Bun̄tōn 10: Wōnmaanļo̧k im bōk etale eo am make, im n̄e jej bōd, mōkaj im kwaļo̧ke.

Katak eo Aorōk: Bōk Eddo Aolep Raan

Bun̄tōn 10 ej jipan̄ kōj eddekļo̧k ilo mour eo ad ekāāl ilo mour in mijeļo̧k eddekļo̧k ilo jetōb. Menin ej kōn bōk eddoin makūtkūt ko an juon armej aolep raan kōn etale an make, bōk ta eo jej loe, im mōkaj in ukweļo̧k. Jejjab weepān im naaj wōnmaanļo̧k wōt in kōm̧m̧ani bōd ko ilo mour ko ad bareinwōt ilo ad ājmour. Jet iaad wōj maron̄ inepata bwe jejjab maron̄ eddekļo̧k ilo ad ājmour mae iien jej kadedeļo̧k kajojo bun̄tōn ilo poļōman ak mour ilo ejjeļo̧k bōd. Bun̄tōn 10 ej kōjeparok kōj ņae kajoor in mour ilo weepān. Jej bar kemeemej bwe jej wōnmaanļo̧k wōt in aikuj jipan̄ eo an Irooj n̄e jej eddekļo̧k ilo ad ājmour.

Ilo Bok in Mormon eo, Alma ekar katakin bwe juon oktak in kajoor ilo bōro ej bōk tōmak ilo Pinmuur im Jerkakpeje an Kraist (lale Alma 5:14–15). Kōjerbal ļam̧ eo an Raan in Ekajet eo im leļo̧k elōn̄ waanjon̄ok in kajitōk ko jemaron̄ kajitūkin kōj make, Alma ekar bar kwaļo̧k jerbal eo aorōk an m̧ool in make-anto̧o̧ņe ilo kōppeļo̧k kōj make n̄an kajoor in pinmuur eo an Kraist. Jej maron̄ bōk pedped in katak in ilo kajitōk juon kain etale kajitōk ko me Alma eaar elmakote kōn en̄jake ko ad, ļōmņak ko, wūn ko, im tōl. Etale eo am̧ make aolep raan im an Irooj jipan̄ pinmuur emaron̄ in jipan̄ kabōjrak kōj jen jekjek ekāāl in kaarmejjete, make nepare, im nañinmej.

Jekjek in ājmour eo ekabwilōn̄lōn̄ ej kōn kōtļo̧k an Irooj ukōt ļōmņak ko ad, en̄jake ko, im bōro ko. Āinwōt juon tōprak, m̧wil ko ad renaaj oktak. Ro me emōj aer jako mokta jen kōj rekar rōjan̄ kōj n̄an mejek utiej bōro ilo aolepen jekjek eo an im n̄an bōk mōjņo̧ ko ad n̄an Jemedwōj Ilan̄. Bōk eddo aolep raan ej jipan̄ kōj kile n̄āāt eo jej aikuj jipan̄ im bōbrae kōj jān rool n̄an m̧wil ko etto.

Ekka an wōr ļōmņak in aitwerōk ko im en̄jake ko. N̄e jej inepata ak en̄jake make būrom̧ōj, inepata, ello̧taan, ļōn̄, ak mijak, jemaron̄ mōkaj in oktak ļo̧k n̄an Jemed im kajitūkin E bwe en kōjeraam̧m̧an kōj kōn aeņōm̧m̧an im ļōmņak. Jemaron̄ bar loe bwe jej dāpdep wōt n̄an tōmak ko rebōd. Jemaron̄ kajjitōk ippān Jemedwōj Ilan̄ n̄an jipan̄ kōj kōm̧m̧ane juon kijejeto em̧ool n̄an oktak. Ilo jerbale bun̄tōn 10, jekar jab bar en̄jake ad aikuj in kam̧ool bwe ejim̧we, emeļeļe, ak jekpen. Mejen kajik eo ad ej n̄an kōppeļo̧k wōt būruwōd n̄an im mije ļōmņak ko ad n̄an Rilo̧mo̧o̧r eo im An jouj.

