Pe’e i te Mesia
Tātou te feiā ’āpe’e i te Mesia, e ha’api’i tātou i te ta’ata ’e e parau pāpū tātou nō Iesu Mesia, te Hōho’a maita’i roa e pe’e nō tātou. Nō reira, pe’e ana’e iāna nā roto i te fa’aru’era’a i te mārō.
I teie matahiti e rave rahi mirioni tei fa’auruhia e te fa’anahora’a ’imira’a ’evanelia tei parauhia i te tītaura’a manihini a te Fa’aora « Mai, pe’e mai. » E ’ere te pe’era’a i te Mesia i te ’ohipa tāu’a ’ore ’e nō te tahi ri’i noa taime. E parau fafau tāmau ’e e huru orara’a e tano i te arata’i ia tātou i te mau taime ato’a ’e i te mau vāhi ato’a. ’O tāna mau ha’api’ira’a ’e tōna hi’ora’a te ’ē’a nō te mau pipi ato’a a Iesu Mesia. ’E ’o te tā’āto’ara’a tei tītau-manihini-hia i ni’a i teie ’ē’a, inaha tē ani nei ’oia i te tā’āto’ara’a ’ia haere mai iāna ra—« te ’ere’ere ’e te ’uo’uo, te tītī ’e te ti’amā, te tāne ’e te vahine […] hō’ē ana’e rātou ato’a i mua i te Atua. »
I.
Te ta’ahira’a mātāmua nō te pe’e i te Mesia ’o te ha’apaora’a ïa i tāna i parau ’o « te parau rahi i roto i te ture » :
« Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a.
« ’O te ture mātāmua teie ’e te hau i te rahi.
« ’E mai te reira ato’a te piti ; E aroha atu ’oe i tō ta’ata tupu, mai tō aroha ia ’oe iho na.
« Te ture ato’a ’e te mau peropheta, tei teie nei ïa pu’e ture e piti nei ».
E hōro’a te mau fa’auera’a a te Atua i te pūai arata’i ’e te ha’amau i roto i tō tātou orara’a. Tā tātou mau ’ohipa i te tāhuti nei, e hōho’a roa ïa i te hō’ē tamāroa iti ’e tōna metua tāne e ha’ape’e i te pāuma i te hō’ē mahana mata’i. ’A pe’e noa ai te pāuma i ni’a, nō te mata’i, e huti te reira i ni’a i te taura i roto i te rima o te tamāroa nei. Nō tōna mā’ua i te ’ohipa a te mau mata’i nō te tāhuti nei, ’ua tu’u ’oia i te mana’o e tāpū i te taura, ’ia teitei atu ā te pāuma i te pe’e. I parau ai tōna metua tāne pa’ari ē ’aita, ma te fa’ata’a ē, nā te taura e tāpe’a i te pāuma i ni’a, i mua i te mau mata’i nō te tāhtuti nei. ’Ia ’ore tātou e tāpe’a i te taura, e’ita ïa te pāuma i pe’e atu ā i ni’a. E hōpoi-haere-hia te reira e teie mau mata’i ma te farara pāpū i raro.
Teie taura faufa’a roa, ’o te mau fafaura’a ïa e fa’atū’ati ia tātou i te Atua, tō tātou Metua i te ao ra, ’e i tāna Tamaiti ’o Iesu Mesia. ’Ia fa’atura tātou i terā mau fafaura’a nā roto i te ha’apa’ora’a i tā rāua mau fafaura’a ’e te pe’era’a i tā rāua fa’anahora’a nō te tāra’ehara, e pe’e a’e tātou i ni’a i te mau teiteira’a tiretiera maoti tā rāua mau ha’amaita’ira’a i parauhia mai.
Tē parau pinepine nei te Buka a Moromona ē ’o te Mesia « te māramarama o te ao nei. » I tōna fāra’a i te ’āti Nephi, ’ua fa’ata’a te Fatu ti’afa’ahou i taua ha’api’ira’a ra ma te parau ia rātou : « I fa’a’ite atu na vau i te hi’ora’a nō ’outou. » « ’O vau nei te māramarama tā ’outou e fa’ateitei atu i ni’a—te mea tā ’outou i ’ite iā’u i te ravera’a. » ’O ’oia te hōho’a tā tātou e pe’e. E ha’api’i tātou i te mea tāna i parau ’e i rave nā roto i te ’imira’a i te mau pāpa’ira’a mo’a ’e te pe’era’a i te mau ha’api’ira’a a te peropheta, mai tā te peresideni Russell M. Nelson i a’o ia tātou ’ia rave. I roto i te taime nō te ’ōro’a mo’a, e fafau tātou i te sābati tāta’itahi ē e « ha’amana’o ā iāna ē a muri noa atu, ma te ha’apa’o maita’i i tāna mau fa’aue. »
II.
