Te rē a te tīa’i
E hōro’a oraora te tīa’i, e hōro’a ’o tē tupu ’a fa’arahi ai tātou i tō tātou fa’aro’o ia Iesu Mesia.
E au mau taea’e, e au mau tuahine nā te ao nei, ’a ha’amata ai tātou i teie tau ta’a ’ē mau nō te ’āmuira’a rahi, e rōtahi mau te mata o te ra’i i ni’a ia tātou. E fa’aro’o tātou i te reo o te Fatu nā roto i tōna mau tāvini ; e putapū tātou i te mana « arata’i ’e te fa’atere ’e te tāmāhanahana » o te Vārua Maita’i, ’e e ha’apūaihia tō tātou fa’aro’o.
’A toru matahiti i teienei, ’ua ha’amata te peresideni Russell M. Nelson i te ’āmuira’a rahi ma teie parau : « Nā te heheura’a ’āno’i ’ore i te mau uira’a i roto i tō ’outou ’ā’au e fa’ariro i teie ’āmuira’a ’ei ’āmuira’a faufa’a rahi ’e ’o tē ’ore roa e mo’ehia. Mai te mea ’aita ā ’outou i ani atu ra i te aupurura’a a te Vārua Maita’i nō te tauturu ia ’outou ’ia fa’aro’o i te mea tā te Fatu e hina’aro ia ’outou ’ia fa’aro’o i roto i teie nā mahana e piti, tē ani nei au ia ’outou ’ia rave i te reira i teie taime. E fa’ariro na i teie ’āmuira’a ’ei taime nō te fa’a’amu’a i te mau parau poro’i nō ’ō mai i te Fatu nā roto mai i tōna mau tāvini. »
Tē nati ’āmui nei, ’e ma te pūai, te mau pāpa’ira’a mo’a i e toru ta’o : te fa’aro’o, te tīa’i ’e te aroha. E hōra’a tao’a rahi te hōro’a nō te tīa’i nō ’ō mai i te Atua.
Tē fa’a’ohipahia nei te [parau nō te] tīa’i nō te mau mea e rave rahi tā tātou e hina’aro ’ia tupu mai. ’Ei hi’ora’a : « Maita’i ē e’ita e ua », ’aore rā « Maita’i ē e upo’oti’a tō tātou pupu. » Tō’u hina’aro ’o te paraparaura’a ïa nō ni’a i tō tātou mau tīa’i mo’a ’e te mure ’ore tei fa’atumuhia i ni’a ia Iesu Mesia ’e i te ’evanelia i fa’aho’ihia mai, nā reira ato’a « tā tātou ti’aturira’a ’e te tīa’ira’a […] i te mau ha’amaita’ira’a nō te parauti’a i parauhia mai. »
Tō tātou tīa’i i te ora mure ’ore
Tō tātou tīa’i nō te ora mure ’ore, e ha’apāpūhia ïa nā roto i te maita’i rahi o te Mesia ’e tā tātou iho mau mā’itira’a, e matara ai nō tātou te ha’amaita’ira’a fa’ahiahia ’ia ho’i i tō tātou fare i te ra’i ra ’e ’ia ora a muri noa atu i roto i te hau ’e te ’oa’oa ’e tō tātou Metua i te ao ra, tāna Tamaiti here, tō tātou ’utuāfare ha’apa’o maita’i ’e tō tātou mau hoa iti, ’e te mau tāne ’e te mau vahine parauti’a nō te mau fenua ra’ituāta’a ato’a ’e te mau tenetere ato’a.
I teie nei ao, e ’ite tātou i te ’oa’oa ’e te ’oto ’a tāmatahia ai tātou ’e ’a ’ite-pāpū-hia ai tō tātou maita’i. E tae mai tā tātou rē nā roto i te fa’aro’o ia Iesu Mesia ’a upo’oti’a ai tātou i tā tātou mau hara, mau fifi, mau fa’ahemara’a, mau mea au ’ore ’e mau fifi o te orara’a tāhuti nei.
’A ha’apūai ai tātou i tō tātou fa’aro’o ia Iesu Mesia, e ’ite tātou nā ni’a atu i tō tātou mau tāfifira’a i te mau ha’amaita’ira’a ’e te mau parau fafau nō te tau mure ’ore. Mai te hō’ē mōrī e ’ana’ana noa atu ra, e ha’amāramarama te tīa’i i te ao ha’apōirihia, ’e e ’ite tātou i tō tātou ananahi hanahana.
Nō roto mai i te Atua te tīa’i
Mai te ha’amatara’a mai ā, i hia’ai noa ana tō tātou Metua i te ao ra ’e tāna Tamaiti here ’ia ha’amaita’i i tei parauti’a i te hōro’a tao’a rahi nō te tīa’i.
