“Wan Naesfala Filing blong Kriesen long Saed blong Spirit,” Liahona, Septemba 2024.
Ol Pikja blong Fet
Wan Naesfala Filing blong Kriesen long Saed blong Spirit
Atonmen blong Jisas Kraes i tekem wan dip mining i kam long mi taem mi stap katem statiu blong stori blong Ebraham mo Aesak.
Ol foto i kam long Kristina Smit
Blong stap peint mo katem ol statiu i wan wei blong soem filing blong mi blong talem tangkyu from hamas wol ia i naes tumas. Blong mi, art i stat wetem wan filing long saed blong spirit abaot kriesen.
“Kavenan Pikinini”
Taem wan fren i nomo wok mo rere blong muv i go longwe, mi mekem wan pis blong statiu blong hem we oli singaotem Kavenan Pikinini”. Hem i wan statiu blong Ebraham we i stap holem bebi Aesak. Stat long taem ia, mi bin mekem plante long ol narafala statiu we i soem Ebraham mo Aesak. Olgeta oli ol fevret wan blong mi mo sam long ol pis we oli impoten tumas long mi.
Ol statiu blong Stephan Seable we oli soem Ebraham mo Aesak, oli ol fevret wan blong hem. Oli rimaenem hem long lav blong Papa long Pikinini blong Hem we i Lavem tumas. Long raet saed i go, hem i statiu we oli singaotem Kavenan Pikinini.
Wan we i gat moa paoa long mi i blong Ebraham we i stap givim instraksen long boe blong hem aot long ol skrol. Ebraham i stap holem prestem leg blong hem mo stap lukluk i go antap wetem bigfala harem nogud long fes blong hem wetem wan filing we i kam long Lod se hem i mas sakrifaesem wan boe nomo blong hem. Aesak i stap haggem Ebraham be i no save andastanem from wanem papa blong hem i no save ansa long hem.
Long statiu ia we i kam long Brata Seable we oli singaotem Tekem Pikinini blong Yu, Wan Stret Pikinini Ia Nomo, Ebraham i kasem wan filing we i kam long Lod se hem i mas sakrifaesem pikinini blong hem Aesak.
Wan narawan pis blong art we oli stap wok long hem we i soem tufala i stap bildim wan olta. Aesak i askem se sakrifaes i stap long weaples, mo Ebraham i ansa se, Lod bae i givim. Long wan fasfala pis art, Ebraham i givim wan nani we hea blong hem i tik, mo oli talem long hem se hem i no nid blong sakrifaesem pikinini boe blong hem. Ebraham i stap haggem Aesak, i stap haggem strong. (Luk long Jenesis 22:1–13.)
Ebraham i haggem Aesak long statiu ia we i kam long Brata Seable, we oli singaotem Afta long Tes.
Wanem we i gud tumas abaot stori ia i wan kaen, o saen, blong sakrifaes blong Pikinini blong God. Papa blong yumi long Heven we i lavem Pikinini blong Hem we i Lavem tumas, i jusum tu blong sakrifaesem Hem be, i no stopem hem long las taem blong Hem. Long ol toktok blong Elda Neal A. Maxwell (1926–2004) blong Kworom blong Olgeta Twelef Aposol, “I no gat wan nani we hea blong hem i tik blong yusum blong sevem Hem long Kalvari, hemia Fren blong Ebraham mo Aesak” (“O, Divine Redeemer,” Ensign, Nov. 1981, 8).
Be, Papa i letem Pikinini Ia blong Hem we oli jusum (luk long Moses 4:2) blong mekem Atonmen long bihaf blong yumi, mekem se yumi evriwan i save gobak hom blong stap laef wetem Tufala bakegen, sapos yumi wantem blong stap laef long wan laef we i klin inaf from blesing ia (luk long Jon 3:16–17).
Eksperiens blong mi i talem se God i pat blong laef blong mifala. Yumi stap mekem se yumi “save gat glad” (2 Nifae 2:25), be yumi kasem eksperiens tru long ol samting we yumi safa from. Olsem we i tru se, ol gud samting bae oli hapen, i gat, be, “ i mas gat wan fasin blong go agens long evri samting” (2 Nifae 2:11). Be, God, i stap ia blong helpem yumi, mo yumi save winim wanem yumi gat blong mekem, nomata wanem i stap kam long yumi. Bae yumi faenem se, yumi save stanap blong winim ol tes blong laef, taem yumi gohed blong stap traem blong lavem, givim seves mo gat moa lav— olsem Sevya blong yumi.
Mi talem tangkyu from gospel, famli blong mi, mo evri naesfala pipol long Jos. Nomata, weaples, waef blong mi Kathleen mo mi i go long ol misin long hem truaot long wol, mifala i faenem Ol Sent we oli lavem wanwan long olgeta mo givim seves, blesem mo sakrifaes blong wanwan long olgeta. Papa long Heven i lavem yumi, mo yumi ol pikinini blong Hem. I no gat wan samting we i moa impoten bitim blong stap fetful long Hem mo Pikinini blong Hem, we Tufala i fetful tumas long yumi.
Nomata weaples Brata Seable mo waef blong hem i stap, Kathleen i givim seves long misin truaot long wol, tufala i faenem ol Lata-dei Sent “we oli lavem wanwan long olgeta mo givim seves, blesem mo sakrifaes blong wanwan long olgeta.”