Te ta’ata here-a’e-hia a te Atua

Elder Karl D. Hirst

Nō te Hitu ’Ahuru

’Ia fa’a’īhia i te here o te Atua e pāruru ia tātou i te mau vero o te orara’a, e fa’atupu ato’a rā i te mau taime ’oa’oa i te ’oa’oa rahi

Hou vau ’a ha’amata ai, e ti’a iā’u e parau atu ē, e piti o tā’u mau tamari’i tei matapōirihia ’a paraparau ai rāua i te terōno, ’e ’aita roa atu vau e mana’o e ’āpiti roa atu vau ia rāua i teie taime. E mana’o hau a’e au i te ’ūputa.

E ’ono tamari’i i roto i tō māua ’utuāfare e ’a’a nei i te tahi taime te tahi ’e te tahi ma te fa’a’ite ē, e tamari’i here-a’e-hia ’oia. E mau tumu ta’a ’ē tō rātou tāta’itahi ’ia here-a’e-hia. Tō māua here nō tā māua mau tamari’i tāta’itahi e mea mā, e fa’atupu i te ’oa’oa ’e te hope. E’ita e ti’a ia māua ’ia here i te hō’ē o rātou hau atu i te tahi—i te fānaura’ahia mai te tamari’i tāta’itahi, ’ua tae mai te tupura’a rahi nehenehe o tō māua here. Tē fa’a’ite hau nei au iā’u iho i te here o tō’u Metua i te ao ra nō’u, nā roto atu i te here o tā’u e putapū nei nō tā’u mau tamari’i.

’A nā ni’a noa ai rātou i te fa’ahiti i tā rātou fa’a’itera’a ’ei tamari’i here-a’e-hia, e riro paha ’outou i te feruri ē ’aita roa atu e piha huehue i tō māua ’utuāfare. Te nīno’a mana’o o te hapehape i roto i te aura’a i rotopū i te metua ’e te tamari’i, e fa’aitihia e te hō’ē fa’atumura’a i ni’a i te here.

I te hō’ē taime mau, penei a’e nō te mea tē ’ite nei au ē tē haere atu ra mātou i te hō’ē ’ōrurera’a pāpū o te ’utuāfare, e parau vau te hō’ē ’ohipa mai teie « nā reira, ’ua fa’arohirohi roa ’outou iā’u, e’ita rā vau e fa’a’ara atu ia ’outou i te reira, ’ua ’ite ’outou ’o vai i roto ia ’outou tā’u i here a’e ». Tā’u fā ’o tē ’itera’a nā tamari’i tāta’itahi e ono i te ’upo’oti’ara’a ’e ’ia ’apehia te hō’ē tātama’ira’a pāpū mau—nō teie noa ra taime !

I roto i tāna ’evanelia, ’ua fa’ata’a Ioane iāna mai « te pipi tei herehia e Iesu », e au ra teie fa’anahora’a ’ua riro mai te mea ra e mea ’ōtahi. Mea au nā’u ’ia feruri ē, nō te mea ho’i ē tē putapū nei Ioane ’ua here-tā’āto’a-hia ’oia e Iesu. ’Ua hōro’a mai Nephi iā’u i te hō’ē ā nīno’a mana’o ’a pāpa’i ai ’oia, « tē ’oa’oa nei au i tō’u Iesu ». Oia mau, ’aita te Fa’aora i riro hau nā Nephi mai ia Ioane ato’a, ’e inaha ra te natura ta’ata nō te aura’a o Nephi ’e « tōna » Iesu, ’ua arata’i iāna i teie fa’a’itera’a marū.

E ’ere ānei e mea fa’ahiahia tē vai nei te mau taime, i reira tātou e nehenehe ai e putapū ’ua ’itehia ’e ’ua herehia ma te tā’āto’ara’a ’e te ta’ata hō’ē ? E nehenehe Nephi e pi’i iāna « tōna » Iesu, ’e tātou ato’a. Te here o tō tātou Fa’aora ’o « te huru here teitei roa a’e, te hanahana a’e ’e te pūai a’e », ’e e fa’arava’i ’oia e tae roa ’ua « ī roa » tātou. E’ita roa te here hanahana e pau, ’e ’ua riro tātou pā’āto’a ’ei mau ta’ata herehia. Tei reira te here o te Atua, i te vāhi mai te mau porota’a [cercle] i ni’a i te nīno’a iti [diagramme] a Venn, tātou pā’āto’a e ’ai rēni ai. Noa atu e mau tuha’a tō tātou e au ra e mea ta’a ’ē, tei roto i tōna here tātou e ’ite mai ai tō tātou hō’ēra’a.