I roto i te Buka a Moromona, ’ua hōro’a mai te Fatu i te mau mea niu nō te mea tāna i parau « te ha’api’ira’a tumu a te Mesia. » ’O teie ïa, te fa’aro’o i te Fatu ia Iesu Mesia, te tātarahapara’a, te bāpetizora’a, te fa’ari’ira’a i te hōro’a nō te Vārua Maita’i, te mau-pāpū-ra’a ē tae noa atu i te hope’a ’e te rirora’a mai te tamari’i ri’i, ’oia ho’i ïa e ti’aturi i te Fatu ’e e auraro i te mau mea ato’a tāna e tītau mai.
E piti huru tā te mau fa’auera’a a te Fatu : te mea tāmau, mai te ha’api’ira’a tumu a te Mesia, ’e te mea tau poto. Te mau fa’auera’a tau poto, ’o terā ïa e tītauhia nō te mau hina’aro o te ’Ēkālesia a te Fatu ’aore rā o te feiā ha’apa’o maita’i nō te tahi ’ohipa tau poto, terā e tu’uhia i te hiti ’ia ’ore tītau-fa’ahou-hia. Te tahi hi’ora’a nō te mau fa’auera’a tau poto, ’o te mau arata’ira’a ïa a te Fatu i te feiā fa’atere mātāmua o te ’Ēkālesia ’ia haere te feiā mo’a mai New York i Ohio, i Missouri, i Illinois, ’e i te hope’a ’ia fa’atere i te reva-’ē-ra’a o te pionie i te mau mou’a i te Tō’o’a o te rā. Noa atu te huru tau poto, ’ia tu’uhia mai teie mau fa’auera’a, nō te ha’apa’o ïa.
E mau fa’auera’a tāmau tei tītau i te taime rahi nō te tā’āto’ara’a ’ia ha’apa’o. ’Ei hi’ora’a, ’ua tūra’i te a’ora’a rahi a te peresideni Lorenzo Snow nō ni’a i te ture nō te tuha’a ’ahuru, i te parau nō te tahi fa’auera’a tei hōro’a-a’ena-hia, ’aita rā ā i ha’apa’o-rahi-hia e te mau melo te ’Ēkālesia. Tītauhia ’ia tūra’i-fa’ahou-hia tōna parau i mua i te mau mea e fa’aruruhia nei e te ’Ēkālesia ’e tōna mau melo. E mau hi’ora’a a’enei nō te tūra’i-fa’ahou-ra’a i te hō’ē parau tei ’itehia nō te mau ’ohipa e fa’aruruhia nei e te feiā mo’a, ’aore rā te ’Ēkālesia. Mai te poro’i nō ni’a i te ’utuāfare tei tu’uhia mai e te peresideni Gordon B. Hinckley ’a tahi u’i i teienei, ’e te pi’ira’a a te peresideni Russell M. Nelson a’enei ’ia parauhia te ’Ēkālesia i tōna i’oa tei heheuhia mai, Te ’Ēkālesia a Iesu Mesia i te Feiā Mo’a i te mau Mahana Hope’a nei.
III.
E au ē, e ha’api’ira’a ’ē a te Fa’aora tei tītauhia ’ia tūra’i-fa’ahou-hia te parau i mua i te huru o tō tātou nei tau.
