Rōtahi i ni’a ia Iesu te Mesia ’e tāna ’evanelia
’Ia vaiiho ana’e tātou i te mau fa’anevanevara’a o te ao nei ’e ’ia rōtahi ana’e i ni’a ia Iesu Mesia ’e Tāna ’evanelia, e pāpū ia tātou ē, e roa’a te manuia rahi.
I te matahiti 1996, ’ua roa’a te feti’a ’auro i te pupu tu’e pōpō a te tāne nō Nītēria i te Tū’aro Nui nō Atlanta, i te Fenua Marite. I te hopera’a te ha’utira’a, ’ua haere mai te mau naho’a ta’ata ’oa’oa nā roto i te mau aroā o te mau ’oire ato’a i Nītēria ; ’ua fa’ariro-’oi’oi-hia teie fenua e 200 mirioni ta’ata ’ei ’ōro’a rahi i te hora piti i te po’ipo’i ! ’Ua ’ī te ’oa’oa, te poupou ’e te ’ana’anataera’a ’a tāmā’a, ’a hīmene ’e ’a ’ori noa ai te ta’ata. I terā-ra’a ra taime, ’ua tāhō’ē Nītēria ’e ’oa’oa rahi tō Nītēria ’ia riro ’ei ta’ata Nītēria.
Nā mua a’e i te Tū’aro Nui, ’ua fa’aruru teie pupu e rave rahi fifi. I te ha’amatara’a o te tata’ura’a, ’ua fa’a’orehia tā rātou moni tauturu. ’Ua fa’aitoito noa te pupu ē ’aita e ’ahu, e vāhi tano nō te ha’api’ipi’ira’a, e mā’a ’e te hōroira’a ’ahu.
Jerome Prevost/Getty Images
I te hō’ē taime, fa’atata roa hope te mau minuti o te ha’utira’a i reira rātou e pau ai, ’aita rā teie pupu nō Nītēria i fa’aea ē upo’oti’a a’enei. I terā taime faufa’a roa, ’ua taui tō rātou hi’ora’a ia rātou iho. Ma teie ti’aturira’a ’āpī ’e te itoito ta’ata hō’ē ’e a te pupu, te tāhō’ē ’e te fa’aotira’a pāpū, ’ua vaiiho rātou i te hiti e rave rahi fa’anevanevara’a ’e e rōtahi i ni’a i te fā, ’oia ho’i ’ia roa’a te rē. Nā teie rōtahira’a i fa’aupo’oti’a i te feti’a ’auro, ’e ’ua pi’ihia rātou e te nūna’a Nītēria « Te pupu Moemoeā ». I teie ā mahana, tē hi’ohia nei teie pupu Moemoeā nō te Tū’aro Nui nō te matahiti 1996, ’ei rēni arata’i i roto i te tū’arora’a Nītēria.
David Cannon/Allsport/Getty Images
I te taime ihoā teie pupu tu’e pōpō i tāu’a ’ore ai i te mau fa’anevanevara’a i fa’aruruhia e rātou, ’ua manuia hau atu rātou i tei mana’ohia ’e ’ua tae mai te ’oa’oa rahi. (Mai ia mātou ato’a e te nūna’a nō Nītēria !)
Hō’ē ā ato’a, ’ia vaiiho ana’e tātou i te mau fa’anevanevara’a o te ao nei ’e ’ia rōtahi ana’e i ni’a ia Iesu Mesia ’e Tāna ’evanelia, e pāpū ia tātou ē, e manuia rahi atu i tei mana’ohia ’e e roa’a te ’oa’oa fāito ’ore. ’Ua ha’api’i mai te peresideni Russell M. Nelson ē, « Mai te mea tei ni’a te fa’atumura’a o tō tātou orara’a […] ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a ».
Tē pure nei au, ’ia tauturu te Vārua Mo’a ia tātou pā’āto’a ’ia rave mai ’e ’ia hāro’aro’a i te anira’a a te peresideni Nelson ’ia rōtahi tō tātou orara’a i ni’a ia « Iesu Mesia ’e tāna ’evanelia » ’ia roa’a te ’oa’oa i ni’a i te Mesia, « noa atu te ’ohipa e tupu nei ’aore rā e ’ore e tupu rā i roto i tō tātou orara’a ».
E rave rahi ’ā’amu i roto i te Buka a Moromona nō te mau ta’ata tei fāriu fa’ahou mai nā roto i te rōtahira’a i ni’a ia Iesu Mesia ’e tāna ’evanelia.
’A feruri na ia Alama tamaiti. ’Ua ’ōrure hau ’oia ’e ’ua ’aro i te ’Ēkālesia. ’Ua pure ’e ’ua ha’apae tōna metua tane, o Alama, i te maa. ’Ua fā mai te hō’ē melahi ’e ’ua parau ia Alama ’ia tātarahapa. I taua taime ra, ’ua ha’amata Alama i te māuiui « i te māuiui nō te hō’ē vārua i fa’ahapahia ». I roto i tōna mau hora poiri roa a’e, ’ua ha’amana’o ’oia i tōna metua tāne i te ha’api’ira’a ē, e haere mai te Mesia nō te tara ’ē i te hara a tō te ao nei. A mau noa tōna ferurira’a i ni’a i teie mana’o, ’ua tāparu ’oia i te Atua ’ia aroha mai iāna. ’Ua roa’a iāna tē ’oa’oa, ’o tāna ïa i parau ē, ’aita roa e mea e tuea ! ’Ua tae mai te aroha ’e te ’oa’oa i roto ia Alama nō te mea, ’ua fa’atumu raua tōna metua tane i ni’a i te Fa’aora.
