasin blong spirit,”
?Wanem nao yu save mekem blong gat moa tingting we i folem spirit mo “lukluk gud i go long heven”?