E mea manuia te orara’a tāhuti !
Noa atu te mau tāmatara’a tā tātou pā’āto’a e fa’aruru nei, ’ua fa’anaho tō tātou Metua i te Ao ra i te ’ōpuara’a o te ’oa’oa ’ia ’ore tātou ’ia topa.
E rave rahi matahiti ’ua mā’itihia vau nō te ha’api’i i te ’utuāfare o te hō’ē tuahine rū’au i roto i tā’u pāroita. ’Aita ’oia i fāri’i i te hō’ē orara’a ’ōhie. E rave rahi mau fifi tōna i te pae nō ea ’e ’ua ro’ohia ’oia i te māuiui i te roara’a ’o tōna orara’a nō te hō’ē ’ati tei tupu i tōna tamari’ira’a i ni’a i te tahua ha’utira’a. ’Ua ta’a ’oia i tāna tāne i te 32ra’a o tōna matahiti, e maha tamari’i na’ina’i nō te aupuru ’e nō te ha’apa’o, e ’ua fa’aipoipo fa’ahou ’oia i te 50ra’a o tōna matahiti. ’Ua pohe te piti ’o tāna tāne i te 66ra’a o tōna matahiti, ’e ’ua ora noa ā teie tuahine e 26 matahiti ’ei vahine ’ivi.
’Ua ha’apa’o maita’i ’oia i tāna mau fafaura’a e tae roa atu i te hope’a, noa atu tōna mau fifi i te roara’a ’o tōna orara’a. E tuahine au rahi teie i te ’ohipa tuatāpapara’a tupuna, te haere i te hiero, te ha’aputu ’e i te pāpa’i i te mau ’ā’amu ’utuāfare. Noa atu e rave rahi tāmatara’a fifi tāna i fārerei, ’e ma te fē’a’a ’ore, ’ua ro’ohia ’oia i te pe’ape’a ’e te mo’emo’e i te tahi mau taime, terā rā, e mata ’oa’oa tōna, e huru maita’i ’e te auhoa.
E iva ’āva’e i muri a’e i tōna pohera’a, ’ua fāri’i te hō’ē ’o tāna mau tamaiti i te hō’ē ’itera’a fa’ahiahia i roto i te hiero. ’Ua ha’api’i mai ’oia nā roto i te mana o te Vārua Maita’i ē, e parau poro’i tā tōna māmā nāna. ’Ua paraparau mai te māmā iāna, ’eiaha rā ma te ’ite mata ’e te fa’aro’o tari’a i te mau parau. ’Ua tae mai teie parau poro’i pāpū i muri nei i roto i te ferurira’a o te tamaiti nā roto mai i tōna metua vahine : « Tē hina’aro nei au ’ia ’ite ’oe ē, e mea manuia te orara’a tāhuti, ’e tē hina’aro nei au ’ia ’ite ’oe ē, ’ua ta’a iā’u i teie nei nō te aha te mau mea ato’a i tupu [i roto i tō’u orara’a] i tupu ai mai te reira te huru—’e e maita’i te mau mea ato’a ».
E mea fa’ahiahia roa atu ā teie parau poro’i ’ia hi’o-ana’e-hia tōna huru tupura’a ’e te mau fifi tā teie tuahine i fa’aruru ’e i upo’oti’a.
Te mau taea’e ’e te mau tuahine, e mea manuia te orara’a tāhuti ! ’Ua ’ōpuahia te reira nō te ’ohipa ! Noa atu te mau tāmatara’a, te māuiui, ’e te mau fifi tā tātou pā’āto’a e fa’aruru nei, ’ua fa’anaho tō tātou Metua here, te pa’ari, ’e te ti’a roa i te Ao ra, i te ’ōpuara’a o te ’oa’oa ’ia ’ore tātou ’ia topa. Tē hōro’a nei tāna fa’anahonahora’a ia tātou i te hō’ē rave’a nō te ti’a i ni’a a’e i tō tātou mau paruparu i te tāhuti nei. ’Ua parau te Fatu ē, « O teie ho’i tā’u ’ohipa e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei ».
