Bun̄tōn 11: Kappukote ilo jar im kājekļo̧kjeņ n̄an jeļā ankilaan Irooj im n̄an bōk kajoor n̄an bōkļo̧ke.

Katak eo Aorōk: Revelesōn an Juon Make

Bun̄tōn 11: jej kōm̧m̧ane juon kallim̧ur aolep raan n̄an kapukōt n̄an jeļā ankilaan Irooj im jar n̄an bōk kajoor n̄an bōkļo̧ke. Jej loe bwe Anij ej kōņaan ekōnono n̄an kōjbwe jen maron̄ ekkatak wāween ron̄jake E. Būreejtōn Russell M. Nelson eaar ba: “Anij ej ke kōņaan kōnono n̄an eok? Aaet!” “Revelesōn n̄an Kabun̄ eo, Revelesōn n̄an Mour ko Ad,” Liaona, Māe 2018, 95). Unin bun̄tōn in ej n̄an kōkm̧anm̧anļo̧k ad maron̄ ron̄jake Jisōs Kraist, bōk revelesōn an juon make, im bōk kajoor eo n̄an tōl mour ko ad. Ikideelel in n̄an revelesōn an juon make ej pād ilo keidi ļo̧k n̄an an̄ūr ko jej en̄jake n̄e jekar jebwābwe jān an̄ūrlep ko ad.

Ilo tōre ko remootļo̧k jej ļōm̧ņak kōjātdikdik, lan̄lōn̄, aenōm̧m̧an, im kakūrm̧ool remaron̄ in itok jen kein jipan̄ ko an laļ in ko einwōt arko̧o̧ļ, uno ko rekajoor, ļōn̄, im kakkan ko rejjab em̧m̧an, ak m̧wil ko jet rekapopo. Jon̄ok eo ad eaar joļo̧k en̄jake ko renana jen eoron̄ e an̄ūrlep ko ad. Jet iaad raar kajjieon̄ in kanne ijo ejjeļo̧k kobban ilo mour ko ad kōn jabdewōt ijello̧kin Anij. Aolep iien jej loe bwe jabdewōt men ko re jim̧we jen an̄ūrlep ko ad rej an jidik wōt iien, riab in uwaak me rej kōm̧m̧an ad ejjeļo̧k kobban.

Kappukot revelesōn an juon make ej juon bun̄tōn eaorōk ilo tōpar āliktata ājmour. Būreejtōn Nelson ekar ba: “Ij rōjan̄ kom̧ bwe kom̧in kōkankanļo̧k maron̄ in jetōb eo ami kiiō n̄an bōk revelesōn ko ami make, bwe Irooj ekar kallim̧ur bwe “eļan̄n̄e kom̧ naaj [kappukot], kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ, bwe kom̧in maron̄ jeļā mennin ittino ko im mennin aenōm̧m̧an ko—men ko rej bōktok m̧ōņōņō, men eo ej bōktok mour indeeo’ [Katak im Bujen Ko 42:61]” (“Revelesōn n̄an Kabun̄ eo, Revelesōn n̄an Mour ko Ad,” 95).

Emōj ad jino kam̧m̧oolol kōn aikuj ko ad n̄an Rilo̧mo̧o̧r, Jisōs Kraist, im meļeļe kōn eddo eo An ilo mour ko ad. Elōn̄ iaad jekar en̄jake wūpeḷ im jab kar kaminene ke jej jar, ak jej jino in jar n̄an Jemed ilo etan Jisōs Kraist kōn juon jemdo̧o̧n epaake E. Jejeļā bwe jemaron̄ kōm̧m̧an eļap Ippān jen ad jab bar pād Ippān. Jej jino ekkatak im jeļā bwe ājmour ejab pedped wōt ioon an̄ūrlep ak jeļāļo̧kjeņ; ej jepooļe an karuwainene tok tōl eo an Irooj n̄an aolep mwian̄ōn mour ko ad.

