“Tangkyu from wan Profet,” Liahona, Septemba 2024.
Blong Ol Papa mo Mama
Tangkyu from wan Profet
Presiden Russell M. Nelson i talem halo long ol Lata-dei Sent long Kona, Hawae, long Mei 16, 2019, long taem blong visit blong hem blong Pasifik ministri tua.
Ol Dia Papa mo Mama,
Long manis ia Presiden Russell M. Nelson i selebretem 100 betdei blong hem. Ol atikol long namba ia i tokbaot olsem wanem hem mo ol nara profet oli poenem yumi i go long Jisas Kraes.
Wan wei we ol yut oli save folem profet i tru long fasin blong mekem folem invitesen blong hem blong go long seminari oltaem mo ridim ol skripja evri dei. Hem i promesem ol naesfala blesing long olgeta we oli mekem folem, we i gat tu blong stap lanem blong kasem revelesen blong yuwan, faenem ol ansa blong ol kwestin blong laef mo kam blong save Sevya. ?Ol yang pikinini blong yu oli harem invitesen blong profet ia? Visitim seminary.ChurchofJesusChrist.org blong faenemaot moa infomesen.
Ol Toktok Raon blong Gospel
Tingbaot Ol Kavenan blong Yu
Long toktok blong Presiden Jeffrey R. Holland long pej 4, yumi lanem olsem wanem blong stap kipim ol kavenan blong yumi mo stap werem gamen blong tabu prishud afta we yumi endao bae i givim proteksen mo kipim yumi kolosap long Spirit. Yu save serem wetem famli blong yu wan kwot aot long toktok ia mo tokbaot olsem wanem blong stap werem gamen “i stap soemaot wan komitmen we i stap insaed long laef.” ?Wanem sam narafala saen we yumi stap soemaot we i soem komitmen blong yumi blong stap kam ol disaepol?
Obei Ol Komanmen
Elda Isaac K. Morrison i askem Presiden Nelson from wan mesej blong olgetawan blong waef mo ol pikinini blong hem. Ansa blong profet i blong “Kipim ol Komanmen.” (Luk long pej 20.) Maet bae yu askem ol pikinini blong yu: ?Olsem wanem nao bae ol joes blong yu oli defren sapos profet i sidaon wetem yufala long wan tebol mo askem yu blong kipim ol komanmen?
Folem Profet
Presiden Nelson bae i gat 100 yia long manis ia. Presiden Dallin H. Oaks, i serem sam lesen we hem i bin lanem aot long ol profet (luk long pej 12). ?Wanem nao ol pikinini blong yu oli lanem aot long ol profet? ?I bin gat wan stret toktok o divosen we i go stret long olgeta? Serem ol tingting blong yu. Yufala i save wajem wan vidio mesej blong hem.