Bun̄tōn 9: Ijo ekkar, kōm̧m̧an oktak ejimwe n̄an aolep armej ro jekar kōmetak er.

Katak eo Aorōk: Kōm̧m̧an Kajim̧we

Ilo ad emakūt n̄an bun̄tōn 9, jekar pojak in kapukōt jeorļo̧k bōd. Āinwōt ļōmaro ro rekar ukweļo̧k nejin Mosaia raar “ilo peran kijejeto n̄an kajim̧we aolep jorrāān ko raar kōm̧m̧ani” (Mosaia 27:35), jej kōņaan kōm̧m̧an kajim̧we. Pād wōt, ilo ad jelmae bun̄tōn 9, jejeļā jeban bōkļo̧k kōņaan ko ad mae iien Anij ekar kōjeraam̧m̧an kōj kōn Jetōb eo An. Jej aikuj peran, jeļā en̄jake, tiljek, im kajejjet iien. Elōn̄ iaad raar jab bōk men kein raorōk ilo iien in. Jekar jeļā bwe bun̄tōn 9 emaron̄ bar teeje kōņaan ko ad n̄an kōttāik kōj make im kapukōt jipan̄ im jouj eo an Irooj.

Kōnke kōn iminene ko ad ilo jerbale appan̄ in, jej leļo̧k jet ļōmņak ko. Elukkuun aorōk bwe jen jab mōkaj mokta jen ļōmņak ak jerwaan ilo ad kajjieon̄ in kōm̧m̧an kajim̧we. En jokun wōt juon an aorōk bwe jen jab aipedped. Elōn̄ armej ilo ājmour emōj aer nan̄inmej ļo̧k ke raar kōtļo̧k an mijak dāpij er jen kōm̧m̧an kajim̧we. Jej aikuj in jar kōn tōl eo an Irooj kōn n̄āāt im elmen kōm̧m̧an kajim̧we. Ilo kakobaba, enej lukkuun jipan̄ n̄an kōnono ippen ribōk eddo ro ad, ritōl ro an Mōnjar, ak ro jet jej lōke.

Jet iien jemaron̄ in deļon̄ ilo kapo n̄an bōbrae kweilo̧k ippen juon armej ilo laajrak eo ad. Mekarta, jej elmakote am̧ eļļo̧k jen mālijjon̄ in, n̄e ejjab, aeet, juon kamo emālim an dāpij eok jen kweilo̧k ippen juon armej. N̄e jej ettā bōro im m̧ool im kōm̧m̧an kijejeto ko ewōr meļeļeier n̄an kweilo̧k ilo lukkuun armej, jemaron̄ kōm̧m̧ane jemdo̧o̧n ko raar jorāān. Jej kōtļo̧k an armej jeļā ke jej jipadek er n̄an kōm̧m̧an kajim̧we. Jej kautij kōņaan ko aer eļan̄n̄e rej kowaļo̧k bwe remaron̄ jab kōnono kake. Eļan̄n̄e rej letok n̄an kōj iien em̧m̧an n̄an joļo̧k bōd, jej kalikkar im kakadu wāween eo. Jej aikuj kanooj kōjeparok im jab kōm̧m̧an jekepen ko ak iṇoṇooj armej ro jej tōpare. Unin kōm̧m̧an kajim̧we ej jab n̄an kwaļo̧k m̧wil ko ad ak kananaik armej; unin ej n̄an kwaļo̧k bōd ko ad, jeorļo̧k bōd, im kōm̧m̧an oktak rejim̧we jabdewōt iien emaron̄. Jejjab akweel ippen armej, men̄e aer uaak ejjab em̧m̧an ak maron̄ bōke. Jej tōpare kajojo armej ilo ettā im leļo̧k kalaajrak, jab kwaļo̧k jim̧we im unin.

Emaron̄ kile an apan̄ n̄an jeorļo̧k bōd kōn jet m̧akūtkūt. N̄an waanjon̄ok, jemaron̄ bōk kōnono kōn ta ko raar waļo̧k me emaron̄ bōk mālim n̄an kwaļo̧k, einwōt ko̧o̧t ak kakkure. Jemaron̄ in idajon̄jon̄ uaak, kōm̧m̧an jekpen ko, ak bōbrae kōm̧m̧an kajim̧we. Jej jar ilo kapukōt kapilek an eklesia ak ro retijemļo̧k mokta jen bōk jabdewōt makūkūt ilo keej kein relukkuun ļap.