Terā rā, mai te mea ē, e hina’aro tātou e fari’i i te « ’ohipa ’e te hanahana » ’o te Fatu, ’oia ho’i « te tāhuti ’ore ’e te ora mure ’ore », e ti’a ia tātou ’ia feruri ē, e ha’api’ihia tātou, ’e e haere nā roto i te auahi a te ta’ata tāmā—i te tahi mau taime, e tae roa i tō tātou mau ’ōti’a hope’a roa. Te ’ape-roa-ra’a i te mau fifi, te mau tāmatara’a, ’e te mau fifi o teie nei ao, ’o te ha’apaera’a ïa i te ’ohipa e tītau-mau-hia ’ia manuia te orara’a tāhuti.
’E nō reira, ’eiaha ïa tātou e maere ’ia tae mai te mau taime fifi i ni’a ia tātou. E fārerei tātou i te mau huru tupura’a o tē tāmata ia tātou, ’e te mau ta’ata ’o tē tauturu ia tātou ’ia fa’a’ohipa i te aroha mau e te fa’a’oroma’i. Terā rā, e ti’a ia tātou ’ia fa’a’oroma’i i tō tātou mau fifi ’e ’ia ha’amana’o, mai tā te Fatu i parau :
« ’E ’o tē tu’u atu i tōna ora i raro i roto i tā’u ’ohipa, nō tō’u nei i’oa, e ’ite fa’ahou mai ā ïa i te reira, ’oia te ora mure ’ore.
« Nō reira, ’eiaha e mata’u i tā ’outou mau ’enemi, nō te mea ’ua tapu vau i roto i tō’u ’ā’au, tē nā reira mai nei te Fatu, ’e e tāmata vau ia ’outou i roto i te mau mea ato’a, e ha’apa’o ānei ’outou i tā’u fafaura’a ’ia ’itehia ē ’ua au maita’i ’outou ».
’Ia hepohepo ana’e tātou ’e ’aore rā ’ia ahoaho ana’e tātou nō tō tātou mau fifi, ’e ’aore rā, ’ia mana’o ana’e tātou ē, e nehenehe tātou e fāri’i hau atu i tā tātou tuha’a ti’a nō te mau fifi o te orara’a, e nehenehe tātou e ha’amana’o i tā te Fatu i parau i te mau tamari’i nō ’Īserā’ela :
E ha’amana’o ho’i ’oe i taua ’ē’a [ato’a] tā tō ’Āua tā Iehova i arata’i ia ’oe nā roto i te medebara ra, ’e a maha a’e nei ’ahurura’a i te matahiti, ’ei fa’aha’aha’ara’a ia ’oe, ’e ’ei tāmatara’a ia ’oe ’e ’ia ’itea i roto i tō ’oe na ’ā’au ; ’e tō ’oe ha’apa’ora’a i tāna parau ra, ’e te ’orera’a » ”
Mai ia Lehi i te ha’api’ira’a i tāna tamaiti ia Iakoba :
« ’Ua pohe ’oe i te mau ’ati ’e te ’oto rahi […] ’Āre’a, e ha’amo’a ’oia [te Atua] i tō ’oe mau ’ati ’ei maita’i nō ’oe […] Nō reira, i ’ite ai au ē, ’ua fa’aorahia ’oe, nō te parau ti’a a tō ’oe Fa’aora ».
Nō te mea teie orara’a, e tahua tāmatara’a ïa ’e « ’Ia ro’ohia mātou i te ’ati, ’ia fa’a’orehia te hau », e mea faufa’a roa ’ia ha’amana’o i teie parau a’o ’e teie parau fafau e ’itehia i roto i te Mosia 23 e parau ra nō ni’a i te mau tāmatara’a o te orara’a nei :xx
I tō’u ’āpīra’a, ’ua ’ite au i te māuiui rahi ’e te ha’amā nō te mau ’ohipa parau-ti’a ’ore a te tahi atu ta’ata, ’o tei fa’a’ino i tō’u faufa’a ’e tō’u mana’o i mua i te Fatu e rave rahi matahiti te maoro. Terā rā, tē fa’a’ite pāpū nei au ē, e nehenehe tā te Fatu e ha’apūai ia tātou ’e e fa’aora ia tātou i roto i te mau fifi ato’a tā tātou e tītauhia ’ia fārerei i roto i tō tātou fa’aeara’a i roto i teie peho roimata.
