Bun̄tōn 7: Ettā bōro ilo kajitūkin Jemedwōj Ilan̄ bwe en joļo̧k mōjņo̧ ko ad.

Katak eo Aorōk: Ettā

Aolepen bun̄tōn ko mokta ļo̧k rekar kepooj kōj n̄an bun̄tōn in. Bun̄tōn 1 ekar jipan̄ kōj n̄an maron̄ ettā im meļeļe bwe ejjeļo̧k ad kajoor ioon an̄ūrlep ko. Bun̄tōn 2 im 3 rekar jipan̄ kōj bōk eļap tōmak im lōke ilo Irooj n̄an kajjitōk jipan̄ Ippān. Etale ko ad jān bun̄tōn 4 rekar jipan̄ kōj loe kadkad im m̧wil ko ad. Jerbale bun̄tōn 5 ej kwaļo̧k ad peran n̄an m̧ool ippen Anij, ippād make, im bar juon armej. Bun̄tōn 6: ekar jipan̄ kōj poojak im m̧ōņōņō in joļo̧k aolep kadkadin mōjņo ko ad. Jej kiiō pojak in bōk bun̄tōn 7. Jej mije wōt “WĀWEEN” jerbale kajjojo bun̄tōn: ettā bōro, m̧ōņōņō in bōk pepe, im em̧ōņōņō.

Aolep bun̄tōn ko rej aikuji ettā bōro, akō bun̄tōn 7 eļapļo̧k aikuji ie: “Ettā bōro ilo kajitūkin Jemedwōj Ilan̄ bwe en joļo̧k mōjņo̧ ko ad.” Ilo ad mokta jerbale jejjo bun̄tōn ko ilo ājmour, jej ekkatak im jeļā bwe jekdo̧o̧n ewi jon̄an ad kate kōj, jeban oktak ak loe ājmour ijello̧kin jipan̄ eo an Irooj. Bun̄tōn in ejjab oktak. True to the Faith ej kōmeļeļeik ettā bōro āinwōt in: “N̄an erom ettā bōro ej n̄an kile kam̧m̧oolol eo am̧ kōn am̧ pedped wōt ioon Irooj—n̄an meļeļe bwe ewōr am̧ aikuj n̄an jipan̄ eo An” (True to the Faith: A Gospel Reference [2004], 86).

Jet iaad wōj rej jino in kōm̧m̧ane men ko kar mokta im kajjieon̄ in oktak ippād make. Ak n̄e jej kile bōd ko ad re lōn̄ im mōjņo ko, jejeļā bwe jej aikuj in pedped ioon Irooj kōn jipan̄ eo An n̄an oktak. Ilo jerbale bun̄tōn 7, jekar jab jekpen jān jerbal eo me kar ad n̄an kōm̧m̧ane. Jekar aikuj in kijenmej im “bun̄ m̧aanļo̧k kōn dim ilo Kraist” (2 Nipai 31:20). Jekar aikuj in tōt wōt im bar kakemejmej kōj n̄an oktak n̄an Anij im kajitōk jipan̄ eo An.

Jekar bwilōn̄ kōn elmen an kabwilōn̄lōn̄ kein maron̄ waļo̧k n̄an kōj. Epidodo n̄an kajojo iaad, ak ej juon kajin eo me makijkij ilubwiljin armej. Ejeja an armej ioon pok im oktak ko rejidimkij n̄an kadkad eo aer; jidik illọk jidik in bun̄tōn 6 im 7 ekkā aer itok ilo wāween an Elder David A. Bednar kōmeļeļeik:

“Kōj āinwōt membōr ro an Kabun̄ in jej ļōmņak in kwaļo̧k aorōkin im kōļapļap in waļo̧k tok ko me jemaron̄ in likjab in kam̧oolol kaki im bareinwōt in jeļā iminene in jon̄n̄ok eo Jetōb Kwojarjar eaar katōprake jerbal eo An, … [kōn] jidik in men ko an jetōb rekabwilōn̄lōn̄” (“The Spirit of Revelation,” Liahona, May 2011, 88).

