E arata’i te mau parau a te Mesia ’e te Vārua Maita’i ia tātou i te parau mau
E tauturu te ’itera’a i teie nei ’opuara’a faufa’a rahi ’ia tātou i te ’itera’a i tō tātou hīro’a atuara’a ’ei tamari’i nā te Atua ’e tō tātou fa’ata’ara’ahia ’ia riro tātou mai Iāna ra te huru.
’O te Atua tō tātou Metua i te ao ra. E mau tamari’i vārua tātou nāna, i hāmanihia tātou ’ia au i tōna hōho’a. Nō reira, tātou tāta’i tahi, ’ei tamari’i nā te Atua, e fa’anahora’a atuara’a tō tātou mai iāna ra te huru.
I ora nā tātou ’ei vārua i pīha’i iho iāna i te ra’i ra hou tātou ’a haere mai ai i te fenua nei. ’Ei metua nō tō tātou vārua, ’ua aroha te Metua i te ao ra ’ia tātou, ’ua hina’aro i te mea maita’i nō tātou ia fāri’i tātou i te teiteira’a nō te mau ha’amaita’ira’a, ’oia ho’i te tāhuti-’ore ’e te ora mure ’ore. ’Ia au i te ’ōpuara’a, ’ua hōro’ahia ia tātou, ’ei tamari’i vārua, te ti’amāra’a nō te mā’iti i tāna ’ōpuara’a. I te haerera’a mai i ni’a i te fenua, e vaiiho tātou te aro o te Atua, e mo’e ia tātou i to tātou orara’a hou te tāhuti nei, e fāri’i tātou te mau tino ’i’o ’e te ’ivi, te verura’a i te ’ite-aravihi, ’e te fa’ati’ara’a i te fa’aro’o. Nā roto i teie tino ’i’o ’e te ’ivi, mai te ta’ata nātura, e topa tātou i roto i te fa’ahemara’a, e repohia tātou ’e e ātea ato’a i te aro o te Atua, ’e e’ita e ti’a ia tātou e ho’i fa’ahou i mua i tōna aro hanahana. Nō te aroha o te Metua i te ao ra ia tātou, ’ua tono mai ’oia i tāna Tamaiti fanau tahi, ’o Iesu Mesia, nō te fa’aora ia tātou. Nā roto i tāna tusia, te tara’ehara, ’ua fa’atupu ’o Iesu Mesia i te rāve’a ’ia fa’aorahia tātou i tā tātou mau hara ’e ia ti’a fa’ahou ’e ia fa’ari’i i te ora mure ore.
E māuruuru rahi roa tō’u nō teie mau parau mau teitei roa—te mea ’o tā tātou e pi’i nei te ’fa’anahora’a nō te fa’aorara’a a te Metua, tāna ’ōpuara’a nō te aroha, ’e ’aore rā tāna rāve’a rahi fa’aorara’a nō te ’oa’oa. ’Ua tauturu te ha’api’ira’a i teie mau parau mau faufa’a roa iā’u ’ia ’ite i tō’u hīro’a mau ’e te mau ha’amaita’ira’a tā te Atua i fa’aineine nō tātou. ’Ua ha’api’i mai te peropheta Nephi ia tātou i te ’ē’a : « Nā reira, ’a rave i te fa’a’amu’a i te mau parau a te Mesia ; inaha ho’i, e fa’a’ite te mau parau a te Mesia ia ’outou i te mau mea tā ’outou e ti’a ’ia rave ». ’Ua parau fa’ahou ’oia, « Mai te mea e tomo mai ’outou nā te ’ē’a, ’e e fāri’i ho’i i te Vārua Maita’i, nā te reira e fa’a’ite ia ’outou i te mau mea ato’a tā ’outou e rave ». I teie mahana,te hina’ro nei au e fa’a’ite e mea nāhea te mau parau a te Mesia ’e te Vārua Maita’i i tauturu mai iā’u i te fā’ari’ira’a i teie mau parau mau faufa’a roa i tō’u ’āpīra’a.
