Tā’amuhia ia Iesu Mesia : Rirora’a ’ei miti nō te fenua

Nā Elder José A. Teixeira

Nō te peresidenira’a nō te Hitu ’Ahuru

’A vai tā’amu noa ai tātou i te Fatu, e ’ana’ana mā tōna huru mau tō tātou orara’a i tōna māramarama, ’e e riro mai tātou ’ei « miti nō te fenua ».

’Ua ha’api’i te Fa’aora ē, « ’ia pi’i-ana’e-hia [tātou] i [tāna] ’evanelia mure ’ore, ’e i te fafaura’a mure ’ore, ’ua fa’arirohia ïa [tātou] mai te miti nō te fenua nei ». ’Ua hāmanihia te miti nā roto e piti mātēria e tā’amu-’āmui-hia. E’ita tātou e riro mai ’ei miti nā roto noa ia tātou iho ; mai te peu e hina’aro tātou ’ia riro ’ei miti nō te fenua, e ti’a ia tātou ’ia tā’amuhia i te Fatu, ’e ’o te mea ïa tā’u e ’ite nei ’ia ’āmui ana’e atu vau i te mau melo o te ’Ēkālesia nā te ao nei—tē ’ite nei au i te mau melo ha’apa’o o te ’Ēkālesia tei tā’amuhia i te Fatu, e tūtava nei i roto tā rātou tauto’ora’a ’ia tāvini ia vetahi ’ē ’e ’ia riro ’ei miti nō te fenua.

’Ua riro tō ’outou ha’apa’o ’aueue ’ore ’ei hi’ora’a ’ana’ana. ’Ua fa’ari’ihia tā ’outou tāvinira’a ’e ’ua poiherehia.

’Ua fa’a’ite mai tō tātou u’i ’āpī i te itoito fa’ahiahia mau ’e te paieti. ’Ua tauahi rātou ma te ’ana’anatae i te ’ohipa ’ā’amu ’utuāfare, ’e tō rātou haere-pinepine-ra’a i te fare o te Fatu e fa’a’itera’a pāpū nō tō rātou ha’apa’o maita’i. Tō rātou hina’aro rahi ’ia pūpū i tō rātou taime ’e te itoito nō te tāvini i roto i te mau misiōni ’ati a’e te ao nei, e fa’a’ite mai i te hō’ē fa’aro’o hōhonu ’e te vai maoro. ’Aita rātou i fa’ari’i noa e ’āmui mai, ’ua ’īriti rā i te arati’a nō te riro mai ’ei mau pipi tei tā’amuhia ia Iesu Mesia. ’Ua fa’a’ana’ana tā rātou tāvinira’a i te māramarama ’e te tīa’ira’a ma te ha’aputapūra’a e rave rahi oarara’a. ’Ia ’outou, te u’i ’āpī nō te ’Ēkālesia, tē fa’a’ite atu nei mātou i tō mātou ’ā’au māuruuru nō tā ’outou tāvinira’a fa’auru mau. E ’ere noa ’outou i te ’ananahi nō te ’Ēkālesia, nō teie ato’a rā tau. ’E e miti mau ’outou nō te fenua !

’Ua here au i te Fatu ia Iesu Mesia ’e tē putapū nei au ’ua ha’amaita’ihia vau e te rāve’a ’ia tāvini nā muri ia ’outou i roto i te ’Ēkālesia a te Fatu. Tō tātou hō’ēra’a ’e tō tātou pūai, ’ua fa’atumuhia i roto i te fa’aro’o ’āmui, e ha’apāpū nei ia tātou ē ’aita tātou i vai ’ōtahi noa i roto i teie tere. Ma te ’āmui, e nehenehe tātou e tāmau noa i te patu i te bāsileia o te Atua, ma te fa’a’a’ahia i roto i te tāvinira’a, te here ’e te fa’aro’o ’aueue ’ore.

’A ha’api’i ai Iesu Mesia i te pae Roto nō Galilea, ’ua fa’a’ohipa pinepine ’oia i te mau mātēria mātauhia i te mau mahana ato’a nō tāna a’ora’a, nō te fa’atae i te mau parau mau hōhonu pae vārua. Hō’ē o te reira mau mātēria ’o te miti ïa. ’Ua parau Iesu, « e miti [’outou] nō te fenua nei », hō’ē fa’ahitira’a parau tao’a rahi i roto i te aura’a ’e te tātarara’a, nō te feiā ihoā rā nō tōna tau, ’o tei hāro’aro’a i te faufa’a rahi o te huru raura’a o te miti.

