Kadkad In

Moktata im āliktata, jej kōņaan bwe kwon jeļā bwe ewōr kōjātdikdik n̄an ājmour jān an̄ūrlep. (“Kōj” em̧m̧aan im kōrā ro raar en̄taan jen jorāān ko rejelet an kajojo an̄ūrlep ko im kar en̄jake aitok-iien ājmour.) Emōj ad jeļā kōn eļap būrom̧ōj, ak emōj ad loe an kajoor eo an Rilo̧mo̧o̧r ukōt aolepen inepata ko ad im anjo ilo anjo ko raiboojoj. Jinoin jekar mour kōn būrom̧ōj, inepata, mijak, im mōjņo kōn illu ak kiiō en̄jake lan̄lōn̄ im aenōm̧m̧an. Emōj ad loe kabwilōn̄lōn̄ ko ilo mour ko ad make im ilo mour ko an ro jet me raar lokjak ilo an̄urlep.

Jekar kōļļaik wōneān juon jerwaane enana im en̄taan kōn an̄ūrlep ko ad. Ak Anij ekar kōjeraam̧m̧an kōj ilo ad kar bōke kajojo bun̄tōn n̄an ājmour. Jekar itok im loe kōj make einwōt ajri ro rejitōnbōro nejin Anij. Bōk juon iruj ilo jetōb, jej kajjieon̄ aolep raan n̄an kōkm̧anm̧anļo̧k jemdo̧o̧n ko ad ippen Jemedwōj Ilan̄; Nejin, Jisōs Kraist; kōj make; im ro jet. Ilo kakadudu, Rilo̧mo̧o̧r ekar kōm̧m̧ane n̄an kōj bwe jān jab kōm̧m̧ane n̄an kōj make.

Jet armej rej ļōmņak an̄ūrlep ko bwe ren jet m̧wil ko renana me jemaron̄ anjo jene jān make kajoor in kōņaan. Jekar jerwaan ļōmņak im juon en̄jake in men ko jet raorōk ilo mour ko ad. Ejjeļok men eļapļo̧k jen kam̧ōņōņō en̄jake in aikuj ko ad. N̄e jej kajjieon̄ in bōjrak, jej en̄jake an ānbwin lukuun kajoor, kōļmānļo̧kijeņ, im en̄jake in kipel. Ilo ad kar leļok n̄an kipel im an̄ūrlep ko, maron̄ eo ad n̄an kōjerbal anemkwoj in kāālōt eo ad eaar jako ak dikļok. Būreejtōn Boyd K. Packer ekar katakin, “An̄ūrlep ewōr jon̄an an mwijkōk jen armej eo enaaj im kāānjeļ anemwkoj in kālet eo” (“Revelation in a Changing World,” Ensign, Nov. 1989, 14).

Jekar jino jerbal eo an ājmour jān ad ettā bōro im m̧ool, jān ad kūr n̄an Anij im ro jet n̄an jipan̄, im jān ad bōk jerbal ko kar kalaajraki ilo unin tōl in. Bun̄tōn ko 12 an ājmour raar katakin kōj ewi wāween bōke gospel eo an Jisōs Kraist n̄an mour ko ad. Būreejtōn Jeffrey R. Holland ekar ba: “Kwōj ke tariņaeik juon demon in an̄ūrlep—jepake ak uno ko rekajoor ak pile, ak … alooje pija ko rettoon? … Mekarta bun̄tōn ko jet komaron̄ in aikuj n̄an madmōd e n̄ūrbōktak kein, itok moktata n̄an gospel eo an Jisōs Kraist” (“Broken Things to Mend,” Liahona, May 2006, 70).

Bun̄tōn 1–3 ej katakin kōj wāween kōmakūtkūt tōmak ilo Jemedwōj Ilan̄ im Jisōs Kraist. Bun̄tōn 4–9 ej bōk n̄an aolepen juon jerbal in ukweļo̧k. Bun̄tōn 10–12 ej rōjan̄ kōj n̄an bōk eddo, n̄an kapukōt tōl kwojarjar im kajoor n̄an pād ilo iaļan bujen eo, n̄an kwaļok n̄an ro jet kabwilōn̄lōn̄ eo me eaar itok n̄an mour ko ad, im n̄an niknik n̄an jemļo̧kin.

