Bun̄tōn 8: Je juon laajrak in aolep armej ro jekar kōmetak er im jino in kōņaan kōm̧m̧an oktak n̄an er.

Katak eo Aorōk: Pojak in Kōm̧m̧an Kajim̧we

Mokta jen ad jino ājmour, mour in an̄ūrlep ko ad raar einwōt juon aire eobrak kōn kajoor in kakkure me ej bukweļo̧k jemdo̧o̧n ko ad, ej likūt bwe en eo̧tōk tok ilik. Ilo ad kar jerbale bun̄tōn 7, jekar en̄jake bōk kajoor in kōmour kōn tūriam̧o eo an Rilo̧mo̧o̧r, jekar en̄jake in kijerjer n̄an kajim̧we jemdo̧o̧n ko rerub. Bun̄tōn 8 ej juon iien em̧m̧an n̄an je juon laajrak in armej ro im kōm̧m̧an oktak jim̧we n̄an ro jekar kōmetak er innem kōm̧m̧ane juon būļāān in karreo im bar kalek jemdo̧o̧n ko ad.

Ilo ad jerbale bun̄tōn ko an ājmour, jej loe bwe juon iaan men ko raar im̧we kōn bun̄tōn 12 ej laajrak eo me rekar jeje ie. Ewōr juon bun̄tōn maanjabpopo emakijkij an itok mokta jān juon bun̄tōn karuo tok jen bun̄tōn ko ruo. Bun̄tōn 8, ippen tok aolep bun̄tōn ko mokta, rej ad maanjabpopo n̄an bun̄tōn 9, im emenin aikuj peran ilōn̄in ad maron̄.

Jekar ekkatak jān armej ro me ededeļo̧k aer jerbale bun̄tōn 8 me raar kair in kōm̧m̧an kajim̧we ko ilo ejjeļo̧k maanjabpopo im maron̄ kakkure ilo jab kōm̧m̧an kajim̧we. Kōn menin jej bōk iien n̄an jar; kappukot kapilōk ān armej ro jej lōke, āinwōt ribōk eddo ro ad ak ritōl ro an Kabun̄ in; im kōm̧m̧ane juon karōk. Maanjabpopo in ilo bun̄tōn 8 ekar bōbrae kōj jān kajorāān ļo̧k jemdo̧o̧n ko ad n̄e jino in kōkeitaak armej ilo bun̄tōn 9.

Je juon laajrak

Mokta jān ad bar ejaake jemdo̧o̧n ko, jej aikuj in kakilen im kōm̧m̧ane juon laajrakin jemdo̧o̧n ko me raar jorāān. Jej kōjerbal etale ko ad jen bun̄tōn 4 n̄an kepooje laajrak ko ad. Ilo ad jar im tiljek ilo bar lale etale ko ad, Jetōb ej jipan̄ kōj kakilen jemdo̧o̧n ko jekar kōmetak er. Ro iaad me raar kōm̧m̧ane juon jaat ke jekar jerbale bun̄tōn 4 rej loe bwe epidodo ļo̧k n̄an kakilen armej rein im ra kein (lale appendix eo n̄an juon waanjon̄ok in juon jaat).

Jej loe bwe laajrakin unin tōl ko reļļap aer jipan̄ ilo ad kōm̧m̧ane laajrak ko ad. Jej kajitūkin kōj make, “Ewōr ke juon ilo mour eo aō, mokta, ak raan kein, me n̄e ij pād turin ij en̄jake jook, jaab aenōm̧m̧an, ak āliklik?” Jekar je etāer, im jekar eļļo̧k jān māllijon̄ n̄an kwaļo̧k en̄jake ko ad ak jekpen nae makūtkūt ko ad rebōd ņae er. Jej bar kobaik armej ro jekar tin kōmetak im armej ro me jekar tin ļōmņakin kajorāān er. Jekar bar kobaik armej ro emōj aer mej im armej ro me jejjab jeļā ewi wāween tōpar er. Jej mije jekjek kein reinjuon ke jekar jerbale bun̄tōn 9. Ilo ad kar jerbale bun̄tōn 8, jej mije ad pād im peran ilo ad m̧ool.

