’Aita roa te mata’i i fa’aea i te puhipuhi
E nehenehe tātou e tauturu ia vetahi ’ē ’ia nu’u i mua i roto i tō rātou tere nō te fa’ari’i i te mau ha’amaita’ira’a a te Atua.
I te matahiti 2015, i te tuha’a fenua nō Pernambuco, Peretīria, ’ua ’āmui mai e 62 melo nō te piha ’īriti ture a J. Reuben Clark ’e te piha ’auvaha ture o te fenua, nō te tītorotoro nō ni’a i te mau ’aimarōra’a ha’avāra’a a te feiā e fa’aea nei i roto e maha fare rū’au fa’atuha’ahia ta’a ’ē. Te maorora’a e pae hora, i te hō’ē mahana mā’a, ’ua uiui hō’ē hō’ē teie mau pāruru hau atu i te 200 rū’au e fa’aea ra i reira, ’ua ha’amo’ehia rātou tāta’itahi e te tōtaiete.
I roto i tā rātou uiuira’a, ’ua ’ite mai rātou e rave rahi ’ohipa ’ī’ino tei ravehia i ni’a i te feiā pa’ari e fa’aea ra i reira, mai te fa’aru’era’ahia, te hāmani-’ino-ra’a ’e te ’eiāra’a moni. Hō’ē o te mau tumu mau a teie piha ’īriti ture ’o te aupurura’a ïa i te feiā veve ’e te feiā i roto i te fifi. E piti noa ’āva’e i muri mai, ’ua tu’u te auvaha ture i te mau horora’a ma te manuia nō te feiā rave ’ino.
’Ua riro tā rātou tauturura’a ’ei hō’ē hi’ora’a maita’i nō te ha’api’ira’a a te Ari’i Beniamina « ’a tāvini ai ’outou i tō ’outou mau ta’ata tupu, tē tāvini rā ïa ’outou i tō ’outou Atua ».
Hō’ē o te feiā e fa’aea ra i reira ’o tā’u iho i uiui i roto i teie ’ōpuara’a tāmoni-’ore, ’o te hō’ē ïa vahine pa’ari ’ā’au marū e 93 matahiti, ’o Lúcia te i’oa. Nō tōna māuruuru rahi nō tā mātou tāvinira’a, ’ua parau ha’uti mai ’oia, « ’a fa’aipoipo mai iā’u ! »
Mā te maere, ’ua pāhono atu vau : « ’a hi’o na i terā vahine ’āpī nehenehe maita’i ! ’O tā’u vahine terā ’e ’o ’oia te ’auvaha ture o te fenua ».
’Oi’oi roa ’oia i te pāhonora’a mai : « E aha ïa ? E mea ’āpī roa ’oia, mea hāviti maita’i ’e e mea ’ōhie nōna ’ia fa’aipoipo fa’ahou. Tā’u noa e vai ra, ’o ’oe ana’e ïa ! »
’Aita te mau fifi ato’a o teie mau rū’au fa’ahiahia i pāhonohia i taua mahana rā. Mea pāpū ’ua tāmau noa rātou i te fa’aruru i te tahi taime i te mau fifi, mai te mau ’āti Iareda i roto i tō rātou mau pahī i te terera’a fifi nō te fenua i parauhia ra, « ’ua hutihia rātou i raro i te mau vāhi hōhonu o te moana, nō te mau ’are miti teitei mai te mou’a tei fati mai i ni’a iho ia rātou ra ».
I taua rā mahana mā’a ra, ’ua ’ite teie mau rū’au e fa’aea ra i roto i te mau fare ha’atuha’ara’a ē, noa atu tō rātou ’ite-’ore-ra’a-hia i te fenua nei, ’ua ’ite-maita’i-hia rātou tāta’itahi e te hō’ē Metua i te ao ra here, Hō’ē ’o tē pāhono nei ato’a i te mau pure ’ōhie roa a’e.
