Russell M. Nelson: Mpaminany ho an’izao androntsika izao

Nosoratan’ny’ny Filoha Dallin H. Oaks

Mpanolotsaina Voalohany ao amin’ny Fiadidiana Voalohany

Tena vahoaka voatahy isika manana mpaminany mitarika antsika amin’izao andro farany izao.

Ny Filoha Russell M. Nelson dia niarahaba ny olona taorian’ny fampaherezam-panahy tany Singapore tamin’ny 20 nôvambra 2019.

Rehefa nanakiana ny Fiangonan’i Jesoa Kristy ho an’ny Olomasin’ny Andro Farany ho “fiangonana tantanan’ny anti-panahy” ny mpanadinadina iray, dia namaly ny Filoha Gordon B. Hinckley (1910–2008) hoe: “Tsy mahafinaritra ve ny manana lehilahy matotra eo amin’ny fiainana ho lohany, dia lehilahy mitsara izay tsy entin’ny rivotry ny fampianarana rehetra?”

Lehilahy toy izany ny Filoha Russell M. Nelson, ilay mpaminany velona tranainy indrindra nanompo tamin’ity fotoampitantanana ity. Mahavita ny faha-100 taonany amin’ny 9 septambra 2024 izy. Izy dia mpitarika manana fangoraham-po sy fihavanana miavaka, fahitana sy heriny, hafanana sy fahendrena.

Tiako ny Filoha Nelson. Efa 60 taona izahay no mpinamana ary 40 taona niaraka ho Apôstôly. Nanomboka tamin’ny janoary 2018 dia nahazo fitahiana aho nanompo teo ambany fitarihany ao amin’ny Fiadidiana Voalohany ao amin’ny Fiangonana.

Nantsoina hitarika ny Fiangonan’i Jesoa Kristy naverina tamin’ny laoniny sy ho mpampianatra ambony indrindra ao amin’izany, ny Filoha Nelson dia mahafantatra ny Mpamonjy, izay mpaminaniny izy. Nandritra ny taonjato niainany sy nianarany, dia niavaka tamin’ny asa matihanina sy fanompoana miaramila izy. Mpitarika fianakaviana be fitiavana sy mahomby izy amin’ny fianakaviany maro be. Mpitarika alain-tahaka izy ao amin’ny Fiangonan’ny Tompo naverina tamin’ny laoniny nandritra ireo antsony tato amin’ny Fiangonana, anisan’izany ireo enin-taona farany naha-mpaminanin’ny Tompo azy.

Nandritra ny taonjato iray niainany, Filoha Nelson dia nianatra sy nampihatra ireo fanalahidin’ny fahasambarana eto amin’ity fiainana ity sy amin’ny fiainana ho avy—izay nantsoiny hoe “lesona manan-danja indrindra” eo amin’ny fiainana.”

Nampianatra antsika Izy fa tokony “manomboka miaraka amin’ny tanjona farany ao an-tsaina” isika.

Tiany ny tranon’ny Tompo. Nandritra ireo taona naha-Filohan’ny Fiangonana azy dia nanambara tempoly vaovao miisa 153 izy—eo amin’ny antsasany amin’ireo tempoly miisa 335 an’ny Fiangonana izay efa naorina, na eo an-dalam-panorenana, na efa nambara tamin’ity fotoampitantanana ity.

Nampianatra antsika Izy fa ny fanorenana ny tempolintsika rehetra dia mitondra ny tempoly sy ireo fitahian’ny fanekempihavanan’ny tempoly hanakaiky kokoa ny zanak’ Andriamanitra maro kokoa. Izany no drafitr’ Andriamanitra.

