Bun̄ton 12: Ālkin kar bōke juon jetōbin karujruj kōn Pinmuur eo an Jisōs Kraist āinwōt juon tōprak in bōk bun̄tōn kein, jej jeere ennaan in ippen ro jet im kaminene kake pedpedin katak kein ilo aolep men jej kōm̧m̧ani.

Katak eo Aorōk: Jerbal in jipan̄

Ilo ad tōpar tok bun̄tōn 12, jej kile bwe ejjab jemļo̧k in iaļ eo ad in. Āinwōt juon tōprak in jerbale bun̄tōn kein, jej m̧ōņōņō kōn juon mour in ājmour kōn jouj im tūriam̧o eo an Anij. Jej kam̧ool bwe jerbale aolepen bun̄tōn ko juon iien ejjab bwe. Jej loe an menin lukkun aorōk n̄an wōnmaanļo̧k in jerbale bun̄tōn kein, kaminene kake pedped in katak ko ilo aolep jikin ko in mour in, im jeere naan in kōjātdikdik n̄an ro jet.

Ewōr ippād juon naan in kōjātdikdik n̄an ro jet rej appan̄ kōn an̄ūrlep im n̄an aolep armej ro rej en̄jake mālijjon̄ ko an mour in: Anij ej juon Anij in menin bwilōn̄ ko, āinwōt Eaar iienotemjej (lale Mormon 9:11, 16–19). Mour ko ad rej kam̧ool menin. Kōj wōj kajojo armej kar menin kōm̧anm̧an ekāāl kōn Pinmuur eo an Jisōs Kraist. Jemaron̄ jeere ennaan in ilo ad jerbal n̄an ro jet. Kwaļo̧k am̧ naan in kam̧ool kōn tūriam̧o eo An im An jouj ej juon iaan jerbal in jipan̄ ko raorōktata jemaron̄ leļo̧k. Būreejtōn Spencer W. Kimball ekar kakemeemej, “Juon iaan men ko raorōk jemaron̄ in kōm̧m̧ane ej n̄an kwaļo̧k ad naan in kam̧ool kōn jerbal in jipan̄, me enaaj, rool tok, kwaļo̧k eddekļo̧k ilo jetōb, kallim̧ur eļapļo̧k, im juon jon̄ok eļapļo̧k n̄an kōjeparok kien ko” (Teachings of Presidents of the Church: Spencer W. Kimball [2006], 87).

Ineek eddo ko an doon tok jān jouj im jerbal in jipan̄ ej juon m̧ōttan mour eo ad ekāāl āinwōt rikaļo̧o̧r ro an Kraist (lale Mosaia 18:8) Ikideelel eo n̄an jipan̄ ro jet ej juon tōprak ilo lukkuun piktokin karujruj an jetōb. Āinwōt ļōmaro nejin Mosaia rekar kōņaan jeere gospel eo ippen RiLeman ro ālkin oktak eo aer make, kōj bareinwōt maron̄ kōņaan jeere kōjātdikdik eo im kōmour e jekar en̄jake kōn Pinmuur eo an Kraist (lale Mosaia 28:1-4). Jemaron̄ kōņaan kōjeraam̧m̧an, jipan̄, im ļōn̄aj ro ipeļaakid. Jej jeļā m̧ool eo Kiin̄ Benjamin eaar katakin ke eaar ba, “Eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij” (Mosaia 2:17).

Juon lukkuun wāween n̄an karejar n̄an ro jet ej n̄an erom juon ribōk eddo ak n̄an katakin ro jet rekāāl n̄an jekjek in ājmour. (Juon i etale pepa eo “Choosing a Sponsor” n̄an jeļā eļapļo̧k) Jej kōjeļāik ro jet rej bōk ko̧naer jān kurup ko an ājmour jej pād ie ak ritōl ro ilo Mōnjar eo ad ijo pād bwe jen maron̄ kōņaan jipan̄ āinwōt juon ribōk eddo ak rikatakin. N̄e jej jino jeļā kōn juon armej eo im ej tariņae an̄ūrlep, jej jeere meļeļe ko kōn Būrookraam̧ in Ājmour jān An̄ūrlep. Jej ba n̄an er kōn kōjātdikdik eo n̄an ājmour kōn Rilo̧mo̧o̧r eo Jisōs Kraist, im jej karuwainene er n̄an itok im pād ilo juon kweilo̧k ippād.

