Būun̄tōn 2: Itok im tōmak bwe kajoor an Anij emaron̄ in kōrool kōj n̄an dipieo in ājmour ilo jetōb.

Katak eo Aorōk: Kōjātdikdik

N̄e jej jeļā bwe ejjeļo̧k ad kajoor ioon an̄ūrlep ko ad, elōn̄ iaad rekar en̄jake an jako kōjātdikdik. Jekar kajjieon̄ in joļo̧k elōn̄ iien ko. Elōn̄ iaad rekar jar n̄an Anij elōn̄ iien ko. Jekar jeorļo̧k ad bōd kōn m̧wil eo ad im kar kallim̧ur n̄an oktak. Ak ālkin ālijii im bar ālijii ad wōtlok, jej jino in ļōmņak kōn an Anij jab m̧ōņōņō ippād im jab maron̄ jipan̄ kōj. Elōn̄ iaad rekar rūttoļo̧k ilo ejjeļok katak kōn Anij im raar kajjieon̄ aolep men remaron̄ aolep iaļ in mour. Juon wōt iaer, bun̄tōn 2 ej kowaļo̧k n̄an kōj juon uwaak jekar kowaane ak jab ļōmņake—n̄an pukōt kōjātdikdik ilo Jisōs Kraist im kajoor in Pinmuur eo An.

Āliktata jej ettā bōro, jekar kajitōk kōn jipan̄. Ālkin kar en̄jake an dik kōjātdikdik, jekar jino in pād ilo kweilo̧k ko an ājmour im jerbal ippen ribōk eddo ro ad. N̄e jej jino itok n̄an kweilo̧k ko, jej obrak kōn pere im mijak. Jekar mijak, m̧ōk, im maron̄ bareinwōt lello̧taan, akō em̧m̧an bwe jekar itok.

Ilo kweilo̧k ko an ājmour, armej rej m̧ool in kwaļo̧k jekjek rōt mour ko rekar pād ie, ta eo ekar waļo̧k bwe ukōt er, im elmen rōt wāween anjo jen an̄ūrlep. Jej loe bwe elōn̄ armej me jekar ioon er ilo kweilo̧ok kein raar en̄jake mokta ļo̧k an ejjeļo̧k kōjātdikdik en jekar en̄jake. Ak ilo ad wōnmaanļo̧k in pād, jej loe elōn̄ ro iaer rej m̧ool in ettōndikdik, kōnono, mejen mōņōņō im kije kōn ilju im jekļaj eo. Jekar loe elōn̄ ro rekar en̄jake juon kajoor in oktak ilo mour ko aer, juon oktak me jemaron̄ bar kōņaan.

Ilo m̧ool, pedped in katak ko rej letok im kar kaminene kake rekar jino jerbale kōj. Ilo ad bar rooltok, jej jino in en̄jake juon men jekar jab en̄jake ilo iiō ko—kōjātdikdik kake. Eļan̄n̄e eaar ejjeļo̧k kōjātdikdik n̄an ro jet me rekar pād ilo turin kakkure, bōlen en kar bareinwōt ejjeļo̧k kōjātdikdik n̄an kōj. Jej jino in tōmak bwe eļan̄n̄e jen kar oktak n̄an Jisōs Kraist, en kar “ejjeļo̧k m̧wil, ejjeļo̧k an̄ūrlep, ejjeļo̧k jumae, ejjeļo̧k jerawiwi, ejjeļo̧k jorāān jen kallim̧ur in dipio in jeorļo̧k bōd” (Boyd K. Packer, “The Brilliant Morning of Forgiveness,” Ensign, Nov. 1995, 19).

Ilo tōrein tōmak im naan in kam̧ool, jej loe bwe kōjātdikdik enaaj kōm̧m̧an ad jeļā im kile juon men n̄an tūriam̧o im kajoor eo an Anij. Jej jino in tōmak bwe E emaron̄ kadiwōj ļo̧k kōj jen kōmakoko in an̄ūrlep. Jekar ļoor waanjon̄ak ko an ro jerad raar ājmour. Jekar jino jerbale bun̄tōn ko, bōk jipan̄ jen ro jet—ekoba ribōk eddo ro ad—im pād ilo kweilok ko an ājmour. Ilo ad jar, kōjekļo̧kjeņ, im mour kōn jejej ko rekwojarjar, kajojo iien jej jino in kōkāāl makūtkūt eo ad ilo Kabun̄ in. Kabwilōn̄lōn̄ ko ad raar jino waļo̧k, im jekar loe ad make jeraam̧m̧an kōn jouj eo Jisōs Kraist n̄an jipan̄ tōlarōk kōj ilo kōm̧m̧an kōņaan juon raan ilo juon iien.