E mea māere ānei ē te mau fa’auera’a rahi roa a’e, ’o te herera’a i te Atua ’e te feiā e hā’ati nei ia tātou ? ’Ia ’ite āna’e au i te feiā e fa’a’ite nei i tō rātou here mai te au i tō te Mesia te huru nō te tahi ’e te tahi, e au ra iā’u tē vai ra i roto i teie here hau atu i tō rātou here, ’o te hō’ē here teie tē vai ato’a ra te atuara’a i roto. ’Ia here āna’e tātou i te tahi ’e te tahi mai teie te huru, ’oia ato’a ma te hope ’e te ’ī mai tā tātou e nehenehe, e ’āmui ato’a mai te ra’i.

Nō reira, mai te peu te hō’ē ta’ata tā tātou i au maita’i e au ra ’ua ’ātea i te aura’a o te here hanahana, e nehenehe tātou e pe’e i teie hōho’a—ma te ravera’a tātou iho i te mau mea e ha’afātata ia tātou i te Atua ’e i muri iho ma te ravera’a i te mau mea e ha’afātata atu tātou i te ta’ata—hō’ē pi’ira’a parau-’ore-hia ’ia haere mai i te Mesia ra.

Tē hina’aro nei au e pārahi i pīha’i iho ia ’outou ’e e ui ia ’outou e aha te mau tupura’a ’o tē fa’aputapū ia ’outou i te here o te Atua. E aha te mau ’īrava o te pāpa’ira’a mo’a, e aha te mau ’ohipa ta’a ’ē o te tāvinira’a ? I hea ’outou e vai ai ? E aha te pehe ? Nā muri i tei hea ta’ata ? ’Ua riro te ’āmuira’a rahi ’ei vāhi faufa’a rahi nō te ha’api’i mai i te fa’atū’ati atu i te here o te ra’i.

Tē putapū nei rā paha ’outou, ’ua ātea ’outou i te here o te Atua ? Penei a’e tē fa’ateimaha nei te hō’ē pupu reo o te tarapapera’a ’e te pōuri i ni’a i tō ’outou ferurira’a, te mau poro’i e parau nei ia ’outou ’ua pēpē ’ino roa ’outou ’e te ’āhuehue, ’ua paruparu roa ’e ’ua ha’afaufa’a-’ore-hia, mea ta’a ’ē roa ’aore rā ’aita e ’avei’a nō te fāri’i i te here o te ra’i noa atu te huru. ’Ia fa’aro’o āna’e ’outou i teie mau mana’o, nō reira tē tāparu nei au ’a fa’aro’o mai i teie : E mea hape ana’e teie mau reo. E nehenehe tātou ma te ti’aturi tā’āto’a e tau’a ’ore i te ’ōfatifatira’a noa atu te huru ’o te fa’ata’a ia ’outou i te here o te ra’i—i te mau taime ato’a e hīmene tātou i te hīmene ’o te fa’aha’amana’o ia tātou ē, ’ua mā’iti tō tātou Fa’aora herehia ’e te hape ’ore ’ia « tā’irihia, ’ia ’ōfatifatihia, [’e] ’ia hūhutihia nō tātou », Pāpū maita’i, e ’īriti Iesu i te mau ha’ama ato’a nō te feiā tei ’ōfatifatihia. Nā roto i tōna ’ōfatifatira’ahia, ’ua riro mai ’oia ’ei mea maita’i roa, ’e e nehenehe ’oia e fa’ariro ia tātou ’ei mea maita’i roa, noa atu tō tātou ’ōfatifatira’ahia. ’Ua ’ōfatifatihia, ’ua vai ’ōtahi, ’ua mutumutu ’e ’ua tā’itihia ’oia—’e e nehenehe tātou e mana’o mai te reira tātou—’ia fa’ata’a-’ē-hia rā i te here o te Atua, ’aita ïa tātou mai te reira. « Ta’ata fatifati, here maita’i roa », mai tā te hīmene e parau nei.

