Bun̄tōn 3: Peeke n̄an ukōt ankilaad im mour ko ad n̄an kōjeparok eo an Anij, Jemād Indeeo, im Nejin, Jisōs Kraist.

Katak eo Aorōk: Lōke ilo Anij

Bun̄tōn 3. ej juon bun̄tōn in kālet. Ilo bun̄tōn ko ruo mokta, jekar kile ta eo jej aikuj in jab kōm̧m̧ane n̄an kōj make im ta eo jej aikuji an Anij kōm̧m̧ane kōj. Ilo bun̄tōn 3, jekar kwaļo̧k kadkad in jab wōt men ko me jemaron̄ kōm̧m̧ane n̄an Anij. Jemaron̄ peeke n̄an mōjņo ilo jetōb im ilo kanniek im wujlepļo̧k aolepen mour ko ad—mokta, kiiō, im ilju im jekļaj—im ankilaad n̄an Ipāān. Bun̄tōn 3 ej juon jerbal in anemkwoj. Ej juon kālet eo elukkuun aorōk jej kōm̧m̧ane ilo mour in.

Elder Neal A. Maxwell ekar katakin: “Leļo̧k ankilaan juon ej lukkuun juon men ejenoļo̧k juon armej make ej aikuj likūt lokatok eo an Anij. Ej juon naan in naan e epen, ak ej m̧ool. Elōn̄ men ko jet jej leļo̧k n̄an Anij, mekarta remaron̄ in em̧m̧anļo̧k n̄an ad leļo̧k men kein n̄an Anij, rej lukkun men ko emōj An kar letok n̄an kōj. Ak n̄e jej jino in wujlepļo̧k kōj make ilo leļo̧k ankilaad bwe en n̄an ankilaan Anij innem jej lukkuun leļo̧k n̄an E juon men” (“Insights from My Life,” Ensign, Aug. 2000, 9).

Būreejtōn Boyd K. Packer ekar kōmeļeļeik kālet eo an n̄an kōtļo̧k ankilaan n̄an Anij im kanemkwōj kālet eo leļo̧ke n̄an e: “Bōlen etale eo em̧m̧antata ilo mour eo aō, lukkuun kallim̧ur eo eļaptata, eaar itok ke Iaar lōke Anij bwe Imaron̄ kar bōk ak leļo̧k anemkwoj in kālet eo aō n̄an e—ilo ejeļo̧k makoko ak kōlaburbur. … Ilo juon wāween, … n̄an bōk anemkwoj an juon armej … im ba, ‘Inaaj kōm̧m̧ane ilo am̧ tōl, ’ ālkin ekkatak ilo eindein komij bōk eļapļo̧k” (Obedience, Brigham Young University Speeches of the Year [Dec. 7, 1971], 4).

N̄e jej moktata pād ilo kweilo̧k ko an an̄ūlep, jemaron̄ en̄jake kōlaburbur ak bareinwōt kajoor jen ro jet n̄an pād ijen. Ak n̄an jerbale bun̄tōn 3, jej aikuj in kar peeke n̄an makūtkūt n̄an kōj make. Jekar jeļā bwe ukōt mour ko ad eaar aikuj ad make kālet. Eaar jab kōn ta eo baam̧le ko im ro jerad rekar ba ak kōņaan. Jekar aikuj in pād ilo ājmour mekarta lōmņak ko im kālet ko an jabdewōt armej.

Ilo ad kar jerbale aolepen bun̄tōn 3, jekar jeļā bwe ājmour ekar itok jen kōm̧m̧an ko an Anij jab jen kijejeto eo ad make. E ekar jerbale menin bwilōn̄ eo ke jekar karuwainene E n̄an mour ko ad. Jaar kāālet n̄an ļoor Anij n̄an ājmour im pinmuur e kōj. Jekar peeke n̄an kōtļo̧k An tōl mour ko ad, kemeemej, em̧ool, bwe E eaar iien otemjej kautiej anemkwoj in kālet eo ad. Jej likūt mour ko ad ilo pein n̄e jej peeke n̄an wōnmaanļo̧k kake in mije būrookraam̧ in ājmour ilo jetōb.