Nampianatra ny Filoha Nelson hoe: “Nianatra aho fa ny drafitry ny Ray any An-danitra ho antsika dia mahavariana, tena manan-danja ny zavatra ataontsika eto amin’ity fiainana ity, ary ny Sorompanavotan’ny Mpamonjy no mahatonga ny drafitry ny Raintsika ho azo tanterahina.” Ny fahatakarana izany drafitra izany, hoy izy, dia “manaisotra ny zava-miafina eo amin’ny fiainana sy ny tsy fahazoana antoka ny amin’ny hoavintsika. Izany dia mamela antsika tsirairay avy hisafidy ny fomba hiainantsika eto an-tany sy ny toerana hipetrahantsika mandrakizay.”

Amin’ny maha-Olomasin’ny Andro Farany antsika dia vahoaka voatahy tokoa isika izay tarihin’ny Filoha Nelson, mpanompon’ny Tompo manetry tena, izay nanolo-tena hanomana izao tontolo izao ho amin’ny Fiaviana Fanindroany an’ny Mpamonjy sy Mpanavotra antsika, dia i Jesoa Kristy. Enga anie isika rehetra hanohy hivavaka, hijoro ho vavolombelona, hanohana, ary hisaotra an’ Andriamanitra noho ny mpaminanintsika—Ny Filoha Russell Marion Nelson.

Anisan’ireo fampianaran’ny Filoha Nelson manan-danja indrindra ireto manaraka ireto:

Nananatra antsika Izy mba hampiasa ny anarana marin’ Ny Fiangonan’i Jesoa Kristy ho an’ny Olomasin’ny Andro Farany.

Nanoro hevitra antsika izy ny amin’ny fomba hamelana an’ Andriamanitra hanjaka eo amin’ny fiainantsika.

Namporisika antsika Izy mba “hisaina amin’ny fomba selestialy.”

Nampianatra antsika hanana fahitana mivelatra momba ny fanangonana an’i Isiraely eo amin’ny lafiny roa amin’ny voaly Izy.

Nitaona antsika handroso eo amin’ny lalan’ny fanekempihavanana Izy, ary nanasa antsika tamim-pitiavana mba hiverina amin’izany lalana izany raha toa ka nania isika.

Nanentana ny mpikamban’ny Fiangonana na aiza na aiza izy mba hanaraka ny lamina fianarana ny filazantsara mifototra ao an-tokantrano sy tohanan’ny Fiangonana.

Fanamarihana

1. Gordon B. Hinckley, ao amin’ny David A. Bednar, “Chosen to Bear Testimony of My Name,” Liahona, Nov. 2015, 128.

2. Russell M. Nelson, “Saino amin’ny fomba selestialy!,” Liahona, nov. 2023, 117.

3. Russell M. Nelson, “Eo am-pandrosoantsika miaraka,” Liahona, apr. 2018, 7.

4. Jereo ny Russell M. Nelson, “Mifantoha amin’ny tempoly, Liahona, nôv. 2022, 121.

5. Russell M. Nelson, “Saino amin’ny fomba selestialy!,” 117.

6. Jereo ny Russell M. Nelson, “Ny anarana marin’ny Fiangonana,” Liahona, nôv. 2018, 87–90.

7. Jereo ny Russell M. Nelson, “Aoka Andriamanitra no hanjaka,” Liahona, nôv. 2020, 92–95.

8. Russell M. Nelson, “Saino amin’ny fomba selestialy!.” Liahona, 117–20.

9. Jereo ny Russell M. Nelson, “Ny fandraisan’ireo rahavavy anjara amin’ny fanangonana an’i Isiraely,” Liahona, nôv. 2018, 68–70; jereo ihany koa ny Russell M. Nelson and Wendy W. Nelson, “Fanantenana ho an’i Isiraely” (fampaherezam-panahy maneran-tany ho an’ny zatovo, 3 jona 2018), Médiathèque de l’Évangile.

10. Jereo ny Russell M. Nelson, ““Avia, manaraha Ahy”,” Liahona, mey 2019, 91; jereo ihany koa ny Russell M. Nelson, “Eo am-pandrosoantsika miaraka,” 7.

11. Jereo ny Russell M. Nelson, “Lahateny fanokafana,” Liahona, nôv. 2018, 6–8.