Ilo jekjek ko jet, jemaron̄ jab maron̄ joļo̧k ad bōd ilo lukkun armij. Armej eo emaron̄ mej, ak jemaron̄ jab jeļā liin/ļein ej jokwe ia. Ilo jekjek rōt in, jemaro̧n̄ joļo̧k ad bōd ilo jab lukkun armij Jemaron̄ je juon leta im kwaļo̧k ad būrom̧ōj im kōņaan kōlaajrak, men̄e jejjab maron̄ jibwe ļo̧k make leta eo. Jemaron̄ pukot juon eo me ebar kakeememej kōj kōn armej eo im kōm̧m̧ane juon men n̄an jipan̄ ļeo ak lio, ak jemaron̄ kōm̧m̧ane juon men eo ennojak an bōbrae im kwaļo̧k etan armej n̄an jipan̄ juon eo uwaan baam̧le eo an armej eo.

Ilo jet jekjek, jemaron̄ kar kōm̧m̧an jorāān ko me jejjab maron̄ m̧adm̧ōde. Elder Neil L. Andersen ekar katakin:

“Elōn̄ bōd ko rejjab maron̄ kajim̧we jen juon eo eaar kametak kalluik, im ewōr metak im en̄taan ko me rejjab maron̄ in m̧adm̧ōd. Ak jamin joļo̧k am̧ kōm̧m̧an oktak jim̧we, en̄taan eo komaron̄ kabōjrake, men̄e iakwe, erreo, wānōk, lōke, im jab maron̄ bar kōjepļaaktok kautiej ijello̧kin kōjeparok eo an Irooj. … N̄an jet jerawiwi, wāween eo wōt n̄an kōm̧m̧an oktak rejim̧we emaron̄ itok jān kōjeraam̧m̧an mour ko an ro jet im einwōt juon kein jerbal ilo pein Irooj n̄an bōktok em̧m̧an im jouj eo an n̄an ro jet” (The Divine Gift of Forgiveness [2019], 218, 221).

Jān iien eo jekar kālet n̄an bōk pedped in katak kein rem̧ool n̄an wāween eo ad ekāāl ilo mour, jej jino in kōm̧m̧an kajim̧we ko. Jej kajim̧we wāween ad mour, im ilo ad mour ilo ājmour, ej kōjeraam̧m̧an aolep ro ipeļaakid wōj.

Emaron̄ wōr jekjek ko ijo n̄an tōpar juon bar armej n̄an kōm̧m̧an kajim̧we ko me remaron̄ kemetak n̄an armej eo ak bareinwōt kemetak. Eļan̄n̄e kwoj ļōmņak bwe emaron̄ keej eo in, kōnono kake jekjek eo ippen ribōk eddo eo am̧ ak rikapilek eo kwoj lōke. Bun̄tōn in an ājmour aikuj in jab kōm̧m̧an eļapļo̧k kemetak ak liaajlọḷ n̄an ro jet.

Ālkin kōm̧m̧an kajim̧we ko n̄an aolepen makūtkūt mokta, emaron̄ wōr wōt juon ak ruo armej jej en̄jake ad jāmin jelmae. Elōn̄ iaad rej jerbale menin ilo m̧ool. Jej elmakot am̧ oktak n̄an Irooj ilo m̧ool in jar. Eļan̄n̄e kwoj mijak wōt ak illu ņae juon armej, kwoj aikuj karumwijļo̧k am̧ bwebwnato ippen ļeo ak lio. Jemaron̄ anjo ioon en̄jake ko rebōd jān jar kōn iakwe em̧ool n̄an loe armej eo āinwōt an Irooj kalimjek ļeo ak lio. Jemaron̄ kalimjek un ko ko rejim̧we etke kōm̧m̧an oktak jim̧we im kalaajrak naaj jipan̄. Eļan̄n̄e jej kōm̧m̧ani men kein im tiljek, Irooj emaron̄ im enaaj—ilo iien eo An make, im ilo wāween eo An make—letok n̄an kōj iien ko rem̧m̧an rekabwilōn̄lōn̄ n̄an kapukkot jeorļo̧k in bōd jen aolep ilo laajrak eo ad.