N̄e jej bōk bun̄tōn in, jej en̄jake mijak e ta eo jab jeļā kake. Ta eo emaron̄ waļok eļan̄n̄e jej kōttāik kōj make im wujlepļo̧k mour ko ad im ankilaad n̄an kōjeparok eo an Anij? N̄an elōn̄ iaad wōj, mour in ajri eaar lukkuun pen, im jekar mijak in erom̧ mōjņo einwōt bar ajri ro redik. Kōnke kōn en̄jake ko ad mokta, kar kareel kōj bwe kallim̧ur n̄an ājmour eaar nan̄in jab tōprak. Jekar loe an armej ro jet rubi elōn̄ kien ko, im jekar rubi bareinwōt elōn̄ ipped make. Jekar pepe n̄an kajjieon̄ e ta eo ro jerad rekar me rekar ājmour kar ba: Jab kōjerbale. Etal n̄an kweilo̧k ko. Kajjitōk kōn jipan̄.” Ro me rekar etetal etetal ilo bun̄tōn ko an ājmour mokta jen kōj raar karuwaineneik kōk n̄an ekkatak kake iaļan mour in ekāāl. Rekar kijenmej im kattar e ad jino m̧ōņōņō in kōm̧m̧an jikin Anij ilo mour eo an juon make.

Jisōs Kraist ekar letok ejja karuwainene in “Ij jutak im̧aan kōjām, im kaļļaļļaļ: eļan̄n̄e jabdewōt armej enaaj ron̄ ainikiō, im kapeļļo̧k kōjām eo, Inaaj deļo̧n̄ļo̧k n̄an e, im naaj kejotak ippān im e Ippa” (Revelesōn 3:20).

Moktata, kijejeto ko ad rekar kijerjer im eliklik. Jej leļo̧k n̄an Jisōs Kraist lōke eo ad innem bar bōke. Jekar inepata bwe E enaaj kar jab m̧ōņōņō kake ad jab koņ im nej kar joļo̧k An jipan̄ im iakwe jen kōj. Bōtaab eaar jab.

Ilo m̧ool jekar kōtļo̧k an Jisōs Kraist kwaļo̧k kajoor in kōmour eo An im jokane eo kōn ļoor iaļ eo An. Kajojo iaad kar jeļā bwe jejjab joļo̧k wōt ad an̄ūrlep, ak jej bareinwōt aikuj in ukōt aolepen ankilaad im mour ko ad n̄an Anij. Ilo ad kōm̧m̧an eindein, jej loe bwe E ej kijenmej im bōk kijejeto ko ad n̄an wujlepļok n̄an E ilo menotemjej.

Maron̄ eo ad n̄an juta ņae kapo ej kiō emjak n̄an wujlepļo̧ke n̄an ankilaan Anij. Jej kwaļok ad aikuj n̄an kajoor in Pinmuur eo an Rilo̧mo̧o̧r, im jej jino en̄jake eo ilo kōj, kowaļo̧k kōj ņae kapo eo tok juon. Jekar ekkatak n̄an bōk mour ilo koņ ko an Irooj.

Wujlepļo̧k n̄an Anij emaron̄ in pen n̄an kōj. Eaikuj ad bar aje ļo̧k kōj make n̄an Ankilaan kajojo raan, jet iien aolep awa, ak bareinwōt iien n̄an iien. Ilo ad m̧ōņōņō in kōm̧m̧ane eindein, jej loe jouj im kajoor in kemaron̄ n̄an kōm̧m̧ane ta eo jejjab maron̄ en̄an kōj make.

