Kāālōt juon Ribōk eddo

Jerbal ippān juon ribōk eddo emaron̄ kōm̧ōkajļo̧k am̧ ājmour. Juon ribōk eddo emaron̄ jipan̄ eok ilo eddōkļok eo am̧ im kālet eo am̧ n̄an anjo̧ jān apan̄ ko, menin kapo ko, ak m̧wil in an̄ūrlep ko kwoj jelm̧ae. Ilo iaļaņ jibadōk in am̧ mourtak ak anjo jān an̄ūrlep, kwojjab make iaam̧; juon ribōk eddo ej juon eo me emaron̄ “m̧ōņōņō in … kaenōm̧m̧an ro rej pād ilo aikuj in aenōm̧m̧an, im n̄an jutak āinwōt rikam̧ool ro an Anij” (Mosaia 18:9). Jouj ļōmņak in jerbal ippān juon ribōk eddo ilo iien eo em̧ōkajtata.

Ta in juon Ribōk eddo?

Juon ribōk eddo ej juon eo ekar lo ājmour ilo aer jerbal bun̄tōn ko 12. Remaron̄ meļeļe apan̄ ko reijuon reiookļo̧k mourtak ak anjo jān an̄ūrlep jekdo̧o̧n n̄e remaron̄ jab jeļā kaki. Juon ribōk eddo eo ejjab meļeļein bwe emaron̄ erom̧ juon m̧ōttam̧ emmantata ak juon ritijem̧ļo̧k ilo jorāān in kōmālij. Ijjelo̧kin, eddo eo an juon ribōk eddo ej n̄an jipan̄ eok jerbale bun̄tōn ko an ājmour.

Kappukot juon ribōk eddo

Ilo Būrookraam in Ājmour jān An̄ūrlep eo an Kabun̄ in, rejjab lewaj juon am̧ ribōk eddo. Kwomaron̄ jerbal in ribōk eddo ilo juon wāween eo ejejjet en̄jake eo am̧ make, aikuj ko, im ko bōnjān . Jerbal in ribōk eddo ej juon kālet in koba maron̄ jān eok, ribōk eddo, im Irooj.

Kappukot juon eo n̄an ribōk eddo kwoj loe emaron̄ peran, ak ro jet remaron̄ jipan̄ eok. Jekjek eo em̧m̧antata n̄an kappukot juon ribōk eddo ej n̄an kobaļo̧k ilo kweilo̧k ko an ājmour. Ro ewōr ippāer ejja apan̄ kein wōt ekkā an wōr maron̄ eo eļap ippāer n̄an meļeļe im en̄jake appan̄ eo am̧. Ļōmņak kein itulaļ remaron̄ jipan̄ ilo kālet juon ribōk eddo eo ekkar:

1. Kappukot tōl ilo jetōb jān Jemedwōj Ilan̄ kōn jar im jitlo̧k kōn wōn eo emaron̄ in juon ribōk eddo n̄an kwe.

2. Ļōmņak in kālet juon eo eļap an joļo̧k iien ilo iien ilo ājmour im em̧ōj an kadedeļo̧k būn̄tōn ko 12.

3. Ron̄jake ilo an armej kwaļo̧k en̄jake ko aer ilo iien mourtak ak anjo jān an̄ūrlep im ļōmņak wōn eo kwomaron̄ ekkeijel ippāņ.

4. Ritōl ro an kurup im rikōjeikiik ro remaron̄ kwaļo̧k kajjiem̧ n̄an ro rekkar im rijibadek ro rem̧ōņōņō in jipan̄.

5. Kajjitōk ippān juon eo kwoj en̄jake ke ekkar.

6. Kwoj aikuj kāālōt juon ribōk eddo eo nememein wōt kwe (mae iien ribōk eddo eo ej juon eo nukum).

7. Ilo am̧ jinoe jerbal in n̄an oktak, emaron̄ pidodo ļōkatip eok ilo ānbwin, en̄jake, im jetōb. Kōkm̧anm̧an n̄an jab ejaaki jemjerā eo eļap am̧ pedped ioon ippān juon am̧ ribōk eddo.