Ilo ad jerbale aolepen bun̄tōn 2, jej jino in m̧ōņōņō in bar bōk jikin lōke ilo kōj make im an̄ūrlep ko ad kōn tōmak ilo iakwe im kajoor eo an Jisōs Kraist. Jej jerbale bun̄tōn in ilo ļōmņak ko ad im bōro wōt ippen ribōk eddo eo an ro jet, im jej ekkatak pedped eo an ājmour jen an̄ūrlep aikuj in ilo jetōb. Innem, ilo ad iuun doon maanļok jerbale kajojo iaan bun̄tōn ko kar elmakote ilo unin tōl in, wāween ājmour ilo jetōb ekar dim n̄an kōj.

Būrookraam̧ in ej ilo jetōb, im ej juon būrookraam̧ in jerbal. N̄an kōj im ro jet, jerbal in ājmour eaar aorōk ilo jabdewōt kijejeto. Ilo ad bōki pedped in katak kein im kōtļo̧k aer jerbal ilo mour ko ad, jej bar rool im em̧m̧an im dipio in ājmour ilo jetōb. Jej loe juon jemdo̧o̧n em̧ool ippād make, ippen ro jet, im ippen Rilo̧mo̧o̧r eo Jisōs Kraist.

N̄an jet iaad wōj, kabwilōn̄lōn̄ eo an ājmour emōkaj an itok; n̄an ro jet, ājmour emōj an ļapļok jen an jidik illọk jidik. Juon wōt iaer, men eo eaorōk ej bwe jen wōnmaanļok in kaminene tōmak im lōke bwe Anij emaron̄ kōm̧m̧ane n̄an kōj men eo me jejjab maron̄ kōm̧m̧ane n̄a kōj make. Kajojo iien jenan̄in maron̄ ba bwe kōn “dim ilo Kraist,” emōj lo̧mo̧o̧ren kōj jen an̄ūrlep im kar m̧ōņōņō kōn juon “kōjātdikdik emeram” (2 Nipai 31:20).

Jemedwōj Ilan̄ im Nejin, Jisōs Kraist, rej pād ippād ilo jekjek in jerbal eo an an̄ūrlep. Rej jipan̄ kōj kakaajririik im kaļapļok ad kōjātdikdik ilo Kraist. Būreejtōn M. Russell Ballard ekar ba:

“N̄an aolep ro raar bōk kuņaer ilo jabdewōt kain an̄ūrlep, ewōr kōjatdikdik kōnke Anij ej iakwe aolep ro Nejin im kōnke Pinmuur eo an Irooj Jisōs Kraist ekōm̧m̧an bwe aolep men ren pidodo.

“Emōj aō loe kōjeraam̧m̧an eo an ajmour ekabwilōn̄lōn̄ me emaron̄ kanemkwoj kōj jen to ko an an̄ūrlep. Irooj ej aō Seperd, im jej jāmin kōņaan ilo ad lōke kajoor in Pinmuur eo [An]. Ijeļā bwe Irooj emaron̄ im enaaj kanemkwoj ro rej an̄ūrlep jen kōmakoko eo er, einwōt Rijilōk Paul ekar kwaļo̧k, ‘Imaron̄ in kōm̧m̧an men otemjej ilo Eo ej kakajoor eō’ (Pilippai 4:13)” (“O That Cunning Plan of the Evil One,” Liahona, Nob. 2010, 110).