E tau teie nō te mau parau teimaha ’e te ha’apēpē i roto i te mau tūreiara’a i mua i te ta’ata ’e i te tahi taime i roto ato’a i tō tātou mau ’utuāfare. Pinepine te mau mana’o ta’a ’ē ’e te ’o’oi nō ni’a i te mau ture o te orara’a tōtaiete e fa’ahope’a i roto i te matariri—’e te tāiroiro ato’a—i mua i te ta’ata ’e i roto i tō tātou tā’amura’a ’e te feiā piri ia tātou. I te tahi taime e ha’aparuparu roa ato’a teie huru au ’ore i te ’īritira’a ture nō ni’a i te tahi mau ’ohipa faufa’a rahi, i reira te rahira’a o te huira’atira e ’ite ra i te hina’aro rū ’ia ravehia te tahi ’ohipa nō te maita’i o te huira’atira.
E aha tē tano i te feiā ’āpe’e i te Mesia ’ia ha’api’i i te ta’ata ’e ’ia rave i teie tau nō te tūreiara’a ta’ero ? E aha nei tāna mau ha’api’ira’a ’e te hi’ora’a maita’i ?
’Ohipa faufa’a rahi, i roto i te mau parau tumu mātāmua tā Iesu i ha’api’i i te fāra’a i te ’āti Nephi, ’o te ’apera’a ïa i te mārō. Noa atu ē ’ua ha’api’i ’oia i te reira nō te mānianiara’a te ta’ata nō ni’a i te ha’api’ira’a tumu pae fa’aro’o, e tano pāpū te mau tumu tāna i hōro’a, i te tūreiara’a ’e i te mau tā’amura’a i roto i te poritita, te ture o te orara’a tōtaiete ’e te ’utuāfare. ’Ua ha’api’i Iesu ē :
« ’O ’oia tei roto iāna te vārua nō te mārō ra, e ’ere ïa ’oia i ta’u, nō te diabolo rā, ’oia te metua nō te mārō, ’e ’ua fa’ati’arepu ’oia i te ’ā’au o te mau ta’ata ’ia mārō ma te riri i te tahi ’e i te tahi.
« Inaha, e ’ere teie i tā’u nei mau ha’api’ira’a tumu, te fa’ati’arepura’a i te ’ā’au o te mau ta’ata ’ia riri i te tahi ’e i te tahi ; teie rā tā’u mau ha’api’ira’a tumu, ’ia fa’aru’e-’ē-hia atu taua mau mea ra. »
I te toe’a i tāna tāvinira’a i rotopū i te ’āti Nephi, ’ua ha’api’i Iesu i te tahi atu mau fa’auera’a ’e tū’ati roa i tāna ’ōpanira’a i te mārō. ’Ua ’ite tātou i roto i te Bibilia ē, nā mua atu, ’ua ha’api’i ’oia i teie mau mea tāta’itahi i roto i tāna A’ora’a rahi i ni’a i te mou’a, ’e tei mātauhia, ma te hō’ē ā reo tāna i fa’a’ohipa i mua i te ’āti Nephi. E fa’ahiti atu vau i te reo mātau o te Bibilia :
« E aroha atu i tō ’outou mau ’enemi ; e fa’aora atu i tei tuhi mai ia ’outou ; e hāmani maita’i atu i te feiā i riri mai ia ’outou ; e pure ho’i i te feiā i parau ’ino mai ’e tei hāmani ’ino mai ia ’outou. »
’O te hō’ē teie o te mau fa’auera’a mātau-roa-hia a te Mesia—te mea fa’ata’ahuri roa a’e ’e te fifi roa a’e ’ia pe’e. Noa atu rā, e tuha’a niu rahi roa nō tāna anira’a i te tā’āto’ara’a ’ia pe’e iāna. Mai tā te peresideni David O. McKay i ha’api’i : « ’Aita atu e rāve’a maita’i a’e nō te fa’a’ite i te here i te Atua maori rā nā roto i te fa’a’itera’a atu i te hō’ē here e’ita e ha’apa’o iāna iho nō te ta’ata tupu. »
Teie te tahi atu ā ha’api’ira’a niu nāna, te hōho’a e pe’e nō tātou : « E ao tō tei fa’atupu i te parau hau ra : e parauhia rātou, ’o te tamari’i nā te Atua. »
E mau fa’atupu hau ! ’Auē ïa tauira’a i roto i tō tātou tā’amura’a ’e te ta’ata piri ia tātou mai te peu e fa’aru’e te feiā ’āpe’e i te Mesia i te mau parau teimaha ’e te ha’apēpē i roto i tā rātou mau tūreiara’a ato’a.