I te mau metua e tamari’i tei haere ’ē atu, ’a fa’aitoito ! Maoti i te aniani nō te aha ’aita te hō’ē melahi e haere mai ai e tauturu i tā ’outou tamari’i ’ia tatarahapa, e ha’amana’o ’ua fa’aineine te Fatu i te hō’ē melahi pae tino i ni’a i tōna ’ē’a : te ’episekōpo, te tahi atu ta’ata fa’atere, ’aore rā, e taea’e ’e ’aore rā, e tuahine aupuru. Mai te mea e tāmau noa ’outou i te ha’apae i te ma’a ’e i te pure, ’ia ’ore ’outou e ha’amau i te hō’ē tārena ’e aore rā, e tai’o mahana nō te Atua, e mai te mea e ti’aturi ’outou ē, tē fa’atoro mai nei ’oia i tōna rima nō te tauturu, i muri iho, e ’ite ’outou i te Atua i te ha’aputapūra’a i te ’ā’au o tā ’outou tamari’i ’ia mā’iti ’oia ’ia fa’aro’o mai. E tupu mai te reira nō te mea, te Mesia ’o te ’oa’oa ïa ’e te tīa’ira’a ; ’O ’oia te fafaura’a o « te mau mea maita’i ato’a e tae mai rā ». Nō reira, ’a ti’aturi ia Iesu Mesia nō tā ’outou tamari’i, ’o ’oia te pūai o te mau metua tāta’itahi, ’e o te mau tamari’i tāta’itahi.
I te taime ’oia i fa’ari’i ai i teie ’oa’oa Mesia, ’ua ora Alama tamaiti e teie ’oa’oa. Mea nāhea pa’i ’oia i vai ai i roto i terā ’oa’oa noa atu te fifi ’e te tāmatara’a ? Teie tāna i parau :
« Mai te reira mai taime ē tae roa mai i teienei, ’ua rave au i te ’ohipa ma te fa’aea ’ore, ’ia ti’a iā’u ’ia fa’afāriu mai i te mau ta’ata ’ia tātarahapa ; ’ia ti’a iā’u ’ia arata’i mai ia rātou ’ia fa’ari’i i te ’oa’oa rahi ’o tā’u i fa’ari’i […]
« ’E […] ’ua hōro’a mai te Fatu i te ’oa’oa rahi iā’u nei i te hotu nō tā’u mau ’ohipa […]
« ’E i tauturuhia na ho’i au i roto i tō’u mau ’ati ’e tō’u mau pe’ape’a e rave rahi ».
’Ua ha’amata te ’oa’oa Mesia nō Alama i tōna fa’a’ohipara’a i tōna fa’aro’o i te Mesia ’e nō tōna tāparura’a i tōna aroha. I muri iho, ’ua fa’a’ohipa ’o Alama i tōna fa’aro’o i te Mesia nō te tauturu ia vetahi ’ē ’ia fa’ari’i ato’a i teie ’oa’oa. Nā teie mau tauturura’a tāmau i fa’atae mai i te ’oa’oa rahi ia Alama, noa atu te ’ati ’e te pe’ape’a e rave rahi. Tē ’ite nei ’outou, « ’Ua here te Fatu i te tūtavara’a, ’e e hōro’a mai te tūtavara’a i te rē. Te mau ’ati rahi ato’a, e « horomi’ihia tō rātou mau ’ati i roto i te ’oa’oa o te Mesia ».
Te tahi ato’a pupu ta’ata i roto i te Buka a Moromona tei rōtahi i ni’a ia Iesu Mesia ’e tāna ’evanelia i te roara’a o te orara’a ’e ’ua fa’ari’i ho’i i te ’oa’oa, ’o rātou ’o rātou ïa tei patu i te ’oire nō Helama—e vāhi i reira rātou i fa’a’amu ai tā rātou mau tamari’i ’e ’ua ti’a ia rātou ’ia fa’a’ohipa i te ti’amāra’a o tō rātou fa’aro’o. ’Ua fa’atītīhia teie mau ta’ata parau-ti’a e ora ra i te orara’a maita’i e te hō’ē pupu ta’ata ’ino ’e ’ua fa’a’erehia rātou i te ti’ara’ tumu o te hō’ē ta’ata nō te fa’atupu i ha’apa’ora’a fa’aro’o. I te tahi taime e tupu mai te mau ’ohipa ’ī’ino i ni’a i te mau ta’ata maita’ita’i.
