Eria Lidasip Mesej
Go Bak mo Traem Bageken
Lod i tijim se yumi mas prea i go long Papa long nem blong Hem. Hem i talem tu se:
“Nao Jisas i talem se, Mi nao, mi olsem prapa rop ya grep, mo Papa blong mi, hem i olsem man blong lukaot long rop ya. Laef blong yufala i mas joen long laef blong mi, olsem we laef blong mi i joen long laef blong yufala. Olsem we han blong rop i no save karem frut sipos i no joen gud long stamba blong hem, oraet, long sem fasin, yufala i no save karem frut long laef blong yufala, sipos yufala i no joen gud long mi.
“Mi nao, mi stamba blong rop ya, mo yufala i han blong hem: Man we i joen gud long mi, mo mi mi joen gud long hem, bambae hem i save karem plante frut long laef blong hem. Be sipos yufala i no joen gud long mi, yufala i no save mekem wan samting nating. Sipos yufala i joen gud long mi, mo ol tok blong mi i stap oltaem long yufala, wanem samting we yufala i wantem, yufala i save askem, nao bambae yufala i kasem.”
Olsem wan yang man we i bigwan long Tonga, mi bin laekem tumas stori blong Tuku Fonua, wan impoten samting we i bin hapen long Pouono, Vava’u long 1839. Hemi makem en blong faet long lan mo mekem i hapen lidasip blong Siaosi Taufaʻāhau Tupou I. Long taem blong Tuku Fonua prea, Siaosi Taufaʻāhau Tupou I i mekem Tonga wan “Lan we i givim i go long God.” Aksen ia i fasem tugeta ol man Tonga olsem ol man Tonga mo ol Kristin man.
Ol prinsipol blong Kristin man i letem pablik mo ol praevet ples mo speseli long ol Sandei, wan dei blong spel. Mo tu, nasonal antem blong Tonga i wan prea i go long God, we i stap askem Hem from proteksen. Tedei, mi kasem blesing from fet mo tras blong King Siaosi Taufa’ahau Tupou 1 long God. Tuku Fonua hemi stat we ol man Tonga oli stap lukaotem tingting blong God long evri samting we yumi mekem. Hemi mekem mifala i spesel long plante wei, mo hemi impoten blong stap talem bakegen stori ia long ol jeneresen we i kam.
Blong fas 18 yia blong laef blong mi, mi folem papa mo mama blong mi mo ol apu blong mi i go long jos evri Sandei. Mi witnesem glad blong olgeta we oli planem long hat blong mi, tingting blong wantem blong ol pikinini oli faenem glad olgetawan taem oli go long jos mo stap toktok wetem Papa long Heven. Mi bigwan long Fri Jos blong Tonga, mi luk hamas ol minista oli komitim olgeta blong tijim mifala blong oltaem putum God fastaem long laef blong mifala. Hemia i givim ol bigfala blesing long mi. Mifala i muv i go long Auckland, New Zealand, blong lukaotem wan gudfala laef, mifala i no save se God i stap mekem mifala i rere from wan bigfala stamba tingting.
Long 2019, wan long ol misinari we i faenem mo invaetem mifala blong folem Sevya blong mifala Jisas Kraes, i talem long mi mo waef blong mi Lupe wan stori. Hem i talem se long 1990, hem mo kompanion blong hem i nildaon blong prea, blong save tingting blong Lod. Oli bin folem wan rod we oli noknok long evri doa, be nogat wan i wantem harem mesej blong olgeta.
Taem oli rere blong aot, hem i gat strong filing blong go bak mo traem bakegen. Hem i obei, oli stat blong stap noknok bakegen long ol semmak doa we oli bin noknok long ol bifo, mo taem oli kasem namba sikis haos, mi stap sidaon aotsaed. Save blong mi blong gospel blong Jisas Kraes i stat long ples ia.
Tufala naesfala misinari ia i tijim mi abaot plan blong hapines blong Papa long Heven, abaot Fas Visen, mo Buk blong Momon. Oli tijim olsem wanem Josef Smit i lukaotem blong save wanem jos hem i mas joenem, ridim buk blong James mo prea long God, wetem fet prea blong hem i bin gat ansa.
Ol misinari oli serem testemoni se ansa blong prea blong hem, God Papa mo Pikinini blong Hem we Hem i lavem tumas i kamaot long Josef Smit, se Oli bin singaotem hem i kam wan profet, mo se gospel blong Jisas Kraes i bin kambak bakegen tru long hem.
Evri samting ia i niu long mi, be oli bin promesem mi se bae mi save long miwan sapos hemia i hapen long mi. Oli givim long mi wan Buk blong Momon wetem wan invitesen blong ridim, tingting hevi, mo folem invitesen blong Moronae blong askem God sapos buk ia i tru.
Taem oli kambak afta long tu dei, mi eksplenem se afta we mi ridim fas toktok, testemoni blong ol witnes long buk blong Momon mo stori blong Kraes we i bin visitim ol pipol insaed long 3 Nifae, mi askem long God blong save sapos hemia i tru. Wan naes filing i kavremap mi be mi no andastanem se hemia i wanem. Mo afta ol elda i tijim mi se Tabu Spirit i stap givim witnes long spirit blong mi, we i givim bigfala glad long hat blong mi. Mama mo tri yangfala brata blong mi i joen long nekis lesen, mo mifala evriwan i kasem baptaes long Jos Ia blong Jisas Kraes blong ol Lata-dei sent.
Wetem wota blong ae blong glad foma misinari ia, Tomasi Takau, i serem eksperiens blong hem afta long 30 yia i pas, mi kasem blesing ia naoia blong witnesem ol frut blong wok blong hem. Hemi from ol prea, fet mo strong tingting blong Elda Tomasi Takau mo kompanion blong hem, Elda Jonhson, miwan mi go givim seves blong mi long Wellington misin, New Zeland long 1991 kasem 1993, afta mi mitim mo maredem waef blong mi Lupe long Amilton Niu Silan Tempol, mo naoia mitufala i gat fo boy mo wan gel, wetem tu apu pikinini mo nambatri bae i bon long yia ia.
Hem i wan glad blong mi mo Lupe blong mitim boe blong Tomasi Takau we i stap givim seves naoia long Kingdom blong Tonga misin. Taem mi luk long ol ae blong yang Elda Takau, mi talem tangkyu long papa blong hem blong karem glad blong gospel i kam long laef blong mi mo blong stap prea wetem tru hat wetem kompanion blong hem blong save tingting blong God long ol yia ia we i pas, mo mi talem tangkyu long yangfala boe ia blong ansa long invitesen blong Presiden Russell M. Nelson blong evri yang man blong givim seves long wan misin. Tingbaot se praes blong ol sol i bigwan long ae blong God.
Laef blong mi i jenis from tu misinari i gat strong tingting blong folem tingting blong Lod mo go bakegen blong seken taem’. Mi save se Papa long Heven i harem mo ansarem ol prea blong ol pikinini blong Hem. Mi tangkyu from membasip blong mi insaed long Jos Ia blong Jisas Kraes blong ol Lata-dei Sent, mo mi save se wan profet blong God we i stap laef i stap lidim yumi. Jisas Kraes i Sevya mo Ridima blong wol. Letem yumi fasem yumiwan long Hem we i gat evri paoa blong hilim, fogivim mo blesem laef blong yumi, long nem blong Jisas Kraes. Amen.