Jekar kajjieon̄ jab kajejtokjān men ko reddik. Jekar m̧ool in ļōmņak kake jorāān eo jekar kōm̧m̧ane n̄an armej ro ilo ad kar m̧ōņōņō ilo an̄ūrlep ko ad, men̄e jekar jab ņitbwil er. Jekar laajrake ro jej iakwe er im ro mōttad jekar kōmetak er ilo pād wōt im lukkuun dike, kilen jabdeki, adikdiki, atebare, jab m̧ool n̄ane, im kajooke. Eļan̄n̄e jekar bar kobaik tok eddo ko an bar juon armej ilo jabdewōt wāween, jej bar kobaik tok armej rein ilo laajrak ko ad. Jekar kajjieon̄ in laajrake aolep ro me rekar jorāān jen riab ko jekar ba, rube kallim̧ur ko, im wāween ko jekar mo̧ne er ak kar kōjerbali. Jekar ļōmņak kōn armej ro jekar jab jeorļo̧k aer bōd, im jekar bareinwōt kobaik er ilo laajrak ko ad.

Ālkin ad kar kalaajrak aolep ro jekar kajorāān er, jej bar kobaik bar juon āt n̄an laajrak eo—ad make. N̄e jej m̧ōņōņō ilo an̄ūrlep ko ad, jej kajorāān kōj make im bareinwōt ro jet. Jekjek eo em̧m̧antata jemaron̄ kajim̧we kōj make kake ej n̄an mour ilo ājmour jen an̄ūrlep. Anij emaron̄ jipan̄ kōj im kōm̧m̧ane kajim̧we ko. Ilo ad en̄jake iakwe an Anij im jeorļo̧k bōd, en̄jake in jook ko ad rej oktak n̄an juon m̧ōņōņō in kōm̧m̧ane kajim̧we ko.

Mōņōņō in kōm̧m̧ane

Ālkin ad kōm̧m̧ane laajrak ko ad, jej aikuj in m̧ōņōņō in kōm̧m̧ane kajim̧we ko. Elōn̄ iaad wōj kar loe bwe jejjab maron̄ kalaajraki armej ro im doulul ko jekar kajorāān e ilo ejjeļo̧k mad jen ad lello̧taan ņae ro jet me raaar bar kajorāān kōj. Armej ro emakijkij aer lokjak ilo juon mwilin in āliji lello̧taan e doon. N̄an kōjem̧lo̧k m̧wil in, juon aikuj in m̧ōņōņō in jeorļo̧k bōd.

N̄e jej kwaļo̧k m̧ool in bōro kōn en̄jake ko rebōd, Anij eaar jipan̄ kōj rube m̧wil in lello̧taan. Ekar kwaļo̧k n̄an kōj ke jej aikuj in jeorļo̧k an doon bōd einwōt E ear jeorļo̧k ad bōd. Ilo būrabōl eo kōn ļeo eban joļo̧k bōd in aolep m̧uri otemjej an ak ejjab kōņaan joļo̧k an ro jet bōd, irooj eo an eaar kūr e, “I ar kōtļo̧k eok jān m̧uri otemjej, bwe kwaar akweļap n̄an eō: E jab em̧m̧an bwe kwō naaj kar barāinwōt … tūriam̧okake ri karijar ippam, āinwōt I ar tūriam̧okake eok ke?” (Matu 18:32–33).

Ilo ad apan̄ n̄an m̧ōņōņō in kōm̧m̧ane kajim̧we ko n̄an armej ro me raar kajorāān kōj, jej akwelap kōn jouj an Kraist n̄an jipan̄ kōj leļo̧k n̄an er ejja tūriam̧o eo E ej letok n̄an kōj. Jekar bōke kapilek eo an Rilo̧mo̧o̧r eo n̄an jar kōn em̧m̧an ļo̧k eo aer im kar kajitūkin er n̄an bōk aolep kōjeraam̧m̧an ko me jekōņaan bwe ren ad make (lale Matu 5:44).

Ilo ad jerbale bun̄tōn 8, jekar kajjieon̄ in kemeemej bwe bun̄tōn in ejjab juon kōmmālmel ilo kajook jabdewōt—kōj make ak ro jet. En̄jake eo ad ekar kwaļo̧k n̄an kōj ke Rilo̧mo̧o̧r ej ineek eddo ko ad im kajookok ilo ad bōk juon erreilo̧k n̄an jemdo̧o̧n ko ad rejorāān im mōttan eo ad ilo er. Ilo bun̄tōn 8, jej jino in kepaake n̄an kōj make, ro jet, im mur kōn juon bōro ekāāl. Jej jino in en̄jake aeņōm̧m̧an ilo mour ko ad ijello̧kin aetwerōk im bōd.