Ilo kakobaba n̄an jipan̄ ro rej appan̄ kōn an̄ūrlep, jej bareinwōt jerbal ippen ro uwaan baam̧le ko aer im ro rejitōn bōro. Emakijkij an armej ippen doon n̄an jipan̄ ro rej apan̄ kōn an̄ūrlep im meļo̧klo̧k in pād ippen ro rejitōn bōro aer. Jemaron̄ koweepen im kile men ko reppen rej jelmaeiki. Jemaron̄ jeere kōjātdikdik eo me remaron̄ in oktak kake n̄an Rilo̧mo̧o̧r eo im pukōt aeņōm̧m̧an im kōmour, jekdo̧o̧n mekarta jab ro aer rejitōn bōro rej kāļet ājmour. Jemaron̄ jeere Support Guide: Help for Spouses and Family of Those in Recovery im karuwainene er n̄an pād ilo juon kweilo̧k an ripālele ro im baam̧le.

Ilo ad jerbal n̄an ro jet jen rie er ilo ājmour, jej aikuj in kōjparok n̄an jab kōtļo̧k an ro jet jino aer lukkuun pedped iood. Eddo eo ad ej n̄an rōjan̄ er n̄an kajitūkin Jemedwōj Ilan̄ im Rilo̧mo̧o̧r n̄an tōl im kajoor. Ilo kakobaba, jej aikuj rōjan̄ er n̄an kappukot jipan̄ jen ro jet. Kōjeraam̧m̧an ko reļļap rej itok jen Irooj kōn ritōl ro an Kabun̄ in, ribōk eddo ro, ro uwaan baam̧le, ro jerad, im ro jet. Jemaron̄ jeere pepa eo “Jipan̄ ilo Bōk Ājmour” ippāer, ej pād ilo appendix eo an unin tōl in.

Ilo ad kajieon̄ jipan̄ ro jet, rej maron̄ jab poojak in bōk bun̄tōn kein. Ilo ad jeere ennaan in an ājmour im kōjātdikdik kōn Rilo̧mo̧o̧r eo, jej aikuj in kijenmej im ettā bōro. Ejjeļok jikin utiej bōro ilo mour ko ad rekāāl ak jabdewōt en̄jake in utiej. Ejipan̄ kemeemej jon̄ok eo ad im wāween an Jisōs Kraist kar pinmuur e kōj kōn tūriam̧o eo An im jouj (lale Mosaia 29:20).

Ilo ad kōņaan jipan̄ ro jet, jej kajjieon̄ in dāpij wōt juon jokin wōt juon ikōtaan jeere enaan eo im wōnmaan n̄an bōki bun̄tōn kein ilo mour ko ad make. Mije eo ad eaorōk ej aikuj in pād ilo wōnmaan im bōki pedpedin katak kein an ājmour n̄an ipped make. Ad kijejeto n̄an jeere ļōmņak kein ippen ro jet enaaj wōt weejepdik āinwōt ājmour eo jej tōlarōke.

Eļan̄n̄e jej kōņaan, jenaaj loe elōn̄ iien ko rem̧m̧an n̄an jeere pedped in katak ko ilo jetōb jekar ekkatak ilo būro̧o̧kraam̧ in. Ilo ad kōjeraam̧m̧an mour ko an ro jet, mour ko ad make rej bar jeraam̧m̧an. Jej ekkatak kake pedped in katak eo Būreejtōn Ezra Taft Benson ekar katakin: “Em̧m̧aan ro im kōra ro rej leļo̧k mour ko aer n̄an Anij renaaj lo bwe E emaron̄ kōm̧m̧an eļapļo̧k ilo mour ko aer jen n̄e remaron̄e. Enaaj kam̧wilaļļo̧k m̧ōņōņō eo aer, kōļapļo̧k visōn eo aer, kōm̧ōkajļo̧k kōļmenļo̧kjeņ ko aer, kakajoorļo̧k majeļ ko, kotak jetōb ko aer, kōļapļo̧k kōjeraam̧m̧an ko aer, kōļapļo̧k iien ko aer, kaenōm̧m̧an jetōb ko aer, kalōn̄ļo̧k ro m̧ōttaer, im lutōkleplep aenōm̧m̧an. Jabdewōt eo likūt an mour ilo jerbal in jipan̄ eo an Anij enaaj lo mour indeeo” (Teachings of Presidents of the Church: Ezra Taft Benson [2014], 42–43).

Bun̄tōn Jerbal ko

En̄in ej juon būrookraam̧ in m̧adm̧ōd Em̧m̧anļo̧k eo ad ej pedped ioon ad mour kake bun̄tōn ko ilo mour ko ad kajjojo raan. Em̧ōj ņaetan menin “jerbale bun̄tōn ko.” Jerbal ko laajraki rej jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour in ad.

