“Olsem Wanem Ol Sik blong Bodi, Filing Mo Tingting I Bin Helpem Mi Blong Bildim Bak Fandesen blong Fet blong Mi,” Liahona, Septemba 2024.
Ol Yang Adalt
Olsem Wanem Ol Sik blong Bodi, Filing Mo Tingting I Bin Helpem Mi Blong Bildim Bak Fandesen blong Fet blong Mi
Afta long sam bigfala sik long saed blong tingting, long bodi, mo ol jalenj long saed blong spirit, mi faenemaot wanem i minim blong faenem hiling tru long Sevya, Jisas Kraes.
Mi bin stap givim seves olsem wan misinari long Franis taem wol ia i foldaon mo COVID-19 i tanem ful kantri i go long wan lok daon. Mi bin fesem hadtaem wetem sik blong tingting truaot laef blong mi, mekem se mi wari se situesen blong log daon ia bae i mekem mi mi go bak long wan taem blong sik blong tingting. Be, fas wik blong kwarantin—we i wik we Epril 2020 histri jeneral konfrens—i wan long ol wik we mi bin filim spirit bitim ol nara taem long laef blong mi.
Taem mi lukluk i go bak long ol eksperiens we mi bin gat long wik ia, i luk olsem we Lod i stap mekem mi i kam strong blong fesem wan rabis taem.
Elda Gary E. Stevenson blong Kworom blong Olgeta Twelef Aposol i bin givim wan toktok long konfrens ia abaot ol ripea wok long ol fandesen blong Sol Lek Tempol. Hem i komperem niufala fandesen ia long laef blong yumiwan mo askem yumi blong tingting long kwestin ia:
“Wanem ol stret materiol we i fomem fandesen blong spirit mo filing blong mi, we bae i letem mi mo famli blong mi blong stap strong mo no muvmuv, iven blong stanap strong long taem we graon i muvmuv mo plante nois blong hem, we bae i hapen long laef blong yumi?”
Taem mi stap lisin long toktok blong hem, Spirit i mekem mi andastanem se long ol taem we i stap kam long laef blong mi bae mi fesem sam sik blong bodi, filing mo tingting, we bae i olsem tempol we oli bin brekem daon. Be mi filim tu se sapos mi tanem mi i go long Lod long taem blong ol jalenj ia, Hem bae help blong givim paoa blong mekem fandesen blong fet blong mi i strong.
Filing blong Brekem Daon
Olsem we mi bin stap tingting long hem, mi stat blong wari bigwan, mo i no longtaem mi gat filing ia se mi fas long wan sekol blong filing blong wantem kilim ded miwan. Mi nomo gat paoa long saed blong tingting, filing, mo long saed blong spirit.
Afta long tu manis long kwarantin, ol samting oli gud smol. Tangkyu long ol jenis long ol situesen blong mi, olsem meresin blong daonem sik long saed blong tingting mo lok daon i finis, mi stat blong filim gud long saed blong tingting. Be i no long taem afta, mi stat blong filim sik mo luksave tri solap daon long trot blong mi.
Long stat, mi no bin wari long ol solap ia, be taem ol saen blong hem oli kam moa nogud, i kam moa klia se mi nomo save laef longtaem long misin. Mi go bak hom, mo oli tritim mi kwiktaem wetem blad kansa—Hodgkin’s lymphoma.
From tritmen blong sik long saed blong tingting we mi stap tekem i mekem mi mi nam smol, ol filing blong mi long saed blong bodi oli nomo gat taem mi statem sikis manis tritmen blong kansa.
Be nomata long hemia, mi bin stat blong lusum paoa long saed blong bodi.
Bildim Bak Fandesen blong Mi long Saed blong Spirit
Wan yia afta we kansa tritmen blong mi i en, mi stat blong filim gud bakegen long saed blong bodi. Mi go bak long kolej mo mekem ol plan. Be bigfala soa long saed blong spirit mo blong filim bodi i nam olsem we mi bin filim long misin blong mi mo long taem blong tritmen blong kansa, naoia i tanem i kam wan jeneral filing blong nogat intres long Papa long Heven mo Jisas Kraes.
Mi bin fesem hadtaem wetem ol filing blong mi abaot wanem mi bin go tru, mo filim olsem Tufala i bin lego mi taem mi stap daon olgeta.
Be papa long Heven i save wanem rod mi nidim blong tekem blong mi save kam oraet.
Mi filim olsem mi stap traehad blong holemtaet ol brokbrok pis bong strong fet we mi gat i stap yet, mo fasin mo kwaleti we i mekem huia mi. Mi filim se mi stap longwe long miwan. Hat blong mi i sopsop taem Lod i kam blong helpem mi, be mi filim mi gilti long saed blong spirit, mi wari, mo mi no klin inaf from mi no gat intres long gospel.
Afta we mi tingting hevi long helt blong mi long saed blong spirit blong sam manis, mi gat strong tingting blong mekem smol jenis long laef blong mi long saed blong spirit. Mi fogetem soa blong wan smol taem, be mi wantem stretem harem nogud we mi stap filim insaed long sol blong mi from ol jalenj we mi bin gat eksperiens long hem.
Sot taem afta, mi save luk han blong Papa long Heven long laef blong mi. Ol fren mo ol famli i stat blong toktok long topik blong hiling be oli no save se mi no save filim o haremsave ol samting long saed blong spirit. Wan long olgeta i serem wan toktok we i kam long Elaine S. Marshall long wan devosen.
Mi no wantem be mi ridim.