Jar, kājekļo̧kjeņ, im ekkatak jeje ko rekwojarjar raorōk ilo itok n̄an Kraist. Rej maron̄ jipan̄ kōj ron̄ anikien E im bōk kajoor n̄an tilmaake kōņaan eo An. Jej kajjieon̄ in jar ilo ettā bōro, jeļā bwe jej pedped ion tōl eo ekwojarjar an Irooj im kajoor. Jej bōjrak jidik im kājekļo̧kjeņ aolepen raan eo, kajjieon̄ in kalur bōklōkōt ko ad im ron̄jake anikien eo edik. Jej ekkatak jeje ko rekwojarjar eļap tata Bok in Mormon, kōnke rej kam̧ool kōn ankilaan Irooj n̄an letok n̄an kōj tōl im kajoor. Ilo ad kōm̧m̧ani men kein, jej en̄jake revelesōn an juon make im bōk kōjeraam̧m̧an ko “iienotemjej [bōk] Jetōb eo An en maron̄ pād [ippād]” n̄an tōl, im kaenōm̧m̧an kōj (Moronai 4:3).

N̄an elōn̄ iaad, pepe eo kōn bōk revelesōn an juon make eaar pen kōnke jekar ļōmņak jejjab erreo n̄an bōk iakwe an Anij. Ilo an̄ūrlep ko ad, jej juon wōt iaan ļōmņak bwe Jemedwōj Ilan̄ im Jisōs Kraist rejjab kea in kōnono ippād ak jekar joļo̧k jim̧we eo n̄an bōk revelesōn kōn wōt mour ko ad mokta. Jet iaad raar ļōmņak jekar jab bōk revelesōn an juon make. Jej jar ak kōjekļo̧kjeņ, im einwōt ejjeļo̧k men eaar waļo̧k. Jekar jab en̄jake jabdewōt men ak kar bōk jabdewōt uwaak ko kar kile. Ke menin ekar waļo̧k, wāween ļōmņak ko ad mokta rekar jejjedmatmat: “Anij emaron̄ jipan̄ ro jet, ak E ejjab jipan̄ n̄a.”

Elōn̄ iaad rej apan̄ wōt kōn en̄jake kein. Ak ilo ad jino ekkōl kōn iakwe im tūriam̧o eo An, tōmak kein reriab rekar pedakilkil. Lōke eo ad bwe E ej iakwe kōj ebwe n̄an kōnono ippād emaron̄ in eddōkļo̧k ilo ad bōk bun̄tōn 11 n̄an mour ko ad.

Ad jerbal ilo bun̄tōn 11 eaikuji kōj n̄an tōmak bwe E enaaj uwaak e kōj, im jemaron̄ ekkatak n̄an kile Ainikien. Emaron̄ jab mōkaj an waļo̧k ak kōn juon kabwilōn̄lōn̄ in kakōļļe jān lan̄. Ak jemaron̄ ron̄jake im maron̄ kijenmej Jemaron̄ aolep ron̄jake E ilo wāween ko re oktak. Jet iien jejjab kajju mōkaj in bōk tōl. Ejjab meļeļein ke E ejjab iakwe kōj. Ijello̧kin, ej meļeļein E ej kōņaan bwe jen ekkatak n̄an lōke E im bōk m̧ool ko E em̧ōj an litok n̄an kōj. Ad lōke E ej jipan̄ kōj m̧ōņōņō in kattar E im eddekļo̧k ilo maron̄ eo n̄an ron̄jake anikien eo An (n̄an elōn̄ ļo̧k meļeļe ko, lale Richard G. Scott, “Learning to Recognize Answers to Prayer,” Ensign, Nov. 1989, 30).