Wōnmaanļok in wujlepļo̧k n̄an ankilaan Anij ej kadikļok im ej bōktok eļapļo̧k meļeļein n̄an mour ko ad. Jej kūtōtō jiddik jen men jiddik ko me rekar kabōņōņō kōj. Jej bōk eddo in jerbal ko ad. Jej kōm̧m̧ane n̄an ro jet āinwōt an Rilo̧mo̧o̧r eo naaj kar kōm̧m̧an n̄an er. Bōke m̧ool eo ilo ta eo jej loe, ļōmņak, im en̄jake bwe mour in ej ketak im bwe enaaj iienotemjej bōk maron̄ eo n̄an bōktok n̄an kōj būrom̧ōj im mijak bareinwōt m̧ōņōņō.

Kajojo raan jej bar kōkāāl kallim̧ur eo ad n̄an wujlepļo̧k n̄an ankilaan Anij. En̄in ta eo enan̄in aoleped wōj rej ba ke rej ba, “mije armej kajojo raan jab inepata kōn raan eo tok juon.” Jekar pepe n̄an kōtļo̧k ankilaad-make im kapukōt men eo kar okran an̄ūrlep ko ad. Im jekar pepe n̄an m̧ōņōņō kōn bar juon raan in aeņōm̧m̧an im kajoor me ej itok jān lōke Anij im An em̧m̧an, kajoor, im iakwe.

Būtōn 1, 2, im 3, raar jipan̄ kōj meļeļe ewi wāween kōjerbal tōmak. Juon iaan kakobaba ko raalikkar kōn jerbale bun̄tōn3 ej bwe jej m̧ōņōņō in lōke Anij n̄an wōnmaanļok n̄an bun̄tōn eo tok juon.

Bun̄tōn Jerbal ko

En̄in ej juon būrookraam̧ in jerbal. Ilo ad wōnmaanļo̧k in pedped ion ilo jokin mour kake bun̄tōn ko ilo kajjojo raan. Menin kar jeļā kake āinwōt “jerbale bun̄tōn ko.” Laajrakin jerbal kein rej jipan̄ kōj itok n̄an Kraist im bōk tōl im kajoor eo menin aikuj n̄an bōk bun̄tōn eo tok juon ilo ad ājmour.

Kāālet n̄an tōmak im pokake Anij

Naan kein—kar kwaļok jen “Jar in Kaeņōm̧an” jān Reinhold Niebuhr—jipan̄ kōj ilo ad kālet n̄an lōke im pokake Anij: “Anij ej letok n̄an n̄a aeņōm̧m̧an n̄an bōk men ko ijjab maron̄ ukōti, kōketak n̄an men ko Imaron̄ ukōti im jeļāļo̧kijeņ n̄an jeļā ta oktak eo.” Naan kein raiboojoj im ka m̧ōņōņō ippen Rikanaan Joseph Smith ilo Katak im Bujen Ko 123:17: “Kōn menin, … jen kōm̧m̧ani aolep men kein ilo m̧ōņōņō ko im rej pād ilo ad kajoor; innām jen jutak pen, kōn jeļā ekanooj dim, n̄an lo lo̧mo̧o̧r an Anij, im n̄an an kwaļo̧k Pein.”

Anij ej letok n̄an kōj aeņōm̧m̧an n̄e jej lōke An kajoor bwe en jipan̄ kōj. Jej bōk mekarta jejjab maron̄ kabwijer kālet ko im makūtkūt ko an ro jet, jej maron̄ kālet wāween ad naaj makūtkūt ilo kajojo wāween ko jej jelmae. Jej peran ilo kālet n̄an lōke Jemedwōj Ilan̄ im makūtkūt ekkar n̄an Ankilaan. Jej ukōt kōņaan ko ad im mour ko n̄an kōjeparok eo An. Jej pepe n̄an pokake E im kōjparok kien ko An.

