Te ’oa’oa o tō tātou fa’aorara’a
E nehenehe te here ’e te mana o Iesu Mesia e fa’aora ia tātou tāta’itahi i tā tātou mau hape, mau paruparu ’e mau hara ’e e tauturu ia tātou ’ia riro mai ’ei mea hau atu ā.
’Ua fātata e ’ahuru matahiti i teienei, ’ua hia’ai roa vau e pēni i te hōho’a o te Fa’aora. Noa atu e ’ainihi (artiste) au, e au ra iā’u e mea teimaha te reira. Nāhea vau i te pēni i te hōho’a o Iesu Mesia e haru nei i tōna Vārua ? I tei hea vāhi e ha’amata ? ’E i hea vau e ’ite mai ai te taime ?
Noa atu ’e tā’u mau uira’a, ’ua fa’aoti au e haere i mua ’e ’ia ti’aturi ē e tauturu mai te Fatu iā’u. E ti’a rā iā’u e tāmau noa i te nu’u i mua ’e e vaiiho i te mau rāve’a iāna. ’Ua pure au, ’ua feruri, ’ua rave i te mau mā’imira’a ’e ’ua pāpā’i hōho’a ’e ’ua fāna’o vau i te ’itera’a mai i te tauturu ’e te mau mātēria. ’E te pēha’a paruai ’uo’uo ’ua ha’amata i te riro mai ’ei ’ohipa ’ē atu ā.
’Aita te fa’anahora’a i te mea ’ōhie. I te tahi taime, e au ra ’aita te hōho’a i te mea i mana’ohia e au. I te tahi taime, tē vai ra te mau taime e tere noa te pēnira’a ’e te mau mana’o fa’auruhia. ’E e mea pinepine, ’ua tītauhia iā’u e tāmata fa’ahou, ’e fa’ahou ā ’e fa’ahou ā.
I tō’u mana’ora’a ē ’ua oti ïa ’e ’ua marō te pēni hinu, ’ua ha’amata vau i te parai i te reira i te vāniti ariari nō te pāruru i te reporepo ’e te repo puehu. ’A nā reira ai au, ’ua ’ite atu vau i te rouru o te hōho’a pēni e ha’amata ra i te taui, e parare ra ’e te tahe ra. ’Oi’oi roa vau i te ’itera’a ē ’ua vāniti vitiviti roa vau i te reira, tē vai rarirari noa ra teie tuha’a o te hōho’a pēni !
’Ua mā roa te hō’ē tūha’a ’o tā’u hōho’a pēni i te vāniti. ’Auē ïa ē ’ua vī roa tō’u ’ā’au. E au ra i roto iā’u, ’ua ha’amou iho nei au i te mea tā te Atua i tauturu iā’u ’ia rave. ’Ua ta’i au ’e ’ua putapū vau i te mauiui i roto iā’u. Ma te hepohepo, ’ua rave au i te mea tā te mau ta’ata ato’a e rave i roto i te hō’ē tupura’a mai teie : ’Ua niuniu atu vau i tō’u metua vahine. ’Ua nā ’ō mai ’oia ma te pa’ari ’e te marū : « E’ita roa e roa’a fa’ahou mai ia ’oe i te mea i vai na ia ’oe, ’a rave rā mai tā ’oe e nehenehe e te mea tā ’oe e vai ra ».
And I Partook [’E ’ua ’amui atu vau], nā Kristin Yee
Nō reira, ’ua pure au ’e ’ua tāparu i te tauturu ’e ’ua pēni i te tā’āto’ara’a o te pō, nō te tātā’i i te mau mea. ’E tē ha’amana’o nei au i te hi’ora’a i te hōho’a peni i te po’ipo’i a’e—e au ra e mea maita’i a’e i terā i nā mua a’e nei. Nāhea te reira i te tupura’a ? Te mea ’o ta’u i mana’o ’ua riro ’ei hape ’aita e tātā’ira’a, ’ua riro ’ei rāve’a nō tōna rima aroha ’ia ’itehia. ’Aita ’oia i fa’aoti i te hōho’a pēni, ’e ’aita tāna ’ohipa i ni’a iā’u i oti. ’Āuē ïa te ’oa’oa ’e te tāmarūra’a tei tae mai i tō’u ’ā’au. ’Ua ’ārue au i te Fatu nō tōna aroha, nō teie temeio ’aita noa i fa’aora i te hōho’a pēni, ’ua ha’api’i rahi ato’a mai iā’u nō ni’a i tōna here ’e tōna mana, nō te fa’aora ia tātou tāta’itahi i tā tātou mau hape, mau paruparu ’e mau hara, ’e i te tauturu ia tātou ’ia riro mai ’ei ’ohipa hau atu.