I muri mai i te fa’aru’era’a i te ’ō, ’ua ha’api’ihia Adamu ’e ’o Eva e te hō’ē melahi, te parau fafau nō Iesu Mesia. I tūrama ai te hōro’a nō te tīa’i i tō rāua orara’a. ’Ua parau Adamu : « ’Ua ’ara’ara tō’u mata, ’e i roto i teie orara’a e roa’a mai iā’u te ’oa’oa. » ’Ua parau Eva nō « te ’oa’oa o tō [rāua] fa’aorara’a ra, ’e te ora mure ’ore ’o tā te Atua e hōro’a ia rātou ato’a ’o tē ha’apa’o. »
Mai tā te Vārua Maita’i i fa’atae i te tīa’i ia Adamu ra, e ha’amāramarama te mana o te Vārua o te Fatu i te feiā ha’apa’o maita’i i teie mahana, ma te tūramarama i te pāpūra’a o te ora mure ’ore.
E tono mai te Fa’aora i te hō’ē Fa’aa’o, te Vārua Maita’i, e hoa e fa’atae mai i te fa’aro’o, te tīa’i ’e te hau « e ’ere mai tā tō te ao nei hōro’a. »
I parau te Fa’aora ē : « E pohe tō ’outou i teie nei ao : E fa’aitoito rā [tāpe’a i te ’ana’ana o te tīa’i], ’ua riro te rē o teie nei ao iā’u ».
I te mau taime ʼati, e mā’iti tātou i te ti’aturi i te Fatu ma te fa’aro’o. E pure muhu ’ore tātou : « ’Ia tupu rā tō ’oe hina’aro ’eiaha tō’u. » E putapū tātou i te fa’ari’ira’a a te Fatu nō tō tātou ineine ’e te marū, ’e e tīa’i tātou i te hau i parauhia mai ’o tā te Fatu e tono mai i te taime tāna i mā’iti.
’Ua ha’api’i te ’āpōsetolo Paulo : « [E] fa’a’īhia mai ’outou i te ’oa’oa ’e te hau […] e te Atua e noa’a ai te ti’aturira’a, ’ia rahi tō ’outou [tīa’i] », « e ’oa’oa i te tīa’ira’a ; e fa’a’oroma’i i te pohe » ; « i te mana o te Vārua Maita’i ra. »
E ha’api’ira’a nō te tīa’i
’Ua ’ite iho te peropheta Moroni i te parau nō te tīa’i i te Mesia i te tau ’ati. ’Ua fa’ata’a mai ’oia i tōna vaira’a māuiui mau :
« ’Aita tō’u e hoa […] ’aita ho’i e vāhi nō te haere atu. »
« ’Aita ho’i au […] e fa’a’ite atu iā’u […] ’o te taparahi mai rātou iā’u. »
’Ohipa fa’ahiahia, i roto i teie hora pōiri ’e te mo’emo’e, ’ua pāpa’i Moroni i te mau parau nō te tīa’i a tōna metua tāne :
« Nō reira, mai te mea e fa’aro’o tō te ta’ata, ’ia vai ato’a ïa tōna [tīa’i] ; ’ia ’ore te fa’aro’o ’aita ato’a ïa e [tīa’i]. »
« E aha ïa tā ’outou e [tīa’i] atu ? […] ’Ia vai tō ’outou [tīa’i] i te tāra’ehara a te Mesia ’e i te mana nō tōna ti’afa’ahoura’a, ’ia fa’ati’ahia nō te fāri’i i te ora mure ’ore. »
E au mau taea’e, e au mau tuahine, e hōro’a oraora te tīa’i, e hōro’a ’o tē tupu ’a fa’arahi ai tātou i tō tātou fa’aro’o ia Iesu Mesia. « ’O te fa’aro’o nei, ’o te ti’aturi ïa i te mau mea e tīa’ihia nei. » E patu tātou i teie mātēria—teie mau ta’aai fa’a’itera’a nō tō tātou fa’aro’o—nā roto i te pure, te mau fafaura’a o te hiero, te ha’apa’ora’a i te mau fa’auera’a, te rave-tāmau-ra’a i te fa’a’amua nō te pāpa’ira’a mo’a ’e te mau parau a te mau peropheta o tō tātou nei tau, te ravera’a i te ’ōro’a mo’a, te tāvinira’a ia vetahi ’ē ’e te ha’amorira’a i te hepetoma tāta’itahi nā muri i tō tātou mau hoa feiā mo’a.
E fare nō te tīa’i
Nō te ha’apūai i tō tātou tīa’i i te hō’ē tau tē rahi noa atu ra te ’ino, ’ua fa’aue te Fatu i tāna peropheta ’ia tu’u haere nā ni’a i te fenua i tāna mau hiero.