Te rāve’a tahito nō te ha’aputura’a i te miti i Algarve, i te tuha’a fenua apato’a o tō’u fenua ’āi’a i Pōtītī, e ravera’a e rave rahi tauatini matahiti i te tau o te ’ēmēpera Roma. E mea fa’ahiahia ’ia ’ite ē, te mau rāve’a tei fa’a’ohipahia e te mau ta’ata hāmani miti, tei mātauhia i te pi’i te mau maranotos, ’aita ïa i taui rahi roa mai taua taime mai ā. ’Ua fa’a’ohipa teie mau ta’ata ’aravihi itoito i te mau ravera’a tahito, te rave-rima-ra’a i tā rātou ’ohipa, ma te tāpe’ara’a i te faufa’a ’āi’a ’o tei vai noa i te roara’a o te mau tenetere.

’Ua fa’ati’a teie rāve’a tahito ’ia ’ō’oti mai i te mea tei pi’ihia te « tiare o te miti ». Nō te fa’ahiahia maita’i i te fa’anahora’a fifi nō te ’ō’oti i te tiare o te miti, e mea faufa’a ’ia māramarama i te vāhi i reira ’oia e hāmanihia ai. E hōro’a mai te mau matapuna [marais] ’ava’ava i te pae miti nō Algarve, i te vāhi tano maita’i nō te hāmani i te miti. E arata’ihia te pape miti i roto i te mau pū vai pāpa’u, tei pi’ihia te matapuna ’ava’ava, i reira e vaiihohia te pape miti ’ia marō i raro a’e i te mahana. ’Ia pau ana’e te pape, e hāmani te tiare o te miti i te mau terehē (cristale) nā ni’a i te matapuna ’ava’ava. E mea teatea maita’i teie mau terehē ’e e mea ta’a ’ē ihoā tōna huru ’e tōna patara’a. E pā’au [écumer] maita’i te mau marnotos i te mau terehē nā ni’a i te pape, ma te fa’a’ohipa i te mau mauiha’a ta’a ’ē, hō’ē fa’anahora’a e tītauhia te ’aravihi ta’a ’ē ’e te tano maita’i. I Pōtītī, ’ua pi’ihia teie fāito maita’i roa o teie miti te « tirīmu miti » nō te mea, e nehenehe te reira e pā’au-maita’i-hia mai te tirīmu [crème] e mara’a i ni’a i te ū. Teie miti maita’i e mea poiherehia te reira nō tōna ateate ’e tōna namurea (saveur) ta’a ’ē, nō te reira ’ua riro ’ei ’āno’i ma’a e ani-rahi-hia i roto i te ’ihi hāmanira’a mā’a.

Mai te mau marnotos e rohi nei ma te mau tauto’ora’a rahi nō te pāpū maita’i e ’ō’oti mai i te miti maita’i roa a’e, tātou, ’ei nūna’a nō te fafaura’a a te Fatu, e ti’a ia tātou ’ia tāmau noa i te rave mai tā tātou e nehenehe, ’ia riro tō tātou here ’e tō tātou hi’ora’a maita’i, hau atu e ti’a ai, ’ei ’ana’ana ateate nō tō tātou Fa’aora ’o Iesu Mesia.

I tahito ra, ’ua hau atu te miti i te ha’amitira’a noa i te mā’a—’ua riro ’ei ha’avaimaorora’a faufa’a roa ’e e taipe nō te ateate ’e te fafaura’a. ’Ua ’ite te ta’ata ē e mea faufa’a roa te miti nō te ha’avaimaoro i te mā’a ’e nō te ha’ateitei i tō rātou monamona. ’Ua ta’a ato’a ia rātou i te tupura’a ’ino ’ia mo’e ana’e tōna namurea ’aore rā tōna monamona, nā roto i te vi’ivi’ira’a ’e te tāpapera’a.