Jej jino in m̧ōņōņō in bōjrak jān ekajet armej ilo jab jim̧we im bōk etale in mour ko aer im jidilo̧k ko. Jej jino in m̧ōņōņō in bōjrak jen kadikdik m̧wil ko ad make rebōd ak kōm̧m̧an jekpen kaki. Jān m̧ōņōņō in kōm̧m̧ane kajim̧we ko, jej en̄jake aeņōm̧m̧an eo in jeļā bwe Jemedwōj Ilan̄ ej m̧ōņōņō kōn kijejeto ko ad. Bun̄tōn in eaar jipan̄ kōj bōk makūtkūt ko me rej kōtļo̧k an Rilo̧mo̧o̧r eo kanemkwōj kōj jān bōd ko ad mokta. Mōņōņō in kōm̧m̧ane kajim̧we ko ej kepooj kōj n̄an jerbale aolepen bun̄tōn 9.

Bun̄tōn Jerbal ko

En̄in ej juon būrookraam̧ in m̧adm̧ōd. Em̧m̧anļo̧k eo ad ej pedped ioon ad mour kake bun̄tōn ko ilo mour ko ad kajjojo raan. Em̧ōj ņaetan menin “jerbale bun̄tōn ko.” Jerbal ko laajraki rej jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour in ad.

Je juon laajrak in armej ro me jemaron̄ kar kalluik ak kōmetak er.

Ribōk eddo ro ad rej tōl kōj ilo ad maanjabpopo kōn laajrak ko ad, im bar juon alen jej loe jeje ko aer relukkuun aorōk. Elōn̄ iaad raar kōjerbali laajrakin unin tōl in n̄an jipan̄ kōjeparok jekjek in epidodo ak eppen.

Mokta, kōjerbal etale ko ad jān bun̄tōn 4, jekar laajrake armej ro ak doulul ko jekar aikuj in tōpare.

Iturin tok kajojo kadeļo̧n̄, jej leļok jiddik unin aikuj in kōm̧m̧an kajim̧we ko.

Innem, ilo an tōl jen Jetōb eo, jekar kōm̧m̧ane juon būļāān n̄an tōpare armej ro ilo laajrak ko ad. Jej bar lale karōk ko ad ippen ribōk eddo ro ad ak rikapilōk ro kar lōke er.

Āliktata, jej kobaiki juon allōn̄ raan im iiō jān juon eo ej kōjātdikdik n̄an kadedeļo̧k mejānkajjik eo. Jekar likūt juon jikin n̄an ripoote allōn̄ raan im iiō eo jenej tōpare armej eo im tōprak ko jāne. (Jaat eo ilo appendix eo ej juon kein jerbal elukkuun jipan̄.)

Jeorļo̧k bōd

Epen menin n̄an kajitōk jeorļo̧k bōd jān armej ro raar kōmetak kōj. Eļan̄n̄e kwoj loe am make appan̄ kōn menin, komaron̄ loe an menin lukkuun jipan̄ n̄an jeiki juon laajrakin armej ro kwoj aikuj in jeorļo̧k aer bōd; innem jeiki juon laajrak in armej ro kwoj aikuj kajjitōk bwe ren jeorļo̧k am̧ bōd. Komaron̄ ilbōk in loe jet iaan āt ko rej waļo̧k ilo jimor laajrak ko.

Jej aikuj in kijenmej ippād make ilo ad jar im tiljek im jerbal maan ļo̧k n̄an jeorļo̧k an armej ro jekar kalaajraki bōd. Būreejtōn James E. Faust eaar ba: “Elōn̄ iaad rej aikuj iien n̄an jerbale aolep metak im būrom̧ōj. Jemaron̄ loe aolep wāween an un ko karumwijļo̧k jeorļo̧k bōd. Juon iaan un kein ej kōttar an ro rikōm̧m̧an bōd ukweļo̧k [im kōm̧m̧ane kajim̧we ko n̄an kōj] mokta jān ad jeorļo̧k aer bōd. Rum̧wij ļo̧k ej kōm̧m̧an ad kajorāān e aeņōm̧m̧an eo im m̧ōņōņō eo me emaron̄ kar ad. Nana in bar āliiji jorāān ko mokta-rem̧ōr rejjab bōk m̧ōņōņō eļap. … Eļan̄n̄e jejjab maron̄ loe jeorļo̧kin bōd ilo būruwōd n̄an ro raar kametak im kakinejnej kōj, jenaaj wanlōn̄ tak ilo juon ļābōļ in kile-kōj make im em̧m̧anļo̧k-eo ad make” (“Kajoor in Jeorļo̧k bōd,” Liaona, Māe 2007, 68).

