Ne Dëshmojmë për Profetin Tonë të Gjallë

Të falemi, Perëndi, për profetin.

E di se Presidenti Rasëll M. Nelson është një profet i Perëndisë dhe unë jam mirënjohës që Perëndia i flet atij. Dashuria e Presidentit Nelson për ne është një nga shfaqjet e dashurisë së Perëndisë. E dua Presidentin Nelson. Premtimet që shqipton ai janë nga Perëndia.

Xhastina Hinautan, Filipine

Presidenti Nelson më mëson se gjëja më e rëndësishme sot është që të zgjedh Krishtin duke i çmuar dhe duke i nderuar besëlidhjet.

Rajan Halm, Zelandë e Re

Sa mirënjohës jam për profetin Rasëll M. Nelson. Jap dëshminë time se ai është një burrë i thirrur nga Perëndia për të na udhërrëfyer dhe forcuar në ditët e fundit. Nëse e ndjekim këshillën e tij, gjithçka do të shkojë mirë.

Nelson Almeida, Kepi i Gjelbër

Faleminderit, Presidenti Nelson, nga thellësia e zemrës që na jep fjalë urtësie nga Ati ynë Qiellor. Perëndia të bekoftë, profeti ynë i dashur!

Brenda Bojëll, Skoci

Faleminderit, Presidenti Nelson, për mësimet e tua frymëzuese dhe lartësuese. Ne ju duam.

Tuong Putjëri, Kamboxhia

Jam shumë mirënjohëse për dashurinë dhe idetë që ofron Presidenti Nelson si profet. Biseda e tij lidhur me tempullin më çoi drejt marrjes së dhurimit tim në tempull, takimi i tij shpirtëror për të rinjtë në moshë madhore më ka kujtuar që të dalloj identitetin tim kryesor si fëmijë i Perëndisë dhe shtysa e Tij për mbledhjen e Izraelit të shpërndarë ka qenë një temë e vazhdueshme brenda familjes sime dhe brenda komunitetit të lagjes sime të kishës. Më e rëndësishmja, ai më ka ndihmuar të afrohem më shumë te Shpëtimtari im.

Grejs Bërt, Shtetet e Bashkuara

I kam përsiatur thellë mësimet e profetit tonë të dashur, Rasëll M. Nelsonit. Mësimet e tij ma kanë frymëzuar jetën. Fjalët e tij profetike më kanë dhënë shtysë që të vazhdoj përpara dhe ta jetoj ungjillin më plotësisht në këtë botë të rrëmujshme dhe plot përplasje. Ndihem tejet e sigurt për faktin se e di që kemi një profet në kohën tonë, i cili na këshillon që të kemi një shpirt paqeje, që të shmangim grindjen me bashkëmoshatarët tanë. I vlerësoj mësimet e tij të mëdha.

Ana Montoia, Honduras

Unë kam një dëshmi të patundur se Presidenti Rasëll M. Nelson është profeti i Perëndisë për ditët e mëvonshme. Kam pasur privilegjin ta dëshmoj nga afër përulësinë e tij, thjeshtësinë e tij dhe dashurinë që ai ndien për njerëzit. Vërtet ai është burri i zgjedhur për ta udhëhequr mbretërinë e Perëndisë në tokë në këtë kohë të pashoqe. E kam dëgjuar dhe e kam ndjekur këshillën e tij, e cila më ka udhërrëfyer për të jetuar një jetë të drejtë dhe për t’u përballur me sfidat e vdekshmërisë. Ndiej dashuri të pamasë për Presidentin Nelson dhe jam në dijeni të ndihmesës së tij të jashtëzakonshëm për përparimin e mbretërisë së Perëndisë dhe mbledhjen e Izraelit nëpërmjet frymëzimeve dhe njoftimeve për ndërtimin e tempujve në mbarë botën.

David G. Fernandes, Brazil

Më 24 gusht 2019, profeti foli në spanjisht dhe na udhëzoi që t’i zbatojmë urdhërimet e Zotit. E ndjeva shumë fort dashurinë e Jezu Krishtit nga përpjekja e profetit për të mësuar gjuhën tonë. E di se nëpërmjet profetit të gjallë, Perëndia na inkurajon, udhëzon, mbron, udhërrëfen dhe bekon.

Saul Alfredo Rohas de Leon, Guatemalë