Irooj ekkā an uwaaki jar ko ad kōn ro jet. Būreejtōn Spencer W. Kimball eaar katakin: “Anij ej lo kōj, im ej lale kōj. Ekkā an kōjerbal ro jet n̄an letok aikuj ko ad” (“Small Acts of Service,” Ensign, Dec. 1974, 5). Emennin aorōk n̄an bwe jen ekkeijel ippen ro jet, eļaptata ro rej pād ilo ijoke jej bōk jiban̄ jāni. Jemaron̄ ron̄ Ainikien jen ritōl ro ad ilo Kabun̄, ro uwaan baam̧le, im ro mōttad bareinwōt jān riiti jeje ko rekwojarjar, ekkatak kōnono ko an kweilo̧k eo eļap, im ron̄jake al ko rekwojarjar. Jemaron̄ bareinwōt bōk im̧we im tōl aolep iien ilo ad pād ilo kweilo̧k ko an ājmour im jerbale bun̄tōn ko an ājmour ippen ribōk eddo ro ad.

Kōkm̧anm̧an ļo̧k ad maron̄ in kappukot im bōk revelesōn ebōk kaminene im kijenmej. “Ilo ejjeļo̧k pere, emaron̄ wōr iien n̄e kwoj en̄jake āinwōt n̄e lan̄ ko rekilōk. Ak ij kallim̧ur bwe ilo ami wōnm̧aanļo̧k im pokake, kwaļo̧k kam̧m̧oolol kōn aolep kōjeraam̧m̧an ko Irooj ej lewaj, im ilo ami kijenmej kautiej karōkan iien ko an Anij, kom̧ naaj bōk jeļāļo̧kjeņ eo im meļeļe eo kwoj pukote. Aolep kōjeraam̧m̧an ewōr ippān Irooj n̄an kom̧—barāinwōt kabwilōn̄lōn̄—naaj ļoori. En̄iin ej ta eo revelesōn an juon make enaaj kōm̧m̧ane n̄an kwe” (Russell M. Nelson, “Revelesōn n̄an Kabun̄ eo, Revelesōn n̄an Mour ko Ad,” 95–96).

Bun̄tōn Jerbal ko

En̄in ej juon būrookraam̧ in m̧adm̧ōd. Em̧m̧anļo̧k eo ad ej pedped ioon ad mour kake bun̄tōn ko ilo mour ko ad kajjojo raan. Em̧ōj ņaetan menin “jerbale bun̄tōn ko.” Jerbal ko laajraki rej jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour in ad.

Itok n̄an Kraist kōn jar, jitlo̧k, im kājekļo̧kjeņ

N̄an ro iaad me rekar en̄jake jiddik jar, naan in keperan ko an Elder Richard G. Scott: “Jab inepata kōn am̧ wūpeļ in kwaļo̧k en̄jake ko. Kōnono n̄an Jemam̧. E ej ron̄ aolep jar im uwaak ilo wāween eo An” (“Learning to Recognize Answers to Prayer,” Ensign, Nov. 1989, 31). E bar jipan̄ n̄an etale m̧ōttan in jar eo. Jej kūr Jemedwōj Ilan̄ kōn etan, kwaļo̧k n̄an E ta eo jej kam̧oolol kake, kajitōk kōn kōjeraam̧m̧an ko jej aikuj, innem ikkilōk ilo etan Jisōs Kraist. Jej bukwelōlō eļan̄n̄e jemaron̄. Jej jar, emakijkij an eļ aaj, n̄an Jemen, kappukot tōl eo An kōn Jetōn Kwojarjar (lale Rom 8:26). Ejjab mennin aorōk bwe jen kōjerbal naan ko re tōn̄al. Jemaron̄ in m̧ool im kwaļo̧k ļōmņak ko ad ilowaa n̄an Jemedwōj Ilan̄.