Jej jerbale bun̄tōn 10 ilo bōke juon etale aolep raan. N̄e jej peek raan eo ad, jej jar ilo tiljek im etale makūtkūt ko ad im wūn ko rekkar: Elukkuun ke ļap ad kōm̧m̧ane ke elukkuun dik? Jej ke kabwe aikuj ko ad ilo jetōb, en̄jake, im ānbwin? Jej ke jerbal n̄an ro jet? Ewōr ke jabdewōt jekjek rej waļo̧k ilo raan eo ad me reppen akō rekamōkmōk? Jej ke aikuj jipan̄ jen ro jet n̄an kōm̧m̧ani men kein reppen? Jej ke loe jabdewōt m̧wilin etto ko akō ļōmņake jon̄n̄ok ko? Kajitōk rōt kein rejipan̄ kōj ittōn ļōmņakin mour, kakajoorļo̧k ad ājmour, im kepaake ļo̧k kōj n̄an Jisōs Kraist.

Jemaron̄ etale kōj make jabdewōt iien ilo ad bōk iien n̄an ļōmņak, lin̄n̄ūri, im mour kake bun̄tōn ko jekar ekkatak kaki. N̄e jej loe kōj make ilo juon iien jorāān, jemaron̄ kajitūkin kōj make im Anij, “Kadkad rōt eo e mōņo ilo n̄a im emōj an kāāp? Ta eo iaar kōm̧m̧ane n̄an leļo̧k n̄an būrabōļōm̧ in? Elōn̄ ke jabdewōt men Imaron̄ ba ak kōm̧m̧ane ilo ejjeļo̧k ankiliriab me enaaj tōl ļo̧k n̄an juon uwaak eo ej menin kile n̄an n̄a im armej eo juon?” Jemaron̄ bar kakemeemej kōj make, “Irooj epād ippen aolep kajoor. Inaaj leļo̧k menin n̄an E im lōke E.”

Jekdo̧o̧n n̄e jej loe ad make bōk juon makūtkūt ebōd ņae juon armej, jemaron̄ kōm̧m̧an men ko rem̧m̧an n̄e emōkaj n̄e emaron̄. Elukuun aorōk n̄an eļļo̧k jen ad juwa im likūt ņae rejet en̄jake eo ad kōn aorōkid im kemeemej in ba ilo m̧ool, “Ikar bōd” emakijkij bar aorōk ilo kōmour juon jemdo̧o̧n āinwōt ba, “Ij iakwe eok.”

Ilo lukkuun jem̧ļo̧kin juon raan, jej etale elmen aer kar kōm̧m̧an. Ejet ad kar kōm̧m̧ane? Jej ke aikuj in kapilek ippen Irooj kōn jabdewōt m̧wil ko rebōd, ļōmņak ko, ak en̄jake ko? Jemaron̄ bar kajitūkin juon eo uwan baam̧le, jerad, ribōk eddo, ak rikapilek ro jej lōke n̄an jipan̄ kōj n̄an loe men ko.

Em̧ool, jenaaj wōnmaanļo̧k wōt in kōm̧m̧ani bōd ko jekdo̧o̧n kijejeto ko ad . Ijoke bōk eddo ej juon kallim̧ur n̄an bōk eddoin bōd kein. Ilo ad etale ļōmņak ko ad im makūtkūt ko kajojo raan, ņa mejaļaer, im ukweļo̧k kōn Rilo̧mo̧o̧r eo, ļōmņak ko re bōd im en̄jake ko renaj dikļo̧k.

“Ejjeļo̧k juon men ej kanemkwoj eļapļo̧k, wōr tokjen, ak aorōkļo̧k n̄an eddekļo̧k eo ad kajojo jān ukweļo̧k eo emakijkij im ej kōm̧m̧an. Ukweļo̧k ejjab juon m̧akūtkūt; ej juon jerbal. Ej kii eo n̄an lem̧ōņōņō im aenōm̧m̧an ilo kōļmenļo̧kjeņ. N̄e kobain tōmak, ukweļo̧k ej kōppeļļo̧k ad deļo̧n̄e kajoor in Pinmuur eo an Jisōs Kraist [see 2 Nephi 9:23]” (Russell M. Nelson, “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67).