E fa’a’ite te parau a te Mesia ia ’outou i te mau mea tā ’outou e ti’a ’ia rave
Mai tā Nephi i fa’a’ite i te ’īrava ’ōmuara’a nō te buka 1 Nephi, « ’ua fānauhia vau, e nā metua maitata’i ». ’Ua pa’ari au i Nagano, fenua Tāpōnē, i roto i te hō’ē utuāfare parauti’a, te itoito, i reira i fa’aitoito-pūai-hia te haeha’a , te ha’apa’ora’a ’e te tāpe’a-maīte-ra’a i te peu tumu. E ta’ata fa’aro’o rahi tō’u metua tāne. ’Ua ’ite au iāna i te pure i mua i te mau fata Shinto ’e te Budha pau roa i te po’ipo’i ’e te pō. Noa atu ’aita roa atu vau i ’ite ē, ’o vai tāna e pure ra ’e nō te aha ’oia e pure ai, ’ua ti’aturi au ē, ’ia pure āna’e mātou ma te ’ā’au tae, e roa’a ia mātou te tahi mana ’ite-’ore’hia a te atua, « tei pūai nō te fa’aora ».
Mai te tahi atu mau feiā ’āpī, ’ua roa’a iā’u e rave rahi mau fifi. ’Ua ’aro vau ma te feruri ē, ’aita e aura’a tō teie orara’a ’e e rave rahi taime maita’i ’e te ’oto ato’a. ’Ua mana’o vau ē ’ua mo’e au, ’aita vau i ’ite e haere vau ihea i roto i tō’u orara’a. ’Ua riro te orara’a mai te huru ra ē tē mau’e ra nō te mea e fa’aea te reira i te taime e pohe ai au. Te orara’a e ’aita e ’ōpu’ara’a nō te fa’aorara’a, e ’ohipa ’āhuehue te reira iā’u nei.
’Aita i maoro i muri mai i tō’u ha’api’ira’a i te reo paretāne i te ha’api’ira’a tuarua, ’ua fāri’i te mau pīahi no tā matou ha’api’ira’a i te hō’ē buka nō te Faufa’a ’Āpī. Nō ha’amata noa atu ra ho’i mātou i te ha’api’i i te reo peretāne, parau mai nei tō mātou ’orometua ha’api’i ia mātou ’ia ha’api’i i te reo nā roto i te tai’ora’a i taua buka ra. ’Ua ’īriti mai au i te reira ’e ’ua ha’amata i te tai’o i te mau tumu parau. E mea fifi roa nō’u te mau ta’o i roto i te faufa’a ’āpī . Hō’ē ā huru fifi te mau ta’o i roto i te reo tāpōnē. ’Āre’an rā, i arata’ihia vau i ni’a i e rave rahi mau uira’a nō te vairua tei fa’aōhia hou te taiora’a bibilia i roto i teie Bibilia Gideona—e mau uira’a i ni’a iho i te parau nō te nīno’a mana’o [sentiment] nō te mo’emo’e, te fifi, te fāri’i i te mau tāfifi e rave rau, ’e te vai atu ā. Teie mau tumu parau tei tāpa’ohia, ’ua ’āpe’ehia īa e te mau ’īrava tāpiri ’e te mau ’api parau i roto i te Faufa’a ’Āpī. ’Ua arata’ihia iho ā rā vau i teie fa’ahitira’a « I tō’u paruparura’a ». ’Ua arata’i teie fa’ahorora’a ’iā’u i te tai’o i te Mataio 11:28–30, i tō Iesu paraura’a i tāna ra mau pipi :
« E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora.
« ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou [vairua].
« Tē mārū nei ho’i tā’u zugo ’e tē māmā nei tā’u hōpoi’a ».
Teie te irava mātāmua tā’u i ha’amana’o i te taiora’a i te mau parau a Iesu Mesia. ’Inaha ho’i ’aita roa vau i māramarama maita’i i te mau ta’o ato’a o tāna i parau, ’ua tāmāru rā ’oia iā’u, ’ua fa’ati’a i tō’u vārua, ’e ’ua hōro’a mai ’oia i te tīa’ira’a iā’u. ’Ia rahi noa atu ā tō’u tai’ora’a i tāna parau, te rahi ato’a tō’u mana’o ’ia tāmata i te viretu nō tāna ra mau parau. ’Aita roa atu vau i roa’a i teie nīno’a mana’o mai te reira te huru. ’Ua ’ite a’era vau ē, ’ua herehia vau. ’Ua ’ite a’era vau ē, e ta’ata mātauhia vau ia Iesua Mesia.