’Ua ’ite paha ’outou i te tahi ’ohipa ’ōmo’e nō ni’a ia ’outou iho ’o tē ha’aputapū ia ’outou ’ei ta’ata e ’ore e ti’a ’ia herehia. Noa atu te tanora’a mau ’o tā ’outou i ’ite nō ni’a ia ’outou iho, ’ua hape ’outou i te ferurira’a ’ua fa’a’ātea ’ē ’outou ia ’outou iho i te here o te Atua. I te tahi taime e mea ’ino roa ’e te fa’a’oroma’i ’ore tātou ia tātou iho, mai te huru ra ē e’ita roa tātou e mana’o te reira nō vetahi ’ē. Tē vai ra e rave rahi ’ohipa tā tātou e rave i roto i teie orara’a, terā rā te au ’ore iāna iho ’e te fa’autu’ara’a ha’ama iāna iho ’aita te reira i ni’a i te tāpura. Noa atu te huru fa’ahapara’a o tā tātou e nehenehe e putapū, ’aita tōna rima i ha’apotohia. ’Aita. Tē vai roa noa ra te reira nō te fa’atoro ’ia « [roa’a] ia [tātou] te tauturu » ’e ’ia tauahi ia tātou tāta’itahi.

’Ia ’ore ana’e tātou e putapū i te māhanahana o te here hanahana, ’aita te reira i mo’e ’ē. Teie te mau parau iho a te Atua « e ta’a ’ē ho’i te mau mou’a, e huritumuhia ho’i te mau ’āivi ; e ’ore rā [tāna] hāmani maita’i ia [tātou] e ta’a ’ē ». Nō reira ’ei ha’apāpūra’a, te mana’o ē ’ua fa’aea te Atua i te here e ti’a i te reira ’ia āte’a ’ē roa i te tāpura o te mau tātarara’a e vai ra i roto i te orara’a, ’o te ’ore e ra’ehia ia tātou hou te mau mou’a e reva ’ē ai ’e te mau ’āivi e mo’e ’ē ai !

Mea au roa nā’u teie hi’ora’a o te mau mou’a ’ei fa’a’itera’a i te pāpūra’a mau o te here o te Atua. Teie hi’ora’a pūai e ’ite-fa’ahou-hia i roto i te mau fa’ati’ara’a a te feiā e haere nei i ni’a i te mau mou’a nō te fāri’i i te heheura’a, ’e i roto i te fa’ata’ara’a a Isaia nō « te mou’a o te fare o te Atua » tei « ha’amauhia i ni’a i te tupuai o te mou’a ». Te fare o te Atua ’o te fare ïa o tā tātou mau fafaura’a faufa’a roa ’e hō’ē vāhi i reira tātou e nehenehe ai e unuhi ’e ’ia hapu hōhonu roa i roto i te fa’a’itera’a o te here o tō tātou Metua nō tātou. ’Ua fa’ahiahia ato’a vau i te tāmahanahana tei tae mai i tō’u vaerua, ’ia tāpo’i vī ana’e vau iā’u i roto i tā’u fafaura’a o te bāpetizora’a ’e ’ia fārerei ana’e au i te hō’ē ta’ata e ’oto ra nō te hō’ē ta’ata tei pohe, ’aore rā nō te māuruuru ’ore, ’e ’o tā’u e tāmata nei i te tauturu iāna ’ia tāpe’a ’e ’ia fa’atere i tōna mau nīno’a mana’o. E mau rāve’a ānei teie ’o tā tātou e nehenehe e hapu hōhonu roa i roto i te here faufa’a rahi o te fafaura’a, hesed ?

Nō reira, mai te peu e’ita te here o te Atua e fa’arue ia tātou, nō te aha ’aita tātou e putapū tāmau noa i te reira ? Nō te fa’atere noa i tō tātou mau tīa’ira’a : ’Aita vau i ’ite. Terā rā ’ia herehia e ’ere roa atu hō’ē ā huru i te putapūra’a ’ua herehia, ’e e mau mana’o ri’i tō’u ’o te nehenehe e tauturu ia ’outou ’a ’imi ai ’outou i tā ’outou pāhonora’a i teie uira’a.