I te ’āmuira’a rahi i te matahiti i ma’iri, ’ua tu’u mai te peresideni Russell M. Nelson i teie nā tītaura’a :
« Hō’ē o te mau rāve’a ’ōhie roa a’e nō te ’ite i te hō’ē pipi mau nā Iesu Mesia ’o te huru aroha ïa o te reira ta’ata i ni’a i te tahi atu mau ta’ata […]
« […] E feiā fa’atupu i te hau te mau pipi mau nā Iesu Mesia.
« […] Hō’ē o te mau rāve’a maita’i roa a’e nō te fa’atura i te Fa’aora ’o te rirora’a ïa ’ei ta’ata fa’atupu i te hau. »
’Ei pū’ohura’a i tāna mau ha’api’ira’a : « E mā’itira’a te mārōra’a. E mā’itira’a te fa’atupura’a i te hau. E ti’amāra’a tō ’outou ’ia mā’iti i te māro ’aore rā te fa’afaite. Tē fa’aitoito atu nei au ia ’outou ’ia mā’iti ’ia riro ’ei feiā fa’atupu i te hau, i teienei ’e i te mau taime ato’a. »
E mea tano i te mau pae e riro i te tito ’ia ha’amata i tā rātou ’āparaura’a ma te hi’o e aha te niu ’āmui ’ua tū te mana’o.
Nō te pe’e i te Hōho’a maita’i roa e pe’e nō tātou, ’e tāna peropheta, tītauhia ’ia rave i tei mātau-roa-hia i te parau ē te ture ’auro : « Te mau mea ato’a tā ’outou i hina’aro ia vetahi ’ē ’ia rave ia ’outou na, e nā reira ato’a atu ’outou ia rātou : ’O tā te ture ïa ’e tā te mau peropheta. » Tītauhia ’ia here ’e ’ia hāmani maita’i i te tā’āto’ara’a. Tītauhia ’ia ’ape i te mārō ’e ’ia vai ’ei fa’atupu hau i roto i tā tātou mau tūreiara’a ato’a. E ’ere ïa nō te ha’afifira’a i tō tātou mau parau tumu ’e te mau ’ohipa e rave mātāmua roa, nō te fa’aea rā i te ’aro teimaha i te ta’ata nō tō rātou. ’O te mea ïa tā te Hōho’a maita’i roa e pe’e nō tātou i rave i roto i tāna tāvinira’a. ’O te hi’ora’a ïa tāna i ha’amau nō tātou i te anira’a ia tātou ’ia pe’e iāna.
I roto i teie ’āmuira’a, ’a maha matahiti i teienei, ’ua tu’u te peresideni Nelson i te tahi ’ōpuara’a peropheta nō tātou nei tau :
« E hina’aro ānei ’outou e vaiiho i te Atua ’ia upo’oti’a i roto i tō ’outou orara’a ? E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ? E vaiiho ānei ’outou i tāna mau parau, tāna mau fa’auera’a, ’e tāna mau fafaura’a ’ia fa’auru i te ’ohipa tā ’outou e rave i te mahana tāta’itahi ? E vaiiho ānei ’outou i tōna reo ’ia riro ’ei reo mātāmua i ni’a a’e i te tahi atu ?
Tātou te feiā ’āpe’e i te Mesia, e ha’api’i tātou i te ta’ata ’e e parau pāpū tātou nō Iesu Mesia, te Hōho’a maita’i roa e pe’e nō tātou. Nō reira, pe’e ana’e iāna nā roto i te fa’aru’era’a i te mārō. ’A ’imi noa ai tātou i te tītau i tā tātou mau ture au a’e nō te orara’a huira’atira, fa’aineine ana’e nō tāna mau ha’amaita’ira’a nā roto i te reo ’e te rāve’a a te feiā fa’atupu hau. I roto i tō tātou mau ’utuāfare ’e te tahi atu mau tā’amura’a ’e te feiā piri ia tātou, ’ape ana’e i te parau teimaha ’e te tāiroiro. ’Imi ana’e ’ia vai mo’a, mai tō tātou Fa’aora, i tōna ho’i i’oa mo’a vau e parau pāpū nei ma te ti’aoro i tāna ha’amaita’ira’a nō te tauturu ia tātou ’ia vai mo’a. I te i’oa o Iesu Mesia, ’āmene.