’Ua mātau tātou i te ’ohipa i tupu i ni’a ia Paulo :
« ’E ’ia ’ore au ’ia teitei rahi hua i te rahi ’o tei fa’a’itehia mai iā’u ra, i tu’uhia mai te hō’ē tara i roto i tā’u tino nei e melahi nā Satani ’ei ha’avī mai iā’u ’ia ’ore au ’ia teitei rahi hua.
« ’E e toru ho’i a’u anira’a atu i te Fatu i taua mea ra, ’ia fa’ata’a-’e-hia iā’u.
’Ua parau maira ’oia iā’u, atu te Fatu iāna e, « tō’u nei maita’i ’ātire ïa tā ʼoe : tō’u nei maita’i atire ïa tā ’oe :ʼei te paruparu e taʼa maitaʼi roa ai tō’u pūai. ’E teienei, e mea ’oa’oa ïa iā’u te ’ārue i tō’u nei paruparu ’ia vai māite te pūai ’о te Mesia i ni’a iā’u nei ».
’Aita tātou i ’ite e aha te « tara i roto i [tō Paulo] tino ». ’Ua mā’iti ’oia ’eiaha e fa’a’ite ē, e ma’i tino anei te reira, e paruparu anei i te pae ferurira’a e ’aore rā e fa’ahemara’a. Terā rā, ’aita e tītauhia ia tātou ’ia ’ite i taua ha’apāpūra’a ra nō te ’ite ē, ’ua aro ’oia ’e ’ua tāparu ’oia i te Fatu nō te ani i te tauturu, ’e i te pae hope’a, ’ua tauturu te pūai ’e te mana ’o te Fatu iāna nā roto i te reira.
Mai ia Paulo, ’ua ha’apūaihia vau i te pae ferurira’a ’e i te pae vārua nā roto i te tauturu a te Fatu, ’e i te pae hope’a ’ua ’ite au i muri a’e i te mau matahiti e rave rahi ē, ’ua riro noa vau ’ei ta’ata faufa’a ’e ’ua ti’a iā’u ’ia fāri’i i te mau ha’amaita’ira’a o te ’evanelia. ’Ua tauturu mai te Fa’aora iā’u ’ia upo’oti’a i ni’a i tō’u mau mana’o ti’a-mā-’ore ’e ’ia fa’atae i te fa’a’orera’a hara i te ta’ata hara. ’Ua māramarama vau ē, ’ua riro te Tara’ehara a te Fa’aora ’ei tao’a hōro’a nā’u iho ’e ’ua here maita’i hope roa tō’u Metua i te Ao ra ’e tāna Tamaiti iā’u. Maoti te tāra’ehara a te Fa’aora, e mea manuia te orara’a tāhuti.
Noa atu ē, ’ua ha’amaita’ihia vau i te pae hope’a i te ’itera’a e mea nāhea te Fa’aora i te fa’aorara’a iā’u ’e i te ti’ara’a i pīha’i iho iā’u nā roto i taua mau ’ohipa i tupu ra, ’ua ’ite maita’i au ē, te huru pe’ape’a o tō’u tau taure’are’ara’a, ’o tō’u iho ïa tere ’e tō’u ’itera’a, ’e ’eita te fa’aotira’a ’e te fa’ahope’ara’a e nehenehe e hurihia i ni’a i te feiā o tei māuiui ’e te māuiui noa nei rātou i te haere’a ti’a ’ore ’o vetahi ’ē.
