Jidik naan

Ilo ad itok n̄an jemļo̧k in unin tōl in, jej kam̧ool bwe jekar jab itok n̄an jemļo̧k in iaļ in ekwojarjar. Ke jekar jino itok n̄an kweilo̧k ko an ājmour, jekar ļōmņak e juon kabwilōn̄lōn̄ eo jemaron̄ kar bar en̄jake me emaron̄ kar ad ājmour jen an̄ūrlep. Ro iaad rekar en̄jake kōjeraam̧m̧an in rejeļā bwe elōn̄ ļo̧k—jerbal n̄an kōm̧m̧ani im elōn̄ ļo̧k kabwilōn̄lōn̄ ko im jouj n̄an en̄jake. “Men ko mej ear jab loi, im lọjiliñ ear jab roñjake, im re jañin deḷọñ ilo būruon armej, men ko jabdewōt Anij e ar kapojak ñan ro rej yokwe E” (1 Korint 2:9).

Kōj me jekar bōk bun̄tōn kein im jej kōjātdikdik in kapukōt ājmour im jar bwe kom̧ bareinwōt naaj maron̄ jeraam̧m̧an kōn eļap ājmour, ekoba elōn̄ ļo̧k jeraam̧m̧an ko in bōk koņa ilo Kabun̄ in. Erreo im jeļālo̧kijeņ ej jinoin in atbọkwōje menotemjej Irooj eaar kakoņi n̄an kōj.

Jet iaad wōj ro rej bōk koņaer ilo būrookraam̧ eo, ļōmņak bwe jemour, bōjrak aer bōk koņaer, innem bar rool n̄an einwōt mokta. Ro jet rej loe ājmour im make kabōjrak aer niknik ilo Kabun̄ in mokta jān tōpar kōttōpar eo ilo Kabun̄ in. Jekar loe bwe kadedeļo̧k ājmour ekoba kappukot n̄an kajokkun wōt juon im ekkeijel ikōtaan bun̄tōn ko12 an ājmour im gospel eo an Jisōs Kraist.

Jej jino erom̧ menin kōm̧anm̧an ekāāl ilo Kraist, im āinwōt menin kōm̧anm̧an ekāāl, jemaron̄ in erom̧ kein jerbal ko rekajoor n̄an jipan̄ Irooj jim̧or ilo rājet ko an rōn̄ōl eo (lale 2 Korint 5:17). Jej kam̧ool kōn elōn̄ ļo̧k kajoor jej loe ilo ad wōnmaanļo̧k wōt in kaminene kake pedped in katak ko an gospel eo ilo mour ko ad, ekoba makūtkūt ko ad ilo Kabun̄ in. Pedped in katak ko je būki ilo ājmour, katak ko jej ekkatak kaki, im en̄jake jej būki rej jipan̄ kōj itok n̄an Kraist eļapļo̧k im tōl kōj n̄an jerbal ekkar n̄an karōk eo an Irooj. Jej jino erom̧ membōr ro rej “m̧ōņōņō in poub” an Kabun̄ eo an Jisōs Kraist im Armej ro Rekwojarjar ilo Raan Ko Āliktata (Katak im Bujen Ko 58:27).

Irooj ej kōjeraam̧m̧an kōj ilo n̄e jej kōjerbal tool ko kar letok ilo unin tōl in. Mekarta, Kabun̄ eo an Jisōs Kraist ej m̧ōn kakkoņ tool ko remenin aikuji n̄an kōj n̄an dāpij jeļāļo̧kijeņ eo ad im eddōkļo̧k im wōnmaanļo̧k wōt ilo iaļan bujen eo. Ilo ad kōjem̧ļo̧k unin tōl in, jej karuwaineneik aolep ro rej bōk ko̧ņaer ilo Būrookraam̧ an Ājmour jān An̄urlep eo an Kabun̄ in n̄an “bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k” (2 Nipai 31:20). Ilo ad kōm̧m̧ane āindein, jej bōk eo eļaptata iaan kōjeram̧m̧an ko an Irooj ekar kallim̧ūr kake: “Kom̧ naaj bōk mour indeeo” (eoon 20).

Ilo jemļo̧kin, jej likūt ippemi ad naan in kam̧ool bwe ewōr kōjādikdik n̄an ājmour kōn Jisōs Kraist im pedpedin katak kein. Jej bōk koņaad ilo gospel eo im kar bōki bun̄tōn kein, im jejeļā ke rej jerbal. Jej karuwainene kom̧ n̄an jar kōn juon ikideelel im kōņaan eļap n̄an wōnmaanļo̧k wōt ilo jerbal in, kōtļo̧k bwe jouj eo an Jisōs Kraist en kadedeļo̧k am ājmour. Anij en kōjeraam̧m̧an kom̧ ilo iaļ in am̧i.