« Inaha, ’o vau ïa te māramarama tā ’outou e fa’ateitei i ni’a »
Tē fa’ateitei nei tātou i te māramarama ’o te Fatu ’ia ha’apa’o pāpū ana’e tātou i tā tātou mau fafaura’a ’e ’ia turu ana’e tātou i tō tātou peropheta ora.
I te mau ’itera’a pāpū e rave rahi i roto i teie ’āmuira’a, tē ’apiti atu nei au i tō’u itera’a pāpū ’āpōtetoro ē, e tamaiti Iesu Mesia nā te Atua, tō tātou Fatu ’e Fa’aora, te tāra’ehara nō te mau tamari’i ato’a a te Metua. Nā roto i tāna tāra’ehara, ’ua fa’ati’a ’o Iesu Mesia ia tātou, mai te mea ē, ua ti’a tātou, ’ia ho’i i mua i te aro o tō tātou Metua i te Ao ra ’e ’ia pārahi i pīha’i iho i tō tātou mau ’utuāfare e a muri noa’tu.
’E’ita te Fa’aora e mo’e i roto i tō tātou mau tere i te tāhuti nei. I roto i nā mahana e piti i ma’iri a’e nei, ’ua fa’aro’o tātou Iāna i te paraparaura’a nā roto mai i tōna mau ti’a fa’atere ma’itihia nō te ha’afātata atu ā ia tātou Iāna. I te mau taime e rave rahi, nā roto i tōna here mo’a ’e tōna aroha, tē pāturu nei ’oia ia tātou a fa’aruru ai tātou i te fifi o te orara’a. Tē fa’ata’a nei ’o Nephi : « ’O tā’u Atua tei tauturu mai iā’u ra ; ’ua arata’i mai ’oia iā’u nā roto i tō’u ra mau ’ati […] ’Ua fa’a’ī ’oia iā’u i tōna ra aroha ».
E ’itehia taua aroha ra ’ia pāturu ana’e tātou i te tahi ’e te tahi i roto i tāna ’ohipa.
E pāturu tātou i tō tātou peropheta ora i roto i te ’āmuira’a rahi, ’e te Peresidenira’a Mātāmua, te pupu nō te Tino ’Ahuru Ma Piti ’Āpōsetolo, te mau huimana fa’atere rahi ’e te feiā fa’atere rahi o te ’Ēkālesia. Te aura’a o te parau pāturu, ’oia ho’i, e fa’ateitei i te tahi atu ta’ata, e hōro’a i tō tātou ara maīte ra’a ia rātou, ’ia ha’apa’o maita’i i tō rātou ti’aturira’a, ’ia ’ohipa i ni’a i tā rātou mau parau. E paraparau rātou nā roto i te fa’aurura’a a te Fatu ; ’ua ’ite rātou i te mau fifi o teie taime, te topara’a te Sōtaiete i te pae morare, ’e te mau tāmatara’a rahi a’e a te ’enemi nō te pato’i i te ’opuara’a a te Metua. Nā roto i te fa’ateiteira’a i tō tātou mau rima, te hōro’a ra ïa tātou i to tātou turu, ’eiaha nō taua taime noa ra, i roto ato’a rā i tō tātou orara’a i te mau mahana ato’a.
I roto i te pāturura’a, tē vai ra te fa’ateiteira’a i tō tātou mau peresideni titi ’e te mau ’episekōpo, te mau ti’a fa’atere nō te pupu ’e te fa’anahora’a, te mau ’orometua ha’api’i, ’e tae noa’tu i te mau ti’a fa’atere nō te mau pūhapara’a i roto i tā tātou mau pāroita e mau titi. I pīha’i iho iō tātou, e pāturu tātou i tō tātou mau hoa fa’aipoipo, te mau tamari’i, te mau metua, tō tātou ’utuāfare ’ā’ano, ’e te mau ta’ata e fa’aea ra i pīha’i iho mai ia tātou. ’Ia pāturu ana’e tātou te tahi ’e te tahi, tē parau ra ïa tātou, « tei ’ō nei au nō ’oe, ’eiaha nō te pāturu noa i tō ’oe mau rima ’tautau ra’ nō te riro rā ’ei tāmāhanahana ’e ’ei pūai i pīha’i iho ia ’oe ».