Elōn̄ iaad raar ekkatak n̄an mājinmuur im joļo̧k iien ilo make ļo̧k iaan n̄an katak im jar. Jej kōm̧m̧an iien n̄an jar im kājekļo̧kjeņ, ekkā ilo jibbon̄. Ilo iien in, jemaron̄ likūt Anij mokta, jen jabdewōt armej ak menotemjej ilo raan eo. Mokta jān ad ekkatak, kōjerbal jeje ko rekwojarjar im katak ko an rikanaan ro raan kein n̄an tōl kōjekļo̧kjeņ ko ad. Juon kajjitōk eim̧we emaron̄ in juon wāween eo ekajoor n̄an karuwainenetok Jetōb eo. Mokta jān ad ron̄jake būruwōd im ļōmņak ko n̄an kajjieon̄ in ron̄jake ak en̄jake E. Jej jeiki ļōmņak ko ad im en̄jake ko ilo ad jar im kājekļo̧kjeņ.

N̄e iien in eaorōk, im ejenolo̧k ej jem̧ļo̧k, jejjab bōjrak in jar. Jar ilo ikōn̄, ilo mūlaļ ko an bōro im ļōmņak, wāween dein ad ļōmņak aolepen raan eo. Jej kapilōk ippen Irooj ilo ad makūtkūt ippen ro jet, kōm̧m̧an kālet ko, im jerbale en̄jake im mālijon̄ ko. Jej wōnmaanļo̧k wōt in kapukōt Jetōb eo An bwe en pād ippād, bwe jen maron̄ bōk tōl n̄an kōm̧m̧ani men eo ejim̧we (lale Sam ko 46:1; Alma 37:36–37; 3 Nipai 20:1).

Kājekļo̧kjeņ jidik im ikōn̄

Elōn̄ iaad rej loe bwe kājekļo̧kjeņ ej jipan̄ ilo ad kappukot revelesōn im jipan̄ jān Irooj. Jej pukot juon jikin elur, ettoļo̧k jen abwilōn̄lōn̄. Būreejtōn Russell M. Nelson ekar ba, “Iien in elur ej iien ekwojarjar” (“Ta eo Jej Ekkatak im Jej Jāmin Meļo̧kļo̧ke,” Liaona, Māe 2021, 80). Emaron̄ jipan̄ pād ilo juon jekjek ejokane. Jej kemeļak ļōmņak ko ad im kakkije. Jej bōk jiddik, menowan.

Tokālik, jej ļōmņak im kājekļo̧kjeņ kōn ta aorōkin n̄an kōj im keron̄ron̄ ļōmņak ko me rej itok n̄an ļōmņak ko ad. Jej ļōmņak kōn appan̄ ko jej jelmaeiki, eļaptata ro rej pād ilo ājmour ak jemdo̧o̧n ko. Jej maron̄ ļōmņak kōn eoon ko ilo jeje ko rekwojarjar ak kōnono eo ilo kweilo̧k ko reļļap jej ekkatak kaki. Jemaron̄ ļōmņak kōn raan eo imaan im tōl eo jej aikuji. Jemaron̄ bar ļo̧o̧k e ļōmņak ko rej itok n̄an kōlmenļo̧kjeņ eo ad ilo juon bok in jeje n̄an eļapļo̧k alikkar. Ālkin iien in elur, jej wōnmaanļo̧k wōt in kappukot tōl eo an Irooj im kajoor ilo aolepen raan eo jej kajjieon̄ in “reitok n̄an [E] ilo ļōmņak otemjeļo̧k” (Katak im Bujen Ko 6:36).

Būreejtōn M. Russell Ballard ekar katakin: “Eaorōk n̄an pād wōt im ron̄jake im ļoor Jetōb eo. Epidodo ad bōk elōn̄ abwilōn̄lōn̄ ko n̄an bōk mejād, jab einwōt jabdewōt ilo bwebwenatoin laļ in. Aolep rej aikuj iien n̄an kōjekļo̧kjeņ im kōḷmānḷọkjeṇ. … Jej aolep aikuj iien n̄an kajitūkin kōj make kajitōk ko ak bōk juon iien intōpiu an juon make ippād make. Emakijkij ad lukkuun poup, im laļ in elukkuun eļaaj eppen ad ron̄ naan ko jān lan̄, ‘kom̧win pād wōt im jeļā bwe N̄a Anij’ [Sam ko 46:10]” (“Pād Wōt, im Jeļā bwe N̄a Anij” [Church Educational System devotional for young adults, Māe 4, 2014, broadcasts.ChurchofJesusChrist.org).