’Ua ’ite au ē, e nehenehe te mau ’ohipa i tupu i roto i te orara’a—te maita’i ’e te ’ino—e ha’api’i mai ia tātou i te mau ha’api’ira’a faufa’a. ’Ua ’ite au i teie nei ’e te fa’a’ite pāpū nei au ē, e mea manuia te orara’a tāhuti ! Tē ti’aturi nei au ē, nō te ha’aputuputura’a o te mau ’ohipa i tupu i roto i tō’u orara’a—te maita’i ’e te ’ino—e aroha tō’u nō te feiā hara ’ore tei ro’ohia i te mau ’ohipa a vetahi ’ē ’e te aroha nō te feiā tei hepohepo.
Tē ti’aturi mau nei au ē, nō te mau ’ohipa i tupu i roto i tō’u orara’a—te maita’i ’e te ’ino—e hāmani maita’i a’e au i te tahi atu mau ta’ata, e rave au i te tahi atu mau ta’ata mai tā te Fa’aora e rave, e māramarama rahi a’e tō’u nō te ta’ata hara, ’e e ha’apa’o maita’i hope tō’u ’Ia ti’aturi ana’e tātou i ni’a i te aroha o te Fa’aora ’e ’ia ha’apa’o ana’e tātou i tā tātou mau fafaura’a, e.nehenehe tātou e riro ei hi’ora’a nō te mau fa’ahope’ara’a rahi o te Tāra’ehara a te Fa’aora.
Tē fa’a’ite atu nei i te tahi hi’ora’a hope’a ē, e mea manuia te orara’a tāhuti.
Te metua vahine o Elder Hales, Lois VandenBosch, ’e tōna metua vahine, Klea VandenBosch.
’Aita tō’u metua vahine i fāri’i i te tere ’ōhie i te tāhuti nei. ’Aita ’oia i fāna’o i te mau ha’amaita’ira’a ’aore ra te mau fa’aturara’a o te ao nei, ’e ’aita ’oia i fāna’o i te mau rāve’a ha’api’ira’a i muri a’e i te fare ha’api’ira’a tuarua. ’Ua ro’ohia ’oia i te polio i tōna tamari’ira’a, ’o tei fa’atupu i te māuiui ’e te hepohepo i roto i tōna ’āvae ’aui i te roara’a o tōna orara’a. I tōna pa’arira’a, e rave rahi mau huru fifi o te orara’a i te pae tino ’e i te pae moni tāna i fārerei, terā rā, ’ua ha’apa’o maita’i ’oia i tāna mau fafaura’a ’e ’ua here ’oia i te Fatu.
I te 55ra’a o te matahiti ’o tō’u metua vahine, ’ua pohe tō’u tuahine pa’ari, ma te vaiiho mai i te hō’ē ’aiū tamahine e va’u ’āva’e te pa’ari, tō’u iramutu [nièce], ’aita e metua vahine. Nō te mau tumu e rave rahi, ’ua aupuru ’o Mama i tā’u iramutu i te roara’a 17 matahiti, i roto i te tahi mau huru fifi pinepine. Terā rā, noa atu teie mau ’ohipa i tupu, ’ua tāvini ’oia ma te ’oa’oa ’e te hina’aro mau i tōna ’utuāfare, te feiā tāpiri mai, ’e te mau melo o te pāroita, ’e ’ua tāvini ’ei rave ’ohipa i roto i te hiero e rave rahi matahiti te maoro. I te mau matahiti hope’a ’o tōna orara’a, ’ua ro’ohia ’o māmā i te hō’ē huru ma’i roro, ’ua huru ’ē pinepine ’oia, ’e ’ua tāpe’ahia ’oia i roto i te hō’ē fare ma’i. Te vahi pe’ape’a, ’o ’oia ana’e ïa i te taime a pohe ai ’oia ma te mana’o-’ore-hia.