’Ua ha’afarara mai te Fatu o te mau fatu i te « hō’ē mata’i rahi roa » tei pūpuhi i te mau ’āti Iareda i te mau ha’amaita’ira’a i fafauhia. Hō’ē ā, e nehenehe tātou e fa’aoti e tāvini mai te hō’ē mata’i ha’eha’a i roto i te rima o te Fatu. Mai te « mata’i i [’ore] i fa’aea i te puhipuhi noa » i te mau ’āti Iareda nō te fenua i parauhia ra, e nehenehe tātou e tauturu ia vetahi ’ē ’ia nu’u i mua i roto i tō rātou tere nō te fa’ari’i i te mau ha’amaita’ira’a a te Atua.
E rave rahi matahiti i ma’iri, ’a uiuihia ai Chris, tā’u vahine fa’aipoipo ’e ’o vau nei, nō tō’u pi’ira’a ’ei ’episekōpo, ’ua ani mai tō’u peresideni titi ’ia feruri nā roto i te pure i te mau i’oa e tu’u ’ei mau tauturu. I muri a’e i te fa’aro’ora’a i te mau i’oa tā’u i hōro’a atu, ’ua parau mai ’oia iā’u e ti’a iā’u ’ia ’ite i te tahi mau mea nō ni’a i te hō’ē o te mau taea’e.
’A tahi, ’aita teie taea’e i ’ite i te tai’o. Te piti, ’aita tōna e pere’o’o ’o tāna e nehenehe e fa’a’ohipa nō te tere e fārerei i te mau melo. Te toru, e tāmau noa ’oia—i te mau taime ato’a—i te tītī’a mata mahana i te fare purera’a. Noa atu te mau ha’ape’ape’ara’a a te peresideni, ’ua putapū pūai au e ti’a iā’u ’ia tāpe’a mai tōna i’oa, ’oia ato’a ’ia rave mai iāna ’ei tauturu nō’u ’e ’ua turu mai te peresideni titi iā’u.
I te sābati i reira tō’u nā tauturu ’e ’o vau nei e pāturuhia ai i roto i te purera’a ’ōro’a, e ’ite-roa-hia te maere rahi o te mau melo i ni’a i tō rātou hōho’a mata. ’Ua haere marū noa mai teie taea’e i mua i te terōno, i reira te mau mōri i ni’a te aroaro e ’ana’ana ai i ni’a i tōna tīti’a mata mahana.
’A pārahi ai ’oia i pīha’i iho iā’u, ’ua ani atu vau iāna, « e te taea’e, e fifi ānei tō tō ’oe nā mata ? »
’Ua parau mai ’oia « ’aita ».
« Nō te aha pai ’oe e tāmau noa ai i tō ’oe tīti’a mata mahana i te fare purera’a ? » ’Ua ui atu vau. « E tō’u hoa, e hina’aro te mau melo e hi’o i tō ’oe mata, ’e e ti’a ato’a ia ’oe ’ia hi’o maita’i atu ia rātou ».
I te reira iho taime, ’ua tātara ’oia i tōna tīti’a mata mahana ’e ’aita roa ’oia i ’ō’omo fa’ahou i te reira i te fare purera’a.
