E mea ’ōhie roa te ha’api’ira’a tumu a Iesu Mesia
Tē fa’a’ite nei au i tō’u ’itera’a pāpū nō te ’ohipa mo’a o te ha’api’i i te ha’api’ira’a tumu ’ōhie a Iesu Mesia i te mau tamari’i a te Metua i te Ao ra.
Tē vai ra tō tātou pā’āto’a te mau melo o te ’utuāfare tā tātou e here nei ’o tē fa’ahemahia ’e tē tāmatahia nei ’e te mau mana tāmau a Satane, te ta’ata ha’amou, ’o te fa’atupu i te ’oto i ni’a i te mau tamari’i ato’a a te Atua. E rave rahi o tatou ’o tei ’ore i ta’oto i te mau pō. ’Ua tāmata tātou i te pāruru i te mau ta’ata e ro’ohia ra i te fifi i te mau pūai ato’a o te maita’i. ’Ua tāparu tātou nō rātou nā roto i te pure. ’Ua here tātou ia rātou. ’Ua hōro’a tātou i te hi’ora’a maita’i roa’e e ti’a ia hōro’a.
’Ua fa’aruru ’o Alama, te hō’ē peropheta pa’ari nō te tau tahito ra, i te mau tāmatara’a mai te reira te huru. Pinepine te ta’ata tāna i arata’i ’e i here, i te topa i roto i te ’arora’a a te hō’ē enemi ’ino, terā rā, tē tāmata noa ra ā rātou i te aupuru i te mau tamari’i parau-ti’a i roto i te hō’ē ao ’ino. ’Ua mana’o ’o Alama ē, tāna ti’aturira’a hō’ē roa nō te rē, ’o te hō’ē ïa pūai tā tātou e nehenehe e ti’aturi ’ore i te tahi mau taime, ’e e pinepine i te fa’a’ohipa iti roa. ’Ua ani ’oia i te tauturu a te Atua.
’Ua ’ite Alama ē, nō te tauturu a te Atua, e tītauhia te tātarahapa o te feiā tāna i arata’i, ’e tae noa atu i tōna mau ’enemi. Nō reira, ’ua mā’iti ’oia i te hō’ē rāve’a ta’a ’ē nō te ’arora’a.
Tē fa’ata’a ra te Buka a Mormon i te reira mai teie te huru, « E teie nei, nō te mea e mana rahi tō te a’ora’a i te parau a te Atua ’ia arata’i i te ta’ata ’ia rave i te ’ohipa ti’a; ’oia ïa, ’ua hau tō reira mana i ni’a i te ’ā’au o te ta’ata i tō te ’o’e, ’e tō te tahi mau mea ato’a tē tae ia rātou ra—nō reira i mana’o ai Alama ē, e mea maita’i ïa ’ia tāmata i te mana o te parau a te Atua ».
Te parau a te Atua o te ha’api’ira’a tumu ïa tei ha’api’ihia e Iesu Mesia ’e Tāna ato’a mau peropheta. ’Ua ’ite Alama ē, e mana rahi tō te mau parau nō te ha’api’ira’a tumu.
I roto i te tuha’a 18 o Te Ha’api’ira’a Tumu ’e te mau Fafaura’a, tē fa’a’ite nei te Fatu i te niu ’o tāna ha’api’ira’a tumu.
« Nō te mea, inaha, tē fa’aue nei au i te ta’ata ato’a i te mau vāhi ato’a, ’ia tātarahapa […]
« Nō te mea inaha, ’ua fa’a’oroma’i te Fatu o tō ’ōrua Fa’aora i te pohe o tōna tino ; nō reira ’ua fa’a’oroma’i ho’i ’oia i te mamae rahi o te mau ta’ata ato’a, ’ia ti’a i te mau ta’ata ato’a ’ia tātarahapa ’e ’ia haere mai iāna ra.
« ’E ’ua ti’afa’ahou mai ra ’oia mai te pohe mai ra, ’ia ’ume mai ’oia i te ta’ata ato’a iāna ra, nā roto i te tātarahapa ».
« ’E e tīpapa’tu ’ōrua i raro ’e e ha’amori i te Metua mai tō’u nei i’oa.