Penei a’e tē ’aro nei ’outou i te aumihi, te ’āravi, te ha’avare, te mo’emo’e, te māuruuru ’ore, ’aore rā te tahi atu ’arora’a pūai i roto i tō ’outou ’aravihi ’ia putapū i te here o te Atua nō ’outou. Mai te mea o te reira iho ā, e nehenehe teie mau mea e tāmarū ’aore rā e fa’ata’ere i tō tātou ’aravihi ’ia putapū mai tā tātou e nehenehe e putapū. Nō te tahi noa tau ri’i, e’ita paha ’outou e nehenehe e putapū i tōna here ’e te ’itera’a ’ua nava’i ïa. Tē uiui nei rā vau e nehenehe ānei ’outou e tāmatamata—ma te fa’a’ōroma’i—ma te mau rāve’a ta’a ’ē nō te fa’a’ite ’e nō te fāri’i i te here hanahana ? E nehenehe ānei ’outou e ’ōtohe ri’i i muri ’ia au i te mea e ’itehia i mua ia ’outou, ’e penei a’e e tu’u hō’ē ta’ahira’a i mua ’e te tahi fa’ahou e tae roa e ’ite atu ’outou i te hō’ē huru fenua ’ā’ano a’e, te rahi roa a’e e ti’a ai, tae roa ’ia « feruri tiretiera » ’outou nō te mea tē māta’ita’i nei ’outou i te mau fetia ’e tē ha’amana’o ra i te mau ao ’aita e nūmerahia ’e nā roto ia rātou i tō rātou Hāmani ?

Te hīmene a te mau manu, putapūra’a i te mahanaha o te mahana ’aore rā te mata’i haumārū ’aore rā te ua i ni’a i tō’u iri, ’e te mau taime e tu’u mai ai te nātura i tō’u mau tumu ’ite nō te māere i mua i te Atua—’ua fa’ati’a teie mau ’ohipa tāta’itahi ’ia ha’amau i te hō’ē tū’atira’a i te ra’i. Penei a’e e tauturu mai te tāmāhanahana a te mau hoa ha’apa’o maita’i ia ’outou ? Penei a’e te pehe ? ’Aore rā te tāvinira’a ? ’Ua tāpe’a ānei ’outou i te hō’ē pāpa’ira’a ’aore rā te hō’ē buka ’ā’amu nō te mau taime i reira tō ’outou tū’atira’a ’e te Atua i te pāpū-maita’i-ra’a ? Penei a’e e nehenehe ’outou e ani i te feiā tā ’outou i ti’aturi, ’ia fa’a’ite mai ia ’outou i tā rātou pū nō te tū’atira’a hanahana, ’a ’imi ai ’outou i te tāmarūra’a ’e te hāroaroara’a ?

Tē uiui nei au, ’āhani pai e ti’a ia Iesu e māiti i te hō’ē vāhi e nehenehe ’outou ’e ’ōna e fārerei, hō’ē vāhi mo’emo’e i reira ’outou e nehenehe ai e rōtahi ’ōtahi i ni’a iāna, e nehenehe ānei ’oia e māiti i tō ’outou iho vāhi hō’ē roa o te māuiui, te vāhi o tō ’outou hina’aro hōhonu roa a’e, hō’ē vāhi e’ita roa atu te tahi ta’ata e tae i roto ? I te hō’ē vāhi i reira ’outou e putapū ai te ’ōtahi-mau-ra’a e ti’a mau ai ia ’outou ’ia vai ’ōtahi noa, ’aita rā ’outou e vai mau ra, hō’ē vāhi paha ’ua rātere nā ’oia ana’e terā rā i reira ’ua fa’aineine a’ena ’oia nō te fārerei ia ’outou ’ia tae ana’e mai ’outou. Mai te peu tē tīa’i ra ’outou iāna ’ia haere mai, e nehenehe ānei ’oia e vai a’ena i reira ’e tē fa’atoro mai ra te rima ?

Mai te mea tē putapū nei ’outou i te ’īra’a o te here i teie tau nō tō ’outou orara’a, ’a tāmata i te tāpe’a māite mai i te reira ma te maita’i pāpū, mai te hō’ē tīti’a e tāpe’a i te pape. ’A ha’apahī atu i te reira nā te mau vāhi ato’a tā ’outou e haere nei. Hō’ē o te mau temeio o te fa’arava’ira’a hanahana ’oia ho’i ’ia tāmata ana’e tātou i te fa’a’ite i te here o Iesu, e ’ite tātou ia tātou iho ’ia fa’a’īhia i te raura’a o te parau tumu ē « o tei ti’a iāna i te tu’u i tōna ora iā’u nei, e roa’a ïa iāna te ora ».