’Ua tāvini teie taea’e i pīha’i iho iā’u ē tae noa i te taime ’a ha’amāuruuruhia ai au ’ei ’episekōpo. Tē tāvini maita’i noa nei ā ’oia i teie mahana i roto i te ’Ēkālesia, ’e e hi’ora’a maita’i ’oia nō te itoito ’e te ha’apa’o maita’i i te Fatu ia Iesu Mesia. ’E nō reira, e rave rahi matahiti, ’ua riro ’oia ’ei ta’ata ’ite-’ore-hia e ’ō’omo nei i te tīti’a mata mahana, e pārahi nei fātata ’ua mo’ehia i ni’a i te mau pārahira’a o te fare purera’a. Pinepine au i te uiui, « e hia mau taea’e ’e mau tuahine ha’apa’o maita’i tei mo’ehia i rotopū ia tātou i teie mahana ? »
’Ua mātauhia ānei tātou ’aore rā ’ua mo’ehia, e fārerei ihoā tātou tāta’itahi i te mau tāmatara’a. ’A fāriu ai tātou i ni’a i te Fa’aora, « e ha’amo’a [’oia i tō tātou] mau ’ati ’ei maita’i nō [tātou] » ’e e tauturu ’oia ia tātou ’ia pāhono i tō tātou mau tāmatara’a, ma te rāve’a e fa’a’ōhie i tō tātou tupura’a pae vārua. Nō te mau rū’au ānei i roto i te fare ha’atūha’ara’a, hō’ē melo nō te ’Ēkālesia tei ha’avā-hape-hia, ’aore rā te tahi atu ta’ata, e nehenehe tātou e riro mai « te mata’i i [’ore] i fa’aea i te puhipuhi », i te ’āfa’ira’a atu i te tīa’ira’a ’e te arata’ira’a ia vetahi ’ē i ni’a i te ’ē’a nō te fafaura’a.
’Ua hōro’a mai tō tātou peropheta here, te peresideni Russell M. Nelson i te hō’ē anira’a manihini ’ono’ono ’e te fa’auruhia i te feiā : « Tē ha’apāpū fa’ahou nei au ma te pūai ē, ’ua ani mai te Fatu i te feiā ’āpī tamāroa ti’a-mā ato’a ’o te nehenehe ’ia fa’aineine nō te tāvini i te hō’ē misiōni. Nō te feiā ’āpī tamāroa nō te mau mahana hope’a nei, te tāvinira’a misiōnare e hōpoi’a ïa nā te autahu’ara’a […] Nō ’outou te mau tuahine ’āpī itoito, te misiōni e rāve’a pūai ato’a, e ’ere rā i te mea fa’ahepohia ».
I te mau mahana ato’a, e tauatini feiā ’āpī tamāroa ’e tamāhine e pāhono nei i te pi’ira’a a te peropheta a te Fatu ma te tāvinira’a ’ei mau misiōnare. E mea māramarama mau ’outou, mai tā te peresideni Nelson i parau na, e nehenehe ’outou e riro ’ei « haʼamaitaʼi rahi atu ā i te ao nei, hau atu i te mau uʼi nā mua atu ! » ’Oia ïa, e ’ere te reira i te aura’a ē ’o ’outou te hōho’a maita’i a’e nō ’outou iho i te taime ihoā ’a tomo ai ’outou i te pū ha’api’ipi’ira’a misiōnare.
’Aita roa ïa, e nehenehe ’outou e ’ite ia ’outou mai ia Nephi, « ’ua arata’ihia… e te Vārua, ’e ’aore […] i ’ite nā mua roa i te mau mea tā [’outou] e ti’a ’ia rave. ’Āre’a ’ua haere atu [’outou] ».
Penei a’e, e ’ite ’outou ia ’outou i te pāruru-’ore-ra’a mai ia Ieremia ’e e hina’aro e parau ē, « ’aore ho’i au i ’ite i te parau : e tamaiti iti au ».
E nehenehe ato’a ’outou e ’ite i tō ’outou iho mau hapehape ’e e hina’aro e tū’ou mai tā Mose i rave : « E tā’u Fatu, e ’ere au i te ta’ata parau […] e reo maromaroā ’e te maumau tō’u ».
Mai te peu hō’ē i roto ia ’outou, te feiā ’āpī tamāroa ’e tamāhine herehia ’e te pūai, e mana’o tōna mai teie i teie taime, ’a ha’amana’o i te pāhonora’a a te Fatu, « ’eiaha e parau, e tamaiti iti au : ’o tei tonohia ’oe e au ra ». ’E ’ua fafau mai ’oia , « e teienei, e haere ’oe, ’e ’ei pīha’i ato’a iho vau i tō vaha, ’e nā’u e fa’a’ite ia ’oe i te parau ’ia parau ’oe ra ».