Bōk eddo kajojo raan, ak ukweļo̧k kajojo raan, ej jipan̄ kōj en̄jake lan̄lōn̄ eo im anemkwoj eo Rilo̧mo̧o̧r eo ej letok n̄an kōj. Ejako ad mour ilo ettoļo̧k jen Irooj ak ro jet. Jemaron̄ bōk kajoor eo im tōmak n̄an jelmae men ko reppen im anjo ioer. Jemaron̄ lan̄lōn̄ ilo ad eddekļo̧k im lōke bwe iminene im kijenmej renaj lale bwe wōnmaanļo̧k ājmour.

Bun̄tōn Jerbal ko

En̄in ej juon būrookraam̧ in m̧adm̧ōd. Em̧m̧anļo̧k eo ad ej pedped ioon ad mour kake bun̄tōn ko ilo mour ko ad kajjojo raan. Em̧ōj ņaetan menin “jerbale bun̄tōn ko.” Jerbal ko laajraki rej jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour in ad.

Maanjabpopo ilo jetōb n̄an kajojo raan

Juon mōttan eaorōk ilo bōk eddo kajojo raan ej n̄an peeke raan eo ad, ļoore pepe ko ad, innem bar etale elmen an men ko jerbal ilo jem̧lo̧kin raan eo. N̄e jej ijuboñ-ijuraan im kōm̧m̧ane menin, jej bōk kōjeparok jen rool likļo̧k n̄an miminene ko etto.

Elder David A. Bednar ekar kapilek kōj n̄an maanjabpopo raan eo ad ippen Irooj ilo jipon̄: Nokin in jipon̄ ewōr meļeļein ej juon men eo eaorōk ilo ejaakin kajojo raan ilo jetōb—im etal wōt im ejaake ilo kanin armej ak lukkuun raan in m̧aņm̧aņ eo” (“Pray Always,” Liahona, Nov. 2008, 41).

Ilo ad etal wōt ilo raan eo ad, jej kōjparok juon jar ilo būruwōd n̄an wōnmaanļo̧k in jipan̄ im tōl. Jet iien men ko rejjab jejjet āinwōt ad kar peeke, im jej aikuj in ekeke ṇa ireeaar im wōnmaanļo̧k wōt im kapukōt jipan̄ eo an Jemedwōj Ilan̄

Elder Bednar ekar kapilek ļo̧k kōj: “Ilo jem̧ļo̧kin raan eo ad, jej bukwelōlō bar juon alen im ripoot ļo̧k n̄an Jemed. Jej bar etale iien ko reļļap an raan eo” (“Pray Always,” 42). N̄e jej bar etal wōt ippen Irooj im bar etale raan eo ad, jej maron̄ kemeem tōprak ko ad im kile ijo jemaron̄ in kar pād ie. Jej kapilōk ippen Irooj kōn ta eo jej aikuj in kōm̧m̧ane n̄an ukweļo̧k ak kōm̧m̧an kajim̧we ko im wāween ad maron̄ kōm̧m̧an em̧m̧an ļo̧k tokālik.

Ukweļo̧k aolep raan

“Juon raan ilo juon iien” ej juon naan in jiniet me ej meļeļein mour juon iien ilo juon tōre. Jān an wōnmaanļo̧k wōt in bōk bwebwenato in ļōmak ko ad, en̄jake ko, im m̧wil ko, jej bōk juon iien em̧m̧an n̄an ukweļo̧k im epaake ļo̧k Jemedwōj Ilan̄. N̄e jej ukweļo̧k, jej loe m̧ool eo bwe ukweļo̧k ejjab juon lōmņak ekaburom̧ōj im mo̧, ak ijello̧kin ej juon en̄jake in lan̄lōn̄ im anemkwoj me jej reim̧aanļo̧k n̄an atbọkwōje.