Jeorļo̧k an juon armej bōd ejjab meļeļein bwe jej kakkure kālet ko aer renana ak kōtļo̧k aer kōm̧m̧an nana n̄an kōj. Ijoke jeorļo̧k bōd ej kōtļo̧k ad wōnmaanļo̧k ilo jetōb, en̄jake, im ānbwin. Āinwōt ro rekar kōmetak kōj ilo kamakoko, ad jab kōņaan jeorļo̧k aer bōd emaron̄ dāpij kōj ilo kōmakoko. Ilo ad jeorļo̧k bōd, jej joļo̧k en̄jake ko me ewōr aer kajoor in “ka nan̄inmej, kakinejnej, im lukkuun kakkure” (Thomas S. Monson, “Hidden Wedges,” Ensign, May 2002, 20). Jeorļo̧k bōd ej bareinwōt jipan̄ kōj kanooj bōk Jetōb eo im wōnmaanļo̧k ilo iaļ in an rikaļooran. Būreejtōn Dieter F. Uchtdorf, kar jān Būreejtōnji eo Kein Kajuon, kar kakemeemej kōj, “Lan̄ eobrak kōn ro me rej juon wōt ilo menin: Bōd ko Aer Rejako. Im raar jeorļo̧k bōd” “Menin Letok an Tūriam̧o̧,” Liahona, May 2012, 77).

Jar kōn iakwe em̧ool

Mekarta komaron̄ mijak āinwōt ke kōm eaar mijak in kōm̧m̧an kajim̧we ko, jej kam̧ool bwe kōn jipan̄ eo an Rilo̧mo̧o̧r, komaron̄ in jino kōņaan ioon armej ro ilo laajrak eo am̧ n̄e enej wōt iien em̧m̧an. Jej kepoojak in kōm̧m̧ane kajim̧we ko jen jar kōn peran eo n̄an mour jen tōmak ilo Anij, jab jān mijak ta eo armej rej kōm̧m̧ane ak ba. Im jej kajjieon̄ in ļoor pedped in katak ko an gospel ijello̧kin jook ak mijak. Juon iaan pedped in katak ko me rekar lukkuun jipan̄ kōj ej iakwe em̧ool ej “iakwe eo erreo an Kraist” (Moronai 7:47).

Mokta jen jerbale aolepen bun̄tōn 8, elōn̄ iaad rekar ilbōk n̄an en̄jake iakwe an Kraist jekdo̧o̧n jab wānōk ko ad aolep. Iakwe in jān E ekar kōm̧m̧an ad en̄jake eļap iakwe n̄an E im ekar letok n̄an kōj juon kōņaan n̄an ļoore E. Ilo ad kajjieon̄ ijo ad em̧m̧antata n̄an ļoor E, jekar obrak kōn An iakwe n̄an kōj im ro jet. Jekar jar kōn iakwe em̧ool, ilo m̧ool jej loe ad make kōņaan eļapļo̧k n̄an jeroļo̧k an armej bōd im kōm̧m̧ane kajim̧we ko. Jekar bareinwōt loe jon̄an iakwe im jeorļo̧k bōd ņae kōj make. Jej kajjitōk bwe Anij en kapidodoik būruwōn armej ro ilo laajrak ko ad jān leļo̧k n̄an iakwe em̧ool n̄an kōj, im jekar jar kōn kajoor eo n̄an bōk jabdewōt ta ej itok.