’Ia fa’a’īhia i te here o te Atua e pāruru ia tātou i te mau vero o te orara’a, e fa’atupu ato’a rā i te mau taime ’oa’oa i te ’oa’oa rahi—tō tātou mau mahana ’oa’oa, ’ia hiti te mahana i ni’a i te ra’i, e fa’a’ana’ana-hau-atu-ā-hia e te mahana i roto i tō tātou vaerua.

’A vaiiho ’ia « a’ahia ’e ’ia fa’atumuhia » i roto i tō tātou Iesu ’e i roto i tōna here. ’A ’imi āna’e ’e ’a fa’aherehere ana’e i te mau ’ohipa i tupu ’o te fa’ati’a ia tātou ’ia putapū i tōna here ’e tōna mana i roto i tō tātou orara’a. E roa’a te ’oa’oa o te ’evanelia i te tā’āto’ara’a : ’eiaha noa i te feiā ’oa’oa, ’eiaha noa i te feiā fa’aturuma. Te ’oa’oa ’o tā tātou ïa fā, e ’ere i te hōro’a o tō tātou huru tupura’a. E mau tumu maita’i ana’e tō tātou nō te « ’oa’oa ’e ’ia fa’a’īhia i te here nō te Atua ’e nō te mau ta’ata ato’a ». ’Ia fa’a’īhia ho’i. I te i’oa o Iesu Mesia, ’āmene.

Fa’ata’ara’a

1. Ioane 21:20 ; hi’o ato’a Ioane 13:23 ; 19:26 ; 20:2 ; 21:7.

2. 2 Nephi 33:6 ; tu’uhia te ha’apāpūra’a.

3. Fa’atoro Bibilia, « Te Aroha ».

4. I roto i te fenua mo’a : Mataio 14:15–20. ’E i roto ia Marite : 3 Nephi 27:16.

5. Hi’o Mataio 22:35–40.

6. Hi’o 1 Ioane 4:12.

7. Nō te Pūai o te Feiā ’Āpī : E arata’i nō te rave i te mau mā’itira’a e ani nei ’ia « tauturu ia [vetahi ’ē] ’ia putapū i te here o te Metua i te ao ra nā roto ia [tātou] ».

8. « Iesu nō Nazareta, Fa’aora ’e Ari’i », Te mau Hīmene, N 101 ; hi’o ato’a Isaia 53:5 ; Mataio 26:26.

9. ’Ua tātara te peresideni Russell M. Nelson : « Hou noa a’e i tō te [Fa’aora] fa’asātaurora’ahia, ’ua parau ’oia ē ‘’ia tae i te rui toru, ’ua ’oti roa tā’u ’ohipa’ (Luka 13:32 ; tu’uhia te ha’apāpūra’a.] ’A feruri na i teie ! Te Fatu hara ’ore, hape ’ore—tei maita’i roa a’ena nā roto i tā tātou mau fa’aturera’a tāhuti—tei fa’a’ite i tōna iho huru o te maita’i roa ’o tei ’ore i tae’ahia atu ra. Tōna maita’i roa mure ’ore ’ua ’āpe’e atu i tōna ti’afa’ahoura’a ’e te fāri’ira’a i ’te mana ato’a i te ra’i ’e te ao ato’a nei […] i te mau fenua ato’a’ (Mataio 28:18 ; hi’o ato’a Te Ha’api’ira’a Tumu ’e te mau Fafaura’a 93:2–23] » (« Perfection Pending », Ensign, Novema 1995, 87). ’Ua tītau mai te peropheta Moroni i te tā’āto’ara’a ’ia « haere mai i te Mesia, ’e ’ia maita’i roa ’outou iāna, ’e ’a ha’apae ’outou i te mau mea paieti ’ore ra, ’e mai te mea e ha’apae ’outou i te mau mea paieti ’ore ra, ’e ’a here atu ai i te Atua ma tō ’outou mana ato’a, tō ’outou mana’o ato’a ’e te pūai ato’a, ’ei reira e nava’i ai tōna ra maita’i nō ’outou, ’e nā roto i tōna maita’i e riro ai ’outou ’ei mea maita’i roa i te Mesia ra » (Moroni 10:32).

10. « Savior of My Soul », 2024 Youth Album, ChurchofJesusChrist.org.