Ilo ad ukweļo̧k kajjojo raan, jemaron̄ loe likjab ko jet ak keememej m̧akūtkūt ko tōre ko remootļo̧k bwe jeaikuj etale im, ilo jet jekjek, ukwelo̧k. Emaron̄ m̧ōttan ukweļo̧k eo ad kajjojo raan n̄an bar mije bun̄tōn ko ļo̧k me kar ejaake n̄an joļo̧k likjab ko ad im kōm̧m̧an kajjim̧we. Bar lale ippen ribōk eddo ro ad ta eo jekar kōm̧m̧ane jen kijejeto ko ad n̄an ukweļo̧k aolep raan me emaron̄ in kalikkare ewōr ta jemaron̄ aikuj kōm̧m̧ane n̄an lukkuun ukweļo̧k. Jemaron̄ bareinwōt aikuj in kwaļo̧k m̧ool in bōro n̄an ritōl an priesthood ekkar.

Būreejtōn Russell M. Nelson ej rōjan̄ kōj n̄an “En̄jake kajoor in kajoorļo̧k eo an ukweļo̧k aolep raan—jān kōm̧m̧an im maron̄ kōm̧m̧an em̧m̧anļo̧k jidik kajjojo raan” (“Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67). Ilo ad kōttāik kōj make im kajjieon̄ in m̧ool kajojo raan, jej eddekļo̧k im epaakeļo̧k Rilo̧mo̧o̧r. Rilo̧mo̧o̧r ekar katakin rikaļoor ran An, “Eļan̄n̄e jabdewōt armej e kōņaan ļoor eō, en make kaarmejjete, im kotak an debwāāl raan otemjej, im ļoor eō” (Luke 9:23). Ukweļok im kotak debwāāl n̄an ļoor Rilo̧mo̧o̧r kajojo raan ej kepooj kōj n̄an bun̄tōn 11.

Ekkatak im Meļeļe

Eoon im enaan kein laajraki jān ritōl ro an Kabun̄ remaron̄ jipan̄ kōj ilo ājmour eo ad. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keemejmej n̄an m̧ool im alikkar ilo ad jeje n̄an bōk aolepen joortoklik eo jen menin.

Lale ļōmņak ko ad, naan ko ad, im kōm̧m̧an ko ad.

“Bwe eļan̄n̄e kom̧ij jab lale kom̧ make, im ļōmņak ko ami, im naan ko ami, im kōm̧m̧an ko ami, im pokake kien ko an Anij, im wōnm̧aanļo̧k ilo tōmak kōn ta kom̧ ar ron̄ kōn itok eo an Irooj, em̧ool n̄an jem̧ļo̧kin mour ko ami, kom̧ aikuj mej. Im kiiō, O armej, keememej, im jab mej.” (Mosaia 4:30).

Emaron̄ in kauwōtata ak kaamijak eļan̄n̄e jejjab lale ta eo jekar kōm̧m̧ane ke jej ettōr kōn juon wa. Jeje kōn am̧ jeļā make ekōl

• Elmen an etale make jipan̄ eō bōbrae eō

Ettā bōro im jeļā make tōlarōke

“Em̧ōņōņō ro rej kōttāik er make ijjab kar kipel er n̄an kōttāik er.” (Alma 32:16).

Mōņōņō in joļo̧k ļōmņak ko rebōd mokta jān aer oktak n̄an m̧wil eo emetak ej juon wāween kōttāik kōj make im ijelo̧kin kipel kōj. Jeiki kōņaan ko am n̄an kōttāik eok make. Ekkatak kake juon raan kōn joļo̧k lōmņak ko rebōd.

• Ta kōjeraam̧m̧an ko rej itok n̄an ippa?

Mour ilo kiiō.