Mai te hōhonura’a o tō’u ’ā’au mēhara i te Fa’aora tei tupu i te rahi, ’a tauturu ai ’oia iā’u ma te aroha ’ia tāta’i i te hōho’a pēni « tāta’i ’ore », ’ua pūai atu ā tō’u iho here ’e tō’u ’ā’au mēhara nō tō’u Fa’aora, ’a tītau ai au i te ’ohipa ’e ’ōna i ni’a i tō’u mau paruparu ’e ’ia fa’aorehia tō’u mau hape. E ’ā’au mēhara e a muri noa atu tō’u nō tō’u Fa’aora ’ia nehenehe iā’u ’ia taui ’e ’ia tāmāhia. Tei iāna tō’u māfatu, ’e tē ti’aturi nei au ē tē rave nei au i te mau mea ato’a tāna e hina’aro ’ia rave au ’e ’ia riro mai.
E fa’ati’a te tātarahapa ia tātou ’ia putapū i te here o te Atua ’e ’ia mātau iāna ’e ’ia here iāna ma te rāve’a e’ita roa tātou e ’ite i nā mua a’enei. Nō te vahine ’o tei tāvai i te ’āvae o te Fa’aora, ’ua parau ’oia [Iesu] :« ’O tāna nei hara rahi, ’ua fa’a’orehia ïa ; i rahi ai tōna māuruuru ;’āre’a te ta’ata hara iti i fa’a’orehia ra, e iti ïa tōna māuruuru ». ’Ua here rahi ’oia [te vāhine] ia Iesu, nō te fa’a’ore rahi ’oia [Iesu] i tāna [te vahine] hara.
Tē vai ra teie māmāra’a ’e teie tīa’ira’a nō te ’itera’a ē e nehenehe tātou e tāmata fa’ahou—ē mai tā Elder Bednar i ha’api’i, e nehenehe tātou e fa’ari’i i te fa’a’orera’a tāmau i tā tātou mau hara maoti te mana ha’amo’a o te Vārua Maita’i, mai te mea e tātarahapa mau tātou ’e ma te ’ā’au tae.
Te mana o te fa’aorara’a a Iesu Mesia ’o te hō’ē ïa o te mau ha’amaita’ira’a rahi roa a’e i parau-fafau-hia nā roto i tā tātou mau fafaura’a. ’A feruri hōhonu i teie ’a ’āmui atu ai ’outou i roto i te mau ’ōro’a mo’a. ’Aita ana’e te reira, e’ita tātou e nehenehe e ho’i i te fare, i mua i te aro o tō tātou Metua i te ao ra ’e te feiā tā tātou i here.
’Ua ’ite au ē e mea pūai tō tātou Fatu ’e Fa’aora ’o Iesu Mesia nō te fa’aora. ’Ei tāmaiti nā te Atua, tei tara’ehara nō tō te ao nei ’e ’ua hōro’a i tōna iho ora ’e tei rave fa’ahou atu, tē mau nei ’oia i te mana nō te fa’aorara’a ’e ti’afa’ahoura’a. ’Ua fa’atupu ’oia i te tāhuti ’ore nō te tā’āto’ara’a ’e te ora mure ’ore nō te feiā i mā’iti iāna. ’Ua ’ite au ē nā roto i tāna tusia tāra’ehara, e nehenehe tātou e tātarahapa ’e ’ia tāmā-roa-hia ’e ’ia fa’aorahia. E temeio teie ’ua here ’oia ia ’outou ’e iā’u mai teie te huru.
