“Spirit I Bin Mekem Gud Wanem We I Stap,” Liahona, Sept. 2024.
Ol Voes blong Ol Lata–dei Sent
Spirit I Bin Mekem Gud Wanem We I Stap
Mi save filim lav blong ol memba blong wod taem oli singsing nomo olsem, mo mi no plei long ogan.
Pikja i kam long Katy Dockrill
Mifala i stap long wan smol taon long Georgia, USA, taem papa blong mi i ded long 55 yia blong hem nomo. Plante long ol famli blong mifala oli stap long narafala stet. I filim olsem 3,200 km (2,000 mael) we i seperetem mifala i bigwan tumas long taem ia.
Hasban blong mi i bin bisop mo mi plei ogan blong smol wod blong mifala. Wetem evri filing blong sore mo wari blong mekem ol plan blong fenerol, mi filim lelebet taet long Sandei ia, taem mifala i singsing long las hym blong sakramen miting blong mifala: “God i Stap Wetem Yumi Oltaem” (Singsing Tabu Mo Singsing blong Pikinini, no. 40).
Taem mifala i singsing namba tu ves kasem medel, filing blong sore i winim mi. I bin hapen se mi bin plei kasem en blong ves ia, be han blong mi i seksek mo ol ae blong mi i fulap wetem wota blong ae mekem se mi mas stop truaot long wan ful ves. Mi no save stop blong stap krae.
Wan smol stop i bin tekem ples blong smol taem nomo, taem ol memba oli harem save se ogan i stop. Be afta, ol memba blong wod oli stat blong singsing akapela (voes nomo, nogat miusik tul). Singsing i no stret gud tumas. From mifala smol nomo. Be Spirit i bin mekem gud wanem we i stap. Nomata we mi stap krae mo harem nogud long wanem we i stap, mi save filim lav blong plante we oli bin singsing.
God i stap wetem yumi oltaem;
Lav blong Hem i kavremap yu;
Sakem saen blong ded aot long yu.
Kasem taem yumi mit bakegen.
Taem we hym ia i finis, hym kondakta i holem taet mi taem mi stap krae bigwan mo las prea i stap gohed. Sam pipol oli kam long ples blong ogan wetem wota blong ae long ae blong olgeta mo talem hamas oli sore long papa blong mi.
Smol taem afta, mi talem long hym kondakta se bae mi plei piano long fenerol. Maet i no wan gudfala tingting afta long wanem we i bin hapen, be papa blong mi i glad blong harem mi plei piano. Mi wantem blong plei blong hem. Mi kam blong haremsave hamas papa i bin filim long taem blong las hym ia.
Mi talem tangkyu bigwan from ol hym. Mi testifae se miusik i save tijim yumi mo givim kamfot long yumi long ol wei we oltaem ol toktok i no save mekem. Olsem olgeta long Fas Presidensi oli raetem long fas pej blong hymbuk, “Ol hym … oli givim kamfot long olgeta we oli taet, kamfotem olgeta we oli krae, mo i givim insperesen long yumi blong stanap strong kasem en.” Mi glad tumas tu long lav blong wan gudfala wod taem mi stap longwe long famli blong mi. Mi save se papa mo mi bae i mas mit bakegen.