Mai te miti e nehenehe e mo’e tōna monamona, e nehenehe ato’a e mo’e tō tātou itoito pae vārua mai te mea e tāpetepete tō tātou fa’aro’o ia Iesu Mesia. E nehenehe tō tātou huru i rāpa’e e vai noa, ’aita ana’e ra e fa’aro’o pūai i roto, e mo’e tō tātou ’aravihi ’ia rave i te ta’a-’ē-ra’a i roto i te ao nei ’e ’ia fa’afaura mai i te maita’i a’e i roto i te feiā e ha’ati ra ia tātou.

Nō reira, nāhea tātou ’ia arata’i i tō tātou itoito ’e tā tātou tauto’ora’a nō te rave i te ta’a-’ē-ra’a ’e ’ia riro ’ei tauira’a ’o tā te ao nei e hina’aro i teie mahana ? Nāhea tātou ’ia fa’aherehere i te ti’ara’a pipi ’e ’ia riro tāmau noa ’ei fa’aurura’a maita’i ?

Tē tāvevo noa nei ā te mau parau a tō tātou peropheta here i roto i tō’u ferurira’a : « Tē hina’aro nei te Atua ’ia ’ohipa ’āmui tātou ’e ’ia tauturu i te tahi ’e te tahi. Nō reira ’ua tono mai ’oia ia tātou i te fenua nei i roto i te mau ’utuāfare ’e ’ua fa’anaho ia tātou ’ei mau pāroita ’e ’ei mau titi. Nō reira tē ani nei ’oia ia tātou ’ia tāvini ’e ’ia aupuru i te tahi ’e te tahi. Nō reira tē ani nei ’oia ia tātou ’ia ora i roto i te ao nei ’eiaha rā ’ia riro nō tō te ao nei ».

’Ia ’ī ana’e tō tātou orara’a i te fā ’e te tāvinira’a, e ’ape tātou i te paruparu pae vārua ; i te tahi a’e pae, ’ia ’ere ana’e tō tātou orara’a i te fā hanahana, i te tāvinira’a mau nō vetahi ’ē ’e te mau rāve’a mo’a nō te feruri-māite-ra’a, e riro tātou i te fa’aihuihu [etouffer] marū noa i roto i tā tātou iho ’ohipara’a ’e tō tātou iho mau hina’aro, ma te ha’afifi i tō tātou namurea. Te rā’au tinai nō te reira ’o te tāmau-noa-ra’a ’ia vai i roto i te tāvinira’a—ma te fa’aō-pāpū-ra’a i roto i te mau ’ohipa maita’i ’e i roto i te ha’amaita’ira’a ia tātou iho ’e te tōtaiete tā tātou e ora nei.

Tō’u mau taea’e ’e mau tuahine, e ha’amaita’ira’a rahi mau nō tātou pā’āto’a i teie mahana ’ia riro nō te ’Ēkālesia a Iesu Mesia ’e ’ia roa’a te rāve’a nō te tāvini i roto i tāna ’Ēkālesia. E nehenehe tō tātou tupura’a e mea rau, e nehenehe rā tātou pā’āto’a e rave i te hō’ē ta’a-’ē-ra’a.

’A ha’amana’o i te mau marnotos, te mau rave ’ohipa o te miti ; tei fa’a’ohipa i te mau mauiha’a ’ōhie nō te ’ō’oti i te terehē maita’i roa a’e, te miti maita’i roa a’e. E nehenehe ato’a tātou e rave i te mau ’ohipa ’ōhie, ē ma te mau tauto’ora’a tāmau i roto i te mau ’ohipa ha’iha’i ’e te faufa’a, e nehenehe e fa’ahōhonu i tō tātou ti’ara’a pipi ’e tā tātou fafaura’a ia Iesu Mesia. Teie e maha rāve’a ’ōhie e mea hōhonu ra nā roto i te reira tātou e nehenehe e tūtava nō te riro mai ’ei « miti nō te fenua » :

