Nomo Stap Yuwan: 7 Wei blong Konek

I Kam long Julianne Holt-Lunstad

Profesa blong maen mo tingting, Brigham Yang Yunivesiti

Blong stap yuwan i wan jalenj we yu save winim wetem sam efot, stap strong long saed blong filing, mo help we i kam long Sevya.

Pikja

tu man i stap wokbaot saedsaed long tufala

Samtaem bae yumi gat eksperiens ia blong stap yumiwan. Samtaem ol filing blong stap yuwan i gud long saed blong helt mo yu save kasem fulap samting, wan saen blong baeoloji we yumi nidim blong bildim ol strong rilesensip. Be blong stap gogohed blong stap yuwan plante taem i wan samting we i blokem fasin blong stap glad.

Plan blong Papa long Heven blong hapines i tekem tu stap kam tugeta olsem famli mo olsem ol grup. Hem ia i no help nomo long progres blong yumi we i no save finis be tu long ol nid blong yumi olsem ol man long medel blong ol narawan, blong filim se yumi pat long, blong givim mo kasem ol sapot long saed blong filing. Saens i stat blong luksave sosol koneksen olsem wan nid we i joen long helt blong yumi mo blong stap laef.

Hem i wan nid long saed blong spirit tu. Yumi nidim wanwan long yumi long saed blong spirit mo blong stap gro. Mo wan heven we i fulap wetem ol rilesensip we i no save finis hem i wan tingting blong glad (luk long Doktrin mo Ol Kavenan 130:2).

Tingting long ol aedia we i stap daon ia blong yu save faet wetem fasin blong stap yuwan long laef blong yu:

Dipen long Sevya. Papa blong yu long Heven mo Jisas Kraes i save se yu stap yuwan mo oli wantem blong help. Blong save se Sevya i save gud harem nogud ia blong stap yuwan, i save helpem yu blong save se Hem i andastanem wanem yu filim. Stap kam kolosap long Papa long Heven mo Sevya tru long prea, stadi ol skripja, mo wosip long sabat mo long tempol bae i helpem yu blong save se yu neva stap yuwan. Olsem Presiden Russell M. Nelson i tijim, “Taem we laef blong yumi i stap lukluk nomo long … Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi.”
Stap wan gud fren. Samtaem fasin blong stap yuwan i save mekem yumi blong gat tu tingting, se blong stap mekem efot bae i help blong mekem ol harem nogud i go daon. Luklukbak long yuwan blong luk sapos yu stap filim nogud. Taem yu stap lukaotem blong gat ol frensip, tingbaot se oltaem i nidim blong stap olsem wan gud fren. Talem halo long wan neba i save mekem wan jenis. Mo blong lukaotem ol janis blong blesem ol laef blong ol narawan we oli stap fesem hadtaem wetem fasin blong stap olgetawan bae i wan aksen we i gat moa paoa long evri samting.
Bildimap ol samting we i pulum intres. Lukaotem ol pipol mo ol grup we ol intres, ol lukluk, mo standet blong olgeta i semmak long yu. Yu save luk (o iven tingting blong statem!) wan buk klab, seves klab, klab blong haeking, grup blong singsing, hom naet grup, o grup blong ol nes we i emti.
Mekem i kam strong ol rilesensip we i stap finis. Fulap pipol oli gat ol rilesensip finis wetem famli, ol fren, ol neba, mo ol wod memba. Blong stap mekem i kam strong ol rilesensip ia we i stap finis i wan moa gud ples blong stat taem yu stap faet wetem fasin blong stap yuwan. I tekem taem blong bildim ol frensip long nomol wei, gat fasin ia blong save wet longtaem taem yu stap mekem ol rilesensip oli kam strong. Tingbaot se kwaliti blong ol rilesensip blong yu i moa impoten long namba blong ol rilesensip we yu gat.
Lukaotem ol janis blong givim seves mo serem ol talen blong yu mo ol presen long saed blong spirit. I gat fulap janis blong givhan mo givim seves long Jos, ol famli blong yumi, mo long komuniti. Taem yumi filim se ol efot blong yumi oli stap mekem wan gudfala jenis long ol narawan, bae i save givim wan mining mo stamba tingting blong laef blong yumi. Blong stap filim se laef blong yumi i gat mining long ol narawan i wan strong filing we i mekem yumi no wantem stap yumiwan.
Plan blong ol taem we i gat jalenj. Holidei mo ol deit we i impoten, olsem aniveseri blong wan we yumi lavem we i ded, bae i had tumas. Traem blong mekem plan blong sam aktiviti wetem ol fren o famli long ol kaen dei ia blong mekem se yu no save tingbaot ol koneksen we yu tingting blong wantem blong gat long taem ia.
Tekpat long tempol mo wok blong famli histri. Hemia i wan narafala wei we i gat paoa blong filim kamfot mo stap pat long. Elda Dale G. Renlund blong Kworom blong Olgeta Twelef Aposol i bin promesem plante blesing we yumi save kasem we i gat tu “gat moa lav mo tangkyu from ol bubu mo ol famli we oli stap laef, mekem se yumi nomo filim se yumi stap yumiwan.”

Blong plante pipol, blong stap yuwan i wan jalenj we yu save winim wetem sam efot, paoa long saed blong filing, mo help we i kam long Sevya.