Eļan̄n̄e jej bar rool n̄an einwōt mokta, jej loe eļap aorōk ilo oktak n̄an Anij im kōnono ippen ribōk eddo ro ad. Jemaron̄ in kar po n̄an joļo̧k aolep kōjātdikdik. Ijoke juon bar rool n̄an einwōt mokta ejjab kakkure eddekļo̧k eo jekar kōm̧m̧ane, im ejjab aikuj in bwe en kajorāān kōjātdikdik eo ad. Bar rool n̄an einwōt mokta ej juon bar kakemeemej elukkuun kajoor kōn menin aikuj eo ad ilo wōnmaanļok wōt im etal n̄an kweilo̧k ko an ājmour, kapukōt rie eo an ribōk eddo ro im ro jet, wujelepļo̧k n̄an Anij, im jerbale aolepen bun̄tōn kein. Ilo ad kate wōt iuun maanļok, jej jino in en̄jake kajor eo an Jisōs Kraist ilo mour ko ad. Jej em̧m̧anļo̧k im maron̄ in jitlo̧k, im bwe kōjātdikdik eo ad en eddekļo̧k.

Elder David A. Bednar ekar katakin: “Jemaron̄ riab in ļōmņak bwe kōjeraam̧m̧an ko im menin letok ko rej kakkoņi n̄an armej ro jet me re wānōk lo̧k ak ro me rej jerbal ilo kūr ko an Kabun̄. Ij kam̧ool bwe tūriam̧o ko an Irooj rej n̄an aoleped wōj im bwe Rilo̧mo̧o̧r eo an Israel ekōņaan letok menin letok ko n̄an kōj” (“The Tender Mercies of the Lord,” Liahona, Māe 2005, 101). Jisōs Kraist eaar letok n̄an kōj elōn̄ tūriam̧o ko ilo ad etal maanļo̧k n̄an ājmour, juon iaan men ko eoarōk an kōjātdikdik ej bwe kajoor eo an Anij emaron̄ bar kōrool kōj n̄an dipio in ājmour eo ad ilo jetōb.

Bun̄tōn Jerbal ko

En̄in ej juon būrookraam̧ in jerbal. Ilo ad wōnmaanļo̧k in pedped ion ilo jokin mour kake bun̄tōn ko ilo kajjojo raan. Menin kar jeļā kake āinwōt “jerbale bun̄tōn ko.” Laajrakin jerbal kein rej jipan̄ kōj itok n̄an Kraist im bōk tōl im kajoor eo menin aikuj n̄an bōk bun̄tōn eo tok juon ilo ad ājmour.

Ejaake juon meļeļe ejim̧we kōn kadkad eo an Anij

Jook eo ad emakijkij an kakkure meļeļe eo kōn kadkad im iakwe eo an Anij n̄an kōj. Jako lo̧k jen en̄jake in metak ko ad im an̄ūrlep, emakijkij ad loe E āinwōt juon eo elukkuun pukōt n̄an ukōt bōkā, inepata, ak illu ippād. Unin jerbale bun̄tōn in ej n̄an likūt rājet pepe ko rejjab jim̧we kōn Anij im ejaake juon meļeļe em̧m̧anļo̧k kōn An iakwe, tūriam̧o, im m̧ōņōņō in in kōņaan kōjeraam̧m̧ane kōj.

Moktata, eoarōk n̄an meļeļe bwe Anij epād ijen men̄e jejjab en̄jake An pād. Itok n̄an jeļā bwe Anij ej kate jerbal im ej bōk kijenmej. Emaron̄ in pen n̄e jekar kōjerbal kōņaan, ijoke kajojo iien jej maron̄ in jino loe im en̄jake kadkad eo An ekwojarjar. Jej jino in jeļā bwe Anij em̧m̧anļo̧k.

Jemaron̄ kajjitōk ippān Jemedwōj Ilan̄ n̄an jipan̄ kōj meļeļe kake paoto̧k eo An. Jemaron̄ kalimjek kajoor an Anij ilo mour ko ad im ewi wāween An kōm̧m̧ane n̄an kōj. Jemaron̄ in ekkatak jeje ko rekwojarjar kōn tūriam̧okake im jouj eo an Rilo̧mo̧o̧r innem kōnono kake jeje kein rekwojarjar ippen ribōk eddo ro a im ro jet rej kōņaan jipan̄ kōj.