Jipan̄ ro jet

Juon ikdeelel n̄an jerbal ej juon lukkuun tōprak in kōmour jej en̄jake kōn Irooj. Kōn ājmour, jej en̄jake juon oktak in kajoor ilo bōro ņae kōj im ro jet (lale Alma 5:14). Būreejtōn Russell M. Nelson ekar katakin: “[Jej] m̧ool in kappukot n̄an mour kōn kien eo kein kajuon im karuo reļlap. N̄e jej iakwe Anij kōn aolepān būruwōd, E ej būruwōd n̄an em̧m̧anļo̧k-eo an ro jet ilo juon doulul eaibojooj, im ewānōk” (“Kien eo Eļap Kein Karuo,” Liaona, Nob. 2019, 97).

Mekarta, jerbal in jipan̄ ejjab iien otemjej pidodo. Men̄e jemaron̄ in kōņaan, jejjab maron̄ jerbal n̄an aolep ro rej aikuj. Jenaaj wōnmaanļo̧k wōt in aikuj tōl im kajoor jen Irooj n̄an karejar n̄an ro jet. Jemaron̄ jar kōn jipan̄ n̄an jeļā im kakilen wāween ko E enaj letok n̄an kōj n̄an jerbale. Jemaron̄ kajjitōk ro ipeļaakid kōn iien ko rem̧m̧an im aikuj ko. Jemaron̄ in ilbōk kōn an lōn̄ iien ko rem̧m̧an repojak n̄an kōj. Jerbal n̄an ro jet emaron̄ pidodo ilo ad mejen ettōn̄dikdik n̄an ro jet, ak jerbal n̄an ro jet emaron̄ bar aikuj elōn̄ ļo̧k kijejeto āinwōt jerbal ilo juon project eapan̄. Jej aikuj in jejjet ad ekajet ilo jerbal in jipan̄ eo ad n̄an bōbrae wōnmaanļo̧k jān jon̄an ad maron̄ ak kajoor.

Juon iaan wāween ko rem̧m̧an tata jemaron̄ karejar ej n̄an jeere bwebwenato in ājmour ko ad. Jemaron̄ wōnmaanļo̧k wōt in pād ilo kweilo̧k ko an ājmour im kam̧ool kōn jouj eo an im kajoor in kōmour eo an Jisōs Kraist. Ke jekar jet ro rekāāl tok, jekar bōk kōjātdikdik jān ro me raar jerbale bun̄tōn ko rej pād ilo ājmour mokta jen kōj. Ewōr kiiō juon iien em̧m̧an n̄an jeere ennaan eo kōn ājmour ilo kwaļo̧k bwebwenato ko ad. Jej bareinwōt jeere naan in kam̧ool eo ad kōn kajoor eo an Rilo̧mo̧o̧r n̄e jej pād ilo m̧ōnjar eo im ippen ro uwaan baam̧le eo ad im ro mōttad.

Bōk koņaam̧ ilo jerbal in tampeļ im jerbal in bwebwenatoon baam̧le

Juon iaan wāween ko rem̧m̧an tata jemaron̄ karejar ej kōn jerbal in tampeļ im bwebwenatoon baam̧le. Jerbal in jipan̄ in ej kōjeraam̧m̧an ro wōt raar mej, ijoke ej bareinwōt kōjeraam̧m̧an kōj. Būreejtōn Russell M. Nelson kar ba: “Ilo an jerbal an tampeļ im bwebwenatoon baam̧le ewōr an kajoor n̄an kōjeraamman ro itulik in rōn̄ōl eo, jokkun wōt juōn n̄an kōjeram̧m̧an ro remour. Ewōr juon an kajoor in kōkāāl ioon ro me rej bōk kuņaer ie” (“Generations Linked in Love,” Liahona, May 2010, 93). N̄an elōn̄ iaad wōj, jerbal in tampeļ im bwebwenatoon baam̧le ej juon mōttan eaorōk in ad ājmour.

Jet iaad remaron̄ jab en̄jake aer pojak in jerbal ilo tampeļ eo. Jemaron̄ jab en̄jake im̧we ak bar jeļā ia eo n̄an jinoe ilo jerbal in bwebwenatoon baam̧le. Ak jemaron̄ in kālet n̄an jino. Jemaron̄ loļo̧k bisop ro ad ak branch būreejtōn ro kōn ikideelel ko ad n̄an jerbal. Ikdeelel ko ad n̄an kōm̧m̧an ankilaan Irooj im wōnm̧aan ilo ad ājmour emaron̄ im̧we kōj. Jemaron̄ aikuj in kōm̧m̧an jet oktak ko ilo mour ko ad n̄an deļon̄e tam̧peļ eo. Jemaron̄ jab bar jeļā elmen kōm̧m̧ani jerbal in bwebwenatoon baam̧le, ijoke jemaron̄ kajitōk kōn jipan̄. Doulul eo an Kōrā ro im būreejtōn ro an doulul an em̧m̧aan ro remaron̄ jipan̄ kōj jeļā ia n̄an jino. Ewōr kein jipan̄ ko barāinwōt ilo online n̄an jipan̄ kōj ilo FamilySearch.org and ChurchofJesusChrist.org.