Ilo ad kar jar kōn iakwe em̧ool, elōn̄ iaad raar loe bwe menin elukkuun jipan̄ n̄an kālet juon armej jān laajrak eo ad im bukwelōlō im jar kōn armej eo kajojo raan ilo ruo wiik. Laajrak in kajim̧we eo ad ekar jipan̄ kōj kaalikar ilo jar ko ad n̄an Jemedwōj Ilan̄ kōn en̄jake ko reban m̧admōdi. Ilo ad jar—men̄e mokta ekar jab m̧ool en̄jake—jekar m̧ool in jeraam̧m̧an kōn tūriam̧o ekabwilōn̄lōn̄. Men̄e ilo iien ko reppen, Anij eaar kōjeraam̧m̧an armej ro me rekar jar kōn iakwe em̧ool n̄an jeorļo̧k bōd im kōm̧m̧ane kajim̧we ko.

Ekkatak im Meļeļe

Eoon im enaan kein laajraki jān ritōl ro an Kabun̄ remaron̄ jipan̄ kōj ilo ājmour eo ad. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keemejmej n̄an m̧ool im alikkar ilo ad jeje n̄an bōk aolepen joortoklik eo jen menin.

Rikaļoor ro an Kraist Reineem̧m̧an

“Ikōņaan kōnono n̄an kom̧ ro rej jān kabun̄ eo, ro rej rikaļoor ro an Kraist reineem̧m̧an, im ro raar bōk kōjatdikdik ebwe eo jān e kom̧ maron̄ deļo̧n̄ļo̧k ilo kakkije an Irooj, jān iien in m̧aanļo̧k m̧ae kom̧ naaj kakkije Ippān ilo lan̄.

“Im kiiō ro jeiū im jatū, ij lo waļo̧kin men kein jān kom̧ kōn ami etetal eaenōm̧m̧an ippān ro nejin armej” (Moronai 7:3–4).

Ilo bun̄tōn ko jijlimjuon jinointata, jenaj jino in erom̧ rikaļoor ro an Kraist reineem̧m̧an. N̄e jej aeņōm̧m̧an ippen Kraist, jej pojak in pād ilo aeņōm̧m̧an ippen ro jet.

• Elmen an jerbale aolepen bun̄tōn ko an ājmour kar maron̄ jipan̄ n̄a erom̧ rikaļoor ro an Kraist reineem̧m̧an?

• Ta makūkūt ko jet ij aikuj in bōke bwe in pād ilo aeņōm̧m̧an ippen armej ro ilo mour eo aō

Iakwe eo an Anij eweepān

“Ejjeļo̧k lōļn̄o̧n̄ ilo yokwe, a yokwe e weepān ej joļo̧k lōļn̄o̧n̄, bwe ewor en̄taan ilo lōļn̄o̧n̄. Eo ej lōļn̄o̧n̄ jan̄in koweepān e ilo yokwe.

“Jej yokwe bwe Ear yokwe kōj m̧okta.” (1 Jon 4:18–19).

• Ekōjkan aō maron̄ lōke iakwe eo an Anij n̄an eō im n̄an armej eo me Ij kappukot jeorļo̧k bōd ippen?

• Ekōjkan maron̄ jeļā bwe Anij ej iakwe eō im aolep ajri ro Nejin im ej kakajoorlok aō m̧admōd n̄an kōm̧m̧an oktak rejim̧we n̄e emaron̄

Pukotļo̧k ro jet.

“Kom̧win jab ekajet, im jāmin ekajete kom̧; kom̧win jab liaakļo̧k: im jāmin liaakļo̧k kom̧:

“Kom̧win leļok, im naaj lewōj n̄an kom̧; jon̄ak em̧m̧an, jooni, kōm̧akūti, im jiōbļo̧k naaj lewōj n̄an kom̧. Bwe kōn jon̄ak eo kom̧ij jon̄ak kake, naaj bar jon̄ak n̄an kom̧”(Luk 6:37–38).

Men̄e jemaron̄ mijak an jet armej naaj kowaane kijejeto ko ad n̄an kōm̧m̧an aeņōm̧m̧an ippāer, jej aikuj jab kōtļo̧k an mijak in dāpij kōj jān likūt er ilo laajrak ko ad im pojak in tōpare er. Kōjeraam̧m̧an ko jenaaj būki reļļapļo̧k jān metak eo.

“N̄e jenaaj epaakeļo̧k Jemedwōj Ilan̄, enaaj ļapļo̧k ad reilo̧k kōn tūriam̧o kōn jetōb ko rem̧ōjņo—jej en̄jake bwe jekōņaan n̄ān bōk er ioon aerar im joļo̧k jerawiwiw ko aer ilikid. … Eļan̄n̄e kwōj kōņaan bwe Anij en tūriam̧o kake eok, kwon tūriam̧o kake ro jet” (Joseph Smith, in History, 1838–1856 [Manuscript History of the Church], volume C-1 Addenda, 74, josephsmithpapers.org).