Ilo keej ko jet, armej eo eban kōņaanj jeorļo̧k bōd ak eban jeorļo̧k. Armej ro jet remaron̄ jeorļo̧k ad bōd ijoke eban kōņaan kōlaajrak ak bōk juon jemdo̧o̧n ippād. Ilo an menin maron̄ kabweerer ak kōmetak n̄an kōj, eaorōk n̄an kautiej en̄jake ko aer im kea kōn anemkwoj in kālet eo aer. Bun̄tōn 9: ej kōn kōm̧m̧ane ijo koņaad n̄an kōm̧m̧an kajim̧we. Bun̄tōn in ejjab aikui an armej eo juon jeorļo̧k bōd ak kalaajrak ippād. Ilo ad kōm̧m̧ani ijo koņaad ilo kōm̧m̧ane juon kijejeto em̧ool n̄an kōm̧m̧an kajim̧we ko, jej jerbale bun̄tōn 9 im wōnmaanļo̧k ilo iaļ in ājmour in ad.

Bun̄tōn Jerbal ko

En̄in ej juon būrookraam̧ in m̧adm̧ōd. Em̧m̧anļo̧k eo ad ej pedped ioon ad mour kake bun̄tōn ko ilo mour ko ad kajjojo raan. Em̧ōj ņaetan menin “jerbale bun̄tōn ko.” Jerbal ko laajraki rej jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour ko ad.

Tōpar ro jet

Ilo bun̄tōn 8, jekar kōm̧m̧an laajrak ko im jar im kar kōjekļo̧kjen n̄āāt im elmen tōpare armej ro ilo laajrak ko ad. Jekar kōnono kōn pepe ko ad ippen ribōk eddo ro ad ak rikapilek ro kar lōke er, innem jekar poojak n̄an bun̄tōn 9—n̄an kūr armej ro ilo laajrak eo ad (eļan̄n̄e emaron̄ im ekkar). N̄e jej kūr armej ro n̄an kōm̧m̧an kajim̧we, jejjab aikuj in tipidik ļo̧k eļap meļeļe kōn an̄ūrlep ko ad. Ak jej aikuj jeere ebwe meļeļe n̄an jipan̄ er meļeļe ļo̧k etke jej aikuj in kōnono ippāer.

Jej kile bōd ko ad im kajitōk ta eo jemaron̄ in kōm̧m̧ane n̄an kōm̧m̧an men ko rejim̧we. Mekarta ak jab ej aer pepe jeorļo̧k ad bōd. Armej ro jej tōpare er remaron̄ wōr ippāer kajitōk ko me rekkar n̄an ad uaake. Kemeemej in uaake kajitōk ko ilo juon wāween me ejāmin naaj kōmetak jemdo̧o̧n ko. Eļan̄n̄e ewōr jadewōt ami pere, jiron̄ er kwōnaaj kōņaan ļōmņak kake bar menin im naaj bar jepļaak n̄ani. Innem komaron̄ kōnono ippen ribōk eddo ro am̧ ak rikapilek ro kar lōke er kōn ewi wāween im n̄āāt eo n̄an uaake kajitōk kein.

Jemaron̄ jet iien jino en̄jake ilo jekjek in. Jej jar im kajitōk ippen Irooj bwe en dāpij wōt im mije unin ad loļo̧k. Jemaron̄ kar pād ilo mālijjon̄ n̄an kwaļo̧k ak kōmeļeļeik makūtkūt ko ad ilo bōktok ak mije juon men me juon armej ekar kōm̧m̧ane, ijoke jej aikuj eļļo̧k jen mālijjon̄ in. Jej aikuj in pād wōt im mije ilo kōm̧m̧an kajim̧we ko n̄an makūtkūt ko ad.