Te parau tumu e pāturu ’ua a’ahia te reira i roto i te mau pāpa’ira’a mo’a. I te mau pape nō Moromona, ’ua fafau te mau melo bāpetizo-’āpī-hia « ’ia tauturu te tahi i te tahi i te hōpoi i tā [rātou] mau hōpoi’a, ’ia māmā te reira […] ’e ’ia ha’amāhanahana ia rātou i tei au ’ia ha’amāhanahanahia ra, ’e ’ia ti’a ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a tā [rātou] e pārahi ra ».
’Ua parau Iesu i te ’āti Nephi : « E fa’ateitei i tō ’outou māramarama, ’ia ’ana’ana’tu i to te ao nei. Inaha, ’o vau ïa te māramarama tā ’outou e fa’ateitei i ni’a ». Tē fa’ateitei nei tātou i te māramarama ’o te Fatu ’ia ha’apa’o pāpū ana’e tātou i tā tātou mau fafaura’a ’e ’ia turu ana’e tātou i tō tātou peropheta ora ’ia parau ana’e ’oia i te mau parau a te Atua.
’Ua parau te Peresideni Russell M. Nelson, a tāvini ai ’oia i roto i te Pupu nō te Tino ’Ahuru ma Piti ’Āpōsetolo, « ’Ua riro tā tātou pāturura’a i te mau peropheta ’ei fafaura’a ia tātou iho ē, e rave tātou i te mau mea ato’a nō te pāturu i tā rātou mau ’ohipa peropheta e rave mātāmua roa »
E ’ohipa mo’a te fa’ateiteira’a i te peropheta. ’Eiaha tātou e parahi māmū noa, e paruru itoito rā tātou iāna, e pe’e i tāna a’ora’a, e ha’api’i i tāna mau parau, ’e e pure nōna.
I roto i te Buka a Moromona, ’ua parau te ari’i Beniamina i te ta’ata, « E ta’ata mau ā rā vau mai ia ’outou ato’a te huru, e ti’a ho’i ’ia ro’ohia-noa-hia i te mau mea ti’a ’ore o te tino nei ’e o te ’ā’au ato’a ho’i ; i mā’itihia rā vau […] e te rima ’o te Fatu ra […] ’ua ha’apa’ohia ’e ’ua fa’aorahia ho’i au e tōna mana faito ’ore, ’ia tāvini ia ’outou ma te mana ato’a, ’e te hina’aro ato’a, ’e te pūai ato’a ho’i tā te Fatu i hōro’a mai iā’u nei ra ».
’Oia ato’a, i te 100ra’a o tōna matahiti, ’ua tīa’ihia ’e ’ua pāruruhia te peresideni Nelson ’e te Fatu. ’Ua fa’ahiti te peresideni Harold B. Lee, e melo nō te Peresidenira’a Mātāmua i taua taime ra, i te hi’ora’a o Mose e ti’a ra i ni’a i te mou’a i Rephidim. « E nehenehe te mau rima o [te peresideni o te Ekalesia] e rohirohi », tāna ïa parau. « I te tahi mau taime, e nehenehe rātou e topa nō tāna mau hopoi’a teimaha ; terā rā, mai te mea ē, e turu tātou i tōna nā rima, ’e mai te mea ē, e arata’i tātou i raro a’e i tāna arata’ira’a, i tōna pae, ’e’ita te mau ’ūputa o hade e upo’oti’a i ni’a ia ’outou ’e ia ’Īserā’ela. Tō ’outou ’e tō mātou pārurura’a, tei te huru ïa mai te mea e pe’e ānei tātou ’aore rā ’aita, i te feiā tā te Fatu i mā’iti nō te fa’atere i tāna ’Ēkālesia. ’Ua ’ite ’oia ’o vai tāna e hina’aro nō te fa’atere i tāna ’Ēkālesia, ’e ’e’ita ’oia e hape ».
