Russell M. Nelson: Wan Profet blong Dei blong Yumi Tedei

I kam long Presiden Dallin H. Oaks

Fas Kaonsela long Fas Presidensi

Wetem wan profet blong lidim yumi long ol lata-dei ia, yumi ol pipol we oli blesem yumi.

Presiden Russell M. Nelson i stap talem halo long ol pipol afta long wan divosen long Singapo long 20 Novemba 2019.

Taem wan man blong intaviu i talem nogud Jos Ia blong Jisas blong Ol Lata Dei Sent olsem “wan jos we ol olfala man nao i lidim,” Presiden Gordon B. Hinckley (1910–2008) i ansa, “?I no naes blong gat wan man we i olfala i stap long fored, wan man blong jajmen we tingting blong hem i no folem evri win blong doktrin?”

Presiden Russell M. Nelson, i profet we i olfala bitim evriwan we i stap laef blong givim seves long dispensesen ia, i wan man olsem. Bae hem i kasem 100 yia blong hem long 9 Septemba 2024. Hem i wan gudfala lida we i gat sore mo mekem fren, gat visen mo mekem ples i laef, hem i gat kaen fasin mo save.

Mi lavem Presiden Nelson. Mitufala i bin gudfala fren blong 60 yia mo wok tugeta olsem Aposol blong 40 yia. Stat long Jenuware 2018, mi gat blesing ia blong givim seves anda long daereksen blong Fas Presidensi blong Jos.

Oli singaotem hem blong i lidim Jos Ia blong Jisas Kraes we i kambak, mo stap olsem mein tija, Presiden Nelson i save Sevya, hem i profet blong Hem. Long wan handred yia blong hem blong stap laef mo stap lan, hem i kam antap gud long profesonol mo givim seves long militeri. Wetem bigfala famli blong hem, hem i wan gudfala famli lida we i fulap long lav. Tru long ol Jos koling, wetem hemia long ol pas sikis yia we hem i bin stap olsem profet ia blong Lod, hem i bin wan gudfala eksampol blong lida insaed long Jos blong Lod we i kambak.

Tru long 100 yia blong stap laef, Presiden Nelson i bin lanem mo praktisim ol ki blong hapines long laef ia, mo long laef we bae i kam—wanem we hem i bin singaotem “ol moa impoten lesen blong laef.”

Olsem we hem i bin tijim yumi se yumi sud “stat wetem wan en long maen.”

Hem i lavem haos blong Lod. Long taem blong hem olsem Presiden blong Jos, hem i bin anaonsem 153 niu tempol—abaot haf blong 335 tempol evriwan we oli bin bildim, oli stap bildim naoia, o oli bin anaonsem long dispensesen ia.

Hem i tijim yumi se evri tempol bilding blong yumi oli stap karem tempol i kam, mo ol blesing blong ol tempol kavenan, i kolosap moa long ol pikinini blong God. Hemia i plan blong God.

Presiden Nelson i tijim, “Mi bin lanem se plan blong Papa long Heven blong yumi i gud tumasmekem se wanem we yumi mekem long laef ia hem i impoten, mo we Atonmen blong Sevya i wanem we i mekem se plan blong Papa blong yumi i save hapen.” Blong andastanem gudfala plan blong God, hem i talem se “i karemaot ol samting we i sikret long laef mo ol samting we yumi no sua long hem aot long fiuja blong yumi. Hem i letem yumi blong jusum hao bae yumi laef long wol ia mo wea bae yumi laef foreva.”

Olsem ol Lata‑dei Sent, yumi ol pipol we yumi kasem blesing ia we wokman ia blong Lod, we i gat tingting i stap daon i lidim yumi, Presiden Nelson, we i dediketem hemwan blong rere long wol from Seken Kaming blong Sevya mo Ridima blong yumi, Jisas Kraes. Bae yumi gohed blong prea from, testifae from, sastenem, mo talem tangkyu long God from profet blong yumi—Presiden Russell Marion Nelson.

Insaed ol moa impoten tijing blong Presiden Nelson i gat olgeta samting ia:

Hem i talem strong long yumi blong yusum stret nem blong Jos Ia blong Jisas blong Ol Lata Dei Sent .

Hem i givim kaonsel long yumi blong letem God i win long ol laef blong yumi.

Hem i leftemap tingting blong yumi blong “tingting selestial.”

Hem i tijim yumi blong gat wan bigfala lukluk blong karem Isrel i kam tugeta long tugeta saed blong vel.

Hem i givim long yumi insperesen blong yumi muv i go fored long kavenan rod, mo wetem lav i invaetem yumi blong gobak long rod sapos yumi mestem rod.

Hem i askem strong long ol Jos memba evri ples blong folem hom‑senta, paten ia, we Jos‑i sapotem blong lanem gospel.

Ol Not

1. Gordon B. Hinckley, insaed long David A. Bednar, “Chosen to Bear Testimony of My Name,” Liahona, Novemba 2015, 31.

2. Russell M. Nelson, “!Tingting Selestial!,” Liahona,Nov. 2023 117.

3. Russell M. Nelson, “Taem Yumi Stap Go Fored Tugeta,” Liahona,Epril 2018, 7.

4. Luk long Russell M. Nelson, “Lukluk Nomo long Tempol,” Liahona, Nov. 2022

5. Russell M. Nelson, “!Tingting Selestial!,” 117.

6. Luk long Russell M. Nelson, “Stret Nem blong Jos,” Liahona, Nov 2018, 87–89.

7. Luk long Russell M. Nelson, “Letem God I Win,” LiahonaNovemba 2020, 92–95. .

8. Russell M. Nelson, “!Tingting Selestial!,” Liahona,Nov. 117 20.

9. Luk long Russell M. Nelson, “Sisters’ Participation in the Gathering of Israel,” Liahona, Nov. 2018, 68–70; see also Russell M. Nelson and Wendy W. Nelson, “Hope of Israel” (worldwide youth devotional, June 3, 2018), Gospel Library.

10. Luk long Russell M. Nelson, “Kam Folem Mi,” Liahona, Mei 2019, 91; luk tu long Russell M. Nelson, “As We Go Forward Togetherl,” Liahona, Nov. 2016, 82–84.

11. Luk long Russell M. Nelson, “Ol Fas Toktok,” Liahona,, Nov 2018, 6–8.