’Ia tomo tātou i roto i te fare o te Fatu, e putapū tātou i te Vārua o te Atua, ’o tē ha’apāpū i tō tātou tīa’i.
Tē parau pāpū nei te hiero nō te mēnema ta’ata ’ore ’e nō te tāmau-ā-ra’a te orara’a i’ō atu i te pāruru nō te tā’āto’ara’a.
Nō rātou ’aita e hoa mure ’ore, tē ha’apāpū nei te mau ’ōro’a ma te pūai ē, e fa’ari’i te ta’ata parauti’a ato’a i te mau ha’amaita’ira’a ato’a i parauhia mai.
Tē vai nei te tīa’i nehenehe ’ia tūturi nā ta’ata fa’aipoipo ’āpī i te fata ’ia tā’atihia rāua, e ’ere nō teie tau noa, nō te tau mure ’ore rā.
E rave rahi roa tīa’i nō tātou i roto i te mau parau fafau tei parauhia i tō tātou hua’ai, noa atu ā tō rātou nei vaira’a.
’Aita e māuiui, ’aita e ma’i, ’aita e ’ohipa ti’a ’ore, ’aita e mamae, ’aita hō’ē mea e nehenehe e ha’apōiri i tō tātou tīa’i ’ia ti’aturi ana’e tātou ’e ’ia mau pāpū ho’i i ni’a i tā tātou mau fafaura’a ’e te Atua i roto i te fare o te Fatu. E fare nō te māramarama, e fare nō te tīa’i.
’Ia fa’aru’ehia ana’e te tīa’i
E mani’i tō tātou roimata nō te ’oto ’ia hi’o ana’e tātou i te rumaruma ’e te taiā i roto i te feiā ’aita e tīa’i i te Mesia.
’Aita i maoro a’enei, tē hi’o ra vau nā te ātea i te hō’ē tāne ’e te hō’ē vahine tei vai na te fa’aro’o i te Mesia i te hō’ē tau, ’ua fa’aoti rā e fa’aru’e i tō rāua ti’aturira’a. E mea manuia rāua i te ao nei, ’e ’ua ’itehia ia rāua te fāna’o i roto i tō rāua māramarama ferurira’a ’e te hurituara’a i tō rāua fa’aro’o.
E au ē e mea maita’i te mau mea ato’a ē tae roa i te ma’i-tā’ue-ra’a-hia te tāne fa’aipoipo, e mea ’āpī ’e te pe’epe’e maita’i ho’i, ’e pohe atu ra. Mai te ha’apōurira’a mahana, ’ua tu’u rāua i te pāruru i mua i te māramarama o te Tamaiti, e ha’apōurira’a tīa’i atu ra ïa i te hope’a. I teienei nō te vahine, i roto i tōna ti’aturi ’ore, ’o te ta’a ’ore ïa, te ineine ’ore ’e te māuiui, e’ita e nehenehe e tāmarū i tāna mau tamari’i. ’Ua parau tōna ferurira’a iāna ē e mea nahonaho maita’i roa te orara’a ē tae roa i terā taime tā’ue noa, e’ita tāna e nehenehe e hi’o i tōna ananahi. E pōiri ’e te ta’a ’ore teie mana’o rumaruma.
Te tīa’i i roto i te ’ati ’oto rahi
E fa’a’ite au i te ta’a ’ē o tōna rumaruma māuiui i te tīa’i i te Mesia o te tahi atu ’utuāfare i roto i te ’ati ’e te ’oto mau.
’A piti ’ahuru ma hō’ē matahiti i teienei, ’ua fa’arere-rū-hia te ’aiū fānau ’āpī o tō’u iramutu ’o Ben Andersen, ’e tāna vahine ’o Robbie, mai tō rāua ’oire fa’a’apu nō Idaho i Roto Miti. ’Ua tae atu vau i te fare ma’i, ’e ’ua fa’ata’a mai Ben i te mau fifi teimaha i ni’a i te māfatu o tā rāua pēpe. ’Ua tu’u māua i tō māua rima i ni’a i te upo’o iti o Trey. ’Ua ha’amaita’i te Fatu iāna i te ora noa.
