Plante Yia we Hem i Dediketem Hem long Seves: Sam long Ol Tijing blong Presiden Russell M. Nelson We Oli Jusum

Naoia we hem i gat 100 yia, Presiden Nelson i givim 40 yia seves olsem wan Aposol. Sam long ol samting ia ol tijing blong hem taem hem i stap olsem Presiden blong Jos.

Stat wetem En long maen.

“En ia, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli, blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan we i kam long God—we i laef we i no save finis. Ol odinens blong tempol mo ol kavenan we yufala i mekem insaed ia, oli ki blong mekem laef, mared, mo famli i gat moa paoa, mo oli ki blong mekem se yu gat paoa blong stanap fesem mo no foldaon long ol agens blong enemi. Wosip blong yufala insaed long tempol mo seves blong yufala long ples ia blong ol bubu blong yufala, bambae oli blesem yufala long wei ia we bae yufala i kasem moa revelesen blong yufalawan, bae yufala i kasem moa pis, mo bae i mekem yufala i moa strong blong wok blong stap long rod ia blong kavenan.

“Taem Yumi Stap Go Fored Tugeta,” Liahona,Epril 2018, 7.

Sakem sin Evri dei.

“Blong save progres, i no gat wan samting we i mekem yumi moa fri, gat moa gud fasin, o i moa impoten bitim blong stap lukluk evri dei long fasin blong sakem sin. Blong sakem sin, i wan wan spesel taem; hem i wan rod blong folem. Hem i ki blong hapines mo pis long maen. Taem yumi yusum wetem fet, fasin blong sakem sin i openem doa blong yumi kasem paoa blong Atonmen blong Jisas Kraes.”

“Yumi Save Mekem Gud Moa mo Stap Gud Moa,” Liahona, Mei 2019, 67

Mekem mo Kipim Ol Kavenan

“Evri woman mo evri man, we oli mekem ol kavenan wetem God mo i stap kipim ol kavenan ia, mo i stap klin inaf blong tekpat long ol prishud odinens ia, oli save go stret blong kasem paoa blong God. Olgeta we oli bin endao insaed long haos blong Lod, oli kasem presen ia we i prishud paoa blong God tru long paoa blong kavenan blong olgeta, wetem wan presen ia blong save hao blong yusum paoa ia.”

Paoa long Saed blong Spirit,” Liahona,, Nov. 2019, 77.

Harem Lod

“Papa blong yumi long Heven i save se, taem tingting blong no sua long wan samting mo fraet i raonem yumi, wanem we bae i helpem yumi aot bigwan, hem i blong harem Pikinini blong Hem.

“From se taem yumi wantem blong harem—yumi harem tru—nao Pikinini blong Hem, bae Hem i soem long yumi wanem blong mekem long eni situesen.”

“Lisin Gud long Hem,” Liahona, Mei 2020, 89.

Jusum blong Letem God i Win

“Wetem Hibru mining blong Isrel long maen, kam tugeta blong Isrel i tekem wan niu mining. Lod i stap mekem olgeta we oli wantem letem God i win long laef blong olgeta, oli kam tugeta wanples. Lod i stap mekem olgeta we oli wantem letem God i paoa ia we i strong moa long laef blong olgeta, oli kam tugeta wanples.”

“Letem God I Win,” Liahona, Nov. 2020, 92.

Winim Wol

“Blong winim wol i no wan samting we i tekem ples long wan dei o tu(2). Hemia i hapen truaot long laef taem yumi stap ripitim blong laef folem doktrin blong Kraes. Yumi mekem fet blong yumi long Jisas Kraes i gro taem yumi sakem sin evri dei mo kipim ol kavenan we i kavremap yumi wetem paoa. Yumi stap long rod blong kavenan mo yumi kasem blesing blong paoa long saed blong spirit, revelesen blong yumiwan, fet we i gro i kam antap, mo givhan blong ol enjel. Blong stap laef folem doktrin blong Kraes i save givim yumi wan wei blong laef we i moa klin,i krietem paoa blong faea blong spirit long laef blong yumi.”

“Winim Wol ia mo Faenem Pis,” Liahona, Nov. 2022, 97.

Jusum blong Stap Man blong Putum Pis

“Fasin blong raorao i ronemaot Spirit—evri taem. Fasin blong raorao i givim rong tingting ia se fasin blong fesem man wetem kros i wei ia nao blong stretem ol samting; be i neva tru. Fasin blong rao i wan joes. Blong putum pis i wan joes. Yu gat ejensi blong jusum fasin blong raorao o fasin blong stretem ol samting. Mi askem yu blong jusum blong stap wan man blong putum pis, naoia mo oltaem.”

“I Nidim Ol Man Blong Putum Pis,” Liahona, Mei 2023, 100.

Tingting Selestial

“Taem yu mekem ol joes, mi invaetem yu blong tekem wan longfala lukluk—wan lukluk we i no save finis. Putum Jisas Kraes fastaem, from laef blong yu we i no save finis i dipen long fet blong yu long Hem mo long Atonmen blong Hem. I dipen tu long fasin blong yu blong stap obei long ol loa blong Hem. Fasin blong stap obei i stap olsem wei ia nao blong gat wan hapi laef tedei mo wan bigfala presen we i no save finis tumoro.”

“!Tingting Selestial!,” Liahona, Nov. 2023, 118.