« ’Ua fa’ahanahana te peresideni Nelson i te 100ra’a o tōna mahana fānaura’a », Liahona, Novema 2024.
Mau parau ’āpī nō te ’Ēkālesia
’Ua fa’ahanahana te peresideni Nelson i te 100ra’a o tōna mahana fānaura’a
’Ua ’āmui mai te feiā fa’atere o Te ’Ēkālesia a Iesu Mesia i te Feiā Mo’a i te mau Mahana Hope’a nei i te ’utuāfare ’e i te mau hoa, i te 9 nō Tetepa 2024, nō te fa’ahanahana i te peropheta ’e te peresideni o te ’Ēkālesia, ’o te peresideni Russell M. Nelson, i te 100ra’a o tōna mahana fānaura’a.
’Ua fa’atupuhia te reira ’ohipa i Roto Miti ’e ’ua ha’apurorohia nā te ao ato’a nei. ’Ua ’itehia te tahi hīmenera’a, te mau video fa’ahanahana a te feiā fa’atere fa’aro’o, te mau a’ora’a a te feiā fa’atere o te ’Ēkālesia ’e a te mau melo o te ’utuāfare o te peresideni Nelson, ’e te mau video a te mau melo o te ’Ēkālesia e fa’a’ite i te huru rātou i aupuru i te hō’ē.
’Ua ha’amāuruuru te peresideni Nelson i te ’utuāfare, te mau hoa ’e te feiā mo’a nō tō rātou maita’i ’e te pāturura’a. ’Ua fa’a’ite ’oia i tōna māuruuru nō te mau poro’i fa’atau aroha e rave rahi roa nō tōna mahana fānaura’a, ’e nō te mau pāhonora’a nā te ao ato’a nei i tāna tītaura’a manihini « 99+1 », ’oia ho’i tāna fa’aitoitora’a i te ta’ata ’ia « toro i te rima i te ‘hō’ē’ i roto i tō tātou orara’a, tei tupu te mana’o mo’emo’e ’e te ’āta’a » (Facebook, 1 nō Tiunu 2024, facebook.com/russell.m.nelson).
’Ua tūra’i te peropheta i te faufa’a rahi o te fa’aro’o, te hi’ora’a mure ’ore i roto i te orara’a ’e te tūsia tāra’ehara a Iesu Mesia. « E au mau taea‘e, e au mau tuahine, e ’ere ā ïa te roara’a o tō ’outou orara’a te mea faufa’a roa maoti rā te huru orara’a tā ’outou e ora nei », ’ua parau te peresideni Nelson. « Nō tātou tāta’itahi, noa atu e ta’ata 100 matahiti, e mea tere roa te orara’a. Tā’u nei pure, ’oia ho’i, ’ia vaiiho ’outou i te Atua ’ia upo’oti’a i roto i tō ’outou orara’a. ’A rave i te mau fafaura’a ’e ana. ’A fa’aea i ni’a i te ’ē’a nō te fafaura’a. ’A fa’aineine, nō te ho’i e ora fa’ahou i pīha’i iho iāna. »
’Ua fa’a’ite nā peresideni Dallin H. Oaks ’e Henry B. Eyring, nā tauturu o te peresideni Nelson i roto i te Peresidenira’a Mātāmua, i tō rāua mana’o nō te ’ohipara’a i pīha’i iho i te peropheta e ono matahiti ’e te ’āfa te maoro. ’Ua fa’a’ite rāua i te māhanahana o te peresideni Nelson, tōna fa’atura i te ta’ata ’e tōna huru Mesia.
« Te pārahira’a i roto i te hō’ē piha, ’aore rā te hō’ē rurura’a ’aore rā te hō’ē ’āparaura’a ’e te peresideni Nelson, e fāna’ora’a ïa nō te ’ite mai mai te aha te huru te pārahira’a ’e te Fa’aora », ’ua parau te peresideni Oaks. « ’O ’oia te ti’a nō te Fa’aora. ’E ’o ’oia te hōho’a e pe’e nō tātou. »