Ilo ad jino bōk juon meļeļe em̧m̧an kōn iakwe im tūriam̧okake an Anij, jej jino en̄jake eļapļo̧k lōke im kōjātdikdik ilo kajoor an Anij n̄an kadiwōjļo̧k kōj. Būreejtōn J. Reuben Clark Jr. ekar kam̧ool kōn tūriam̧okake eo an Jemedwōj Ilan̄ ke kar ba: Ij tōmak bwe Jemedwōj Ilan̄ ej kōņaan lo̧mo̧o̧ren aolep ajri ro nejin. … Ij tōmak bwe ilo an ekajet im tūriam̧o e enaaj letok n̄an kōj nepar eo eļaptata n̄an jerbal ko ad, letok n̄an kōj aolep men ko e ej maron̄ letok, im ilo ukōt ļo̧k, Ij tōmak bwe e enaaj kipel iood kaje eo ediktata me e emaron̄ in kipele” (ilo Conference Report, Okt. 1953, 84).

Jar im ekkatak jeje ko rekwojarjar

Būreejtōn M. Russell Ballard ekar ba: “Eļan̄n̄e jabdewōt eo ej an̄ūrlep ewōr an kōņaan anjo, innem ewōr juon wāween anemkwoj ilo jetōb—juon wāween ko jen kōmakoko—juon wāween emōj kam̧oole. Ej jino kōn jar—em̧ool, tokjān jar, im kemaanwa ippen ippen Rikōm̧anm̧an eo an jetōb ko ad im ānbwinnid, Jemedwōj Ilan̄” (“O That Cunning Plan of the Evil One,” Liahona, Nob. 2010, 110).

Ilo ad kōtļo̧k utiej bōro im kajjieon̄ kōm̧m̧an jon̄an wōt ad maron̄ kajojo raan, jej kōņaan jar kōn unin tōl im tōl jen juon Jemedwōj Ilan̄ eo ej iakwe. Elōn̄ iaad raar jan̄in lukkuun kar jar ak lin̄n̄ūri jeje ko rekwojarjar. Elōn̄ iaad raar po ilo kapo n̄an jab jar ak ekkatak. Jekar bōd ilo ad ba wōt ke kijejeto kein rekar jab jerbal kōnke jekar jab en̄jake ad epaakeļo̧k Anij ak kōnke jekar appan̄ wōt kōn an̄ūrlep.

Jekar loe bwe juon iaan men eo eaorōk n̄an bōk jeraam̧m̧aan ej n̄an wōnmaanļo̧k im kōjerbal kein jerbal kein ilo jetōb. Lukkuun jar, jar ilo kam̧oolol aolepen juon raan, im jar kōn ro jet ekar lukkuun kaminene ko rekāāl im rekajoor n̄an elōn̄ iaad wōj. Juon iaan wāween ko n̄an kaļapļo̧k kajoor in jar ej jen m̧ool in kwaļo̧k appan̄ n̄an Anij. Men̄e jej kwaļo̧ke n̄an ippān Jemedwōj Ilan̄ kōn an ejjeļo̧k ad kōņaan oktak, ad kōņaan ekar kajoorļo̧k. Jekar bareinwōt en̄jake ikutkut in, lur, im̧we jiddik ko jān Jetōb Kwojarjar. Jekar jino in kajitūkin Anij ta makūtkūt jiddik ko jemaron̄ in būki kajojo raan, ijello̧kin kajitūkin E bwe n̄an kōmakūt appan̄ ko im an̄ūrlep ko ad.

Āliktata, kōņaan eo n̄an kemaanwa ippen Anij ej tōl ļok kōj n̄an ekkatak naan ko an rikanaan ro raan kein im etto. Jar im ekkatak jeje ko rekwojarjar, kapukōt uwaak ko n̄an kajitōk ko ad, im ļooki im̧we ko jān Jetōb eo emaron̄ in lukkuun jipan̄ ilo itok n̄an tōmak bwe Anij emaron̄ im enaaj jipan̄ kōj.

Juon jikin emman n̄an ekkatak naan in Anij ej pād ilo jeje ko rekwojarjar im ālij ilo jemļo̧kin kajojo jepta ilo unin tōl in. Kajojo eoon im ālij kar kālet e tok im kajojo kajitōk kar kajitūkin kōn kōjātdikdik bwe emaron̄ jipan̄ kōj būki eoon ko im ālij ko n̄an mour ko ad. Jekar loe bwe men̄e ebōk jejjo minit in kajojo raan n̄an kapukōt ta eo Anij ekōņaan bwe en kōnono n̄an kōj ej kwaļo̧k eļap jinekjej. Jej leļo̧k ad kam̧ool kōn m̧ool in: “Aaet, jej lo bwe jabdewōt eo e kōņaan maron̄ jirok ioon naan eo an Anij, eo em̧ōkaj im kajoor, eo enaaj ajeje ijeņ im ijeņ aolep m̧oņ im aujiid im kōttōbalbal ko an devil” (Hilamōn 3:29).