N̄e jej kālet n̄an ajeļo̧k kōj n̄an Anij im kalaajrake ankilaad n̄an An, raan ko ad rej obrak kōn iien ko reddik me E ej karuwainene kōj n̄an bōjrak jen mininene ko n̄an kōm̧m̧ani men ko im ijello̧kin pepdped ion kajoor eo An n̄an jipan̄, kotake, im iakwe. Sister Rebecca L. Craven ekar katakin: “Jab ebweer. Oktak ej juon jerbal eo ebōk iien. … Ilo apan̄ ko n̄an oktak, Irooj ej kijenmej ippād” (“Dāpij Oktak eo,” Liaona, Nob. 2020, 59).

Men̄e an̄ūrlep ko ad rej n̄an arko̧o̧ļ, uno ko rekajoor, kāāmbōļ, mōm ilo kanniōk, make-kakure jān m̧ōn̄ā ko kijen, jaje bōjrak jān joļo̧k jāān, ak m̧wilin an̄ūrlep ko jet ak men ko me jekar wōnmaan kaki ippen jon̄an ājmour ilo mour in, Rilo̧mo̧o̧r enaaj “jipan̄ [kōj] ekkar n̄an mōn̄ņo̧ ko” [ad] (Alma 7:12). Ilo ad jino kōņaan oktak jān itok n̄an Jisōs Kraist, jej en̄jake kajoor in kōmour eo An.

Ilo jerbale bun̄tōn in, elōn̄ iaad raar loe bwe jekar aikuj in tariņaeiki ad en̄jake jook. Kalimjek lok apan̄ ko ad ej bōktok en̄jake ko ekar jab bwe ad em̧m̧an kaki ak bwe jekar juon iien kar likjab kaki. Ijoke jerbale bun̄tōn ko im itok n̄an Kraist ej jipan̄ ļōmņak kake kōj ilo bar juon wāween. Jekar en̄jake iakwe eo n̄an kōj āinwōt ļaddik im leddik ro Nejin rejitōnbōro. Iakwe in ekar jipan̄ kōj tariņaik ļo̧k en̄jake in kajookok ko im būrōm̧ōj kōn juon make.

Jekar jino in loe appan̄ ko im mōjņo ko einwōt iien ko rem̧m̧an n̄an ettā bōro ilo kajitōk jipan̄ an Anij n̄an eddekļo̧k maan ļo̧k im ājmour jān an̄ūrlep.

Bun̄tōn Jerbal ko

En̄in ej juon būrookraam̧ in m̧adm̧ōd. Em̧m̧anļo̧k eo ad ej pedped ioon ad kōjerbal bun̄tōn kein ilo mour ko ad kajjojo raan. Em̧ōj ņaetan āinwōt “jerbale bun̄tōn ko.” Jerbal ko laajraki renaaj jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour eo ad.

Kajjitōk bwe Anij en kōm̧m̧ane ta eo jejjab maron̄ kōm̧m̧ane n̄an kōj make

Ekōjkan ad mour kōn bun̄tōn 7 kajjojo raan? Jej bōjrak jidik ilo juon raan ilo iien ko n̄e kōņaan ko an juon make ej bar rool tok ak n̄e jej loe ad m̧ōjņo. Ilo iien kein, jej wujlpļo̧k im ron̄jake. Jej kemeemej an ejjeļo̧k ad kajoor in ukōt kōj make, im jej lōke bwe Irooj emaron̄ ukōt kōj. Innām jej wōnmaanļo̧k ilo ad pedped Ioon. Jekar kōtļo̧k ta eo jejjab maron̄ kōm̧m̧ane, im jej kajitōk ippen Anij n̄an jipan̄ kōj.

Jitļo̧k n̄an Anij ilo jar emennin aikuj. “Kajjojo iaad ewōr ippād būrabļōm ko me jejjab maron̄ in ņa mejļāer im m̧ōjņo̧ ko me jejjab maron̄ anjo ioer n̄e jejjab jar n̄an juon jikin eutiejļo̧k an kajoor” (James E. Faust, “The Lifeline of Prayer,” Ensign, May 2002, 59).

