Huna i tā tātou mau mauha’a tama’i nō te ’ōrurehau
’Ia huna tātou—i te hōhonu roa ’ino—i te mau mea ri’i ato’a nō te ’ōrurehau i te Atua i roto i tō tātou orara’a, ma te mono i te reira i te ’ā’au tae ’e te mana’o tae.
Tē pāpa’i nei te Buka a Moromona fātata 90 matahiti hou te fānaura’a o te Mesia ē, ’ua ha’amata nā tamāroa a te ari’i Mosia i te hō’ē misiōni e haere roa i te 14 matahiti te maoro i rotopū i te ’āti Lamana. E rave rahi u’i te maoro ’aita te mau tauto’ora’a i manuia nō te fa’atae i te ’āti Lamana ’ia ti’aturi i te ha’api’ira’a tumu a te Mesia. I teie rā taime, nā roto i te ’ohipa temeio a te Vārua mo’a, e rave rahi tauatini ’āti Lamana tei fa’afāriuhia ’e tei riro mai ’ei pipi nā Iesu Mesia.
Tē tai’o nei tātou : « ’E tē ora mau nei te Fatu, ’e ’o rātou e rave rahi ’o tei ti’aturi, ’e ’o rātou e rave rahi ’o tei fa’afāriuhia mai i te ’ite i te parau mau ra, nā roto i te a’ora’a a Amona ’e tōna ra mau taea’e, mai te au i te vārua nō te heheura’a ’e nō te tohu, ’e te mana ho’i o te Atua tei rave i te mau semeio i roto ia rātou ra—’oia ïa, tē parau atu nei au ia ’outou, tē ora mau nei te Fatu, ’e te mau ’āti Lamana ato’a ’o tei ti’aturi i tā rātou a’ora’a, ’e tei fa’afāriuhia i te Fatu ra, ’aita roa ïa rātou i tāiva. »
Te tāviri nō te fa’afāriura’a vai maoro o teie feiā, ’ua fa’ahitihia ïa i roto i te ’īrava nō muri iho : « ’E ’ua riro ho’i rātou ’ei feiā parauti’a ; ’ua vaiiho rātou i tā rātou mau mauha’a tama’i nō te ’ōrurehau i raro, ’e ’aita rātou i tama’i fa’ahou i te Atua, ’e ’aita ato’a i tō rātou mau taea’e. »
Teie fa’ahitira’a nō te mau « mauha’a tama’i nō te ’ōrurehau », e aura’a mau ïa ’e e fa’ahōho’ara’a. Te aura’a ra, ’o tā rātou ïa mau ’o’e ’e mau mauha’a tama’i ’ē atu, nā reira ato’a tō rātou ha’apa’o ’ore i te parau a te Atua ’e i tāna mau fa’auera’a.
Mai teie tā te ari’i o teie mau ’āti Lamana i fa’afāriuhia i parau : « ’E i teienei, inaha, e tō’u mau taea’e […] ’o te reira ana’e tē ti’a ’ia tātou ’ia rave […] nō te tātarahapa i tā tātou mau hara ato’a ’e te mau taparahira’a ta’ata e rave rahi tā tātou i rave, ’e nō te ani atu i te Atua ’ia ’īriti ’ē atu i te reira mau hara i tō tātou nei ’ā’au, nō te mea ’o te reira ana’e ho’i tē ti’a ’ia tātou ’ia rave nō te tātarahapa māite i mua i te Atua ’ia ti’a iāna ’ia horoi atu i tō tātou tāfetafeta. »
’A hi’o maita’i i te parau a te ari’i—’aita tā rātou tātarahapara’a hina’aro mau i arata’i ia rātou i te fa’a’orera’a hara noa, ’ua rave ’ē ato’a rā te Atua i te tāfetafeta o tā rātou mau hara ’e te hia’ai ’ia hara mai roto mai i tō rātou ’ā’au. Mai tā ’outou e ’ite, nō te ’ore rātou e topa fa’ahou i roto i tō rātou vaira’a ’ōrurehau i te Atua, ’ua huna rātou i tā rātou mau ’o’e. ’E ’a huna ai rātou i tā rātou mau mauha’a tama’i, ma te tauihia te ’ā’au, ’ua huna ato’a rātou i tō rātou huru ’ia hara.