Ekkatak im Meļeļe

Laajrakin jeje ko rekwojarjar im ennaan ko jen ritōl ro an Kabun̄ in remaron̄ jipan̄ ilo ad ājmour. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keememej n̄an m̧ool im alikkar ilo ad jeje n̄an bōk aolepen joortoklik eo jān menin.

Tōmak ilo Anij

“Kom̧in lōke Anij; kom̧in tōmak bwe E emour, im bwe Eaar kōm̧anm̧an men otemjej, jim̧or ilo lan̄ im ilo laļ; kom̧in lōke bwe Ippān epād jeļā otemjeļo̧k, im kajoor otemjeļo̧k, jim̧or ilo lan̄ im ilo laļ; kom̧in lōke bwe armej ej jab jeļā aolep men ko Irooj E jeļā” (Mosaia 4:9).

• Elōn̄ rikam̧ool ro ilo lan̄ im ilo laļ rej kam̧ool kōn an wōr Anij. Ta kein kam̧ool kōn Anij im An iakwe me emōj Aō en̄jake?

Kōļapļo̧k tōmak ilo Jisōs Kraist

Būreejtōn Rusell M. Nelson ekar katakin: “Jino rainin n̄an kōļapļo̧k tōmak eo ami. Jān tōmak eo ami, Jisōs Kraist enaaj kōļapļo̧k maron̄ eo ami n̄an kōm̧akūt toļ ko ilo mour eo ami” (“Kraist Em̧ōj an Jerkakpeje; Tōmak ilo E Enaaj Kōm̧akūt Toļ ko,” Liaona, Māe 2021, 101).

Elōn̄ iaad raar kajjieon̄ in ājmour jān an̄ūrlep ko ad kōn wōt kajoor in kōņaan ak kōn tōmak ilo juon eo jerad ak taktō. Kiiō ak tokālik, jekar loe bwe tōmak ilo kōj make ak ro jet ekar jab kōtļo̧k ad lukkuun anjo ioon an̄ūrlep ko ad. Tōmak ilo Jisōs Kraist im kajoor eo An n̄an kōmour kōj ej pedped in ājmour eo ad.

• Ekōjkan aō en̄jake kōn kōjeparok kien ko an Rilo̧mo̧o̧r?

• Ta eo ekar jipan̄ eō tōmak ilo Jisōs Kraist?

• Ta ribōk eddo eo aō, ritōl ro an Mōnjar eo, im ro jet rej loe bwe In kōm̧m̧ane n̄an kaļapļo̧k aō tōmak?

Kajoor im kajoor in kōjātdikdik

N̄e jej kōjātdikdik ilo būruwōd im ļōmņak ko ad, jenaaj bōk juon mije emeram ļo̧k kōn ilju im jekļaj eo ad. Kōjātdikdik ej bōktok kajoor edim im lōke jab kijenmmej bajjek. Kōjātdikdik emaron̄ in bar juon jipan̄ kōn aeņōm̧m̧an, lur, im dim ilo ad eddekļok ilo aolepen ad ājmour jen an̄ūrlep.

Jekdo̧o̧n pedped in katak in, Būreejtōn Russell M. Nelson ekar ba, “Kōjātdikdik ekajoorļo̧k jān bajjek kōņaan ļōkōm̧. Kōjātdikdik, kar kapenļo̧k kōn tōmak im iakwe em̧ool, ej ejaake juon kajoor eppen āinwōt meel. Kōjatdikdik ej erom̧ āinwōt juon emjak n̄an jetōb eo. … Eļan̄n̄e jenaj dāpdep wōt n̄an emjak in kōjātdikdik eo, menin enaaj ad kein dāpdep indeeo” (“A More Excellent Hope” [Brigham Young University devotional, Jan. 8, 1995], 3, speeches.byu.edu).