N̄e jej jar ilo ewōr wunin im meļeļein, jemaron̄ deļo̧n̄e iakwe an Anij. N̄e jej kōtļo̧k kōj make juon iien aeņōm̧m̧an im jikin n̄an kōnono ippān Anij, jej maron̄ in kalek im kakajoorļo̧k jemdo̧o̧n eo ad ippān Anij. Jān kōjeparok juon jar ilo būruwōd, āinwōt, “Irooj, ta eo kwoj kōņaan bwe in kōm̧m̧ane?” (Jerbal 9:6) ak “Ankilaam̧ en kōm̧m̧an” (Katak im Bujen Ko 109:44), jenaaj wōnmaanļo̧k wōt im kemeemej ad pedped ioon Irooj. Iakwe eo ad n̄an Anij im An iakwe n̄an kōj enaaj jipan̄ kōj ejaake juon jemdo̧o̧n n̄an ad maron̄ leļo̧k aoleped.

Ekkatak jar ko an kwojkwoj eo

Jar ko an kwojkwoj eo rej men ko rem̧m̧an me rej kwāļo̧k ettā im unin bun̄tōn 7. Ewōr ippād juon iien em̧m̧an n̄an bōk mōttan kwojkwoj eo kajojo wiik im kōļmenļo̧kijeņ kōn naan ko an jar ko an kwojkwoj eo.

Kemij rōjan̄ riiti Moronai 4:3; 5:2 im ettā bōro ilo bōki naan kein rekwojarjar ilo ainikien eo am̧ make āinwōt: “O Anij, Jemām Indeeo, [ij] kajjitōk Ippam̧ ilo etan Nejūm̧, Jisōs Kraist, n̄an kōjeraam̧m̧an im kokwōjarjar pilawā in n̄an [jetōb eo aō] ej bōk m̧ōttan; bwe [in] maron̄ m̧ōn̄ā ilo [aō] ememej ānbwinnin Nejūm̧, im kam̧ool n̄an Kwe, O Anij, Jemām Indeeo, bwe rem̧ōņōņō in bōk [ioō] etan Nejūm̧, im keememej E iien otemjej, im kōjparok kien ko An ko Eaar liļo̧k n̄an [eō], bwe Jetōb eo An en maron̄ pād [ippa]” iien otemjej (Moronai 4:3).

N̄e jej ļōmņake jar ko an Kwojkwoj eo ilo wāween in, jej maron̄ tōpar Rilo̧mo̧o̧r eo make kōn juon bōro erub im jetōb ettā. Ilo ad ļōmņak kōn mōjņo ko ad ak jabdewōt bōd ko me jekar kōm̧m̧ani, jej maron̄ ukōt ļo̧k būruwōd n̄an E. Jemaron̄ kajjitōk Ippān n̄an jipan̄ kōj ukweļo̧k, em̧m̧anļo̧k, im n̄an bar joļo̧k apan̄ kein.

Ekkatak im Meļeļe

Eoon im enaan kein laajraki jān ritōl ro an Kabun̄ in remaron̄ jipan̄ ilo ājmour eo ad. Jemaron̄ kōjerbali n̄an kōkm̧anm̧anļo̧k mour, ekkatak, im jeje bwebwenato. Jej aikuj keememej n̄an m̧ool im alikkar ilo ad jeje n̄an bōk aolepen joortoklik eo jen menin.

An jouj ebwe.

“Im eļan̄n̄e armej rej itok n̄an Eō Inaaj kwaļo̧k n̄an er aer m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧āō; bwe eļan̄n̄e rej kōttāik er Im̧aō, im wōr aer tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄an er” (Ether 12:27).

Āinwōt kanniōk im jab weepān, jej aolep maron̄ bōk elōn̄ mōjņo̧ ko. Ilo eoon in, Irooj ej kōmeļeļeik jibadbad eo an ilo an kōtļo̧k bwe jen en̄jake mour in kanniōk im ioon m̧ōjņo ko ej n̄an jipan̄ kōj ettā. Kemeemej bwe jej kālet n̄an kōttāik kōj make.