I te hepetoma mātāmua o tōna orara’a te tāpū mātāmua o Trey nō tōna māfatu, ’e e rave rahi ato’a i muri iho. ’A he’e noa ai te mau matahiti, ’ua ’itehia ē e tītauhia te tāhitira’a o te māfatu o Trey. Noa atu ā te mau ’ōpanipanira’a i te pae tino, tē rahi noa atu ra tōna fa’aro’o. I pāpa’i ’oia ē : « ’Aita vau i amuamu a’enei nō te mea i ’ite noa ana vau i te faufa’a rahi ’ia vai te fa’aro’o ia Iesu Mesia ’e te ’itera’a pāpū nō te fa’anahora’a nō te fa’aorara’a. »
Tei ni’a noa i te niuniu paraparau o Trey te fa’ahitira’a mātauhia a te peresideni Nelson : « Te ’oa’oa e tae mai, ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a. »
’Ua pāpa’i Trey : « I tīa’i maoro ana vau ’ia tāvini i te hō’ē misiōni rave tāmau […] e’ita rā tō’u mau taote e vaiiho iā’u ’ia tāvini i te hō’ē misiōni ē tae noa atu e ma’iri i te hō’ē a’e matahiti i muri i tō’u tāhitira’a […] Tei ia Iesu Mesia tō’u fa’aro’o. »
’Ana’anatae roa ’o Trey i te fa’ari’ira’ahia ’oia i te ha’api’ira’a nūmerara’a faufa’a nō BYU, e ha’amata i teie ha’amatara’a ha’api’ira’a, hau roa atu tōna ’ana’anatae i te hope’a o te ’āva’e Tiurai ra, i te taera’a mai te niuniu tīa’i-maoro-hia a te fare ma’i nō tōna tāhitira’a māfatu.
’Ua parau ’o Trey : « Hō’ē noa matahiti, e haere vau i te misiōni. »
E ti’aturi rahi tei ’itehia i te tomora’a ’oia i roto i te piha tāpū. Terā rā, i roto i te tāpū, ’ua fifi roa te ’ohipa ’e ’aita ’o Trey i ara fa’ahou mai.
’Ua parau tōna metua vahine, ’o Robbie : « E mahana ’oto rahi te mahana pae ra […] i te tāmatara’a i te māramarama i te ’ohipa i tupu […] ’Aita vau i ta’oto nō te tāmatara’a i te māramarama i te reira […] I te mahana mā’a rā, ’ua ara mai au ma te ’ā’au ’oa’oa mau. E ’ere i te mana’o hau noa ; e ’ere i te tāvirira’a mana’o. E ’oa’oa tei tae mai nō tā’u tamaiti, ’e e ’oa’oa tō’u ’ei metua vahine nōna […] ’Ua nā mua atu ’o Ben i te arara’a iā’u, ’e i te fāna’ora’a māua i te paraparau, hō’ē ā mana’o tō Ben i te arara’a mai ’oia. »
’Ua fa’ata’a mai Ben ē : « E māramarama tei tae mai i tō’u vairua i te ha’api’ira’a mai te Atua iā’u nā roto i tōna Vārua mo’a. ’Ua ara vau i te hora 4 i te ’ā’ahiata ma te ’ī i te hau ’e te ’oa’oa e’ita e nehenehe e parau. Nāhea pa’i te reira ? […] E mea māuiui roa ho’i te fa’aru’era’a mai o Trey, ’e mihi rahi tō’u iāna. ’Aita rā te Fatu e vaiiho ia mātou ma te tāmarū ’ore […] E tīa’i maoro vau i terā fārereira’a ’oa’oa. »
Te parau fafau nō te tīa’i
’Ua pāpa’i ’o Trey i roto i tāna buka ’ā’amu i teie mau parau a te peresideni Nelson i te ’āmuira’a rahi : « ’Ia hi’ohia, e’ita e nehenehe e ’oa’oa ’ia ro’ohia tā ’oe tamari’i i te ma’i e’ita e ora ’aore rā ’ia ’ere ’oe i te ’ohipa ’aore rā ’ia ha’avare tō ’oe hoa fa’aipoipo ia ’oe. ’O te reira mau rā te ’oa’oa tā te Fa’aora e pūpū nei. E mea tāmau tāna ’oa’oa, ma te ha’apāpūra’a ē, ‘e vai poto noa mai tō ’oe […] mau ’ati’ [Te Ha’api’ira’a Tumu ’e te mau Fafaura’a 121:7] ’e e ha’amo’ahia te reira nō tō tātou maita’i. »
Te mau taea’e ’e te mau tuahine, e’ita paha te hau tā ’outou e ’imi ra e tae ’oi’oi mai mai tā ’outou e hia’ai nei, tē parau fafau nei rā vau ia ’outou ē, ’ia ti’aturi ’outou i te Fatu, e tae mai tōna hau.
’Ia aupuru tātou i tō tātou fa’aro’o tao’a rahi, ma te haere i mua ma te tīa’i pāpū roa. Tē parau papū nei au ē, ’o tō tātou Fa’aora Iesu Mesia te tīa’i nō tātou. Nā roto iāna te mau moemoeā parauti’a ato’a e tupu ai. ’O ’oia te te Atua nō te tīa’i—te rē a te tīa’i. Tē ora nei ’oia ’e ’ua here ’oia ia ’outou. I te i’oa o Iesu Mesia, ’āmene.