’Ua parau ’oia : « ’Aita ānei ’outou e fāriu mai iā’u i teienei, ’e ’ia tātarahapa ho’i i tā ’outou mau hara, ’e ’ia fa’afāriuhia mai, ’ia fa’aorahia ’outou e au ra ? » E nehenehe ’oia e fa’aora i te mau « vāhi pau » ’o tō ’outou vaerua—te mau vāhi marō, te pa’ari ’e i ’āhuehuehia e te hara ’e te ’oto ’e « ’ia fa’ariro i [tō ’outou] medebara ’ei ’ō i Edene ».
Mai ia tātou e ’ore e hāro’aro’a i te māuiui ’e te hōhonu o te mamae o te Mesia i Getesemane ’e i ni’a i te sātauro, « e’ita ato’a tātou e nehenehe e fāito i te mau ’ā’anora’a ’e e perehahu i te hōhonura’a ’o [tāna] fa’a’orera’a hara hanahana », te aroha ’e te here.
E mana’o paha ’outou i te tahi taime ē e’ita roa ’outou e fa’aorahia, ē penei a’e tei rāpae ’outou i te here o te Atua ’e i te mana tāra’ehara o te Fa’aora, te tumu nō te mea tā ’outou e ’aro nei ’aore rā nō te ’ohipa tā ’outou i rave. Tē fa’a’ite pāpū nei rā vau ē, ’aita ’outou i ātea i te rima o te Fatu. « ’Ua pou [te Fa’aora] i raro a’e i te mau mea ato’a ra » ’e e ti’ara’a Atua tōna nō te fa’ateitei ia ’outou ’e nō te huti mai ia ’outou i rāpae i te hōhōnu pouri roa a’e ’e ’ia arata’i mai ia ’outou i roto i « tōna māramarama ’umerehia ». Nā roto i tōna mau māuiui, ’ua fa’aineine ’oia i te hō’ē rāve’a nō tātou tāta’itahi, ’ia upo’oti’a i ni’a i tō tātou iho mau paruparu ’e tā tātou mau hara. « Tei iāna te mana ato’a nō fa’aora i te ta’ata ato’a e ti’aturi i tōna ra i’oa, ’e tē fa’atupu ho’i i te ’ohipa e au i te tātarahapa ».
Mai tei tītauhia ’ia ’ohipa ’e ’ia tāparu i te tauturu i te ra’i nō te tāta’i i te hōho’a pēni, e ti’a ’ia ’ohipa, ’ia fa’a’ite i te ’āau tae ’e te ha’eha’a nō te fa’atupu « i te hotu e au i te tātarahapa ». Teie mau hotu tei roto te fa’a’ohipara’a ïa i tō tātou fa’aro’o ’e te ti’aturira’a ia Iesu Mesia ’e i tāna tusia tāra’ehara, te pupura’a i te Atua i te ’ā’au ’oto ’e te vārua tātarahapa, ma te fā’i ’e te ha’apae-roa-ra’a i te hara, te fa’a’āpira’a nā roto i tō tātou ’aravihi i te mea i ’ino, ’e te tāmatara’a ’ia ora ma te parauti’a.
Nō te tātarahapa mau ’e nō te taui, e ti’a ia tātou nā mua roa ’ia « ’ite pāpū maita’i i tā tātou mau hara ». ’Aita te hō’ē ta’ata e ’ite ra i te tītaura’a mau ’ia rave i te rā’au maori rā ’ua māramarama ’oia ē, ’ua ma’ihia ’oia. E nehenehe e vai ra te mau taime ’aita tātou i ineine i te hi’o i roto ia tātou iho ’e ’ia hi’o ’ite i te mea e ti’a ’ia fa’aorahia ’e ’ia tāta’ihia.
I roto i te mau papa’ira’a a C. S. Lewis, tē hōro’a nei Aslan i teie mau parau i te hō’ē ta’ata tei fa’atāfifi iāna i roto i tāna iho mau mārei : « ’Auē, [te mau ta’ata ē], ma teie ’aravihi tē pāruru nei ’outou ia ’outou iho i te mau mea ato’a e maita’i ai ’outou ».