Mai tā’u i tāmau noa i te ha’api’i, ’ua roa’a te nīnoa mana’o ē, te paraparau ’āfaro mai ra ’oia iā’u i te nā-ō-ra’a ē : « E ao tō tei hia’ai i te maita’i ; e fa’aīhia hoi rātou ».
’Ua fa’a’ī tāna parau i tō’u nei ’ā’au a ta’a noa atu ai e’ita roa e ti’a iā’u i te tatara atu i te huru o tō’u mau nīno’oa mana’o i taua taime ra. Noa atu ā ’ua ora mai ’o Iesu Mesia ’a tau tenetere i teie nei i roto i te hō’ē fenua huru ē nō’u, ’ua mana’o vau ē e ti’aturi atu vau i tāna mau parau i tō’u ’ā’au tā’āto’a. Tē ti’aturi nei au ē, e vai te mahana e noa’a iā’u hau atu i te mau parau a Iesu Mesia.
E fa’a’ite te Vārua Maita’i ’ia ’outou i te mau mea ato’a tā ’outou e rave.
’Ua tae mai taua mahana i muri nei a tau matahiti i muri mai. ’Ua fārerei atu vau i te tahi mau misiōnare tāmau ’e te ’āpī, ha’apa’o maita’i nō te ʼĒkālesia a Iesu Mesia i te Feiā Mo’a i te mau Mahana Hopeʼa nei. ’E ’ua fārerei vave atu vau i te hō’ē pupu na’ina’i a te feiā mo’a i te mau mahana hōpe’a nei, tei ’ī i te maita’i ’e te ’oa’oa ’e ’o tei fa’aitoito i te pe’e ia Iesu Mesia. Noa atu ’aita vau ti’aturi ’oi’oi ia rātou, ’ua ’ite rā vau i te mea tā’u i fa’atorotoro nā roto i tō’u tuatāpapara’a i te Faufa’a ’Āpī, i roto i te ’evanelia tei fa’aho’i-fa’ahou-hia mai—te mau parau a Iesu Mesia ’e te tīa’ira’a ’e te hau ’o tei tae mai nā roto i te reira.
Te tahi mea mo’a i orahia i te taime a ha’api’i mai ai te mau misiōnare iā’u i te pure. ’Ua ha’api’i vau ē, e ti’a ia tātou i te fa’ahiti i te i’oa o te Atua. ’Ia pure āna’e tātou, e tītauhia ia tātou ’ia parau mai roto mai i tō tātou ’ā’au, ’ia ha’amauruuru, ’e ’ia fa’a’ite i tō tātou tīa’ira’a ’e tō tātou hina’aro. ’Ia oti i parau i te tā’āto’ara’a o tā tātou i hina’aro i te fa’ahiti, e fa’aoti tātou i tā tātou pure ma te parau ē, « Nā roto i te i’oa o Iesu Mesia, amene ». Tē rave nei tātou i te reira nō te mea ’ua fa’aue mai ’o Iesu ia tātou ’ia pure nā roto i tōna ra i’oa. ’Ua tauturu te pure i te Metua i te ao ra iā’u ’ia ’ite pāpū ’o vai ’oia ’e tae noa atu i tō’u tu’atira’a Iāna—e tamaiti vārua herehia vau. ’Ua ha’api’i au ē, nō te mea ’ua ’ite au ’e ’ua here te Metua i te ao ra iā’u, e paraparau mai ’oia iā’u iho, ’o vau āna’e, ’e nā roto i te rēni e māramarama ai au nā roto i te Vārua Maita’i.
I te hō’ē tau, e’ita e ti’a iā’u ’ia ’ite i te Vārua Maita’i. ’Ua hape au i te ferurira’a ē, e ti’a noa iā’u ’ia pe’e i te fa’anahora’a nō te pure ’e e tupu mai ïa te tahi ’ohipa teata ’ati. I te tahi mahana, i roto i te ha’api’ira’a ’e te mau misiōnare, ’ua fa’aātea vau i te ha’api’ira’a no te tāmāru iā’u. ’Ua vai noa vau i roto i te ta’a-ore-ra’a e nāhea vau i tō’u iho orara’a mai te mea e parau mau iho ā te ’evanelia a Iesu Mesia.