• Ta meļeļe naan in n̄an n̄a “Aō jouj ebwe n̄an aolep armej”?

• Ewōr ke aō tōmak bwe jouj an Irooj ebwe n̄an eō?

• Ta meļeļe in n̄an kōttāik eō make im̧aan Irooj?

• Kōlaajrak jet iaan kadkad in mōjņo ko am̧. Iturin tok, kōlaajrak kajoor ko me remaron̄ in waļo̧k n̄e kwoj itok n̄an Kraist.

Kāālet n̄an ettā bōro

“Āinwōt iaar ba n̄an kom̧, kōnke kar kipel kom̧ bwe kom̧in ettā kōmij m̧ōņōņō, kom̧ij kōtmāne ke bwe rem̧ōņōņōļo̧k ro em̧ool aer kōttāik er kōnke naan eo?” (Alma 32:14).

Elōn̄ iaad jekar itok n̄an kweilo̧k kein ilo eļap aikuj; jōrrāān in an̄urlep ko ad raar im̧we kōj. Kar kipel kōj bwe jen ettā. Ijoke, ettā eo me kōmeļeļeik ilo bun̄tōn in ej an juon make pepe. En̄in ej tōprak in kālet ko ad make n̄an kōttāik kōj make.

• Elmen an en̄jake ko aō kōn ettā bōro kar oktak jān ke ikar jino ājmour?

Obrak kōn Lan̄lōn̄

“Raar kalimjek er make ilo wāween kanniōk eo aer, em̧ool dikļo̧k jān būn̄aln̄al in laļ. Im raar lam̧ōj kōn juon wōt ainikien, im ba: O Kwōn tūriam̧o, im kōjerbal bōtōktōkin pinmuur eo an Kraist bwe kōmin maron̄ bōk jeorļo̧k bōd in jero̧wiwi ko am̧, im būruōm̧ ren karreo, bwe kōmij tōmak ilo Jisōs Kraist, Nejin Anij, eo eaar kōm̧anm̧an lan̄ im laļ, im men otemjej; Eo enaaj wanlaļtak ilubwiljin ro nejin armej.

“Im ālikin men kein ke raar kōnono naan kein Jitōbōn Irooj eaar wanlaļtak ioer, im raar obrak kōn lan̄lōn̄, im raar bōk jeorļo̧k in jero̧wiwi ko aer, im kar wōr aer aenōm̧m̧an in bōklōkōt, kōnke kar tōmak eo eļap aer ilo Jisōs Kraist, eo enaaj kar itok” (Mosaia 4:2–3).

Armej ro an Kiin̄ Benjamin raar jar kain jar eo me jekar lelo̧k ke jekar kōm̧m̧ane bun̄tōn 7. Raar en̄jake aeņōm̧m̧an im lan̄lōn̄ ke Jitōbōn Irooj ekar itok ioer im leļo̧k n̄an er juon jeorļo̧kin jerawiwi ko aer.

• Ta en̄jake ko em̧ōj aō būki ke ikar en̄jake aeņōm̧m̧an im lan̄lōn̄?

• Elmen nej en̄jake menin n̄an bōk aeņōm̧m̧an im lan̄lōn̄ ilo mour eo aō kajojo raan?

Pokake kien ko

“Kom̧win pād ilo n̄a, im n̄a ilo kwe. Āinwōt ra e ban make jebar leen, eļan̄n̄e e jab pād ilo vain eo; āindein bareinwōt kom̧ bane, eļan̄n̄e kom̧ jab pād ilo n̄a.

“N̄a vain, kom̧ ra ko; Eo ej pād ilo N̄a, im N̄a ilo e, e in ej jebar elōn̄ leen, bwe n̄e kom̧ jepel jān N̄a kom̧ ban kōm̧m̧an jabdewōt. …

“Eļan̄n̄e kom̧ij kōjparok kien ko Aō, kom̧ naaj pād ilo Aō yokwe; im barāinwōt Iar kōjparok kein ko an Jema, im Ij pād ilo An yokwe.