Tam̧peļ im jerbal in bwebwenatoon baam̧le rej letok kajoor im maron̄ n̄an ājmour eo ad. “Kwōnaaj jab loe wōt kōjeparok jen māllijon̄ im nan̄inmej ko an laļ in, ak kwōnaaj bar loe am̧ make kajoor—kajoor n̄an oktak, kajoor n̄an ukweļo̧k, kajoor n̄an ekkatak, kajoor n̄an kakwojarjar, im kajoor n̄an ukōt bōro ko an ro uwaan baam̧le eo am̧ n̄an ro jet kajojo im kōmour ta eo me emenin aikuj in kōmour” (Dale G. Renlund, “Family History and Temple Blessings,” Liahona, Feb. 2017, 39). Peded in katak ko ilo unin tōl in rej tōl kōj n̄an ļoore Rilo̧mo̧o̧r eo im m̧ōņōņō kake aolep kōjeraam̧m̧an ko E ear likūt n̄an kōj, eļaptata ko rej waļo̧k ilo tam̧peļ eo.

Ekkatak im Meļeļe

Eoon im enaan kein laajraki jān ritōl ro an Kabun̄ remaron̄ jipan̄ kōj ilo ājmour eo ad. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keemejmej n̄an m̧ool im alikkar ilo ad jeje n̄an bōk aolepen joortoklik eo jen menin.

Oktaktok im ājmour

“M̧ool in oktak eļapļo̧k jān baj wōr jidik jeļāļo̧kjeņ kōn pedped ko an ko̧jpeļ eo im kwaļo̧k em̧ool eļapļo̧k jān baj wōr juon naan in kam̧ool an pedped kein. … M̧ool in oktak ej meļeļe in jej jerbal ekkar n̄an ta eo jej tōmak im kōtļo̧k n̄an ejaake ‘juon oktak ekajoor ilo kōm, ak ilo būruōm̧,’ [Mosaia 5:2]. … [Mool in oktak] ebōk iien, kijejeto, im jerbal” (Bonnie L. Oscarson, “Be Ye Converted,” Liahona, Nov. 2013, 76–77).

Ilo an Irooj ukōt ļōmņak ko im en̄jake ko ad ilowaa kōn m̧ool in oktak im ājmour, jej erom̧ kein jipan̄ ko rekajoor n̄an ro jet me rej kab jinoe ilo iaļ in. Rilo̧mo̧o̧r eo eaar jiron̄ Piter, “im n̄e eṃōj aṃ bar oktak, kwōn kakajoor ro jeiōṃ im jatōṃ” (Luk 22:32).

• Elmen bōke n̄an ekkatak kake meļeļe eo an Sister Oscarson kōn m̧ool in oktak ilo ājmour?

• Ekōjkan aō en̄jake kakajoorļo̧k ro jet ilo aer ājmour jen m̧wil in an̄ūrlep?

Eļap eddekļo̧k jen bun̄tōn ko reddik

“jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.” (Katak im Bujen Ko 64:33).

• Elmen aō en̄jake n̄e ij ļōmņak in mour kōn pepdped in katak ko ilo aolepen aō mour?

• Elmen an menin jipan̄ eō jeļā bwe jerbal ko rem̧m̧an rededeļo̧k ilo bun̄tōn ko reddik?

Jeere naan in kam̧ool ko ad im kaeņōm̧m̧an ro jet

“En̄in ej aō wōj, bwe bōlen in maron̄ juon kein jerbal ilo pein Anij n̄an bōktok jān armej n̄an ukeļo̧k; im en̄in ej aō lan̄lōn̄.

“Im lo, n̄e ij lo elōn̄ iaan ro jeiū im jatū rem̧ool ilo ukeļo̧k, im rej itok n̄an Irooj aer Anij, innām aō ej obrak kōn lan̄lōn̄; innām ij keememej ta Irooj Eaar kōm̧m̧an n̄an eō, aaet, em̧ool bwe Eaar ron̄ aō jar; aaet, innām ij keememej An pein tūriam̧o kake eo ej erļo̧ke tok n̄an eō.” (Alma 29:9–10).