Ilo ad ājmour, jej loe ta eo jej aikuj n̄an emakijkij ekkatak kake bun̄tōn 3. Jet iien jemaron̄ aikuj in bar kallim̧ur kajojo iien ak kajojo raan. Ejjab aorōk jete katten ad aikuj in kōm̧m̧ane menin. Kajojo iien jej kōm̧m̧ane, jej en̄jake jipan̄ im iakwe eo an Anij, im jej kajoorļok ilo ajmour. Elder Neal A. Maxwell ekar bar kakemeemej kōj: “Ettā ilo jetōb ej jab dedeļo̧k ilo juon iien emōkaj, ak jen kakobaba in eddekļo̧k ko im jān jerbal in kein jipan̄ ko. Kein jipan̄ ko rej meļeļein n̄an bōki juon ilo juon iien. … Em̧ool ankilaad emaron̄ in ‘naaj oran̄ ilo ankilaan Jemān’ ilo ad m̧ōņōņō in ajeļo̧k e n̄an … em̧ool āinwōt juon ajri ej ajeļo̧k e n̄an jemān’ (lale Mosaia 15:7; 3:19)” (“Consecrate Thy Performance,” Ensign, May 2002, 36).

Bar lale im bar kōkāāl bujen ko ippān Anij

Lōke Anij ilo aolep men emaron̄ einwōt kōņake juon pea in mājen pilo im loe an alikkar aolep men. N̄e jej kālet n̄an ukōt ankilaad n̄an Anij, jej jino en̄jake kaeņōm̧m̧an eo im lan̄lōn̄ ej itok jān kappukōt im kōm̧m̧an ankilaan Jemedwōj Ilan̄. Juon wāween ad loe ankilaad n̄an lōke Anij ej n̄an maanjabpopo n̄an bōk kwojkwoj eo ilo erreo im ļoor ankilaan Anij.

Kōnono ippān bisop ak branch branch būreejtōn eo am̧ kōn an̄ūrlep eo am̧ im kālet eo am̧ n̄an ļoore ankilaan Anij. Kōm̧m̧ane ijo em̧m̧antata am̧ n̄an pād ilo kweilo̧k in kwojkwoj ko kajojo wiik. Ilo am̧ kabun̄jar, kanooj ron̄jake jar ko an kwojkwoj eo im kōjekļo̧kijeņ kōn menin letok ko Jemedwōj Ilan̄ ej lewaj n̄an eok. Innām bar kōkāāl am̧ kallim̧ur n̄an bōke im ļoore Ankilaaan n̄an mour eo am̧ ilo bōke kwojkwoj eo eļan̄n̄e bisop eo am̧ ak branch būreejtōn eo am̧ ej errā bwe kwoj poojak in kōm̧m̧ane eindein.

Ilo an eddekļo̧k am̧ ājmour, kwonaaj loe am̧ make kōņaan pād ilubwiljin ro rej kautij katok eo an Rilo̧mo̧o̧r eo. Kwonaaj jino in en̄jake m̧ool eo bwe “bwe ejjeļok naan jen Anij enaaj m̧ōjņo̧” (Luk 1:37).

Ekkatak im Meļeļe

Laajrakin jeje ko rekwojarjar im ennaan ko jen ritōl ro an Kabun̄ in remaron̄ jipan̄ ilo ad ājmour. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Lukkuun piktok eo ad ej n̄an pukōt kālet eo epidodo im ejjab jokane n̄an ājmour. Ak jejeļā kiiō bwe m̧ool im alikkar relukkuun kajoorļo̧k. Ilo ad bar lale uwaak ko ad n̄an laajrakin kajitōkko ippen ribōk eddo ro ad im ro jet, jej loe an alikkar ļōmņak ko im un ko ad.

Pukōt Aenōm̧m̧an ilo Ankilaan Anij

“Kom̧in kōllaajrak kom̧ n̄an ankilaan Anij, im jab n̄an ankilaan devil im kanniōk; im keememej, ālikin ami kar kōllaajrak kom̧ n̄an Anij, bwe ej ilo im kōn wōt jouj an Anij kom̧ij bōk lo̧mo̧o̧r” (2 Nipai 10:24).