Te tu’ura’a te fare o te Fatu i rōpū i tā tātou ha’amorira’a. I teienei ’ua piri fātata mai te mau hiero, te tu’ura’a ’ei ’ohipa mātāmua te ha’amorira’a tāmau i roto i te fare o te Fatu, e tauturu ia tātou ’ia rōtahi i ni’a i te mau mea faufa’a a’e ’e ’ia tāpe’a fa’atumu noa i tō tātou orara’a i ni’a i te Mesia. I roto i te hiero, e ’ite mai tātou te tumu o tō tātou fa’aro’o ia Iesu Mesia ’e te vaerua o tō tātou ha’amorira’a iāna.
’Ia ti’amā i roto i tā tātou mau tauto’ora’a nō te ha’apūai ia vetahi ’ē, ma te ora-’āmui-ra’a i te ’evanelia. E nehenehe tātou e ha’apūai i tō tātou mau ’utuāfare nā roto i te mau tauto’ora’a tāmau ’e te hina’aro mau, nō te hōpoi mai i te mau parau tumu o te ’evanelia i roto i tō tātou orara’a ’e tō tātou ’utuāfare.
’Ia vai ineine nō te fa’ari’i i te hō’ē pi’ira’a ’e ’ia tāvini i roto ’Ēkālesia. E fa’ati’a te tāvinira’a i roto i tā tātou mau ’āmuira’a o te fenua ia tātou ’ia turu i te tahi ’e te tahi ’e ’ia tupu ’āmui. Noa atu e ’ere te tāvinira’a i te mea ’ōhie, e riro noa te reira ’ei ha’amaita’ira’a.
’E te hōpe’a, ’a fa’a’ohipa i te mau mauiha’a tūreiara’a ma te hō’ē ’ōpuara’a. I teie mahana, e fa’ati’a te mau mauiha’a tūreiara’a nūmeri ia tātou ’ia tū’ati atu i nā mua a’e nei. Mai te rahira’a o ’outou, tē fa’a’ohipa nei au i teie mau mauiha’a nō te tū’ati atu i te mau taea’e ’e mau tuahine o te ’Ēkālesia ’e i tō’u ’utuāfare ’e te mau hoa. Ma te tūreiara’a ia rātou, e ’ite au i te ha’afātatara’a ia rātou, e nehenehe mātou e aupuru i te tahi ’e te tahi i roto i te mau taime e hina’arohia, ’ia ’ore ana’e mātou e vai tino atu i reira. Mea pāpū ’ua riro teie mau mauiha’a ’ei hō’ē ha’amaita’ira’a, e nehenehe ato’a rā te reira e fa’aātea ia tātou i te hōhonura’a o te ha’ara’a mau ’e e arata’i atu ia tātou ’ia rave i te mau peu o te ha’amau’a i tō tātou taime i roto i te mau ’ohipara’a faufa’a ’iti. Tē tītaura’a ’ia riro ’ei miti nō te fenua, e mea hau atu ïa i te māta’ita’i tāmau noa i te mau reels i ni’a i te hō’ē paruai na’ina’i.

Ma te tāpe’ara’a i te fare o te Fatu i rōpū i tō tātou orara’a, te ha’apūaira’a ia vetahi ’ē ma te hina’aro mau ’ia ora i te ’evanelia, te fa’ari’ira’a i te mau pi’ira’a ’ia tāvini ’e te fa’a’ohipara’a i te mau mauiha’a nūmeri ma te hō’ē ’ōpuara’a, e nehenehe tātou e pāruru i tō tātou itoito pae vārua. Mai te miti i roto i tōna huru ateate roa a’e e mana tōna ’ia ha’amaita’i ’e ’ia fa’ahereherehia, nā reira ato’a nō tō tātou fa’aro’o ia Iesu Mesia, ’ia fa’a’amu-ana’e-hia ’e ’ia pāruru-ana’e-hia nā roto i tā tātou tāvinira’a huru Mesia ’e tō tātou here.

’A vai tā’amu noa ai tātou i te Fatu, e ’ana’ana ma tōna huru mau tō tātou orara’a i tōna māramarama, ’e e riro mai tātou mai te « miti nō te fenua ». I roto i teie tauto’ora’a, ’aita noa tātou i ha’amaita’i rahi i tō tātou orara’a, ’ua ha’apūai ato’a rā tātou i tō tātou mau ’utuāfare ’e tō tātou mau ’āmuitahira’a. ’A tītau ana’e i te tāpe’a maite i teie tā’amura’a ’e te Fatu, ’eiaha roa ’ia mo’e tō tātou namurea ’e ’ia riro ’ei terehē iti ha’iha’i o te miti o tā te Fatu e hina’aro ’ia riro mai tātou. I te i’oa o Iesu Mesia, ’āmene.