E rave rahi ’āva’e i muri a’e i tōna pohera’a, ’ua moemoeāhia vau, ’e ’e’ita roa atu te reira e mo’ehia iā’u. I roto i tō’u moemoeā, tē pārahi ra vau i roto i tō’u piha tōro’a i te Fare Fa’aterera’a ’o te ’Ēkālesia. ’Ua tomo mai ’o māmā i roto i te piha tōro’a. ’Ua ’ite au ē, nā te ao vārua mai ’oia i te haere. E ha’amana’o tāmau noa vau i te mau mana’o tā’u i fāri’i. ’Aita ’oia i parau i te hō’ē noa a’e parau, terā rā, ’ua fa’a’ite mai ’oia i te hō’ē huru nehenehe pae vārua o tā’u i ’ore roa atu i ’ite nā mua a’e nei, ’e e mea fifi roa nā’u ’ia fa’ata’a i te reira.
E mea maere mau tōna hōho’a mata ’e tōna huru ! Tē ha’amana’o nei au i tō’u paraura’a iāna ē, « E māmā, e mea nehenehe roa ’oe ! » nō te parau i tōna mana vārua ’e i tōna nehenehe. ’Ua aroha mai ’oia iā’u—ma te paraparau ’ore. ’Ua ’ite au i tōna here iā’u, ’e ’ua ’ite au i taua taime ra ē, tē ’oa’oa ra ’oia, ’e ’ua fa’aorahia ’oia i tōna mau ha’ape’ape’ara’a ’e tōna mau fifi o teie nei ao, ’e tē tia’i nei ’oia ma te ’ana’anatae i « te hō’ē ti’a-fa’ahou-ra’a hanahana ». ’Ua ’ite au ē, nō māmā, ’ua manuia te orara’a tāhuti—’e manuia ato’a te reira nō tātou.
Te ’ohipa ’e te hanahana ’o te Atua o te fa’atupura’a ïa i te tāhuti ’ore ’e te ora mure ’ore ’o te ta’ata nei. ’Ua riro te mau ’ohipa o te tāhuti nei ’ei tuha’a nō te tere o tē fa’ati’a ia tātou ’ia tupu i te rahi ’e ’ia haere i taua tāhuti ’ore ra ’e te ora mure ’ore. ’Aita tātou i tonohia mai i ’ō nei nō te hi’a, nō te manuia rā i roto i te fa’anahora’a a te Atua nō tātou.
’Ua ha’api’i te ari’i Beniamina : « ’Ua hina’aro ho’i au ’ia ha’amana’o ato’a ’outou i te maita’i ’e te ’oa’oa ’o te ta’ata e ha’apa’o i te mau fa’auera’a a te Atua. Inaha ho’i, e ha’amaita’ihia rātou i te mau mea ato’a, ’o te tino nei ’e ’o te vārua ato’a ho’i ; ’e ’ia ha’apa’o maita’i rātou ē tae noa atu i te hope’a ra, e fāri’ihia ïa rātou i te ra’i ra, ’ia pārahi rātou ’e te Atua ato’a i roto i te ’oa’oa hope ’ore ra ». ’Oia ho’i, e mea manuia te orara’a tāhuti !
Tē fa’a’ite pāpū nei au ē, a fari’i ai tātou i te mau ’ōro’a o te ’evanelia, a rave ai tātou i te mau fafaura’a ’e te Atua, ’e i muri iho a ha’apa’o ai tātou i taua mau fafaura’a ra, a tātarahapa ai, a tāvini ai i te tahi atu mau ta’ata, ’e a fa’a’oroma’i ai e tae roa atu i te hope’a, e nehenehe ato’a tātou e fāri’i i te ha’apāpūra’a ’e te ti’aturi hope i te Fatu ē, e mea manuia te orara’a tāhuti ! Tē fa’a’ite pāpū nei au nō ni’a ia Iesu Mesia, ’e nā roto i te aroha ’e te tāra’ehara a te Fa’aora, e tupu tō tātou orara’a hanahana nō a muri a’e, i pīha’i iho i tō tātou Metua i te Ao ra. I te i’oa o Iesu Mesia, ’āmene.