11. Hi’o Isaia 59:1.

12. « I Hea vau e fāri’i ai te hau ? », Te mau Hīmene, N°62.

13. Isaia 54:10.

14. ’Ei hi’ora’a, ’o Nephi (hi’o 1 Nephi 17;7), ’o Mose (hi’o Exodo 19:3), nā ’āposetōlo e hō’ē ’ahuru ma hō’ē (hi’o Mataio 28:16), e te Fa’aora (hi’o Mataio 14: 23 ; hi’o ato’a Salamo 24:3.

15. Isaia 2:2 ; hi’o ato’a īrava 3 E hōpoi teie hi’ora’a iā’u ’ia feruri hau atu i te mau ’ōpuara’a a te Fatu, ma te hōro’ara’a mai e rave rahi hānere hiero i tāna mau tamari’i nā te ao nei.

16. Tē ha’apāpū nei te ’ohipa i tupu iā’u i te parau mau o te parau fafau a te peresideni Nelson, e au ra nō te vāhi pāpū roa a’e nō te ora tei roto ïa i tā tātou mau fafaura’a nō te hiero (hi’o « Te hiero ’e tō ’outou niu pae vārua », Liahona, Nov. 2021, 96).

17. ’Ua ha’apāpū mai te peresideni Nelson ia tātou :

    « E tauturu te taime i roto i te hiero ia ’outou ’ia feruri tiretiera ! ’e ’ia fāri’i i te hō’ē ’itera’a ē, ’o vai mau ’outou, e riro mai ’outou mai ia vai, ’e i te huru o te orara’a tā ’outou e fāri’i e a muri noa atu. Te ha’amori-tāmau-ra’a i roto i te hiero, e ha’amaita’i te reira i te huru nō tā ’outou hi’ora’a ia ’outou iho ’e i te huru nō te fa’aora’a ia ’outou i roto i te fa’anahora’a nehenehe a te Atua. Tē parau fafau atu nei au i te reira ia ’outou ē […]

    « ’Aita hō’ē mea e tāmarū hau atu i tō ’outou vārua i roto i te mau taime māuiui. ’Aita hō’ē mea e ’īriti hau atu i te mau ra’i. ’Aita hō’ē mea ! » (« ’A ’oa’oa i te hōro’a o te mau tāviri o te autahu’ara’a », Liahona, Mē 2024, 121, 122).

18. Hi’o Mosia 18:8–10, 13. « Te fafaura’a o te bāpetizora’a ’o te hō’ē ïa ’itera’a pāpū huira’atira i tō tātou Metua i te ao ra nō nā e toru tītaura’a ta’a ’ē :Te tāvinira’a i te Atua, te ha’apa’ora’a i tāna mau fa’auera’a, ’e ’ia ineine nō te rave i te io’a o Iesu Mesia i ni’a ia tātou. Te tahi atu tuha’a o te fa’atū’ati-pinepine-hia i te fafaura’a o te bāpetizora’a—’oia ho’i « ’ia amo te tahi i tā tahi te tahi mau hōpoi’a’, ‘’ia ’oto ’a ’oto ai te feiā ’oto ra’, ’e ‘’ia tāmāhanahana ia rātou ’o tē au ’ia tāmāhanahanahia’ [Mosia 18:8–9]—e mau hōtu teie nō te ravera’a i te fafaura’a ’eiaha ïa i te hō’ē tuha’a o te fafaura’a iho. E mea faufa’a roa teie mau tuha’a nō te mea ’o teie te mau mea tā te hō’ē vaerua fa’afāriu-’āpī-hia e rave » (Dale G. Renlund, « Stronger and Closer Connection to God through Multiple Covenants » [Brigham Young University–Idaho devotional, 26 nō ’Ātopa 2023], byui.edu).

19. Hi’o Russell M. Nelson, « Te fafaura’a mure ’ore », Liahona, ’Ātopa 2022, 4–11.

20. Hi’o Russell M. Nelson, « ’A feruri tiretiera ! », Liahona, Novema 2023, 117, 118.

21. Mataio 16:25.

22. Ephesia 3:17.

23. Hi’o 2 Nephi 2:25 ; Russell M. Nelson, « Te ’oa’oa ’e te oraora pae vārua », Liahona,, Novema 2016, 81–84.

24. Mosia 2:4.

25. Hi’o Moroni 7:48.