Ekkatak im Meļeļe

Eoon im enaan kein laajraki jān ritōl ro an Kabun̄ remaron̄ jipan̄ kōj ilo ājmour eo ad. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keemejmej n̄an m̧ool im alikkar ilo ad jeje n̄an bōk aolepen joortoklik eo jen menin.

Epaake tok Irooj

Irooj ej ba, “kepaaktok Eō im Inaaj kepaakwaj kom̧; niknik kappukot Eō im kom̧ naaj lo Eō; kajjitōk, im kom̧ naaj bōk; kaļļaļļaļ, im enaaj peļļo̧k n̄an kom̧.” (Katak im Bujen Ko 88;63).

Irooj ej kautiej kōņaan eo ad im anemkwoj in kālet eo ad. Ej kōtļo̧k ad kālet n̄an tōpare E ilo ejjeļo̧k kipel. E ej epaak tok kōj n̄e jej karuwainene E.

• Elmen aō naaj epaake E rainin?

Kwaļo̧k Kam̧m̧oolol

“Jab bōj jān jar. Ilo men ko otemjej kom̧win kam̧m̧oolol: bwe menin ej ankilaan Anij ilo Kraist Jisōs kōn kom̧. Kom̧win jab kune Jetōb Kwōjarjar” (1 Tessalonika 5:17–19).

N̄e jej kemeemej in kam̧m̧oolol kōn men ko otemjej ilo mour ko ad, bareinwōt men ko jejjab meļeļe, jenaaj maron̄ in dāpij kōkkeitaak eo ippen Anij me Paul ej ņaetan en jab jokwōd ami “[jar].” Kajjieon̄ in kam̧m̧oolol Anij ilo aolepān raan eo.

• Elmen an iminene in kam̧m̧oolol in jelet epaak eo aō n̄an Jetōb?

Kwojkwoj ioon naan ko an Kraist

“Enjeļ raņ rej kōnono kōn kajoor in Jetōb Kwōjarjar; kōn menin, rej kōnono naan ko an Kraist. Kōn menin, ij ba n̄an kom̧, kwojkwoj ioon Naan ko an Kraist.; bwe lo, naan ko an Kraist renaaj jiron̄ kom̧ aolep men ko komij aikuj kōm̧m̧an” (2 Nipai 32:3).

Ilo eoon in, Nipai ekar katakin bwe n̄e jej kwojkwoj ioon naan ko an Kraist, naan kein renaaj tōl kōj ilo aolep men ko jej aikuj jeļā im kōm̧m̧an. Pijaik elmen an Jisōs Kraist maron̄ etetal im kōnono ippam̧ aolep raan?

• Ta eo ij en̄jake n̄e ij kōjekļo̧kjeņ kōn pija in?

Bōk revelesōn ko an juon make.

“Rilo̧mo̧o̧r eaar ba, ‘I naaj ba n̄an eok ilo ļōmņak eo am im ilo būruōm̧, jān Jetōb Kwōjarjar’ (K&B 8:2, italics added). … Juon en̄jake n̄an kōļmenļo̧kjeņ elukkuun alikkar. Tipdikin naan ko remaron̄ in ron̄ ak en̄jake im jeiki āinwōt n̄e rekar kōmeļeļe tok. Juon kōkkeitaak n̄an bōro eo ej juon en̄jake eļap” (Richard G. Scott, “Helping Others to Be Spiritually Led” [address given at the Church Educational System Symposium, Aug. 11, 1998], 3–4).