« … ’Ia tātarahapa ’e ’ia bāpetizohia ’outou e ti’a ai, i roto i te i’oa o Iesu Mesia ».
« ’A ani atu i te Metua i roto i tō’u nei i’oa, ma te fa’aro’o ’e te ti’aturi ē ’e hōro’ahia mai, ’e e fāri’i ïa ’ōrua i te Vārua Maita’i ».
« ’E i teie nei, i muri a’e i tō ’ōrua fāri’ira’a i te reira, ’ia ha’apa’o ho’i ’ōrua i tā’u mau fa’auera’a i te mau mea ato’a e ti’a ai ».
« ’A rave nā i ni’a ia ’ōrua te i’oa ’o te Mesia, ’e ’a parau i te parau mau mai te marū.
«’E ’o rātou ato’a ’o tē tātarahapa ’e ’o tē bāpetizohia i tō’u ra i’oa, ’oia ho’i ’o Iesu Mesia, ’e e fa’a’oroma’i e tae noa atu i te hope’a ra, ’o rātou ho’i ïa tē fa’aorahia ».
I roto i teie mau ’īrava ri’i, tē hōro’a mai nei te Fa’aora ia tātou i te hi’ora’a maita’i roa nō te ha’api’ira’a tātou i tāna ha’api’ira’a tumu. Teie ha’api’ira’a tumu, ’oia te fa’aro’o i te Fatu Iesu Mesia, te tātarahapa, te bāpetizora’a, te fāri’ira’a i te Vārua Maita’i, ’e te tāpe’a-māite-ra’a ē tae noa atu i te hope’a, e ha’amaita’i te reira i te mau tamari’i pā’āto’a a te Atua.
’Ia ha’api’i ana’e tātou i teie mau tumu parau ia rātou tā tātou e here nei, e tauturu mai te Vārua Maita’i ia tātou ’ia ’ite i te parau mau. Nō te mea ho’i ē e hina’aro tātou i te mau fa’aurura’a a te Vārua Maita’i, e ti’a ïa ia tātou ’ia ara maita’i ’e ’ia ha’apa’o maita’i ’ia ’ore tātou e ha’api’i i te tahi mea ta’a ’ē atu i te ha’api’ira’a tumu mau.
E nehenehe e riro ’ei ’ohipa fifi ’ia rave mai te mea ē, ’ua here ’outou i te ta’ata tā ’outou e tāmata nei i te ha’api’i. ’Aita paha ’oia i tau’a i te ha’api’ira’a tumu tei ha’api’ihia iāna. E fa’ahemahia tātou ’ia tāmata i te tahi mea ’āpī ’aore rā i te tahi mea fa’ahiahia. Terā rā, e heheu mai te Vārua Maita’i i te vārua o te parau mau mai te mea noa ē, e ara maita’i tātou ’e e ha’apa’o maita’i ’ia ’ore tātou e ha’api’i i te tahi mea ta’a ’ē atu i te ha’api’ira’a tumu mau. Te hō’ē o te mau rāve’a pāpū roa a’e nō te ’ape i te piri atu i te ha’api’ira’a tumu hape ’o te mā’itira’a ïa ’ia ha’api’i ’ōhie noa i roto i tā tātou huru ha’api’ira’a. E noa’a te parurura’a nā roto i taua ohiera’a ra, ’e e mea iti roa te mea e mo’e.
Nā te ha’api’ira’a ’ōhie e tauturu ia tātou ’ia fa’a’ite i te ha’api’ira’a tumu o te fa’aorara’a i te ’āpī roa ra’a ra, a pāruru noa hia ai te mau tamari’i i te mau fa’ahemara’a a te ta’ata ha’avare o tā rātou ho’i e fa’aruru atu i muri mai, hou roa te mau parau mau e tītauhia ia ratou ia ’’ite, e moe atu ai i roto i te mau rāve’a ha’apararera’a parau, te mau hoa, ’e tō rātou iho mau ’arora’a. E mea ti’a ia tātou ’ia fa’a’ohipa i te mau rāve’a ato’a nō te fa’a’ite i te mau tamari’i i te mau ha’api’ira’a a Iesu Mesia. E mea faufa’a roa taua mau taime ha’api’ira’a ra, ’e e mea iti roa ho’i te reira ’ia fa’aauhia i te tauto’ora’a tāmau a te mau pūai pato’i. Nō te hora tāta’itahi e ravehia nō te nīni’i i te ha’api’ira’a tumu i roto i te orara’a o te hō’ē tamari’i, e rave rahi hanere ïa hora pāto’ira’a tei ’ī i te mau parau poro’i ’e te mau hōho’a o tē ’aro ’aore rā o tē tau’a ’ore i taua mau parau mau fa’aora ra.