• Jejjab aolep weepān ilo aikuj tūriam̧o kake eo an Jisōs Kraist. Ekōjkan an menin jipan̄ jeļā bwe ilo jerbale bun̄tōn 8, Ij ejaake juon iien em̧m̧an n̄an bōke tūriamo kake im jouj eo an Kraist?

Joļo̧k bōd im kajitōk jeorļo̧k bōd

“Innām Piter ej itok n̄an Ippān, im ba, “Irooj, jete alen an jeiū ak jatū kōm̧anm̧an nana n̄an eō im ij jeorļo̧k nana eo? N̄an jiljilimjuon ke?

“Jisōs e ba n̄an e, I jab ba n̄an eok n̄an jiljilimjuon alen, a n̄an jiljilimjuonn̄oul alen jiljilimjuon.” (Matu 18:21–22).

Epidodo n̄an jeorļo̧k bōd im kajitōk jeorļo̧k bōd kōn juon wōt bōd in jerbal jen jeorļo̧k bōd ak kajitōk jeorļo̧k bōd kōn juon wāween eo ej waļo̧k im eaitok kitien ippen elōn̄ alen jorāān ko. Ļōmņak kōn jemdo̧o̧n ko tōre ko mokta ak raan kein ippen wāween ko rej waļo̧k im eaitok kitien me kwōnaj aikuj in kajitōk jeorļo̧k bōd ak kajitōk n̄an jeorļo̧k bōd.

• Elmen aō bōk kajoor n̄an jeorļo̧k bōd im kajitōk jeorļo̧k bōd?

• Elmen an Jisōs Kraist juon waanjon̄ok eo em̧m̧antata an jeorļo̧k an armej ro jet bōd? Elmen an waanjon̄ok eo An jipan̄ eō jeorļo̧k an armej ro jet bōd?

“Ij ba n̄an kom̧, bwe kom̧ij aikuj jeorļo̧k an doon bōd; bwe eo ej jab jeorļo̧k an eo jein im jatin bōd bōd ko an rej liaakeļo̧k im̧aan Irooj; bwe epād ippān jero̧wiwi eo eļapļo̧k.

“N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd” (Katak im Bujen Ko 64:9-10).

Jisōs eaar katakin bwe jab jeorļok an ro jet bōd ej juon jerawiwi eļap jān jorāān eo mokta.

• Elmen aō makoko in jeorļo̧k aō make bōd ak bar juon armej jon̄an wōt juon ilo kariabe Pinmuur eo an Rilo̧mo̧o̧r eo?

• Elmen an lello̧taan im meo̧ kajorāān eō ānbwin, ilo en̄jake, im ilo jetōb?

Kōjem̧ļok ālijii meo̧ im kajorāān

Rikanaan Joseph Smith ekar kōmeļeļeik wāween an meanwōd maron̄ tōl ļo̧k ukweļo̧k im jeorļo̧k bōd:

“Ejjeļo̧k juon men eļapļo̧k an naaj jipan̄ tōl armej ro n̄an meļo̧kļo̧k jerawiwi eo aer ijjeļo̧kin ad jibwe peir, im lale er ilo iakwe. N̄e armej rej kwaļo̧k jiddik meanwōd im iakwe eō, menin ewōr an kajoor ilo ļōmņak eo aō, juon m̧wil eo ejab meanwōd n̄an kainepataik aolep en̄jake ko reppen im komlaļ e ļōmņak an armej” (Joseph Smith, in History, 1838–1856 [Manuscript of the Church], volume C-1 Addenda, 74, josephsmithpapers.org).

• In ke m̧ōņōņō in juon eo ej rube ālijlij eo an meo̧ im kajorāān?

• Elmen an armej ro me rekar kwaļo̧k aer meanwōd n̄an eō im iakwe eim̧we ak kipel eō n̄an makūtkūt ilo oktak?

• Ilo wāween rōt ko remaron̄ in kakkure jemdo̧o̧n ko ilo mour eo aō im ukōte ilo aō kōm̧m̧an n̄an armej ro jet iakwe im meanwōd?