I hea ’outou ’e ’o vau nei e pāruru ai ia tātou iho i teie mau mea ’o te nehenehe e ha’amaita’i ia tātou ?
’Eiaha tātou e pāruru ia tātou iho i te maita’i tā te Atua e hina’aro e hōro’a mai ia tātou. I te here ’e te aroha ’o tāna e hina’aro nei ’ia putapū tātou. I te māramarama ’e te ’ite tāna e hina’aro nei e hōro’a mai ia tātou. I te fa’aorara’a ’o tāna i ’ite e hina’aro ’ōhie rahi mau tātou. I te aura’a hōhonu mau o te fafaura’a ’o tāna i fa’ata’a nō tāna mau tamaiti ’e mau tamahine ato’a.
Tē pure nei au ’ia vaiiho tātou i te hiti te mau « mauha’a tama’i » ’o tā tātou e fa’a’ohipa nei ma te ’ite mau ’aore rā ma te ’ite ’ore, nō te pāruru ia tātou i te mau ha’amaita’ira’a o te here o te Atua. Te mau mauha’a o te te’oteo—te fe’i’i, te mata’u, te riri, te ’ino’ino, te au ’ore, te ha’avara’a ti’a ’ore, te pohehae—te mau mea ato’a ’o tē ’ōpani ia tātou ’ia here i te Atua ma tō tātou ’ā’au ato’a ’e ’ia ha’apa’o i tā tātou mau fafaura’a ato’a ’e ’ōna.
’A ora ai tātou i tā tātou mau fafaura’a, e nehenehe te Fatu e hōro’a mai ia tātou te tauturu ’e te mana e hina’arohia e tātou nō te ’ite mai ’e nō te fa’a’oroma’i i tō tātou mau paruparu, ’oia ato’a i te tirotiro pae varua o te te’ote’o. ’Ua parau tō tātou peropheta :
« ’O te tātarahapa te ’ē’a i te vi’ivi’i ’ore, ’e nā te vi’ivi’i ’ore e fa’atae mai i te mana ».
« ’E ’auē ïa tō tātou hia’ai rahi i tōna mana i te mau mahana i muri nei ».
Mai tā’u hōho’a pēni, ’aita te ’ohipa a te Fatu i oti i ni’a ia tātou ’ia rave ana’e tātou i te hō’ē hape, e’ita ato’a ’oia e horo ’ē ’ia hahi ’ē ana’e tātou. Tō tātou hina’aro i te fa’aorara’a ’e te tauturu e ’ere ïa i te hō’ē fa’ateimahara’a nōna, e tumu mau rā nō tōna haerera’a mai. ’Ua parau te Fa’aora iho ē :
« Inaha, ’ua haere mai au i roto i te ao nei nō te ’āfa’i mai i te fa’aorara’a i tō te ao nei, nō te fa’aora i tō te ao nei i tā rātou mau hara ».
« ’Ua fa’atorohia atu tō’u nei rima nō te aroha ia ’outou na, ’e ’o ’oia ’o tē haere mai iā’u nei ra, ’o tā’u ïa e fāri’i ; ’e e ha’amaita’ihia rātou ’o tē haere mai iā’u nei ».
Nō reira ’a haere mai—’a haere mai ’outou tei rohirohi, tei paruparu ’e tei ’oto, ’a haere mai ’e ’a vaiiho i tā ’outou ’ohipa ’e ’a ’ite mau i te fa’aeara’a i roto iāna ’o tei here rahi ia ’outou. ’A rave i tāna zugo i ni’a ia ’outou, mea maru ’ōna ’e te ha’eha’a te ’ā’au.
Tē hi’o nei tō tātou Metua i te ao ra ’e te Fa’aora ia ’outou. ’Ua ’ite rāua i tō ’outou ’ā’au. Tē ha’ape’ape’a nei rāua i te mea tā ’outou e tau’ahia nei tae noa atu i te feiā tā ’outou e here nei.