Jej kōnono kōn ta eo jemaron̄ kōm̧m̧ane n̄an kōm̧m̧an kajim̧we ippen armej eo jekar bōd n̄an e. N̄an waanjon̄ok, eļan̄n̄e jej aikuj in kōm̧m̧an oktak jim̧we ilo kōļļā ļo̧k jāān, armej eo emaron̄ jeorļo̧k m̧uri eo, kajitōk jon̄an oneān eo, ak kajitōk nejin jāān eo. Jemaron̄ jab aikuj in kakūrm̧ool kōtmāne ko aer; mekarta, eorōk n̄an meļeļe ta eo armej rej en̄jake ke jej aikuj in kōm̧m̧an oktak jim̧we, im jej aikuj jar im ļōmņak kake.

Ālkin kōm̧m̧an oktak ko, jenaaj kadedeļo̧k joor kko ruo eliktata ilo jaat eo jekar ejaake ilo bun̄tōn 4 (lale appendix eo n̄an juon waanjon̄ok in juon jaat). Jej kadeļon̄ raan/allōn̄/iiō in kajojo kōkkeitaak, kajim̧we ko jekar kōm̧m̧ane, im tōprak ko. Innem jej kōnono kake tōprak ko ippen ribōk eddo ro ad. Jej kile bwe jej kajjieon̄ in kōm̧m̧an aolep men jemaron̄ in pād ilo aņōm̧m̧an ippen armej ro ilo laajrak ko ad. Jekar kadedeļo̧k ijo em̧m̧antata ad n̄an kōm̧m̧an men ko rejim̧we, im jemaron̄ lōke Irooj n̄an kōmour ta eo jejjab maron̄ in kōm̧our e. Aeņōm̧m̧an ej itok kōn jemdo̧o̧n ko ad ippen Irooj. Armej ro jet ewōr aer anemkwoj in kālet n̄an uaak āinwōt rej kōņaan.

Kile kōjeraam̧m̧an ko an ājmour

Ilo ad kobaik tok peran eo n̄an kōm̧m̧an kajim̧we ko, eaar kōperan n̄an etale kōjeraam̧m̧an ko jekar būki jen jerbale bun̄tōn ko n̄an jabōn in. Jej jino in kile bwe kōjeraam̧m̧an ko an ājmour eļap jen kōtmāne ko ad. Jej elmakote bwe kwōn jino juon laajrak in oktak ko ilo mour eo am̧. Erein ej jet iaan oktak ko jejeļā ilo kake ilo ad itok n̄an jabōn in ilo ājmour ko ad:

• Jej en̄jake yokwe e weepān an Anij n̄an kōj.

• Jej en̄jake lan̄lōn̄ ekāāl, m̧ōņōņō eļap, im anemkwoj ilo mour ko ad.

• Je meļeļe armej, jemdo̧o̧n ko, im wāween ko kōn juon elmakot emūlaļ ļo̧k im bōk tūriam̧o nae ro jet.

• Ewōr ippād juon tōl ekāāl im un n̄an mour ko ad.

• Jej en̄jake an mūlaļ ļo̧k in bōke im iakwe n̄an kōj make im ro jet.

• Edikļo̧k ad ļōmņake kōj im pedped eļapļo̧k ilo jerbal n̄an armej ro me rej aikuj ad jipan̄.

• Jej en̄jake an pād im kajoor Pinmuur eo ejjeļo̧k jem̧ļo̧kin an Jisōs Kraist.

• Elōn̄ļo̧k ad kōjātdikdik im tōmak n̄an ilju im jekļaj eo ad indeeo.

• Edikļo̧k ad mijake mour in im wāween ko rej waļo̧k kōn jāān.

• Jej en̄jake jeorļo̧k bōd, im jemaron̄ poojak in jeorļo̧k an ro jet bōd.

• Jej tōmak bwe kōn kajoor eo an Anij, jemaron̄ in kōm̧m̧an aolep men ko jejjab maron̄e jen kōj make.

Ekkatak im Meļeļe

Laajrakin jeje ko rekwojarjar im ennaan ko jen ritōl ro an Kabun̄ in remaron̄ jipan̄ ilo ad ājmour. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keemejmej n̄an m̧ool im alikkar ilo ad jeje n̄an bōk aolepen joortoklik eo jen menin.

