Si Mund ta Forcoj Dëshminë Time për Profetin?

Konferenca e Përgjithshme mund të na ndihmojë që ta forcojmë dëshminë tonë për profetët e gjallë.

Në librin e Helamanit, profeti Samuel Lamaniti dëshmon për Jezu Krishtin dhe u jep paralajmërime dhe ftesa nefitëve (shihni te Helamani 13–14). Në ditët tona gjithashtu ne kemi mundësinë që të dëgjojmë paralajmërimet e kohës nga profeti ynë dhe udhëheqës të tjerë të Kishës. Nëse ua vëmë veshin ftesave të tyre, kjo na ndihmon të ndjekim shtegun e besëlidhjeve.

Konferenca e përgjithshme është një mundësi e shkëlqyer për të dëgjuar fjalët më të fundit nga udhëheqësit tanë të frymëzuar dhe për t’u afruar më shumë te Jezu Krishti. Këtu janë disa mënyra që mund t’i merrni parasysh se si ta përdorni konferencën e përgjithshme për ta rritur dëshminë tuaj për profetët e gjallë:

Përpara konferencës së përgjithshme, përsiatni me lutje përse është e rëndësishme për ju që të kemi një profet. Merrni parasysh të luteni për të marrë konfirmim nga Shpirti se Presidenti i tanishëm i Kishës është profeti, shikuesi dhe zbuluesi i Perëndisë në tokë sot. “Të dish me anë të zbulesës se ka një profet të gjallë mbi tokë, ndryshon gjithçka.”
Bëni kërkime se ç’do të thotë të përkrahësh dhe mbështetësh profetin dhe Autoritetet e Përgjithshme. Gjatë konferencës së përgjithshme, merrni pjesë në mbështetjen e tyre në thirrjet e tyre.
“Nëpërmjet fuqisë së Frymës së Shenjtë, ju mund të dini të vërtetën e të gjitha gjërave” (Moroni 10:5). Ndërsa i dëgjoni mesazhet nga udhëheqësit e Kishës, kushtojuni vëmendje Shpirtit që ju dëshmon se fjalët e tyre janë të vërteta.
Njëri nga rolet kryesore të profetit është që të dëshmojë për Jezu Krishtin dhe të na mësojë që “ta shikoj[m]ë Birin e Perëndisë me besim” (shihni te Helamani 8:13–16). Ju mund të doni të mbani shënim atë që profeti dhe folës të tjerë japin mësim rreth Shpëtimtarit.
“Nëpërmjet [Presidentit Rasëll M. Nelson], ne kemi marrë ftesa të panumërta dhe na janë premtuar bekime të lavdishme nëse do ta përqendrojmë jetën tonë te Shpëtimtari ynë.” Merrni parasysh të bëni një listë me ftesat e bëra nga profeti dhe folës të tjerë gjatë konferencës. Referojuni sërish asaj liste për t’ju ndihmuar që të përpiqeni për t’u bërë më shumë si Krishti.
Kujtoni ftesën e Presidentit Nelson: “Unë ju nxit t’i studioni mesazhet e kësaj konference vazhdimisht – madje në mënyrë të përsëritur – gjatë gjashtë muajve që vijnë”. Teksa i dëgjoni ose i lexoni sërish mesazhet, shenjojini gjërat që ju bëjnë përshtypje.
Presidenti Nelson na fton që të “kërko[jmë] dhe pr[esim] mrekulli”. Teksa i bindeni këshillës së profetit dhe bëni ndryshime në jetën tuaj, kushtojini vëmendje bekimeve që merrni dhe mrekullive që shihni (shihni te Helamani 16:4–5).

Teksa i ndiqni këta hapa për të zhvilluar dëshminë tuaj për një profet, shikues dhe zbulues, vëreni besimin tuaj te Jezu Krishti dhe një Atë i dashur Qiellor. Perëndia na ka dhënë plot dashuri profetë për të na udhërrëfyer që të kthehemi sërish tek Ai – profetë që veprojnë si zëdhënësit e Tij për t’ia zbuluar vullnetin e Tij botës. (Shihni te Doktrina e Besëlidhje 1:38; 21:5–6.) Nëse zgjedhim të ndjekim këshillën e shërbëtorëve të Tij, ne zgjedhim ta ndjekim Atë.