• N̄āāt eo iaar en̄jake kajoor im lōke kōnke kōn kōjātdikdik ilo Kraist?

• Ta kaminene ko im jerbal ko ilo jetōb aolep raan me Iaar kōm̧m̧ane ilo tōrein?

• Elmen an kōjātdikdik kar jelet aō ļōmņak, m̧wil, im jetōb? Elmen an menin jelet kōttōpar ko aō ilju im jekļaj im būļāān ko?

• Elmen an jelet jemdo̧o̧n ko im iaio̧ ko aō ippen armej ro me rej iakwe im kea kōn eō?

Laajrakin kam̧oolol

Juon wāween kile kajoor an Anij ilo mour ko ad ej emakijkij lin̄n̄ūri im jeiki kōjeraam̧m̧an ko ad. Jemaron̄ meļeļeļo̧k em̧m̧anļo̧k kōn iakwe eo an Jemedwōj Ilan̄ n̄an kōj ilo ad kalimjeki kam̧ool in iakwe eo An im kajoor ilo mour ko ad.

• Ta eo ij lukuun kam̧oolol kake?

• Ta men ko rem̧m̧an rekar waļo̧k ilo mour eo aō?

• Ekōjkan aō kar lo pein Anij ilo mour eo aō?

Wōnmaanļo̧k wōt im kōjatdikdik men̄e juon ej en̄jake juon mōjņo.

Elder Dale G. Renlund ekar kwaļo̧k kōn “‘Juon riwānōk ej juon rijerawiwi eo ej kajjieon̄.’ … Anij eļap ļo̧k an kea kōn wōn kōj im wōn eo jej erom̧, jen wōn kar kōj. Ej kea ilo ad kajjieon̄ maanļo̧k wōt” (“Armej ro Rekwojarjar ilo Raan-ko Āliktata rej Kajjeion̄ Wōt,” Liaona, Māe 2015, 56). Aoleped wōj rej en̄jake an ejjeļo̧k kōjātdikdik jen iien n̄an iien ilo ad kajjieon̄ in ājmour. Menin elukkuun m̧ool eļan̄n̄e ak n̄e jej m̧ōjņo̧. Ak kōjātdikdik im ājmour rej jutak eļapļo̧k ilo eddekļo̧k jen weepān. Juon m̧ōjņo ejjab jeer kijejeto ko ad mokta ak iien ko reļļjap ad ilo oktakļo̧k n̄an Jisōs Kraist. Jemaron̄ in ekkatak dāpij ad kōjātdikdik ilo Kraist men̄e je m̧ōjņo ļo̧k.

• Ilo wāween rot ij kajjieon̄ in oktak, em̧m̧an ļok, im eddekļo̧k?

• Ta jet iaan anjo̧ ko ak tōprak ko Ikar bōki ilo mour eo aō?

• Ta ribōk eddo eo aō, ritōl ro an Kabun̄ in, im ro uwaan baam̧le, im ro mōtta rej ba kōn aō kijejeto im wōnmaanļo̧k?

E emaron̄ kōtļo̧k kōj jān kōmakoko

“A eļan̄n̄e kom̧ naaj oktak tok n̄an Irooj kōn aolepān m̧wilaļ in būruōmi, im likūt ami kōjatdikdik ilo E, im jerbal n̄an e kōn aolep niknik in ļōmņak, eļan̄n̄e kom̧ij kōm̧m̧an e men in, Enaaj, ekkar n̄an ankilaan im An kōņaan, kōtļo̧k kom̧ jān ineen kōm̧akoko” (Mosaia 7:33).

• Ta eo ej jipan̄ eō bwe in tōmak ilo kallim̧ur eo bwe Jisōs Kraist enaaj kōtļo̧k eō?

• Elmen kōkm̧anm̧anļo̧k aō oktak n̄an Jisōs Kraist, likūt aō lōke ilo E, im jerbal n̄an E kōn aolep tiljek in ļōmņak? Ta men ko raalikar imaron̄ in em̧m̧anļo̧k ie?

• Ta meļeļein menin n̄an n̄a n̄an kōttar an Jisōs Kraist kōtļo̧k eō “ekkar n̄an anikilaan im kōņaan eo an make?”