E nehenehe tātou e ui ia tātou iho e aha tā tātou e nehenehe e rave nō te pe’e i teie hōho’a, e « vaiiho […] i tā rātou mau mauha’a tama’i nō te ’ōrurehau », noa atu te huru, ’e e riro ’ei ta’ata « fa’afāriu-[roa]-hia i te Fatu » e rave-’ē-hia ai te hara ’e te hia’ai e hara mai roto atu i tō tātou ’ā’au ’e e’ita fa’ahou tātou e tāiva.
E nehenehe e ’itehia te ’ōrurehau ma te ha’a ’e ma te ha’a ’ore. Te hi’ora’a mātauhia nō te ’ōrurehau hina’aro mau, ’o Lucifero ïa, tei pāto’i, i te orara’a hou i te tāhuti nei, i te fa’anahora’a a te Metua nō te tāra’ehara ’e ’ua ’ume ato’a mai vetahi nō te pāto’i nā muri iāna, « ; ’e, i taua mahana ra, e rave rahi tei pe’e atu iāna. » E ’ere i te mea fifi ’ia hāro’aro’a i te ’ino o tāna ’ōrurehau tāmau i tō tātou nei tau.
’O nā aneti-Mesia to’otoru ’e te vi’ivi’i nō te Buka a Moromona—ia Serema, Nehora ’e Korihora—te hi’ora’a mātau nō te ’ōrurehau i te Atua ma te ha’a. Te tumu parau rahi roa a Nehora ’e Korihora, ’oia ho’i, ’aita e hara ; nō reira, ’aita e faufa’a te tātarahapara’a, ’e ’aita e Fa’aora. « [E] manuia […] te ta’ata tāta’itahi mai te au i tōna ’aravihi, ’e tē riro noa ra te rē i te ta’ata i tei au i tōna ra pūai ; ’e te mau mea ato’a tā te ta’ata [e] rave [e ’ere] ïa i te hara. » E ha’apae teie aneti-Mesia i te fa’aterera’a o te ha’apa’ora’a fa’aro’o, ma te parau i te mau ’ōro’a ’e te mau fafaura’a ’ei « ’ohipa ma’ama’a i tu’uhia mai e te mau tahu’a tahito, nō te haru i te mana ’e te ha’amanara’a i ni’a iho ia rātou. ».
Te hō’ē hi’ora’a i te mau mahana hope’a nei nō te ’ōrurehau hina’aro mau, ma te hope’a au rā, ’o te ’ā’amu ïa o William W. Phelps. I tomo ’o Phelps i roto i te ’Ēkālesia i te matahiti 1831 ’e ’ua tu’uhia ’oia ’ei ta’ata nene’i a te ’Ēkālesia. Nāna i fa’anene’i i te mau ha’apararera’a mātāmua a te ’Ēkālesia e rave rahi, ’ua pāpa’i i te tahi mau hīmene ’e ’ua tāvini ’ei pāpa’i parau nō Iosepha Semita. Te vāhi ’ino rā, ’ua huritua ’oia i te ’Ēkālesia ’e i te Peropheta, ’e ’ua hōro’a roa ato’a i te parau ha’avare nō ni’a ia Iosepha Semita i mua i te tiripuna nō Missouri, mau atu ra te Peropheta i te fare ’āuri i reira.
I muri mai, ’ua pāpa’i Phelps ia Iosepha nō te ani i fa’aorera’a hapa. « ’Ua ’ite au i tō’u vaira’a, ’ua ’ite ’oe ’e ’ua ’ite ato’a te Atua i te reira, ’e tē hina’aro nei au ’ia fa’aorahia vau mai te mea e tauturu mai tō’u mau hoa iā’u. »
I roto i tāna pāhonora’a, ’ua parau te Peropheta : « Parau mau ’ua mamae rahi mātou i tā ’oe ravera’a […] Terā rā, ’ua inuhia te ’āu’a, ’ua ravehia te hina’aro o tō tātou Metua i te ao ra, ’e tē ora noa nei tātou […] Haere mai rā, e te taea’e, inaha ’ua ma’iri te tama’i, e hoa ho’i i te ha’amatara’a, e hoa fa’ahou i te hope’a. »
Ma te tātarahapa hina’aro mau, ’ua huna ’o William Phelps i tāna « mauha’a tama’i nō te ’ōrurehau » ’e ’ua fa’ari’i-fa’ahou-hia i roto i te auhoara’a hope, e’ita fa’ahou e tāiva.