E tupu tō ’outou tauira’a mai tō ’outou ta’ata natura ’ei ta’ata pae vārua, « ma te a’o nā ni’a iho i te a’o, te tahi vāhi iti i’ō nei ’e te tahi vāhi iti i’ō atu » ’a tāmau noa ai ’outou i te tūtava e tāvini ia Iesu Mesia i roto i te ’āua misiōni, nā roto i te tātarahapara’a tāmahana, te fa’aro’o, te ha’apa’ora’a tano ’e te ’ohipa pūai nō « te ’ite tāmau mai, te ha’api’ira’a i te tātarahapa ’e te bāpetizora’a i te feiā fāfariuhia ».
Noa atu tē tāmau nei ’outou i te tāreta misiōnare, e nehenehe ’outou i te tahi taime e putapū i te ’ite-’ore-hia ’aore rā ’ua mo’ehia. Terā rā, e ti’a ia ’outou ’ia ’ite ē, e Metua i te ao ra maita’i roa tō ’outou, ’o tei ’ite maita’i roa ia ’outou iho, ’e te hō’ē Fa’aora tei here ia ’outou. E feiā fa’atere misiōni tō ’outou, ē noa atu tō rātou mau hapehape, e tāvini rātou ia ’outou mai te « mata’i i [’ore] i fa’aea i te puhipuhi », nō te arata’i ia ’outou i te roara’a o tō ’outou tere nō tō ’outou iho fa’afāriura’a.
I roto i te « fenua tahe noa te ū ’e te meli » e tāvini ’outou i roto i tā ’outou misiōni, e fānau-fa’ahou-hia ’outou ’e e riro ’ei pipi tau maoro nā Iesu Mesia ’a ha’afātata ai ’outou iāna. E ’ite mai ’outou ē ’aita roa ’outou i ha’amo’ehia.
Noa atu e tīa’i vetahi « ma’a taime roa » ’ia ha’amāmāhia, nō te mea « ’aita e ta’ata » e nehenehe e tauturuhia, ’ua ha’api’i te Fatu Iesu Mesia ia tātou ē, ’aita roa hō’ē ta’ata e ha’amo’ehia iāna ra. ’Aita roa, ’ua riro ’oia ’ei hō’ē hi’ora’a maita’i roa nō te ’imira’a i te ta’ata ’ōtahi i te mau taime ato’a o tāna tāvinira’a i te tāhuti nei.
Tātou tāta’itahi—’e te feiā e fa’a’ati nei ia tātou,—e fa’aruru nei i tō tātou iho mau vero o te pāto’ira’a ’e te mau vave’a o te tāmatara’a o te tāpoi nei ia tātou i te mau mahana ato’a. Terā rā « [’aita roa] te mata’i i fa’aea i te puhipuhi noa e tae noa atu i te fenua i parauhia ra… ; ’e ’ua nā reira rātou i te tūra’ihia i mua i te mata’i ».
E nehenehe tātou e riro ’ei tuha’a nō teie mata’i—taua ā mata’i ra tei ha’amaita’i i te ’āti Iareda i tō rātou tere ’e te hō’ē ā mata’i ma tā tātou tauturu, e ha’amaita’ihia te feiā ’ite-’ore-hia ’e tei mo’ehia ’ia tāpae rātou i tō rātou iho fenua i parauhia ra.
Tē fa’a’ite pāpū nei au ē, ’o Iesu Mesia tō tātou pāruru i mua i te Metua. E Atua ora ’oia ’e e rave ’oia mai te mata’i pūai ’o te arata’i noa ia tātou i ni’a i te ’ē’a nō te fafaura’a. I te i’oa o Iesu Mesia, ’āmene.