Elōn̄ ro iaad me rej mour ilo ājmour rej pād wōt ilo Būrookraam̧ in Ājmour jān An̄ūrlep eo. Jej loe eļap jipan̄ ilo ad kōņaan dāpij anemkwoj in kālet eo ad jān an̄ūrlep. Im jekar jeraam̧m̧an ilo ad kapukōt n̄an jipan̄ ro jet me rej pād ilo kōmakoko n̄an an̄ūrlep. Jej pen wōt tōmak bwe jekar oktak kōn Pinmuur eo an Jisōs Kraist. Āinwōt Antai-Nipai-Liai ro ilo Bok in Mormon (lale Alma 24:17–19). jekar en̄jake kōmour im juon oktak ilo lukkuun paotok eo ad kōn jouj im kajoor an Jisōs Kraist. Jejjab kōņaan jerwaane menin letok an kōmour im oktak, innām bwe aolep raan jej kālet n̄an kemeemej pedped Ioon. Ilo ad wōnmaanļo̧k im pād ilo būrookraam̧ in Ājmour jān An̄ūrlep eo, jej bar kakemeemej bwe an̄ūrlep ej elukuun kajoor im bwe jemaron̄ in pād ilo jekjek eo jejjab kōņaan bar bōk m̧wil in an̄ūrlep eo jab n̄an Anij eļan̄n̄e jekar meļo̧kļo̧k juon men eo aorōk kōn m̧ool kein. Kōņaan eo ad ej n̄an dāpij ta eo Anij eaar letok ilo jouj n̄an kōj.

Eļan̄n̄e kwōj en̄jake ke ewōr juon am̧ an̄ūrlep im men̄e kōņaan eo ediktata n̄an anemwkoj im kōņaan “mālejjon̄i” naan ko an Anij (Alma 32:27), jej karuwainene eok n̄an kobatok ippām ilo ekkatak im būki pedped in katak ko an Jisōs Kraist āinwōt kar katakin ilo unin tōl in. En̄jake eo ad ekar kwaļo̧k bwe eļan̄n̄e kwoj ļoor iaļ in kōn juon bōro em̧ool, kwonaaj loe kajoor eo kwoj aikuji n̄an ājmour jān an̄ūrlep. Kajoor in ej ņa etan jouj. “Jouj an Anij ej jipan̄ kōj kajjojo raan. Ej kakajoorļo̧k kōj n̄an kōm̧m̧an jerbal ko rem̧m̧an jemaron̄ jab kōm̧m̧ani ippād make” Topics and Questions, “ (Grace,” Gospel Ļaibrāre). Ilo am̧ tiljek im būki kajojo bun̄tōn kein 12, Rilo̧mo̧o̧r eo enaaj kakajoorļo̧k eok im kwonaaj itok im “jeḷā ṃool, im ṃool enaaj kōṃanṃan anemkwōjami.” (Jon 8:32).

Jej jeļā jen en̄jake ko eo ad make bwe kwonaaj anemkwoj jān an̄ūrlep. Jekdo̧o̧n ewi jon̄an jōbwābwe im ebweer komaron̄ en̄jake, kwoj juon ajri nejin juon Jemedwōj Ilan̄ eo ej iakwe. Eļen̄n̄e kwaar jab kōņaan loe m̧ool in, pedped in katak rej kōmeļeļeik ilo unin tōl in renaaj jipan̄ eok bar loe im ejaake ilo ļōmņak im en̄jake ko am̧. Pedped in katak kein remaron̄ jipan̄ eok itok n̄an Kraist im ļoore E n̄an ukōt eok. Ilo am̧ būki bun̄tōn ko, kwonaaj bōk waj kōjerbal kajoor eo an Rilo̧mo̧o̧r un E enaaj kanekwoj eok jen kōmakoko.

Ro iaad wōj ilo ājmour rej karuwainene eok kōn aolep tūriam̧o im iakwe n̄an koba tok ippām ilo juon mour in kōjādikdik, anemkwoj, im lan̄lōn̄, jepooļe ilo pein Jisōs Kraist, ad Ripinmuur. Ejja āinwōt ke jekar ājmour, komaron̄ bareinwōt ājmour im m̧ōņōņō kōn aolepen kōjeraam̧m̧an ko an gospel eo an Jisōs Kraist.