E uiui paha te tahi pae o ’outou ē, e mea maita’i a’e paha ’ia ha’afātata i tā ’outou mau tamari ia ’outou ma te ha’uti, ’aore rā e feruri paha ’outou ē te ha’amata ra paha te tamari’i i te ta’ahoa i tā ’outou mau ha’api’ira’a. Teie rā te uira’a e ti’a ’ia uihia, « Nō te poto o te taime ’e nō te varavara o te taime tano, e aha te mau parau o te ha’api’ira’a tumu tā’u e nehenehe e fa’a’ite o tē ha’apūai ia rātou i mua i te mau tāmatara’a i ni‘a i tō rātou fa’aro’o o tei pāpū roa e tae mai ihoa ? » E riro paha te mau parau tā ’outou e parau i teie nei mahana e mau parau tā rātou e ha’amana‘o, fātata ho’i teie mahana i te mo’e ’ē atu.
’Ua fa’ahiahia noa vau i te itoito ’o tō’u māmā rū’au ’o Mary Bommeli nō te fa’a’ite i te ha’api’ira’a tumu a Iesu Mesia. ’Ua ha’api’i te mau misionare i tōna ’utuāfare i te fenua Helevetia i te 24ra’a o tōna matahiti.
I muri a’e i tōna bāpetizora’ahia, ’ua hina’aro ’o Mary e ’apiti atu i te Feiā Mo’a i America, nō reira, ’ua haere atu ’oia mai te fenua Helevetia ’e tae atu i Berlin ’e ’ua ’imi i te ’ohipa i pīha’i iho i te hō’ē vahine ’o tei fa’a’ohipa iāna nō te nira i te ’ahu nō te ’utuāfare. ’Ua ora ’o Mary i roto i te hō’ē piha nō te tāvini vahine ’e ’ua fa’anaho i tāna ’ohipa nira ’ahu i roto i te piha fa’afa’aeara’a o te ’utuāfare.
’Aita te ture i fa’ati’a i taua taime ra ’ia ha’api’ihia te ha’api’ira’a tumu a te ’Ēkālesia a Iesu Mesia i te feiā Mo‘a i te Mau Mahana Hope’a nei i Berlin. ’Ua ’ite ato’a rā ’o Marie ē, e’ita tāna e nehenehe ’eiaha e fa’a’ite i te mau mea tāna i ha’api’i mai. E amui mai te vahine fatu fare ’e tōna mau hoa ma te hā’ati i te mātini natinatira’a nō te fa’aro’o ia Marie ’ia ha’api’i. ’Ua paraparau ’oia nō ni’a i te fāra’a mai ’o te Metua i te Ao ra ’e ’o Iesu Mesia ia Iosepha Semita, te fāra’a mai ’o te mau melahi, ’e te Buka a Moromona. Ma te ha’amana’o i te mau ’ā’amu nō Alama, ’ua ha’api’i ’oia ’nō ni’a i te ha’api’ira’a tumu o te Ti’a-fa’ahou-ra’a. ’Ua fa’a’ite pāpū ’oia ē, e nehenehe te mau ’utuāfare e tāhō’ēhia i roto i te bāsileia tīrētiēra.
Te ’oa’oa rahi ’o Marie nō te fa’a’ite i te ha’api’ira’a tumu o te ’evanelia fa’aho’i-fa’ahou-hia mai, ’ua fa’atupu te reira i te fifi. ’Aita i maoro i muri iho, ’ua ’āfa’i te mūto’i ia Marie i roto i te fare ’āuri. I tō rāua haerera’a, ’ua ani ’oia i te mūto’i i te i’oa ’o te ha’ava tāna e fārerei atu i te po’ipo’i a’e. ’Ua ui ato’a ’oia nō ni’a i tōna ’utuāfare ’e e metua tāne ’e e tāne maita’i anei ’oia. ’Ua fa’ata’a te mūto’i e ta’ata te ha’ava mai te mau ta’ata o te ao nei.
