“Stap Faenem Rilif long Kavenan Rilesensip blong Yumi wetem God, Liahona,” Liahona, Septemba 2024.
Stap Faenem Rilif long Kavenan Rilesensip blong Yumi wetem God
Jisas Kraes, stamba blong klin lav, hiling, hapines mo rilif.
Oli karemaot smol pat ia long Hem I Kam Bakegen blong Hem I Rul mo Kam King, i kam long Mary R. Sauer
Blong stap faenem rilif tru long long kavenan rilesensip blong yumi wetem God i bin stap long maen mo hat blong mi blong sam taem. Olsem profet blong Lod i bin tijim mo askem strong long yumi blong lanem abaot ol kavenan, tempol mo prishud paoa, mi faenem miwan mi stap lukaotem, lavem, mo stap kakae gud long ol trutok we oli laef mo oli impoten insaed long ol kavenan.
Yumi sapos blong patna wetem Lod long wan wei i gat paoa tru long ol kavenan blong yumi. Hem i wantem tumas blong stap wetem yumi long ol wari mo desisen blong yumi. Yumi no nid blong go tru ol jalenj, sore, ples we i no sef, mo ol harem nogud blong laef yumiwan. Bae Hem i stap long saed blong yumi. Hem i talem: “Mi no save lego yufala i stap nomo olsem. Bambae mi mi save kambak bakegen long yufala.” (Jon 14:18
Presiden Russell M. Nelson i bin tokbaot fasin blong God mo bigfala lav blong Hem long yumi taem hem i talem se, “Kavenan rod hem i evri samting abaot rilesensip blong yumi wetem God.” Hem i talem: “Taem yu mo mi i mekem wan kavenan wetem God, rilesensip blong yumitu wetem Hem i kam moa kolosap bitim taem we no bin mekem kavenan yet wetem Hem bifo. Naoia oli fasem yumi tugeta. From kavenan we yumi mekem wetem God, Hem bae i neva taed long ol traehad blong Hem blong helpem yumi, mo bae yumi neva stopem ol sore mo longfala tingting blong Hem we hem i gat long yumi. Wan wan long yumi i gat wan spesel ples insaed long hat blong God. Hem i gat bigfala hop long yumi.”
Bigfala Stamba blong Pis blong Mi
Olsem wan sista we i no mared yet, rilesensip ia we i gat lav mo sore wetem Papa long Heven mo Sevya i gat wan paoa long laef blong mi mo i bin wan bigfala stamba blong rilif mo pis blong mi. I nomata long taetol blong mared o bakgraon blong yumi, Lod i wantem yumi blong patna wetem Hem long wan wei we i gat paoa—blong kam “wan” (3 Nifae 19:23) wetem Hem long “evri wok blong [yumi]” (Alma 37:37). Taem yumi krae i go long Lod from sapot mo “letem ol filing blong hat blong [yumi] i stap long Lod blong oltaem” (Alma 37:36; oli ademap long italik), laef blong yumi i save fulap long naesfala kavenan rilesensip ia.
Tru long Sevya, Jisas Kraes, yumi save kasem rilif aot long wokbaot blong ol jalenj blong yumiwan.
Yumi evriwan i gat ol wari mo nid we yumi save filim yumiwan. Hem i kea abaot ol wari blong yumi i nomata i smol o bigwan olsem wanem. Mi bin filim nid ia blong gat help blong Hem taem mi stap wari abaot ol samting we oli smol olsem wan fren blong oltaem we mi singaotem “wan blong mekem gud haos” Taem i nogat wan patna blong askem kaonsel wetem, mi save wari miwan abaot kontrakta we i stret, praes we i gud, gat taem ia aot long wok blong stap long hom, mo blong stap wan wokman ova long ol faenens mo hom blong mi. !Hem i wan win long nara dei blong karem doa blong garaj blong mi we oli fiksim finis! Lod i bin harem ol wari blong mi. Mo nomata i smol long impoten plan blong ol samting, Hem i ansarem prea blong mi. ?Olsem wanem? Tru long wan neba we i kaen, help blong Spirit, mo wan vidio long Yutub, mi bin kasem blesing ia blong save wanem blong mekem blong fiksim doa.