Olsem wan nes, Elaine i soem olsem wanem hiling long saed blong bodi mo hiling long saed blong spirit tufala i semmak: “Hiling hem i no kiua. Kiua hem i klin, hem i kwik, mo hem i finis—plante taem wetem meresin. … Hiling … wok blong hem blong kam oraet mo stap gro, oltaem i tekem wan longfala taem long laef. I no mata sapos yu stap faet agensem atak long saed blong bodi, filing, o spirit . Hem i tekem taem.”
Mi no ting se i wan janis blong tritmen blong kansa i nidim sikis manis. Wanem i bin tekem ples long taem blong tritmen ia oli nogud, oli tumas, mo i nidim tumas samting. Intresting pat se, taem mi stap lanem blong letem bodi blong mi i hil long saed blong bodi, i bin tijim mi wan ki prinsipol blong hiling long saed blong spirit—olsem wanem blong lukluk long gladhat blong Jisas Kraes, mo givim miwan taem mo spes blong hilim rilesensip blong mi wetem Hem mo Papa long Heven.
Stap Kasem Gladhat blong Sevya
Gladhat i help we i kam long God, paoa we i helpem man blong mekem samting mo helpem man i kam strong, mo i hilim man long saed blong spirit. Hem i wan presen we i kam long papa blong yumi long Heven, “we i kam long yumi tru long Atonmen blong Jisas Kraes.”
Fevret eksampol blong mi blong wan we i kasem hiling paoa blong Jisas Kraes tru long Atonmen blong Hem, hem hem i Yangfala Alma. Long taem we hem i ledaon long koma blong tri dei, wetem bigfala “harem nogud tumas wetem ol so blong wan sol we devel i stap kontrolem,” hem i tingbaot ol tijing blong papa blong hem abaot Jisas Kraes (luk long Alma 36:16–17). Fas samting, hem i wanten tumas blong kasem help, mo afta hem i tanem hem i go long Kraes, we i gaedem hem blong jenisim rod blong hem, mo helpem hem blong kasem hiling long saed blong spirit (luk long Alma 36:18–22).
Fas step we mi bin tekem blong kasem hiling long saed blong spirit hem i blong faenem filing ia blong wantem konek wetem God. Alma i bin tijim olsem wanem blong mi stat taem hem i talem, “Be luk, sapos yufala i girap mo wekemap tingting blong yufala, blong go traem ol toktok blong mi, mo praktisim wan smol pis blong fet, yes iven sapos yufala i no save mekem moa be wantem blong biliv nomo, letem samting ia i wok insaed long yufala, go kasem taem we yufala i kasem wan bilif we i inaf blong yufala i save akseptem wan pat blong ol toktok blong mi” (Alma 32:27).
Mi testifae aot long eksperiens blong miwan, se hemia i tru.
Yumi save developem wan filing blong wantem, planem wan sid (toktok blong God), mo fidim gud sid ia kasem taem hem i kam wan samting we i ril mo i strong. Long en, ol frut blong fet blong yumi long Jisas Kraes oli kamaot taem yumi luk ol jenis long ol aksen blong yumi, ol tingting blong yumi, ol bilif blong yumi, ol hat blong yumi, ol tingting blong yumi, mo afta ol sol blong yumi. Fandesen blong yumi, yumi bildim long Hem (luk long Hileman 5:12).
Semmak olsem eksperiens blong Alma, mi wantem blong filim Spirit mo glad blong gospel ia bageken mo putum gud wan ful lukluk long rod ia we i tekem mi tru long rod blong hiling. Afta long taem ia, Sevya i bin helpem mi blong fogetem ol filing we mi bin filim bifo taem mi lanem blong lego i go ol filing blong kros blong mi long God, Hem, mo ol wiknes blong mi.
From Hem, ol pat blong mi we mi bin ting se mi bin lusum long medel blong ol hadtaem blong mi—olsem ol fasin blong mi, wanem we mi wantem, mo lav blong mi from gospel—oli kambak long mi mo i bin mekem mi filim se mi fulwan, mi kam niu, mo mi kambak fulwan.
Wan Strong Fandesen
Soa mo ol jalenj oli jenisim mi, be taem mi faenem hilim tru long Jisas Kraes, mi biltim fandesen blong fet blong mi long Hem. Taem i pas mo mi hil, mi luk se from Jisas Kraes, mi save lanem blong gat glad nomata long ol jalenj blong mi. Naoia mi andastanem se moa impoten pat blong go tru long ol jalenj i no wanem we i putum yumi daon o soa we yumi filim—hem i wanem we i kam afta taem yumi eksperiensem hiling mo bildim bak tru long bigfala lav blong Sevya.
Elda Patrick Kearon blong Kworom blong Olgeta Twelef i bin tijim se: “Ol dia fren we yufala … we i karem ol tritmen long laef we i no fea—yu save gat wan niu stat mo wan fres stat. Long Getsemane mo long Kalvari, Jisas i ‘ tekem long Hemwan … evri trabol mo safaring we yumi eva gotru’ [Russell M. Nelson, “Stret Nem blong Jos,” Liahona, Novemba. 2018, 88], mo Hem i winim evriwan!”
Long yufala we yufala i harem nogud, mi askem strong long yufala blong gat strong tingting, blong holemtaet strong, mo trastem Lod, mo hiling paoa blong Hem. Wetem taem, fasin blong stap wet longtaem, iven wetem wan smol filing blong wanem mekem samting, bigfala lav blong Hem i save jenisim yu, bildimap fandesen blong yu.
Hemia nao presen we Hem i givim long evriwan long yumi.
Woman we i raet i stap long Not Karolina, YSA.