I tō’u ineinera’a nō te ho’i atu i roto i te piha ’e te mau misiōnare, ’ua fa’aro’o atu vau i te reo o te hō’ē misiōnare. ’Ua fa’aro’o vau i tō’u i’oa. ’Aita ā vau i ’īriti i te ’ōpani, ’ua fa’aro’o rā vau i te reo mai te tahi pae mai o te ’ōpani. ʼUa māere roa vau. Tē pure nei ho’i rātou i te Metua i te ao ra. Tē ’ani onoono mai nei te ta’ata pure i te Atua ’ia fa’aro’o i tā’u pure. Noa atu ā e ’ere tōna reo tāpōnē i te mea maita’i, ma te fa’aro’o rā i tāna pure ateate i māru ai tō’u ’ā’au. ’Ua mana’ona’o vau ē, nō te aha rāua i ha’apa’o onoono mai iā’u. I reira vau i te ’itera’a ē, te pure tā rāua i fa’ahiti nō’u, oo te hi’ora’a ïa o te Metua i te ao ra ’e te here o te Fa’aora nō’u. ’Ua hōro’a taua here ra i te ti’aturira’a ’e i muri mai, ’ua ani au i te Atua nā roto i te fa’aro’o ’e te hina’aro mau. I tō’u nā-reira-ra’a, ’ua tupu te ’oa’oa ’e te hau i te mea ē, e tamari’i mau ā vau nō te Atua ’e tē vai ra tō’u hīro’a atuara’a ’e te tura. ’Ua mau māite te ’ōpuara’a fa’aora i roto i te hōhonura’a o tōu ’ā’au.
’Ua parau te peresideni Nelson, « Te huru tā ’outou e feruri ra ’o vai ’outou […] e hope’ara’a ïa te reira i ni’a i te mau fa’a’ōtira’a o tā ’outou e rave. » E parau mau te reira nō’u. ’Ua ha’amaita’i te fa’aotira’a ’ia pe’e i te Faaora ia Iesu Mesia nā roto i te bāpetizora’a ’e te fa’ari’ira’a i te horo’a o te Vārua Maita’i i to’u orara’a hau atu i ta’u i mana’o. ’Ia tomo ana’e tātou i roto i te fafaura’a nō te bāpetizora’a ’e te Atua, tē fafau ra ïa tātou ē, ’ua hina’aro tātou ’ia rave i te i’oa o Iesu Mesia i ni’a iho ia tātou, ’ia ha’apa’o i te mau fa’auera’a a te Atua, ’e ’ia tāvini iāna nō te toe’a o to tātou orara’a. E fafau mai ïa tō tātou Metua i te Ao ra ia tatou ē, e vai noa tōna Vārua i roto ia tātou—te arata’i-tāmau-ra’a no ’ō mai i te Vārua Maita’i ra.
Tē tītau manihi nei au ’ia ’outou ’ia roa’a i te fa’aro’o i roto i te poro’i tā Nephi i ha’api’i ia tātou—e fa’a’ite te mau parau a te Mesia ’e te Vārua Maita’i ia ’outou « i te mau mea ato’a tā ’outou e rave ». Te mau mea ato’a ! E hōro’a hau roa atu i te fa’ahiahia teie nō ’ō mai i te Atua ra.
Te mau taea’e ’e te mau tuahine, te māuruuru nei au nō te ’ōpuara’a ’oa’oa a te Metua i te ao ra. Nō te mea ’ua here ’oia ia tātou, ’ua fa’a’ineine ’oia i te ’ē’a nō te ho’i i mua i tāna aro nā roto i tāna Tamaiti fānau tahi herehia, ’o Iesu Mesia. E tauturu te ’itera’a i teie nei ’opuara’a faufa’a rahi ’ia tātou ’ia ’ite i tō tātou hīro’a atuara’a ’ei tamari’i nā te Atua ’e ti’a ia tātou ’ia riro tātou mai iāna ra te huru. ’Ua māuruuru roa vau nō teie nei parau mau faufa’a roa. Tē fa’a’ite nei au i tō’u ’itera’a pāpū ē, e arata’i te mau parau a te Mesia ’e te Vārua Maita’i ia tātou nō te fāri’i i te ora mure ’ore. ’Ua ’ite au ē, e parau mau teie mau parau. Nā roto i te i’oa mo’a o Iesu Mesia, ’āmene.