“Gudfala Samting We Gospel I Karem I Kam long Mi,” Liahona, Sept. 2024.
Ol Voes blong Ol Lata–dei Sent
Gudfala Samting We Gospel I Karem I Kam long Mi
From ol pipol we oli stap long jos, mi bin filim Tabu Spirit.
Taem mi stap groap, hiro blong mi i apu man blong mi long saed blong mama, acheii, blong mi. Hem i strong long saed blong fet blong hem. Mi bin go long plante defren jos wetem hem, be relijin i no wan samting we mi intres long hem.
Taem mi mitim Gina, we i kam waef blong mi, hem i bin wan fetful memba blong Jos Ia blong Jisas Kraes blong Ol Lata-dei Sent. Hem i wantem mi blong lanem abaot Jos ia blong bae mitufala i save mared insaed long tempol. Be mi no wantem hemia. Mi no man blong relijin.
I hapen se mitufala i bin kasem sivil mared. Afta we mitufala i gat wan pikinini, mi gohed blong nogat intres long Jos ia, be Gina i gohed blong stap atendem.
Long en, mi kam blong disaed se bae mi pruvum se jos blong hem i rong, mo bae mi stap go long ol nara jos. Hemia i bin stap gogohed blong samfala yia, be nomata wea ples mi go mi no filim kamfot.
Afta, long wan Sandei taem Gina i stap rere smol gel blong mitufala blong go long jos, mi stat blong dresap tu blong go long jos. Hem i luk long mi mo askem, “?Yu stap mekem wanem?” Mi ansa, “Mi stap kam long jos wetem yu.” Hem i luk smol gel blong mitufala mo talem, “!Yu rere hariap! !Yumi no wantem hem blong i jenisim maen blong hem!”
Mifala i bin go. From se mi filim Tabu Spirit tru long ol pipol blong jos, oli kam impoten blong jenisim laef blong mi. Afta long hemia, ol misinari oli kam long hom blong mifala. Oli naes tumas, ol tijing we oli serem oli naes tumas long mi, mo Spirit i fulumap hat blong mi (luk long Moronae 10:4–5).
Taem mi visitim apuman blong mi blong talem long hem wanem mi bin faenem, hem i no bin hapi. Be mi bin save se mi mas folem hat blong mi.
Mi bin joenem Jos, mo smol taem afta Gina mo mi i sil long tempol. Gel blong mitufala i sil long mitufala, mo naoia mitufala i gat tri moa pikinini we oli bin bon long kavenan.
I bin tekem 10 yia blong acheii blong mi i kam blong respektem wanem yumi bilivim long Jos. Long graduesen blong boe blong mi long hae skul, Hem i talem long evriwan long Navajo, “mi glad long famli ia. Mi sapotem wanem oli bilivim. Ol pikinini blong olgeta oli rili save olsem wanem blong prea.”
Mi wan nomo mi memba blong Jos long nara famli blong mi, be mi save oli akseptem se fasin ia blong jenisim laef blong mi i wan gudfala samting, mo oli luk gudfala samting we gospel i karem i kam long waef blong mi, ol pikinini blong mitufala, mo mi.