Sapos Lod i luk long ol smol nid, gat pikja long maen, Hem i wantem blong blesem mo helpem yumi long hevi impoten samting blong hat mo sol, we oli no smol long namba: abius, adiksen, ol famli rilesensip we i had, ded o no glad, gogohed blong sik long tingting mo ol jalenj blong helt long bodi, hadtaem long saed blong faenens, oltaem wari olsem wan papa mo mama, oltaem wari blong lukaot gud long wan papa mo mama, ol hadtaem wetem fet blong yuwan, wan pikinini o waef o hasban we i jusum blong no tekpat long gospel.
Long taem blong ol strong mo wik samting blong laef, mi bin dipen bigwan mo stap holem taet gud rilesensip kavenan blong mi wetem God. Taem mi gat tras long kea blong Hem we i gat lav mo traem bes blong mi blong konsekretem laef blong mi long Hem, Hem i bin givim rilif tru long prishud paoa blong Hem mo i Hem i bin Man blong Givim ol nid blong mi long saed blong spirit mo laef ia. Hem i givim rilif aot long fraet, rilif aot long taem we yu no filim sef, rilif aot long hae tingting, rilif aot long sin, rilif aot long taem blong yuwan, mo rilif aot long sore.
Presiden Nelson i tijim wetem klia mo toktok blong givim hop se, “presen blong kipim kavenan wetem God hem i paoa blong heven—paoa we i mekem yumi strong blong winim ol hadtaem blong yumi, ol temtesen, mo mekem harem nogud i kam moa gud.”
Tru long Jisas Kraes, yumi save kasem rilif long ol wokbaot blong ol jalenj blong yumiwan long laef ia.
Sista Yee wetem tu sista long Maekronesea we oli stap lukaotem ol pikinini we ol papa mo mama blong olgeta oli lego olgeta. Mi gat spesel janis ia blong travel i go long ol smol aelan blong Chuuk long Micronesia, samples 2,400 kilo mita, long saot is blong Japan.
Ol Sista “long ol aelan blong solwota”
Taem mi stap tingting long ol blesing blong kavenan we yumi fasem wetem God, mi tingting abaot asaenmen blong mi blong visit long Esia Not Eria.
Mi gat spesel janis ia blong travel i go long ol smol aelan blong Chuuk long Micronesia, samples 2,400 kilomita, long saot is blong Japan. Tu sista long Weno, Chuuk, i givim laef blong tufala blong lukaotem ol pikinini we ol papa mo mama blong olgeta oli lego olgeta nomo olsem. Tufala sista ia i filim se i impoten blong lukaotem mo tijim ol pikinini ia insaed long gospel. Wan long tufala sista ia i singgel mo i stap wok fultaem olsem wan skul kaonsela.
Mi serem wetem olgeta mesej blong Presiden Nelson i go long ol sista blong Jos, we hem i oli lavem yufala, nidim yufala mo yufala i gat valiu.
Wan naesfala sista we i stap lukaotem ol nis mo nefiu blong hem i krae bigwan samtaem i pas mo talem se hem i no filim se hem i gat valiu; hem filim olsem se oli fogetem hem. Be hem i testifae se hem i filim lav blong God mo luksave hem tru long ol toktok blong profet se i tru hem i “gat valiu” mo hem i save se hemia i tru. Hem i filim hiling blong lav blong God; hem i filim rilif.
Lod i talem, ?Yufala i no save se mi, Lod, God blong yufala, i bin mekem evri man, mo we mi tingbaot olgeta we oli stap long ol aelan blong solwota? (2 Nifae 29:7)
Ol sista ia Papa blong olgeta long Heven mo Sevya i save olgeta. Oli no stap olgetawan. Lod i bin sendem mi long wan had wokbaot blong 13,000 kilo mita long tren, trak, mo bot blong karem lav mo rilif blong God i go long “wan ia” long ol aelan blong solwota. Mo semmak long yu mo mi long ol tes mo jalenj blong yumi. Lod i bin sendem mi long wan had wokbaot blong 13,000 kilo mita long tren, trak, mo bot blong karem lav mo rilif blong God i go long “wan ia” long ol aelan blong solwota. Mo bae Hem i faenem yu mo mi long ol aelan blong yumiwan, ples we yumi maet filim se yumi stap yumiwan long ol wari mo hevi samting we yumi stap karem insaed long hat blong yumi. Hem i stap mo rere blong blesem, lidim mo givim kamfot long yumi.