“Men kein ij kōnono n̄an kom̧ bwe Aō lan̄lōn̄ en pād ilo kom̧, im bwe ami lan̄lōn̄ en obrak” (Jon 15:4–5, 10–11).

• Ta meļeļein n̄an n̄a bwe eļan̄n̄e Ij kōjparok kien ko an Rilo̧mo̧o̧r, “[ij] pād ilo [An] yokwe?” (eoon 10).

• Ekkar n̄an eoon kein, ta jet iaan kōjeraam̧m̧an ko kar kallim̧ūr kōn pād ilo E?

• Ekōjkan aō en̄jake kōn kōjeparok kien ko an Rilo̧mo̧o̧r?

• Ekōjkan an kōjeparok kien ko juon wāween kwaļo̧k aō iakwe n̄an Anij?

iakwe an Anij

“N̄e jej likūt Anij im̧aan, men otemjej rej loe joko jikier ak julo̧k jen mour ko ad. Iakwe eo ad n̄an Irooj enaaj kakien maron̄ ko n̄an tokjan ko ad, kajitōk ko ilo iien eo ad, itok limo ko jej pukōte, im laajrakin kōņaan ko ad” (Ezra Taft Benson, “The Great Commandment—Love the Lord,” Ensign, Māe 1988, 4).

Itok n̄an jeļā kake tūriam̧o im em̧m̧an eo an Anij eļap, jekar maron̄ jino in en̄jake iakwe eo an Anij—an Anij n̄an armej.

• Emōj ke aō kar en̄jake juon ļapļo̧k in iakwe ke ikar kōm̧m̧ani bun̄tōn ko? Eļan̄n̄e āindein, etke?

• Elmen an jerbale bun̄tōn 7 kar jipan̄ eō bar kajim̧we kōņaan ko aō im likūt Anij moktata ilo mour eo aō?

Bōk iood make et eo etan Kraist

“Im kiiō, kōnke bujen eo kom̧ ar kōm̧m̧ane naaj ān̄inn̄in kom̧ ro nejin Kraist, m̧aan ro nejin, im kōrā ro nejin; …

“…Ikōņaan bwe kom̧in bōk ioomi etan Kraist, aolep kom̧ ro raar deļo̧n̄e bujen eo ippān Anij bwe kom̧in pokake n̄an jem̧ļo̧kin mour ko ami. …

“Jabdewōt eo ej kōm̧m̧ane men in naaj lo ilo anbwijmaron̄ in pein Anij, bwe enaaj jeļā āt eo ān̄inn̄in e kake; bwe naaj ān̄inn̄ini e kōn etan Kraist” (Mosaia 5:7–9).

• Ta meļeļein n̄an naaj ān̄inn̄ini e kōn etan Kraist im n̄an pinej jenkwan E?

• Ta eo ij aikuj kōm̗m̗ane in naaj lo ilo anbwijmaron̄ in pein Anij?

• Ta eo Ij kallim̧ur n̄an kōm̧m̧ane n̄e ij peptaij im n̄e ij bōk mōttan kwojkwoj eo? (Lale Mosaia 5:7–9; 18:8–10, 13; Katak im Bujen Ko 20:77, 79.)

• Elmen aō en̄jake n̄e ij ļōmņak kōn an Rilo̧mo̧o̧r eo m̧ōņōņō in letok n̄an eō Etan ilo oktan jānij n̄an kōm̧m̧an juon bujen ippen E n̄an pokake im jerbal n̄an E, ekoba leļo̧k appan̄ ko aō?

Wujlepļo̧k mōjņo ko ad

“Juon kabun̄ ejjab aikuji kaarmejete eo an aolep men ko ejjan̄in kar bwe aer kajoor n̄an kwaļo̧k tōmak eo emenin aikuj n̄an mour im lo̧mo̧o̧r” (Lectures on Faith [1985], 69).

• Jet armej rej riiti naan ko im kōjekļo̧kjeņ kake “aolep men” kōnono kōn aolep men ko mweie. Ekōjkan wujlepļo̧k aolep mōjņo ko aō n̄an Irooj kar kaļapļo̧k aō meļeļe kōn ta meļeļein n̄an kaarmijete aolep men ko?