Pēnei a’e te hōho’a fa’ahema atu ā nō te ’ōrurehau i te Atua, ’o terā paha ma te ha’a ’ore—te tāu’a-’ore-ra’a i tōna hina’aro i roto i tō tātou orara’a. E rave rahi te ta’ata ’o tē ’ore roa e ’ōpua i te ’ōrurehau ma te ha’a, ’e tē pāto’i nei rā paha i te hina’aro ’e i te parau a te Atua nā roto i te haerera’a i tō rātou iho tere ma te hi’o ’ore i te arata’iraa a te Atua. Tē ha’amana’o ra vau i te hīmene rahi a Frank Sinatra, ’a tau matahiti i teienei, ’e terā parau rahi roa « Mai tā’u iho i mana’o. » ’Aita e ’ore ē i roto i te orara’a e mea āteatea maita’i nō te rave mai tōna hina’aro ’e mai tāna iho mā’itira’a, nō te parau rā nō te fa’aorara’a ’e te ora mure ’ore, teie tā tātou parau e hīmene « Mai tā te Atua i mana’o », nō te mea ’aita iho ā e rāve’a ’ē atu.
E hi’o na pa’i, nō te fa’ahōho’a, i te hi’ora’a o te Fa’aora nō te bāpetizora’a. ’Ua auraro ’oia i te bāpetizora’a ’ei fa’a’itera’a i tōna mana’o fa’atura i te Metua ’e ’ei hi’ora’a nō tātou nei :
« Tē fa’a’ite mai ra ’oia i te mau tamari’i a te ta’ata nei ē, tē fa’aha’eha’a ra ’oia iāna iho i te pae tino nei i mua i te Metua, ’e tē fa’a’ite ato’a ra ho’i i te Metua ē, e auraro ’oia iāna ra i te ha’apa’ora’a i tāna ra mau fa’auera’a […]
« ’E ’ua parau atu ra ’oia i te mau tamari’i a te ta’ata nei : ’A pe’e mai na ’outou iā’u nei. Nō reira, e tō’u mau taea’e here, e ti’a ānei ia tātou ’ia pe’e atu ia Iesu ra, ’ia ’ore tātou e hina’aro māite i te ha’apa’o i te mau fa’auera’a a te Metua ra ? »
’Aita e paraura’a « mai tā’u iho » mai te peu e pe’e tātou i te hi’ora’a o te Mesia. Mai te huru te tāmatara’a i te ’imi i te tahi atu ’ē’a nō te ra’i ra, i te ’ohipa-faufa’a-’ore-ra’a i ni’a i te Pare nō Babela, e mea maita’i a’e ho’i ’ia hi’o i te Mesia ’e i tāna fa’aorara’a.