« ’Āre’a rā ’ua ti’a i te Fatu ’ia ’avau mai i tōna ra mau ta’ata ; ’oia ïa, tē tāmata mai rā ’oia i tō rātou fa’a’oroma’i ’e tō rātou fa’aro’o ho’i.
« ’Āre’a rā—’o ’oia ’o tē ti’aturi iāna ra, e fa’ateiteihia ïa i te mahana hope’a ra. ’Oia ïa, ’ua nā-reira-hia teie nei feiā.
Nāhea teie mau ta’ata i fa’a’oroma’i ai i tā rātou mau ’ati ’e te māuiui ? Nā roto i te rōtahira’a i ni’a te Mesia ’e tāna ’evanelia. E ’ere nā tā rātou mau ’ati i fa’ata’a ia rātou ; ’ua fāriu rā rātou tāta’itahi i te Atua ’e ’ua fa’ariro rātou ia rātou iho ’ei tamari’i nā te Atua, ’ei tamari’i nō te fafaura’a ’e e pipi nā Iesu Mesia. ’A ha’amana’o ai rātou ’o vai mau rātou ’e ma te pi’i i te Atua, ’ua fa’ari’i rātou i te hau, te pūai ’e i te pae hope’a, te ’oa’oa i roto i te Mesia :
« Alama ’e tōna mau ta’ata […] ’ua nīni’i māite atu rātou i tō rātou ’ā’au iāna ; ’e ’ua ’ite mai ho’i ’oia i te mau mana’o o tō rātou mau ’ā’au.
« ’Ua tae maira ho’i te parau a te Fatu ia rātou i tō rātou vai-’ati-ra’a ra, nā ’ō maira : E fa’ateitei na ’outou i te upo’o, ’ia māhanahana maita’i, ’ua ’ite ho’i au i te parau fa’aau tā ’outou i fa’aau mai iā’u ra ; e fa’aau atu ho’i au i te faufa’a i tō’u ra mau ta’ata, e fa’aora atu ho’i ia rātou i te tītīra’a.
’Ei pāhonora’a, ’ua « ha’amāmā [te Fatu] i te mau hōpoi’a teiaha i tu’uhia i ni’a iho i tō [rātou] mau tapono […] ’Oia ïa, nā te Atua rātou i fa’aitoito, i ti’a ai ia rātou i te fa’aoroma’i i te mau ’ati ma te paruparu ’ore, ’e ’ua auraro ihora rātou ma « te ’ā’au tae ’e te fa’aoroma’i i te hina’aro ato’a o te Fatu ». ’A ha’amana’o ē, ’ua vaiho teie mau Feiā mo’a i tō rātou mau pe’ape’a, te mau māuiui ’e te mau ’ati ’ia horomi’ihia i roto i te ’oa’oa i te Mesia ! I muri iho, ’ia tae te taime, ’ua fa’a’ite ’Oia ia Alama nāhea ’ia horo ’ē atu, ’e Alama—hō’ē peropheta nō te Atua—’ua arata’ihia ’oia i te pārurura’a.
’A rōtahi ai tātou i ni’a i te Mesia ’e ’ia pe’e ana’e i tāna mau peropheta, te Peresideni Russell M. Nelson, e arata’i ato’a hia tātou i te Mesia ’e te ’oa’oa o te ’evanelia. Mai tā peresideni Nelson i ha’api’i : « E mana rahi tō te ’oa’oa, ’e e fa’atae te fa’atumura’a i ni’a i te ’oa’oa i te mana o te Atua i roto i tō tātou orara’a. I roto i te mau mea ato’a, ’o Iesu Mesia te hi’ora’a maita’i hope, ‘’o tei fa’a’oroma’i i te satauro… i te [’oa’oa] i tu’uhia mai i mua i tāna aro’ [Hebera 12:2] ».
Nō fa’aru’e noa a’enei tō’u metua vahine ; ’ua māere roa vau. ’Ua here au i tō’u māmā ’e ’aita vau i mana’o ē e reva ’oi’oi ’ōna nō tōna ’āpī. Terā rā, nā roto i tōna pohera’a, ’ua fa’ari’i tō’u ’utuāfare ’e ’o vau nei, i te ’oto e te ’oa’oa. ’Ua ’ite rā vau ē, maoti te Mesia, ’aita tō’u māmā i pohe ; tē ora nei ’oia ! I teienei rā ’ua ’ite au ē, maoti te Mesia ’e te tāviri o te autahu’ara’a i fa’aho’ihia mai nā roto i te peropheta Iosepha Semita, e ’ite fa’ahou vau iāna i te hō’ē mahana. ’Ua horomi’ihia tō’u māuiui nō te pohera’a o tō’u māmā i roto i te ’oa’oa i te Mesia ra ! Tē ’ite ra vau ē, ’ia « feruri tiretiera » ’e ’ia « vaiiho i te Atua ’ia upo’oti’a » e tītau ato’a ïa te rōtahira’a i ni’a i te ’oa’oa e vai rā i roto i te Mesia.
Ma te here, tē ani manihini nei ’oia ’ia « Haere mai […] iā’u nei, ’e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora ». I te i’oa o Iesu Mesia, ’āmene.