Ilo ad meļeļe kōn an eddekļo̧k revelesōn an juon make, jenaaj kile eļapļo̧k an emakijkij im elōn̄ kain wāween ko reļļapļo̧k.

• Elmen aō kar bōk en̄jake ko im revelesōn jān Irooj?

“Ij ba n̄an kom̧ [men kein kar kwaļo̧k] n̄an eō jān Jetōb Kwōjarjar an Anij. Lo, iaar jitlo̧k im jar elōn̄ raan ko bwe in maron̄ jeļā men kein n̄an eō make. Im kiiō i jeļā make bwe rem̧ool; bwe Irooj Anij Eaar kwaļo̧ki n̄an eō kōn An Jetōb Kwōjarjar; im en̄in ej jitōbōn revelesōn eo ej ilo n̄a” (Alma 5:46).

Jitlo̧k ilo wāween eo Irooj ekar kapiti emaron̄ bōktok eļap kajoor me jemaon̄ in jab bōke (lale Matu 17:14–21). Ilo m̧ool, jemaron̄ jitlo̧k n̄an anjo jān an̄urlep. Aiseia ekar katakin, “E jab eñin jitlo̧k eo Iar kāālōte? n̄an jeļate korak in jero̧wiwi, jelate toon ine eo, im kōtļo̧k ro emōj kamakokoik er, im bwe komwin ruji ine otemjej ke?” (Aiseia 58:6).

• Elmen an jitlo̧k in im jar kōļapļok aō maron̄ n̄an bōk revelesōn?

“Ļōmņak eo bwe riiti jeje ko rekwojarjar emaron̄ tōl ļo̧k n̄an im̧we im revelesōn ren kōppeļo̧k kōjem eo n̄an m̧ool eo bwe jeje ko rekwojarjar ejjeļo̧k jon̄aer n̄an ta eo ej ba n̄e emōj kar jeiki ijoke ebareinwōt kobaik ta meļeļein jeje ko rekwojarjar n̄an juon eo ej riiit rainin. Mekarta, riiti jeje ko rekwojarjar emaron̄ barāinwōt tōl n̄an revelesōn eo kiiō kōn jabdewōt ta Irooj ej kōņaan kōnono n̄an eo ej riit ilo iien eo. Jejjab aikuj in kōļapļap naan n̄e jej ba bwe jeje ko rekwojarjar remaron̄ juon Urim im Thummim n̄an jipan̄ kajojo iaad wōj n̄an bōk revelesōn an juon make” (Dallin H. Oaks, “Scripture Reading and Revelation,” Ensign, Jan. 1995, 8).

Ekkatak kajin eo an jeje ko rekwojarjar ej juon men eo eļap āinwōt ekkatak juon kajin ruwamāejet. Wāween eo em̧m̧antata n̄an ekkatak ej n̄an lelōn̄ tak kōj make ie—n̄an riit im ekkatak kaki aolep raan.

• N̄āāt eo iaar bōk revelesōn jān juon eoon ilo jeje ko rekwojarjar?

Bōk kapilōk jān Irooj

“Pukot jaab n̄an kapilōk Irooj, ak n̄an bōk kapilōk jān Pein.” Bwe lo, kom̧ make jeļā bwe E ej kapilōk ilo mālōtlōt, im ilo jim̧we, im ilo eļap tūriam̧okake, ioon aolep jerbal ko An” (Jekab 4:10).

Jar ko ad remaron̄ jab weejepdik iien ko mokta kōnke jekar joļo̧k iien jaab n̄an kapilek Irooj—jiron̄ E ta eo jej kōņaan—ijello̧kin kapukōt Ankilaan kōn jokālet ko im tōl.

• Ewōr ke juon en̄jake iaar bōke kōn jar? Eļan̄n̄e āindein, eaar ke obrak kapilōk n̄an Irooj ak jen Irooj?

• Ij ke m̧ōņōņō in ron̄jake im bōk kapilōk ko An?