“?Olsem Wanem Nao Mi Save Mekem Testemoni blong Mi long Profet i kam Strong?,” Liahona, Septemba 2024.
Kam Folem Mi
?Olsem Wanem Nao Mi Save Mekem Testemoni blong Mi long Profet i kam Strong?
Jeneral konfrens i save help blong mekem ol testemoni blong yumi long ol profet we i stap laef i kam strong.
Long buk blong Hileman, profet Samuel man blong Leman i testifae abaot Jisas Kraes mo i givim ol woning mo ol invitesen i go long ol man blong Nifae (luk long Hileman 13–14). Long dei blong yumi tedei yumi gat janis blong lisin long ol woning blong taem tedei we i kam long ol profet mo ol narafala lida blong Jos. Blong stap folem ol toktok blong olgeta i helpem yumi blong folem kavenan rod.
Jeneral konfrens i wan stret janis blong harem ol toktok we i jes kamaot tru long ol lida we oli givim insperesen mo tekem yumi i go moa kolosap long Jisas Kraes. Hemia sam wei we yu save tingting long hem blong stap yusum jeneral konfrens blong mekem testemoni blong yu i kam moa strong long ol profet we i stap laef.
-
Bifo jeneral konfrens, prea mo tingting hevi from wanem blong gat wan profet i impoten long yu. Tingting blong stap prea blong kasem stret ansa we i kam long Spirit se Presiden blong Jos ia naoia i profet blong God, sia, mo reveleta blong wol tedei. “Blong save tru long revelesen se i gat wan profet we i stap laef long wol, i jenisim evri samting.
-
Lukaotem wanem i minim blong sapotem mo sastenem profet mo ol Jeneral Atoriti. Long Satedei aftenun sesen, tekpat blong sastenem olgeta long ol koling blong olgeta.
Pikjaman long Konfrens Senta i leftemap raet han blong mekem sastening vot -
“Tru long paoa blong Tabu Spirit, yufala i save gat save long saed blong trutok blong evri samting” (Moronae 10:5 Taem yu stap lisin long ol mesej we i kam long ol Jos lida, lisin gud long Spirit we i testifae se ol toktok blong olgeta i tru.
-
Impoten rol blong wan profet i blong testifae abaot Jisas Kraes mo tijim yumi blong “lukluk long Pikinini blong God wetem fet” (luk long Hileman 8:13–16). Yu save raetem daon wanem profet mo ol narafala spika i tijim abaot Sevya.
-
“Tru long [Presiden Russell M. Nelson], yumi bin kasem plante invitesen mo hem i bin promesem yumi ol gudgudfala blesing sapos yumi putum Sevya i faswan long laef blong yumi.” Tingting blong mekem wan lis blong ol invitesen long taem blong konfrens we ol spika mo profet oli askem yumi blong mekem. Luklukbak long lis ia blong helpem yu traehad blong kam moa olsem Kraes.
-
Tingbaot invitesen blong Presiden Nelson: “Mi askem strong long yufala blong stadi long ol mesej blong konfrens ia plante taem—iven we yufala i ripripitim—long ol nekis sikis manis.” Taem yu stap lisin o ridim ol mesej ia bakegen, makem ol samting we i pulum intres blong yu.
-
Presiden Nelson i invaetem yumi blong “lukaotem mo wet from ol merikel.” Taem yu lisin long ol kaonsel blong profet mo mekem ol jenis long laef blong yu, luksave ol blesing we yu kasem mo ol merikel we yu stap luk (luk long Hileman 16:4–5).
Taem yu folem ol step ia blong mekem testemoni blong yu i kam antap long saed blong wan profet, sia, mo reveleta, yusum fet blong yu blong kam kolosap long Jisas Kraes mo wan Papa long Heven we i gat lav. God i lavem yumi tumas mo i givim yumi ol profet blong gaedem yumi i gobak long Hem—ol profet we oli wok olsem wokman blong Hem blong talemaot tingting blong Hem i go long wol. (luk long Doktrin mo Ol Kavenan 1:38; 21:5–6.) Sapos yumi jusum blong folem kaonsel blong ol wokman blong Hem, yumi jusum blong folem Hem.