Kipel ro jet n̄an em̧m̧an

“Jetōb in Irooj ej ba n̄an eō: Kwōn jiron̄ ro nejūm̧ n̄an kōm̧m̧an em̧m̧an, n̄e raab tōl būruōn elōn̄ armej n̄an ko̧kkure; kōn menin ij jiron̄ eok, nejū m̧aan, ilo mijak e Anij, bwe kwōn bōjrak jān nana kein am̧;

“Bwe kwōn oktakļo̧k n̄an Irooj kōn aolepān am̧ ļōmņak, kajoor, im maron̄; bwe kwōn jab bar tōlļo̧k būruōn kōrā kijon̄ raņ n̄an kōm̧m̧an nana; ak kwōn ro̧o̧lļo̧k n̄an er, im kwaļo̧k jirilo̧k ko am̧ im bōd eo kwaar kōm̧m̧ane” (Alma 39:12–13).

Juon iaan kaje ko rekemetak in an̄ūrlep ko ad ej bwe jemaron̄ in bōk kar kipel ro jet n̄an ejaake an̄ūrlep ko ko ippāer make.

• Wōn ilo mour eo aō Iaar kipe e ilo wāween in?

• Ekkar n̄an katak ko an Alma ilo eoon kein, Ia eo imaron̄ loe peran ie n̄an kōm̧m̧an kajim̧we ko n̄an armej rein?

Kwōn kareele, jab kipele

“Jabdewōt eo ekōņaan emaron̄ itok im bōk dān in mour ilo ejjeļo̧k wōņāān; im jabdewōt ekōņaan ejja in wōt jab kipel e n̄an itok; a ilo raan eo āliktata enaaj jepļaakļo̧k n̄an e ekkar n̄an kōm̧m̧an ko an” (Alma 42:27).

Elōn̄ un ko relukkuun kajoor n̄an jerbale bun̄tōn 9, ijoke jej aikuj in jab bōkļo̧k kōj ilo meļeļe ak riab bwe ejjeļo̧k ad kālet. Būrookraam̧ in Ājmour jān An̄ūrlep ej juon būrookraam̧ in kareel, jab kipel.

• Ij ke en̄jake kareel ak kipel n̄an kōm̧m̧an kajim̧we ko?

• Ekkar n̄an eoon in, ta jet iaan un ko imaron̄ in kareel?

M̧aanjabpopo n̄an iioon Anij.

“Ikōņaan bwe kom̧in wōnm̧aantak im jab kapene būruōmi ļo̧k wōt; bwe lo, kiiō ej iien eo im raan in lo̧mo̧o̧r eo ami; im kōn menin, eļan̄n̄e kom̧ naaj ukeļo̧k im jab kapene būruōmi, ejidimkij an naaj karōk in lo̧mo̧o̧r eļap itok n̄an kom̧.

“Bwe lo, mour in ej iien eo n̄an armej bwe ren maanjabpopo n̄an ioon Anij; aaet, lo raan eo ilo mour in ej raan eo n̄an armej bwe ren kōm̧m̧an jerbal ko aer” (Alma 34:31–32).

• Ta ko ij kōtōpraki n̄e ij kōttaik būruō im kōm̧m̧an kajjim̧we.

• Elmen aō kōņaan kōm̧m̧an kjim̧we n̄e ij loe bwe ij bareinwōt maanjabpopo n̄an iioon Anij?

M̧akūtkūt ilo Kabun̄ in

“Im [Alma eo edik im ļōmaro nejin Mosaia] raar ito-itak iaolepān, … im ilubwiljin aolep armej ro raar pād ium̧win tōl an kiin̄ Mosaia, ilo peran kijejeto n̄an kajim̧we aolep jorrāān ko raar kōm̧m̧ani n̄an kabun̄ eo, im kwaļo̧k aolep jero̧wiwi ko aer, im kajeededļo̧k aolep men ko rekar loi, im kōmmeļeļeik kanaan ko im jeje ko rekwōjarjar n̄an aolep ro raar kōm̧m̧an ron̄jake er” (Mosaia 27:35).

Kōn wōt an̄ūrlep, elōn̄ armej rekar bōjrak aer itok n̄an m̧ōnjar. Jet armej raar kōjerbal jidiklo̧k ko an ro jet n̄an kwaļo̧k jon̄an ippen doon eo ilo Mōnjar.

