Nā muri i te ’āmuira’a rahi : Te fa’aineinera’a i te pū ’āmuira’a

’Ia feruri tātou i te ’āmuira’a rahi, e puta mai iho ā paha i roto i te ferurira’a te pa’epa’e ’e te feiā fa’atere o te ’Ēkālesia tē pārahi ra i mua i te hāmonia rahi. E ’ere rā te reira te hōho’a o te pū ’āmuira’a i te matahi tā’āto’a.

E rave rahi ’āru’i e fa’atupuhia nei i te pū ’āmuira’a, e tītauhia te mau fa’anahora’a ta’a ’ē, ’e e rave rahi hora nō te fa’aineine i te pa’epa’e (tei parauhia « estrade ») nō te ’āmuira’a rahi. E pupu 10 ta’ata tei ’ohipa e toru hepetoma te maoro nō te fa’aineine i te pa’epa’e, te mau vāhi tomora’a ’e te tahi atu mau vāhi o te pū ’āmuira’a nō te fa’ari’i i te mau rātere nō te ’āmuira’a rahi.

Teie te tahi mau parau fa’ahiahia :

18 tuha’a rahi nō te hāmani i te mau tahua nō te pa’epa’e, 1.5– 4 tane te teiaha o te hō’ē.
E fa’anu’uhia teie mau tuha’a teiaha maoti te mau marū e tītōhia te mata’i ’o tē tu’uhia i ni’a i tahua, e mea huru ’ōhie atu ra i te fa’anu’u i te reira.
Fātata e 500 tuha’a na’ina’i a’e, mai te ’ē’a ’āuri ’e te mau ’apa’apa, tei tu’u-ato’a-hia.
E 80 ’āvae (24 m) te teitei o te mau ’ūputa e ’īritihia nō te fa’aō i teie mau tuha’a nō te ’āpapa i te reira.
E fa’aineine ato’a te pupu fa’aineinera’a i te mau vāhi nō te feiā pāruru ’ohipa ataata, te mau misiōnare ’e te fa’ari’ira’a—’ua hau i te 600 ’ohipa te tā’āto’ara’a.

’Ua tauturu ’o Joel Wright, fa’atere o te pupu, nō te 50 ’āmuira’a rahi. Tē parau nei ’oia i te mau melo o tōna pupu, e mau « ’aito ’ārue-’ore-hia », ’o tē fa’aitoito roa nei. Tē parau ra ’oia : « E ’ere iho ā ïa i te hanahana rahi te tu’ura’a i te hō’ē pārahira’a ’e te hō’ē ’aira’amā’a, ’aore rā te tāmaura’a i te mau tuha’a. » Terā rā, ’āhani ’aita te reira, ’aita ïa e hōho’a ’āmuira’a.

Tē parau nei ’o Brandon Urry, te rautī o te pupu ē, tītauhia « e rave rau ta’ata ’e e rave rau ’aravihi ’e e rave rau heitupura’a » nō te rave i tā rātou ’ohipa—« nō te ha’apuroro i te here o te Fatu ’e te mau parau tāna e hina’aro e fa’a’ite i te tā’āto’ara’a. »

Tē parau nei Brandon ē tītauhia te tā’āto’ara’a ’e tō rātou mau ’aravihi ta’a ’ē « ’ia haere ’āmui mai nō te hō’ē tumu. » ’E nō te mea ’o Iesu Mesia terā tumu, tē putapū nei teie pupu fa’anaho i tōna aro ’e tē ’ite nei i tāna mau semeio.

Tē parau ato’a nei ’o Robert Simpson, te tahi ato’a rautī : « Mai te huru ē […] tē haere mai nei te Vārua o te Fatu i roto i tā mātou mau rurura’a ’e tei reira ’oia nō te tauturu ia mātou […] ’ia fa’aoti [i te ’ohipa] […] I te tahi taime e uiui te mana’o, e nāhea pa’i mātou i te fa’aoti roa i teie ’ohipa. E pure rā mātou nō te ani i te tauturu o tō tātou Metua i te ao ra. »

’E mai tā Joel i parau : « Maoti te fa’a’oroma’ira’a, te fa’aitoitora’a, te tāmau-noa-ra’a i te ’ohipa, e oti roa [te pa’epa’e], ’e ’ua ineine i te po’ipo’i o te ’āmuira’a rahi. » Tē parau nei Joel e mea « fa’auru mau » te reira nō te mau semeio e tae mai nei nā roto ia Iesu Mesia.