I te fare tape‘araa ’ua ani ’o Marie i te hō’ē pēni tara ’e te tahi ’api parau. ’Ua pāpa’i ’oia i te hō’ē rata i te ha’avā i terā pō ta’ato’a, ma te fa’a’ite pāpū nō ni’a i te Ti’a-fa’ahou-ra’a ’o Iesu Mesia mai tei fa’a’itehia i roto i te Buka a Moromona, ma te paraparau nō ni’a i te ao vārua, ’e ma te fa’ata’a i te aura’a o te tātarahapa. ’Ua parau ’oia ē, e tītauhia te taime i te ha’avā nō te feruri i ni’a i tōna orara’a hou a fa’aruru ai ’oia i te ha’avāra’a hope’a. ’Ua pāpa’i ’oia ē, ’ua ’ite ’oia ē, e rave rahi mau mea e ti‘a iāna ’ia tātarahapa, mau mea o tē ha’amauiui hōhonu i tōna ’utuāfare, ’e o tē fa’atupu i te ’oto rahi. I te po’ipo’i, i muri a’e i te otira’a tōna pāpa’ira’a i tāna rata, hōro’a atu ra ’oia i te reira i te mūto’i ma te ani iāna ’ia horo’a i te reira i te ha’avā, ’e ’ua fāri’i te mūto’i i te reira.
I muri mai, ’ua tītauhia te mūto’i nā te ha’avā ’ia haere atu i tōna piha ’ohipara’a. ’Ua riro mau te rata tā Marie i pāpa’i eei tāpa’o fa’a’ite pāpū ē, tē ha’api’i ra ’oia i te ha’api’ira’a tumu ’evanelia i fa’aho’i-fa’ahou-hia mai ’e, nā roto i te reira, tē ’ōfati ra ’oia i te ture. ’Āre’a rā, ’aita i maoro roa ’ua ho’i mai te mūto’i i te piha tāpe’ara’a ’o Marie. ’Ua parau ’oia iāna ē, ’ua fa’a’orehia te mau fa’ahapara’a ato’a ’e ’ua ti’amā oia nō te haere i rāpae. Nō tōna ha’api’ira’a i te ha’api’ira’a tumu o te ’evanelia a Iesu Mesia tei fa’aho’i-fa’ahou-hia mai, i tāpe’ahia ai ’oia i roto i te fare ’āuri. ’E nā tāna fa’a’itera’a i te ha’api’ira’a tumu o te tātarahapara’a i te ha’avā i fa’ahaere atu iāna i rapae ’au i te fare tāpe’ara’a.
’Aita te ha’api’ira’a a Mary Bommeli i hope i tōna matarara’a mai. ’Ua fa’a’ite te pāpa’ira’a o tāna mau parau i te ha’api’ira’a tumu mau i te mau u’i tei ’ore ā i fānauhia. Tōna ti’aturira’a ē, e nehenehe ato’a te hō’ē ta’ata fa’afāriu ’āpī e ha’api’i i te ha’api’ira’a tumu a Iesu Mesia, ’ua ha’apāpū te reira ē, e ha’apūaihia tōna hua’ai i roto i tā rātou iho mau ’arora’a.
Noa atu ē, e ’imi tātou i te mau rāve’a maita’i ato’a nō te ha’api’i ia rātou tā tātou e here nei i te ha’api’ira’a tumu a Iesu Mesia, e nehenehe ā te tahi pae e ’ore e pāhono mai. E tupu mai paha te mau mana‘o fē’a’a i roto i tō ’outou ferurira’a. E uiui paha ’outou ē, ’ua nava’i anei tō ’outou ’ite nō ni’a i te ha’api’ira’a tumu nō te ha’api’i maita’i atu i te reira. E mai te mea ’ua tāmata a’ena ’outou i te ha’api’i i te reira, e ui paha ’outou ē, nō te aha rā ’aita e ’ite-rahi-hia te mau fa’ahope’ara’a maita’i. ’Eiaha e fati i roto i te reira mau mana’o tapitapi. ’A fāriu atu i te Atua ra nō te ani i te tauturu.