8. Komaron̄ aolep iien kajjitōk ippān juon armej n̄an ribōk eddoik eok ilo juon iien ekadu. Komaron̄ ukook am̧ ribōk eddo jabdewōt iien.

Erom̧ juon ribōk eddo ewājepdik

Erom̧ juon ribōk eddo ej juon jerbal in jipan̄ eo eļap ilo am̧ kwaļo̧k en̄jake eo am̧ make, tōmak, im kōjatdikdik eo kwoj loe ilo am̧ jerbale būn̄tōn ko 12 in ājmour im bōk kōmour kōn Rilo̧mo̧o̧r Jisōs Kraist. Ribōk eddo ro rej kajjitōk kajjitōk ko reboktok ļōmņak, armej eo kar raar ribōk eddoiki ejeļā kōn kein jipan̄ ko, jeere jipan̄ ko kōn wāween jerbale būn̄tōn ko, im rojan̄ ro rej ribōk eddo n̄an kobaļo̧k ilo kweilo̧k ko an ājmour. Juon ribōk eddo emeļeļe bwe ro jet remaron̄ kōm̧m̧ane juon eddo ilo an juon armej ājmour ļo̧k im jāmin naaj illu eļan̄n̄e ro rej ribōk eddo er rej kappukot jipan̄ jān ro jet ak kālet n̄an ukōt ribōk eddo ro. Tulaļ ej jet pedped in katak ko n̄an erom̧ juon ribōk eddo eo ewājepdik:

1. Likūt Anij m̧oktata jān aolep men. Emakijkij in kemeemej Irooj im jipan̄ ro kwoj ribōk eddo er pedped ioon E. Kōjparok n̄an jab kōtļo̧k an ro kwoj ribōk eddo er ren jino lukkuun tar jān jon̄an aer pedped ioom̧. Eddo eo am̧ āinwōt juon ribōk eddo ej n̄an rojan̄ ro jet n̄an kajitūkin Jemedwōj Ilan̄ im Rilo̧mo̧o̧r kōn tōl im kajoor. Eddo eo am̧ ej n̄an kwaļo̧k en̄jake eo am̧ kōn tōmak im kōjatdikdik n̄an jipan̄ armej eo kwoj rie en̄jake iakwe im jipan̄ jān Anij.

2. Kwon juon eo eniknik an kobaļo̧k ilo kweilo̧k ko ikkijeen mourtak ak anjo jān an̄ūrlep. Juon ribōk eddo aikujin ļap an ped ilo ājmour n̄an juon tōre m̧okta jān an ribōk eddo juon armej (em̧ool 12 allōn̄ ak aitokļo̧k) im eniknik in bōk koņaan ilo mour kake im ekkatak kake pedped in katak ko an ājmour. Komaron̄ en̄jake eļapļo̧k eddodo ilo iien am̧ ājmour ļo̧k n̄e kwoj jino ribōk eddo e juon bar armej. Kōkm̧anm̧an n̄an jab likūt am̧ make ājmour ilo kauwōtata kōn am̧ ribōk eddo in juon bar armej. Juon ribōk eddo ej kōjerbal lale e-make im kajjitōk jipan̄ ak rie n̄e emenin aikuj.