• Ta kar en̄jake eo aō ippen makūtkūt ko ilo Kabun̄ eo an Jisōs Kraist im Armej ro Rekwojarjar ilo Raan ko āliktata?

• Elmen an epaakeļo̧k Rilo̧mo̧o̧r kōn ājmour kar jipan̄ eō en̄jake aō bar kobaļo̧k ippen Kabun̄ eo An?

• Elmen an niknik ilo Kabun̄ in jipan̄ eō kōm̧m̧an kajim̧we ko im lukkuun ājmour?

M̧ōņōņō kōm̧m̧an oktak rejim̧we

“Kwoj aikuj bar kōrooltok jon̄an eo maron̄ e in aolepen men ko kar koote, kar kakkure, ak kar katooņe. M̧ōņōņō kōm̧m̧an oktak rejim̧we ej kein kam̧ool eo eppen n̄an Irooj me kwaar kallim̧ur n̄an kōm̧m̧an aolepen am̧ maron̄ n̄an ukweļo̧k” (Richard G. Scott, “Finding Forgiveness,” Ensign, Māe 1995, 76).

• Elmen kōm̧m̧ane kajim̧we ko bwe ren menin kam̧ool jab wōt n̄an Irooj ak bareinwōt n̄an n̄a make im ro jet bwe In kar kallim̧ur n̄an juon mour in ettā bōro im m̧ool?

Ļōmņak ko ilo būruwōd

“Eo ej ukeļo̧k im kōjparoki kien ko an Irooj naaj jeorļo̧k an bōd” [Katak im Bujen Ko 1:32).

Ilo kōm̧m̧ani kajim̧we ko, jemaron̄ jelmae armej ro me renaaj jab jeorļo̧k ad bōd. Bōlen būruweer rej pen wōt ņae kōj, ak bōlen rejjab lōke ļōmņak ko ad.

• Elmen an menin jipan̄ n̄an jeļā bwe Irooj emeļeļe m̧ool in ļōmņak eo an būruwō im bwe E enaaj bōk menin leļo̧k eo aō n̄an ukweļo̧k im kōm̧m̧an oktak rejim̧we, men̄e armej ro jet rejjab?

Ta eo Rilo̧mo̧o̧r emaron̄ kōm̧m̧ane n̄an kōj

“Armej rejjab maron̄ jeorļo̧k jerawiwi ko aer make; rejjab maron̄ karreoik er make jān kaje ko an jerawiwi ko aer. Armej rejjab maron̄ jān jerawiwi im maron̄ kōm̧m̧an jim̧we jekļaj, im kōn menin ilo an jerbal ko aer em̧m̧an im̧aan Irooj [erom] erreo kōn ļōmņak kake. Bōtaab eo enaaj kajim̧we bōd ko em̧ōj aer kōm̧m̧ane n̄an er make im n̄an ro jet, me ej āinwōt epidodo n̄an er n̄an kajim̧we kōn er make? Kōn pinmuur eo an Jisōs Kraist jerawiwi ko an eo ej ukweļo̧k renaaj kwaļi ļo̧k; men̄e rej rōbūrōrō renaaj mouj āinwōt sno. En̄in ej kallim̧ur eo kar letok n̄an kom̧” (Joseph F. Smith, ilo Conference Report, Okt. 1899, 41).

Ilo am̧ kōm̧m̧an jim̧we, lale kwaar ebweer jen ļōmņak ko einwōt, “Epen menin! Ejjeļo̧k wāween Imaron̄ kōļļāiki bōd ko Ikar kōm̧m̧ane n̄an armej in.” Mekarta emaron̄ m̧ool, ļōmņak kōn kajoor eo an Jisōs n̄an m̧adm̧ōd e men ko kwojjab maron̄ m̧dmōde. Jej aikuj lōke bwe Jisōs Kraist enaaj kōm̧m̧ane ta eo jejjab maron̄ kōm̧m̧ane.

• Ekōjkan ad kwaļo̧k n̄an Irooj ke jej lōke E? Ekōjkan aō maron̄ kōļapļo̧k lōke eo?