« ’Oia ïa, e ti’aoro atu i te Atua ’ia tauturu mai ’oia ia ’oe i te mau mea ato’a ra […] ’e ’ia tu’uhia te aroha ’o tō ’ā’au i ni’a i te Fatu e a muri noa atu ».
« E teie nei, ’ua hina’aro vau ’ia riro ’outou ’ei feiā haeha’a, ’e te auraro, ’e te marū, ’e ’ei feiā a’o-’ohie-hia ; ’e te ’ī i te fa’a’oroma’i, ’e te hitahita ’ore ; ’e te au maita’i i te mau mea ato’a ; ’e te itoito i te ha’apa’ora’a i te mau fa’aue a te Atua i te mau mahana ato’a ra ; i te anira’a i te mau mea atoa’ e au ia ’outou na, i tā te vārua ’e tā te tino ato’a ho’i ; ’e i te ha’amaita’ira’a i te Atua i te mau mea ato’a tā ’outou e fāri’i ra, ma te fa’aea ’ore ».
Mai te mea ē, e pure ’outou, mai te mea e paraparau ’outou i te Atua, ’e mai te mea e ani ’outou i Tana tauturu nō tei herehia e ’outou, e mai te mea, e ha’amāuruuru ’outou Iāna eiaha nō te tauturu noa, nō te fa’a’oroma’i rā ’e te marū i roto i te ’orera’a e fāri’i i te mau mea ato’a tā ’outou e hina’aro i te reira iho taime, e aore rā ’aita roa’tu, nō reira tē fafau atu nei au ia ’outou ē, e fātata atu ā ’outou iāna ra. E riro mai ’outou ’ei ta’ata itoito ’e te fa’a’oroma’i. ’E i muri iho, ’e nehenehe ’outou e ’ite ē, ’ua rave ’outou i te mau mea ato’a tā ’outou e nehenehe e rave nō te tauturu i te feiā tā ’outou e here nei ’e te feiā tā ’outou e pure nei ’ia ’ape i te mau tāmatara’a a Satani nō te fa’a’ino ia rātou.
« ’O te feiā rā e ti’aturi ia Iehova, e noa’a ïa te ’eta’eta ’āpī ; e pe’e rātou i ni’a mai tei ni’a i te pererau o te ’aeto ra ; e horo rātou, ’e e ’ore e rohirohi ; e haere ā ho’i rātou, ’e e ’ore e matapōurihia ».
E nehenehe ’outou e ’ite i te tīa’ira’a i roto i te mau papa’ira’a pae vārua a te mau ’utuāfare. Tē tai’o nei tatou i te ’ā’amu ’o te feia’ tei fāriu ’ē i te mau mea tei ha’api’ihia ia rātou e aore rā ’o tei ’aro ’e te Atua nō te fāri’i i te fa’a’orera’a i te hara, mai ia Alama te Tamaiti, te mau tamaiti a Mosia, ’e o Enosa. I roto i tō rātou tau hepohepo, ’ua ha’amana’o rātou i te mau parau a tō rātou mau metua, te mau parau nō te ha’api’ira’a tumu a Iesu Mesia Nā te ha’amana’ora’a i fa’aora ia rātou. Tā ’outou ha’api’ira’a i taua ha’api’ira’a tumu mo’a ra, e ha’amana’ohia ïa te reira.
Tē fa’a’ite pāpū nei au i te ’ohipa mo’a o te ha’api’ira’a i te mau tamari’i a te Metua i te Ao ra i te ha’api’ira’a tumu ’ōhie a Iesu Mesia, ’o tē tauturu ia tātou ’ia tāmāhia i te pae vārua ’e ’ia fāri’ihia tātou i mua i te aro o te Atua, nō te ora i piha’i iho Iāna ’e tāna Tamaiti i roto i te hanahana ē a muri noa atu. I te i’oa o Iesu Mesia, ’āmene.