• Ta meļeļein naan eo kōllaajrak ?

• Ta meļeļein n̄an mour in aenōm̧m̧an ilo ankilaan Anij?

• Elmen aō maron̄ en̄jake kajoor an Anij ilo mour eo aō ilo aō oktak n̄an Ippān?

• Ta ļōmņak ko aō ilo kōtļo̧k bwe Anij en tōl mour eo aō?

• Ta ej bōbrae n̄a jen aō kōtļo̧k E bwe en tōl mour eo aō?

Wujlepļo̧k n̄an Ankilaan Anij

“Eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj” (Mosaia 24:15).

Anij emaron̄ kar kōmakūt eddo ko an Alma im armej ro an. Ak ijello̧kin, Eaar kōkajoorļo̧k er bwe ren maron̄ “kotak eddo ko aer ilo ejjeļo̧k pen.” Jeļā bwe rekar jab ello̧taan ak raar m̧ōņōņō ilo kijenmej n̄an ankilaan Anij. Ļōmņak mōk kōn ettā bōro ej bōk n̄an m̧ōņōņō in kōmera juon eddo im jab ilo mōkaj.

• Ta meļeļein n̄an ajeļoke n̄an Anij?

• Elmen aō ajeļo̧k?

• Ta aō ļōmņak kake?

• Elmen aō bōk peran n̄an kajjieon̄ in ļoore Ankilaan?

Jitlo̧k im jar

“Raar jitlo̧k im jar emmakijkij, im eaar kanooj kajoorļo̧k im kajoorļo̧k ilo aer ettā, im penļo̧k im penļo̧k ilo lōke Kraist, n̄an obrak in burueer kōn m̧ōņōņō im ineem̧m̧an, aaet, em̧ool n̄an karreoik im kokwōjarjare būruweer, kokwōjarjare eo ej itok kōnke aer kōtļo̧k burueer n̄an Anij” (Hilamōn 3:35).

• Eoon in ej kōmeļeļeik an armej ro leļo̧k būruweer n̄an Anij. Elmen an jitlo̧k maron̄ jipan̄ n̄a leļo̧k būruwō n̄an Anij im bōjrak jān an̄ūrlep?

• Inaaj ke kallim̧ur n̄an jar ilo iien mālijon̄ n̄an ettā bōro im tōmak ilo Kraist? Etke ak etke ejjab?

• Ewi jon̄an kajoor in aō kōņaan leļok būruwō n̄an Anij im jab n̄an an̄ūrlep?

Kōttāik kōj make make im̧aan Anij

“Im lo, eaar kōtļo̧k er kōnke raar kōttāik er im̧aan mejān; im kōnke raar kūr ilo kajoor n̄an E, Eaar kōtļo̧k er jān kōm̧akoko; im āindein Irooj ej jerbal kōn an kajoor ilo aolep wāween ilubwiljin ro nejin armej, im erļo̧keļo̧k pein tūriam̧okake n̄an er bwe raar likūt aer lōke ilo E.” (Mosaia 29:20).

Kōttāik kōj make ej juon kālet. Jemaron̄ in bōk mālijon̄ n̄an tōmak bwe mekarta Anij ekar jipan̄ ro jet, E eban bar jipan̄ kōj kōnke jej mōjņo im pere. Jemaron̄ kile riab in kōn ta eo ie. Ilo m̧ool, jej ajri ro nejin Anij.

• Elmen an jeļāļo̧kijeņ in jipan̄ eō kōttāik eō make im kapukōt jipan̄ eo an Anij?

• Ta ļōmņak ko jet im tōmak reriab kōn Anij im n̄a me raar dāpij eō jān jan̄ ilo eļap kajoor n̄an Anij bwe en kōtļo̧k eō jen kōmakoko?