E nehenehe te Fa’aora e fa’aora i mea tei mo’e ra, ’oia ato’a te mau aura’a tei pāparari ’e tei parari. ’Ua ’īriti ’oia i te hō’ē atati’a ’ia ti’a i te mau mea ato’a tei hahi ’ē ’ia fa’aorahia—nō te hōro’a i te ora i te mea tei mana’ohia ’ua pohe ’e ’aita e rāve’a fa’ahou.
Mai te mea tei roto ’outou i te hō’ē tupura’a ’o tā ’outou i mana’o ’ua fa’a’oroma’i a’ena ’outou, ’eiaha e tāora i te tauera. ’A fa’a’oroma’i ia ’outou iho, ’a ha’apa’o i tā ’outou mau fafaura’a, ’a tātarahapa pinepine, ’a ’imi i te tauturu ’o tō ’outou feiā fa’atere mai te mea e hina’arohia, ’e ’a haere tāmau i te fare o te Fatu mai tā ’outou e nehenehe. ’A fa’aro’o ’e ’a ha’apa’o maite i te mau muhumuhu tāna e fa’atae ia ’outou. E’ita ’oia e fa’aru’e i tōna aura’a o te fafaura’a ’e ’outou.
’Ua fa’ari’i au i te mau aura’a fifi ’e te pe’ape’a i roto i tō’u orara’a nō te reira, ’ua ’aro vau ’e ’ua ’imi au ma te ’ā’au tae i te ha’amaita’i atu ā. I te tahi taime, e au ra iā’u e mea pinepine a’e au i te manuia ’ore e ti’a ai. ’Ua uiui au, « ’aita ānei au i fa’a’āfaro i te mau mea i te taime i ma’iri ? ’Aita ānei au i fa’a’oroma’i i tō’u paruparu ? » ’Ua ha’api’i mai au i te roara’a o te tau ē, ’aita roa vau i ’ino roa ; maori rā, pinepine e mea rahi a’e te ’ohipa e rave ’e e rahi atu ā te fa’aora’a e tītauhia.
’Ua ha’api’i Elder D. Todd Christofferson ē : « E mea pāpū roa e mata ’ata’ata tō te Fatu i te ta’ata ’o tē hina’aro e haere i mua i te ha’avāra’a ma te parauti’a, ’o tē rohi maita’i nei i te mau mahana ato’a nō te mono i te paruparu i te pūai. Te tātarahapara’a mau, te tauira’a mau e nehenehe e tītauhia i te mau tāmatara’a tāmau, tē vai nei rā te tahi mea maita’i a’e ’e te mo’a i roto i taua tauto’ora’a ra. E tahe mai te fa’a’orera’a hara hanahana ’e te fa’aorara’a mai te au i roto i te reira vaerua ra ».
Te mahana tāta’itahi e mahana ’āpī ïa tei ’ī i te tīa’ira’a ’e te mau rāve’a maoti ’o Iesu Mesia. I te mau mahana ato’a, e nehenehe ’outou ’e ’o vau nei e ’ite mai tei fa’a’itehia e tō tātou metua vahine ’o ’Eva : « te ’oa’oa o tō taua fa’aorara’a ra », te ’oa’oa ’ia fa’aorahia, te ’oa’oa ’ia ’ite ’ia putapū i te here ’āueue ’ore o te Atua nō ’outou.
’Ua ’ite au ē, ’ua here tō tātou Metua i te ao ra ’e te Fa’aora ia ’outou. ’O Iesu Mesia te Fa’aora ’e te Arai nō te ta’ata ato’a. Tē ora nei ’oia. Nā roto i tāna tusia tāra’ehara, ’ua mutu te tā’amura’a o te hara ’e te pohe e a muri noa atu ’ia nehenehe ia tātou ’ia vai ti’amā nō te mā’iti i te fa’aorara’a, te tāra’ehare ’e te ora mure ’ore ’e te feiā tā tātou i here. ’E tē fa’a’ite pāpū nei au nō teie mau mea nā roto i tōna i’oa mo’a, ’o Iesu Mesia, ’āmene.