Tē turu’i nei te peresideni Nelson i ni’a i te rahira’a matahiti tōna tāvinira’a i te fatuu. Tōna matahiti pa’ari, tōna ’ite rahi, tōna pa’ari, e tōna fāri’i-tāmau-ra’a i te heheura’a, ’ua tano maita’i te reira nō tō tātou nei ’anotau. ’Ua parau ’oia : « Tē fa’aineine nei te ’Ēkālesia a Iesu Mesia i te Feiā Mo’a i te mau Mahana Hope’a nei i te ao nei nō te mahana e ’ī ai ho’i te fenua i te ’ite ia Iehova’ (Isaia 11:9) […] ’Ua ha’apūaihia teie ’ohipa nā roto i te hō’ē parau fa’a’ite hanahana tei fa’a’itehia a 200 matahiti i teienei. E va’u noa ta’o : « ’O tā’u Tamaiti Here teie. ’A fa’aro’o iāna !’ (hi’o Iosepha Semita—’Ā’amu 1:17). »
’Ua parau ato’a te peresideni Nelson :’Aita i ’ite-noa-hia a’e hō’ē taime i roto i te ’ā’amu o te ao nei ’a riro ai te ’itera’a i tō tātou Fa’aora ’ei ’ohipa faufa’a ’e te tītauhia nō te vārua ta’ata tāta’itahi. ’A feruri nā i te vitiviti rahi o te fa’atītī’aifarora’a i te mau mārōra’a ’ī’ino nā te ao nei—’e tō roto ato’a i tō tātou orara’a tāta’itahi—’āhiri te mau ta’ata ato’a e mā’iti ’ia pe’e ia Iesu Mesia ’e ’ia ha’apa’o i tāna mau ha’api’ira’a ».
E te mau taea’e ’e te mau tuahine, e ti’a ia tātou ’ia rave rahi a’e i te mau ’ohipa fa’ateitei ’e fa’aiti a’e te amuamu, ma te pāturu rahi a’e i te parau a te Fatu, tōna mau ’ē’a, ’e tāna peropheta, tei parau ē : « Te hō’ē ’o tō tātou mau tāmatara’a rahi roa a’e i teie mahana, o te ’itera’a ïa i te mau parau mau a te Atua ’e te mau parau ha’avare a Sātane. Nō reira te Fatu i fa’aara mai ai ia tātou ’ia pure noa i te mau taime ato’a […] ’ia upo’oti’a [tātou] i ni’a ia Sātane, ’e […] ’ia ora i te rima ’o te mau tāvini ’o Sātane o tē pāturu nei i te ’ohipa a te [’enemi]’ [Te Ha’api’ira’a Tumu ’e te mau Fafaura’a 10:5 ; ha’apāpūra’a tu’uhia] ».
I te ’āva’e ’Ēperēra i ma’iri a’e nei, ’ua fāna’o vau ’e te tuahine Rasband i te ’āmui atu i tō tātou peropheta here e te tuahine Nelson nō te ha’amo’a-fa’ahou-ra’a i te hiero nō Manti, i Utah.
’Ua tupu te maere i roto i te mau ta’ata ato’a i te tomora’a mai te peresideni Nelson i roto i te piha. Te tahi pae ri’i noa ’o mātou tei ’ite e haere mai ’oia. I mua iāna, ’ua ’ite ’oi’oi au i te māramarama ’e te ’ahu peropheta tāna e ’ahu ra. E vai noa i roto i tō’u ferurira’a e a muri noa’tu te hōho’a ’oa’oa i ni’a i te mata o te mau ta’ata i te ’itera’a i te peropheta.
I roto i te pure nō te ha’amo’a-fa’ahou-ra’a, ’ua ani te peresideni Nelson i te Fatu ē, ïa fa’ateitei tōna fare mo’a i te mau ta’ata ato’a e tomo atu i roto i te hiero « ’ia fāri’i rātou i te mau ha’amaita’ira’a mo’a ’e ’ia vai ti’a noa ’e ’ia ha’apa’o maita’i i tā rātou mau fafaura’a ’ia riro teie ’ei fare nō te hau, ’ei fare nō te tāmāhanahanara’a ’e ’ei fare nō te heheura’a ’o te ta’ata iho nō te mau ta’ata ato’a ’o tē tomo mai ma te ti’amā i roto i teie mau ’ūputa ».