3. Ettā Āinwōt juon ribōk eddo, eddo eo am̧ ej n̄an kōjerbal kajoor ko am̧ n̄an leļo̧k jipan̄ im tōl.

4. Kautiej anemkwoj in kāālōt eo an ro jet im kōjerbal kijenmej. Bwe en wājepdik jerbal in ribōk eddo ej itok “jān wōt jeļā ņae, jān meanwōd, jān meoeo im ettā bōro, im jān iakwe jab ankilaan riab; jān jouj, im lukkuun jeļāļo̧kjeņ” (Katak im Bujen Ko 121:41-42). Bōbrae jān kajjieon̄ in ukōt m̧wilin ro jet ilo jabdewōt wāween. Jipan̄ ro jet ļōmņake pedped in katak ko im m̧akūtkūt ko innem tokālik jipan̄ er ilo aer make kōm̧m̧ani kāālōt ko aer make. Kautiej anemkwoj in kāālōt eo aer im bōk kōjatdikdik bwe Irooj enaaj jipan̄ er ilo aer oktakļo̧k n̄an E. Armej eo kwoj jipan̄ e emaron̄ jab kijer in pojak n̄an wōnm̧aanļo̧k in eddōkļo̧k. Ļeo ak lio remaron̄ āliji m̧wil ko rejjab wāmourur ak remaron̄ rum̧wij n̄an mour kōn pedped in katak ko im iminene ko in oktak em̧ool. Juon ribōk eddo ej aikuj kijenmej ippān ro jet ilo aer wōnm̧aaļo̧k ilo iaļan jibadōk ājmour.

5. Jerbal n̄an ro jet Jerbal n̄an ro jet eaikuj in leļo̧k ilo jab kōtmene in bōk jabdewōt jān er. Juon ribōk eddo ej aikuj wōr ippān juon meļeļe eo eļap im kōņaan n̄an leļo̧k an iien im jerbal in kijejeto n̄an ro rej ribōk eddo e er. Bōbrae jān kappok nōbar, bun̄bun̄, m̧ool, ak menin nōbar ko jet ilo en̄jake jān ro kwoj ribōk eddo e er.

6. Kautiej kallim̧ūr ko am̧ make. Erom̧ juon ribōk eddo ejjab meļeļein bwe ro kwoj ribōk eddo e er aikuj in ejjeļo̧k jon̄an aer kepaak iien ko am̧ kein jipan̄ ko. Komaron̄ kōm̧m̧ane juon waanjon̄ak kōn aorōk in tōrerein ko re ājimourur ilo am̧ kakūrm̧ool kallim̧ur ko am̧ jet, ekoba ko an baam̧le eo am̧, Kabun̄ in, jerbal eo am̧, im iien ko am̧ make. Kemeemej naan in kapilōk eo kar letok ilo Mosaia 4:27: “Im lale bwe aolep men kein rej kōm̧m̧an ilo ļoļātāt im koņ; bwe e jab aikuj bwe juon armej en ettōr m̧ōkajļo̧k jān kajoor eo an.”

7. Jar. Kajjojo iien kwoj kāālet n̄an ribōk eddo e juon armej, kappukot tōl eo an Irooj n̄an jeļā eo iaan pedped in katak ko ak iminene ko renaaj ļap aer jipan̄ n̄an aikuj ko an armej. Jar ilo am̧ ļōmņaki jekjek ko n̄an jerbal, aolep iien kajjieon̄ in ļoore tōl jen Jetōb.

8. Kam̧ool kōn m̧ool eo. Kwoj maron̄ en̄jake n̄an jeere en̄jake ko n̄an kōtļo̧k bwe ro jet ren jeļā bwe komaron̄ kwaļo̧k. Kwoj maron̄ bar kwaļo̧k naan in kam̧ool kōn Rilo̧mo̧o̧r im kōn kajoor in kōmour eo An. M̧ool eo bwe Anij ej juon Anij in kabwilōn̄lōn̄ ej men eo aorōktata (lale Moronai 7:29). Kwaļo̧k am̧ naan in kam̧ool kōn tūriam̧o eo An im kōn Iakwe eo An emaron̄ juon iaan jerbal ko reaorōktata kwoj maron̄ leļo̧k.

9. Dāpij lōke. Āinwōt juon ribōk eddo, ewōr juon am̧ eddo n̄an kōjparok eņojak ko an ro jet. Dāpij etāer im men ko ilo ennojak rej pedped in katak ko ioļaptata ilo kōkajoorļo̧k maron̄ eo am̧ n̄an ribōk eddo im jipan̄ ro jet.