Em̧ōj ad jeļā bwe eaorōk menin ilo ājmour n̄an maron̄ kwaļo̧k ad naan in kam̧ool kōn pedped in katak kein.

• Elmen kwaļo̧k aō en̄jake naaj jipan̄ eō pād wōt im kajoor ilo aō ājmour?

“[Āinwōt], kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko kom̧ maron̄ pād ie, em̧ool m̧ae mej, bwe kom̧in maron̄ bōk lo̧mo̧o̧r an Anij, im bōnbōn ippān ro ilo jerkakpeje eo m̧oktata, bwe kom̧in maron̄ bōk mour indeeo—

“Kiiō ij ba n̄an kom̧, eļan̄n̄e en̄in ej ikdeelel eo an būruōmi, ta ippemi ņae peptaij ilo etan Irooj, āinwōt juon rikam̧ool im̧aan mejān ke em̧ōj ami kar deļo̧n̄e juon bujen Ippān, bwe kom̧ naaj jerbal n̄an E im kōjparok kien ko An, bwe E en maron̄ lutōkleplep eļapļo̧k Jetōb eo An ioomi?” (Mosaia 18:9–10).

En̄jake eo am̧ kōn an̄ūrlep ej jipan̄ eok meļeļe im kwaļo̧k ro rej apan̄ kōn an̄ūrlep; en̄jake eo am̧ ilo ājmour ejipan̄ eok kaeņōm̧m̧an er.

• Elmen an kōņaan eo aō n̄an jutak einwōt juon rikam̧ool an Anij kar ļapļo̧k ke ikar ļoori bun̄tōn ko an ājmour?

Karejar men̄e jab wānōk

“Ijjeļo̧kin ilo jekjek eo an Eo Nejin Emake Wōt, armej ro rejjab wānōk ren an Anij me ej aikuj jerbal ippāer” (Jeffrey R. Holland, “Lord, I Believe,” Liahona, May 2013, 94).

“Ejjeļo̧k iaad ewānōk mour ko ad ak baam̧le ko ad rōwānōk; ijeļā bar n̄a. Ilo ad kappukot n̄an meļeļe ro jet ro raar bar ioon apan̄ ko im jab wānōk ko, emaron̄ jipan̄ er en̄jake bwe rejjab make ļo̧k ilo apan̄ ko aer. Kajjojo raikuj en̄jake ke rej lukkuun kōm̧m̧an kobatok im rej aikuj ilo ānbwin Kraist” (J. Anette Dennis, “Bwe Aō Ine Ej Eṃṃan, im Men eo Ij Ineke E Mera,” Liaona, Nob. 2022, 81).

Jet iien jej ļōmņak eļan̄n̄e jekar poojak in kwaļo̧k ājmour ippen ro jet kōnke jekar jab weepen ilo kaminene kōn pedeped in kata kein.

• Elmen kar jeļā bwe Rilo̧mo̧o̧r eo ej jerbal kōn armej jab wānōk n̄an jipan̄ eō kaļapļo̧k aō kōņaan jeere en̄jake eo aō kōn ājmour?

Kajoor an Anij n̄an Lo̧mo̧o̧r

“Bwe I jab jook kōn gospel, bwe ej kajoor an Anij ñan lọmọọr ippān ro otemjej rej tōmak” (Rom 1:16).

• Ta ļōmņak ko aō im en̄jake ko ad ke ij reilik ļo̧k n̄an oktak eo aō ilo jetōb kōn jerbal in ājmour eo?

• Ij ke m̧akoko im āliklik in kwaļo̧k en̄jake eo aō ilo ājmour? Eļan̄n̄e āindein, etke?

“Etal ilo iaļ eo am ijoko jabdewōt Inaaj ba, im naaj lewōj e n̄an eok jān Rikaenōm̧m̧an ta eo kwo naaj ba im ia kwo naaj ilo̧k ie.

“Jar iien otemjej, n̄e kwo ab deļo̧n̄ ilo kapo im m̧wijkōk jān men eo woņeam̧.

“Kwōn niknik n̄an jem̧ļo̧k in, im lo, Ij pād ippam̧. Naan kein rej jab jān armej im jab jān armej raņ, ak jān N̄a, em̧ool Jisōs Kraist, am Ripinmuur, jān ankilaan Jemān” (Katak im Bujen Ko 31:11–13).

Jeje ko rekwojarjar re obrak kōn unin tōl n̄an jipan̄ kōj dāpij juon iaļan mour ilo jetōb me enaaj tōl kōj ļo̧k n̄an Anij.

• Ta unin tōl eo ij loe ilo eoon kein?