“Ļapļo̧k in an meletlet juon armij, ļapļo̧k in an naaj kappukot kōjeraam̧m̧an ko an ukweļo̧k, im ļapļo̧k in an ikutkut in kajjieon̄ kanemkwoj e make jān jerawiwi ilo an likjab ilo ankilaan kwojarjar. … Ej laajrak wōt ke jerawiwi ko an ro rej mijak Anij im re jim̧we rej wōnm̧anļo̧k wōt im bōk jeorļo̧k bōd kōnke rej ukweļo̧k im kappukot Irooj aolep raan im aolep awa” (Bruce R. McConkie, Doctrinal New Testament Commentary [1973], 3:342–43).

Juon iaan jeraam̧m̧an ko rej waļo̧k—ilo kōļmenļo̧kjen, en̄jake, im ilo jetōb—an mour kōn pedped ko kōmeļeļeik ilo bun̄tōn in ej bwe jej ekkatak mour ilo tōrein.

• Ekōjkan an bun̄tōn 10 jipan̄ eō jelm̧ae mour juon awa ilo̧k juon n̄e emennin aikuj?

• Ekōjkan an menin jipan̄ eō jeļā bwe ij aikuj in mour kake pedped in katak ko juōn wōt katten ilo juon iien?

Wōnmaanļo̧k in ukweļo̧k im jeorļo̧k bōd

“A jon̄an emmakijkij in aer ukweļo̧k im kappukot jeorļo̧k bōd, kōn jibadbad em̧ool, kar jeorļo̧k aer bōd” (Moronai 6:8).

Jeļā bwe Irooj ej kōņaan jeorļo̧k ad bōd n̄e emakijkij ad ukweļo̧k kōn jibadbad em̧ool, emaron̄ letok n̄an kōj peran n̄an bar kajjieon̄ kajojo raan jej likjab.

• Ta meļeļein menin n̄an n̄a n̄an ukweļo̧k im kappukt jeorļo̧k bōd kōn jibadbad em̧ool?

Kijenmej

“Im kiiō ikōņaan bwe kom̧in ettā bōro, im jeļā nae im jouj; im niknik ilo kōjparok kien ko an Anij ilo iien otemjeļo̧k.” (Alma 7:23).

Jabdewōt eo ekar kōm̧m̧ane kōnono in etto eo “Ekkata ej kōm̧m̧an wānōk” jab ba ewi jon̄an kijenmej eo bōke n̄an kaminene. Ilo ad kijenmej im wōnmaanļo̧k in kōm̧m̧an kajim̧we aolep raan im bōk etale ko aolep raan, jenaaj eddekļo̧k ilo iaļ in ad n̄an ājmour.

• Elmen an etale ko lukkuun kōm̧m̧an kajim̧we aolep raan bwe in naaj wōnmaanļo̧k wōt ilo aō ettā bōro im eddekļo̧k ilo jetōb?

• Elmen an bōk juon etale ilo aolep jemļo̧k in kajojo raan jipan̄ kar eō anjo jen men eo ekkā dāpdep ie n̄an illu ak en̄jake ko jet rekemetak?

Em̧m̧anļo̧k an mour

“Ij en̄jake wōt n̄an rōjan̄ Armej ro Rekwojarjar ilo Raan-ko Āliktata kōn aorōkin jipan̄ eo an pedped in katak ko an Gospel eo ilo mour ko ad, tōl im naan ko im aolep men ko jej kōm̧m̧ani; im ej aikuji juon dipio in em̧m̧aan, aolepen mour n̄an weepen n̄an maron̄ itok n̄an jeļāļo̧kjeņ kōn m̧ool eo epād ilo Jisōs Kraist” (Discourses of Brigham Young, sel. John A. Widtsoe [1954], 11).

Bōk bun̄tōn kein emaron̄ in letok juon āinwōt juon “jipan̄” an pedped in katak ko an gospel.

• Ekōjkan m̧ōņōņō in etale eo aō make kajjojo raan ilo aolep jekjek (m̧akūtkūt, naan, kōļmenļo̧kjen, en̄jake, im tōmak ko) jipan̄ eo wūjlepļo̧k n̄a make n̄an em̧m̧anļo̧k ko an mour?