“Mi Save Kam long Yu.”
Presiden Gordon B. Hinckley (1910–2008) wantaem i tokbaot eksperiens blong wan yang divos “mama blong seven pikinini we oli gat ej blong 7 i go kasem 16. Hem i talem se wan naet hem i krosem rod blong givim wan samting long neba.” Hemia i ol toktok blong hem taem hem i tingbaot olgeta:
“Taem mi tanem mi blong gobak long hom, mi save luk haos blong mi i laet i stap saen. Mi save harem noes blong ol pikinini blong mi taem mi stap wokbaot aot long doa sam minit i jes pas. Oli stap talem: ‘?Mama, bae yumi gat wanem blong dina?’ ‘?Yu save tekem mi i go long laebri?’ ‘Mi mas karem sam posta pepa long naet ia.’ Wetem taet mo wari, mi lukluk long haos ia mo luk laet long insaed blong wanwan rum. Mi tingting long evri pikinini ia we oli stap long hom oli stap wet long mi blong kam mo mekem ol nid blong olgeta. Mi filim se harem nogud blong mi i moa hevi long wanem we mi save tekem.
“Mi tingbaot we wetem wota blong ae mi stap lukluk i go long skae, mo talem, ‘Dia Papa, mi no save mekem nomo long naet ia. Mi taet tumas. Mi no save mekem. Mi no save go bak long hom mo tekem kea long evri pikinini ia miwan. ?Mi save kam long Yu mo stap wetem Yu blong wan naet nomo? …’
“Mi no bin harem ol toktok blong wan ansa, be harem olgeta long maen blong mi. Ansa hem i: ‘No, smol wan, yu no save kam long mi naoia. … Be mi save kam long yu.’”
“Mi Save Kam long Yu.” Hem i kam long hem, mo bae Hem i kam long yu mo mi, semmak olsem Sevya i kam long woman long wel, ples we hem i traehad mo wok truaot long ol dei blong hem (luk long Jon 4:3–42). Hem i leftemap tingting blong hem, tijim hem, talemaot wok blong Hem olsem Mesaea long hem mo lavem hem taem we maet hem i no lavem hemwan. Long woman long wel, i go long woman blong seven pikinini, i go long yu mo mi, Jisas Kraes i stanap redi blong givim rilif. Mi testifae se yumi save kasem rilif tru long kavenan we yumi fasem wetem God.
Maet olsem mi, yu bin askem help blong no stap yuwan long sam long ol taem we yu filim sore, ol taem blong hadtaem long saed blong laef mo spirit long laef blong yu. Ol bigfala sesen blong gro oli bin finis long wanem mi singaotem “ol stret mak long saed blong spirit” insaed long sol. Be mi talem witnes blong mi se Hem i bin karem mi mo bae Hem i karem yu. Hem i bin raetem yu long skin blong insaedhan blong han blong Hem (luk long Aesea 49:16; 1 Nifae 21:16). Hem i bin stap long ples ia olsem we yu bin stap lukaotem “blong kam stret long tudak.” Hem i no lego mi, mo bae Hem i no lego yu. Mo bae mi lavem Hem blong oltaem from hemia.
Ol dia sista mo brata, stamba blong klin lav, hiling, hapines mo rilif yu save faenem long Jisas Kraes. Mi testifae se Jisas Kraes i rilif.
Hem i wantem tumas blong kea long yu, blong blesem mo fogivim yu. Hem i kam from stamba tingting ia nao, blong givim yu wetem plante rilif we yu nidim we yu stap lukaotem. Hem i Ridima blong wol mo mi testifae se Hem i laef mo se Hem i lavem yu.
I kam long wan Brigham Young University Women’s Conference address delivered long Mei 3, 2023.