Te ’o’e ’e te tahi atu mauha’a tama’i tā te feiā fa’afāriu ’āti Lamana i huna, e mau mauha’a ïa nō te ’ōrurehau nō te huru rātou i fa’a’ohipa ai i te reira. ’Aita roa atu te reira huru mauha’a tama’i i roto i te rima o tā rātou mau tamaiti, tei fa’a’ohipahia nō te pāruru i te ’utuāfare ’e i te ti’amāra’a, i te mauha’a nō te ’ōrurehau i te Atua. Nā reira ato’a nō taua mau mauha’a tama’i ra i roto i te rima o te ’āti Nephi : « ’aita rātou e ’aro ra ’ia roa’a te fa’aterera’a ’e te mana, tē aro ra rā […] nō tō rātou mau ’utuāfare ’e tō rātou ti’amāra’a, ’e tā rātou mau vahine ’e tā rātou mau tamari’i, ’e tā rātou mau mea ato’a, ’oia ïa, nō tā rātou mau rāve’a ha’amorira’a ’e tā rātou ’ēkālesia. »
Nā reira ato’a, e mau mea i roto i tō tātou orara’a, ’aita paha e ’ino ’aore rā e mea maita’i iho, nō te fa’a’ohipa-hape-ra’a rā, riro mai nei ’ei « mauha’a tama’i nō te ’ōrurehau. » ’Ei hi’ora’a tā tātou huru paraparau, e nehenehe e fa’aitoito ’aore rā e fa’aha’amā. Mai tā Iakobo i parau :
« ’Āre’a te arero nei, [e au ē] ’aore ïa e ta’ata e vī ai te reira, e ’ino mōrohi ’ore ïa, ’ua ’ī i te hora pohe.
« Tē ha’amaita’i nei tātou i te Atua ra i tō tātou Metua i te reira ; ’e tē fa’a’ino tātou i te ta’ata tei hāmanihia i tō te Atua ra hōho’a i te reira.
« Nō roto i taua vaha hō’ē nei te ha’amaita’i, ’e te fa’a’ino. ’Eiaha roa te ti’a te reira, e au mau taea’e. »
E rave rahi roa i roto i te mau parau i mua i te ta’ata ’e i te vāhi ’ōmo’e, e mea mana’o ’ino ’e te pi’o. E rave rahi roa ’āparaura’a e mea faufau ’e te tū’a’ā, i rotopū ato’a i te feiā ’āpī. Teie huru paraparaura’a e « mauha’a tama’i nō te ’ōrurehau » i te Atua, tei « ’ī i te hora pohe. »
E feruri na i te tahi atu hi’ora’a nō te hō’ē mea maita’i iho, ’o tē nehenehe rā e hurihia nō te huritua i te mau arata’ira’a a te Atua—te tōro’a ’ohipa. E nehenehe te hō’ē e ’ite i te māuruuru mau i roto i te hō’ē tōro’a ’ohipa, te hō’ē ’ohipa ’aore rā te hō’ē tāvinira’a, ’e tātou pā’āto’a tē fāna’o nei i te mea tā te feiā pūpū mau ’e te ’aravihi, i roto i te mau tōro’a rau, e rave nei ’e e hāmani nei.
Terā rā, e nehenehe terā pūpūra’a i tāna tōro’a e riro mai ’ei rōtahira’a hō’ē roa i roto i te orara’a o te hō’ē ta’ata. E mea iti atu ra te tahi atu mau mea, mai te mau tītaura’a a te Fa’aora i te taime ’e te tārēni a te hō’ē ta’ata. Te mau tāne, ’e te mau vahine ato’a, e fa’aru’e i te fāna’ora’a ti’a ’ia fa’aipoipo, ’o tē ’ore roa e mau māite ’e e turu i tōna hoa fa’aipoipo, ’o tē ’ore roa e aupuru i tāna mau tamari’i, ’aore rā ’o tē ’ape ho’i, ma te ferurihia, i te ha’amaita’ira’a ’e te hōpoi’a e fānau i te tamari’i, nō te maita’i noa o tāna tōro’a, e nehenehe rātou e huri i teie ’ōpuara’a e au ’ia ’āruehia ’ei hōho’a nō te ’ōrurehau.