Kālet n̄an lōke Anij

“Im kiiō ikōņaan bwe kom̧in ettā bōro, im jeļāņae im jouj; kipiliie; obrak kōn kem̧m̧aanwa im meanwōd; im jatōr ilo aolep men, im niknik ilo kōjparok kien ko an Anij ilo iien otemjeļo̧k; kajjitōk kōn jabdewōt men ko kom̧ij aikuji, jim̧or ilo jetōb im ilo kanniōk; iien otemjej kōro̧o̧l kam̧m̧oolol ko n̄an Anij kōn jabdewōt men ko kom̧ij būki.” (Alma 7:23).

Lōke Anij ej juon kālet. Ājmour ej waļo̧k kōn un ko ilo kajoor an Anij wōt ijoke ālkin ad kālet n̄an ajeļo̧k n̄an Ankilaan. Kālet eo ad n̄an leļok n̄an ankilaan Anij ej kōm̧m̧an bwe kajoor eo An en ļap an pād ilo mour ko ad. Eoon in ej kōmeļeļeiki men ko raorōk jej aikuj n̄an ajelļo̧k mour ko ad n̄an ankilaan kōjeparok eo an Anij.

• Ewi wōt iaan men kein raorōk im ejjeļo̧k ippa?

• Wōn emaron̄ jipan̄ n̄a ejaake men ko raorōk im ejjeļo̧k Ippa?

• Ewi wōt iaan men ko raorōk im imaron̄ in jerbale rainin?

• Ta eo imaron̄ kōm̧m̧ane n̄an jino ejaake men kein raorōk?

Erom̧ āinwōt juon Ajri Jidikdik

“Armej ilo lukkuun biktokin ej rikōjdat n̄an Anij, im eaar jān wōtlo̧k eo an Adam, im enaaj, indeeo im indeeo, m̧ae an naaj kōtļo̧k e n̄an karreelel ko an Jetōb Kwōjarjar, im utūkļo̧k armej eo ilo lukkuun biktokin im erom juon rikwōjarjar kōn pinmuur eo an Kraist Irooj, im erom āinwōt juon ajri, ettā, ineem̧m̧an, ettā bōro, kem̧m̧aanwa, obrak kōn iakwe, m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik ņa ioon, em̧ool āinwōt juon ajri ej ajeļo̧k e n̄an jemān” (Mosaia 3:19).

Elōn̄ iaad rekar en̄jake kōm̧m̧an ko rejjab em̧m̧an jen ro jined im jemād, ak ro rej eddoik er, erom̧ “āinwōt juon ajri” ej menin ekkatak, bareinwōt bōlen kamijak.

• Jekjek eo in ke n̄an n̄a? Ewōr ke aō būrabōļo̧m̧ ippen juon eo jinen ak jemān me ejjan̄in de jako?

• Ta eo imaron̄ kōm̧m̧an n̄an kōjenolo̧k en̄jake ko aō kōn ro jinō im jema jen en̄jake ko kōn Anij?

Kōnono ippan Anij

“[Jisōs] ekar bukwelōlō, im jar, im ba, Jema eļan̄n̄e Kwō kōņaan, Kwōn bōkļo̧k kab in jān eō: a en jab ankil Aō a Am̧ wōt” (Luk 22:41–42).

Ilo jar in, Rilo̧mo̧o̧r ekar kōmeļeļeiki An m̧ōņōņō in ajeļo̧k n̄an Jemedwōj Ilan̄. E eaar kwaļo̧k kōņaan ko An, ijoke ālkin E ej kōttāiki im kar kōm̧m̧ane ankilaan Jemān. Ej juon kōjeraam̧m̧an n̄an maron̄ kwaļok Anij en̄jake ko ad.

• Elmen jeļā ke Jemedwōj Ilan̄ ej meļeļe kōn aō mijak, metak, ak jabdewōt ta Ij en̄jake ke ejipan̄ eō kwaļo̧k ilo m̧ool, “a Am wōt”?