E hina’aro tātou pā’āto’a ’ia fa’ateiteihia tātou i ni’a i te Fatu nā roto i te hau, te tāmāhanahanara’a, ’e hau atu i te mau mea ato’a, nā roto i te heheura’a a te ta’ata iho nō te pāto’i i te mata’u, te pouri, ’e te ’aimārōra’a ’ati a’e te ao nei.
Nā mua a’e i te pureraa, ’ua ti’a noa mātou i rāpae i raro a’e i te mahana ’e te peresideni ’e te tuahine Nelson nō te mata’ita’i i te fare nehenehe. E mea hōhonu roa te mau tā’aira’a ’o te peresideni Nelson i taua vāhi ra. ’Ua fa’aea tōna nau metua tupuna e va’u i roto i te mau ’āfa’a e hā’ati ra i te hiero, ’oia ato’a te tahi ’o tō’u mau metua tupuna. ’Ua tavini tō’u pāpā rū’au ’o Andrew Anderson i roto i te pupu patura’a o te mau pionie mātāmua o tei rave i te ’ohipa 11 matahiti nō te fa’aoti i te hiero nō Manti, te toru o te hiero i ni’a i te mau Mou’a ’Ōfa’i.
A ti’a noa ai māua i pīha’i iho i te peresideni Nelson, ’ua ti’a ’ia māua ’ia fa’ateitei ’e ’ia turu i te peropheta a te Atua i roto i te fa’ahanahanara’a o te ha’amo’a-fa’ahou-ra’a i te fare mo’a o te Fatu. ʼO te hōʼē ïa mahana e ʼore roa e moʼehia iāʼu.
« E patu tātou i te mau hiero nō te fa’ahanahana i te Fatu », te parau ïa a te peresideni Nelson i taua mahana mo’a ra. « E patuhia te reira nō te ha’amorira’a ’eiaha nō te fa’a’ite’itera’a. Tē rave nei tātou i te mau fafaura’a mo’a ’e te aura’a mure ’ore i roto i teie mau patu mo’a ». Tē ha’aputuputu nei tātou ia ’Īserā’ela.
’Ua fa’atā’ue’ue te peresideni Nelson ’e te mau peropheta nā mua atu iāna i te mau hiero mo’a i roto i tō rātou rima. I teie mahana, ’ati a’e te ao nei, tē vai nei tā tātou e 350 fare mo’a o te Fatu ’e ’ohipa nei, tei fa’aarahia, ’aore rā tei roto i te patura’a. Mai te taime ’a riro mai ai ’oia ’ei peresideni nō te ’Ēkālesia i te matahiti 2018, ’ua fa’aara te peresideni Nelson e 168 hiero.
’Ua parau ’oia, « I tō tātou nei ’anotau, e ti’a ’ia natihia te hō’ē tāhō’ēra’a tā’āto’a hope roa ’e te maita’i o te mau tau tu’ura’a ato’a, te mau tāviri, ’e te mau mana (hi’o Te Ha’api’ira’a Tumu ’e te mau Fafaura’a 128:18). Nō teie mau fā mo’a, tē ’ī nei te fenua nei i te mau hiero mo’a. Tē ha’apāpū fa’ahou nei au ē, ’e’ita te patura’a o teie mau hiero e taui i tō ’outou orara’a, nā tā ’outou tāvinira’a rā i roto i te hiero e taui ».
« Te Fa’aora ’e tāna ha’api’ira’a tumu, o te māfatu mau ïa o te hiero », te parau ïa a te peresideni. « Te mau mea ato’a e ha’api’ihia i roto i te hiero, nā roto i te arata’ira’a ’e nā roto i te Vārua, e fa’arahi te reira i tō tātou hāro’aro’ara’a ia Iesu Mesia. E tā’ati tāna mau ’ōro’a faufa’a rahi ia tātou i ni’a iāna nā roto i te mau fafaura’a mo’a o te autahu’ara’a. I muri iho, ’a ha’apa’o ai tātou i tā tātou mau fafaura’a, e hōro’a mai ’oia ia tātou i tōna mana fa’aora ’e te ha’apūai ».