Te tahi fa’ahou hi’ora’a, nō ni’a ïa i tō tātou tino tāhuti. Tē fa’aha’amana’o nei Paulo ē, ’ei ha’amaita’i tātou i te Atua, i te tino ’e i te vārua ’e e hiero teie tino nō te Vārua Maita’i, « tei noa’a ia ’outou i te Atua ra, e ’ere ho’i ’outou i tō ’outou iho. » Nō reira, e mea ti’a iho ā ’ia rave tātou i te taime nō te ’atu’atu i tō tātou tino, te maita’i e noa’a ia tātou. ’O te pae iti o tātou tē tae i te fāito teitei tā tātou i ’ite na i roto i te mau mā’ona o te heiva tū’aro nui ’e te tū’aro nui nō te huma, ’e vetahi o tātou tē ’ite ra i te huru o te ruhiruhiāra’a, ’oia tā te peresideni M. Russell Ballard i parau « te mau naero nē’i e ta’ata’a ra. »
’Āre’a rā, tē ti’aturi nei au ē, e mea au nā tō tātou Hāmani ’ia fa’aitoito ana’e tātou i te ’atu’atu i tāna hōro’a fa’ahiahia nō te tino tāhuti nei. E tāpa’o nō te ’ōrurehau ïa, ’āhani e rave ’ino tātou, ’aore rā e ha’avi’ivi’i tātou i te tino, ’aore rā te hāmani ’ino, ’aore rā te ’orera’a e rave i tei noa’a ’ia rave nō te hō’ē orara’a ea maita’i. Nā reira ato’a, e nehenehe te fa’aahaaha ’e te onoono’a i ni’a i tōna tino, tōna hōho’a ’aore rā te ’ahu, e riro mai ’ei hōho’a nō te ’ōrurehau i te tahi atu pae, ’e ’ua ha’amori atu ra terā ta’ata i te hōro’a a te Atua ’eiaha rā te Atua.
I te hope’a, te aura’a ’ōhie nō te hunara’a i tā tātou mauha’a tama’i nō te ’ōrurehau i te Atua, ’o te fatira’a ïa i raro a’e i te tāparura’a a te Vārua mo’a, te tatarara’a i te ta’ata tino nei ’e te rirora’a ’ei « ta’ata mo’a nā roto i te tāra’ehara a te Mesia ra te Fatu. » Te aura’a ra, e tu’u mātāmua i te fa’auera’a mātāmua i roto i tō tātou orara’a. Te aura’a ra e vaiiho i te Atua ’ia upo’oti’a. Mai te peu tō tātou here i te Atua ’e tō tātou tapitapi ’ore ’ia tāvini iāna ma tō tātou pūai ato’a, tō tātou mana’o ato’a ’e tō tātou itoito, e riro mai ’ei ’ōfa’i hi’opo’a nō tātou nō te hi’o i te mau mea ato’a ’e nō te rave i tā tātou mau fa’aotira’a ato’a, e huna ïa tātou i tā tātou mauha’a tama’i nō te ’ōrurehau. Nā roto i te maita’i rahi o te Mesia, e fa’aore mai te Atua i tā tātou mau hara ’e mau ’ōrurehau nō tahito ra ma te horoi atu i te tāfetafeta o te reira mau hara ’e mau ’ōrurehau i roto i tō tātou ’ā’au. ’E e tae te taime, e horoi atu ato’a ’oia i te hō’ē noa atu hia’ai nō te ’ino, mai tāna i nā reira i te feiā fa’afāriu ’āti Lamana i tahito ra. ’Ei reira ato’a tātou « e’ita fa’ahou e tāiva. »
E arata’i te hunara’a i te mauha’a tama’i nō te ’ōrurehau i te ’oa’oa hō’ē roa. Tātou pā’āto’a tei fa’afāriuhia i te Fatu, e « roa’a ia [tātou] te hina’aro ’ia hīmene i te [hīmene nō te] aroha fa’aora. » ’Ua ha’apāpū tō tātou Metua i te ao ra ’e tāna Tamaiti, tō tātou Tāra’ehara, i tā rāua parau fafau hope ’ore i tō tātou poupou hope’a roa nā roto i te here ’e te tūsia hōhonu roa a’e. Tē ’ite nei tātou i tō rāua here i te mahana tāta’itahi. E nehenehe mau ā tātou e fa’aho’i atu i tō tātou iho here ’e te mana’o fa’atura. ’Ia huna tātou—i te hōhonu roa ’ino—i te mau mea ri’i ato’a nō te ’ōrurehau i te Atua i roto i tō tātou orara’a, ma te mono i te reira i te ’ā’au tae ’e te mana’o tae. I te i’oa o Iesu Mesia, ’āmene.