« Te feiā ato’a e ha’amori i roto i te hiero », ’ua parau te peresideni Nelson, e mau rātou i te mana o te Atua ’e te mau melahi ’ia ha’apa’o noa mai ia rātou ra’ [Te Ha’api’ira’a Tumu ’e te mau Fafaura’a 109:22] ’Ei vahine ’aore rā ’ei tāne tei fāri’i i te ’ōro’a hiero ’aore rā ’ei feiā ’āpī e haere ra i te hiero ma te ha’anahia i te mana ’o te Atua, e aha ïa te huru o te tupura’a rahi ’o tō ’outou ti’aturira’a, ’ia ’ite ana’e ’outou ē,’e’ita ’outou e fa’aruru i te orara’a ’outou ana’e ? Te ’itera’a ē, e tauturu mau te mau melahi ia ’outou, e aha ïa te itoito tā te reira e hōro’a mai ia ’outou ?
Tē fa’ata’a ra te mau pāpa’ira’a mo’a i te mau melahi e fa’atoro ra i te rima nō te fa’ateitei ia Iesu Mesia a tūturi noa ai ’oia ma te ha’eha’a i roto i te ’ō nō Getemāne. Nā roto i tōna māuiui, ’ua hōro’a ’oia i te hō’ē tāra’ehara hope’a ’ore. Tē parau nei te peresideni Nelson, « Te ’ohipa here rahi roa a’e o te ’ā’amu, ’ua tupu ïa « I reira » […] I reira, i Getesemāne, ’ua fa’a’oroma’i te Fatu i te mamae rahi ’o te mau ta’ata ato’a, ’ia ti’a i te mau ta’ata ato’a ’ia tātarahapa ’e ’ia haere mai iāna ra’ [Te Ha’api’ira’a Tumu ’e te mau Fafaura’a 18:11] ».
« E hōpoi ’ē atu i teie nei ’au’a », te anira’a ïa a Iesu Mesia, « ’ia tupu rā tō ’oe hina’aro ’eiaha tō’u ».
« ’Ua fā maira te hō’ē melahi nō te ra’i mai, ’ua fa’aitoito maira iāna ».
E mau melahi tē hā’ati nei ia tātou i teie mahana. Ua parau te peresideni Nelson, « [i roto i te hiero,] e ha’api’i mai ’outou e nāhea ’ia vāhi i te pāruru i rotopū i te ra’i ’e te fenua, nāhea ’ia ani i te mau melahi a te Atua ’ia tauturu mai ia ’outou »
E hōpoi mai te mau melahi i te māramarama. Te māramarama ’o te Atua. ’Ua parau Iesu i te mau ’āpōsetolo ’āti Nephi, « Inaha, ’o vau ïa te māramarama tā ’outou e fa’ateitei i ni’a ». ’Ia pāturu ana’e tātou i tō tātou peropheta, tē fa’a’ite pāpū ra ïa tātou ē, ’ua pi’ihia ’oia ’e tō tātou Fa’aora, ’oia « te māramarama o te ao ».
E te peresideni Nelson, i te i’oa ’o te mau melo ’e ’o te mau hoa o te ’Ēkālesia a te Fatu ’ati a’e te ao nei, ’ua ha’amaita’ihia mātou ’ia fa’ateitei i tā ’oe mau ha’api’ira’a ’ia fa’ateitei i tō ’oe hi’ora’a nō te orara’a mai te Mesia te huru, ’e ’ia fa’ateitei i tō ’oe ’itera’a pāpū pūai nō tō tātou Fatu ’e Fa’aora, te tāra’ehara nō tātou pā’āto’a.
Tē fa’a’ite nei au i tō’u ’itera’a pāpū ’ei ’āpōsetolo ē, ’o Iesu Mesia « te māramarama o te ao ». E mata nā tātou pā’āto’a, ’ei mau pipi nana, ’ia « fa’ateitei » i tōna māramarama. I te i’oa o Iesu Mesia, ’āmene.