Bun̄tōn Jerbal ko

En̄in ej juon būrookraam̧ in m̧adm̧ōd. Em̧m̧anļo̧k eo ad ej pedped ioon ad mour kake bun̄tōn ko ilo mour ko ad kajjojo raan. Em̧ōj ņaetan menin “jerbale bun̄tōn ko.” Jerbal ko laajraki rej jipan̄ kōj itok n̄an Kraist im bōk tōl im kajoor eo emennin aikuj n̄an bōk bun̄tōn eo juon ilo ājmour in ad. Jouj im kemeemej in jerbal ippān ribōk eddo eo am̧.

Mije kadkad eo ad indeeo

Ke Būreejtōn Russell M. Nelson ekar kajitōk ewi wāween jipan̄ ro me rej en̄taan kōn an̄ūrlep, eaar uwaak, “Katakin er paoktok im jibadbad eo aer” (ilo Tad R. Callister, “Our Identity and Our Destiny” [Brigham Young University devotional, Aug. 14, 2012], speeches.byu.edu). Kajjojo iaad ej juon ajri nejin Anij eo ej iakwe. Jejeļā bwe E ej iakwe kōj im lukkuun kea kōn kōj.

Jekar jab aolep iien ļōmņak kōn wāween in. Elōn̄ iaad kar kipel er ke E ejako ijen. Jet iaad raar jab kea kake wāween eo. Jet iaad raar tōmak bwe Epād ijen im bwe Eaar lukuun in illu ak jab m̧ōņōņō ippād n̄an jipan̄. Enan̄in aoleped wōj, jab meļeļe kōn jemdo̧o̧n eo ad ippen Anij kar tōl ļo̧k n̄an kapukōt E im kajoor eo An n̄an jipan̄ kōj. Ijello̧kin, jekar oktak n̄an men ko rekapopo ak mwil ko n̄an jipan̄ kōj jerbale apan̄ ko an mour in. Emakijkij ad kar deļo̧n̄e jon̄ok in mwil ko. Jekar kōm̧m̧ane juon mwil ejjab ekkar, kar tōl ļo̧k n̄an en̄jake bōd im kajookok, im jen menin ebar tōl ļo̧k n̄an elōn̄ kōm̧m̧ane en̄jake kein. Meļeļe kōn kadkad eo ad im un eo āinwōt ajri ro nejin Anij kar kakjoor kōj n̄an rubi jon̄ok in mwil kein.

Jekar bareinwōt ekkatak oktak eo ikōtaan bōd im kajookok. Bōd ej juon en̄jake enana kōn juon men jekar kōm̧m̧ane, im jook en̄jake enana kōn wōn kōj. Elder David A. Bednar ekar kōmeļeļeik aorōkin wāween bōd in: “Bōd ko rejelet jetōb ko ad ej āinwōt metak ko ilo ābwinid: Bōd ej juon kōkaļļe eo ekauwōtata im juon kōtōrak jān jorrāān ko” (“We Believe in Being Chaste,” Liahona, May 2013, 44). Mokta jān ājmour, elōn̄ iaad ijello̧kin aer kar en̄jake jook, tōmak bwe juon armej ejorāān im ejjab erreo n̄an bōk iakwe eo jān Anij ak jen jabdewōt.

Mekarta, jinoin jekar itok im loe paotok eo ad ekwojarjar im kar meļeļe kōn aikuj ko ad n̄an jipan̄ eo an lan̄ n̄an ājmour jān an̄ūrlep, jekar jino loe kōj make einwōt an Jisōs Kraist loe kōj: em̧m̧aan im kōrā ro rej nan̄inmej ilo jetōb rej kajjieon̄ in bōk kōmour kōn jouj eo An im jab jān m̧aan im kōrā ro renana rej kajjieon̄ in em̧m̧m̧an n̄an bōk iakwe eo An.

Kōmij karuwainene eok n̄an kaminene tōmak bwe kwoj juon ajri nejin Anij im bwe E ej iakwe eok jekdo̧o̧n ta eo kwaar kōm̧m̧ane. Ke ej m̧ool menin bwe kālet ko renana rekar kabōjrak iien ko ad rem̧m̧an, aorōk eo ad n̄an Anij emaron̄ ban oktak. E ej iakwe kōj kōnke jej ajri ro Nejin, jab kōnke kāālōt ko ad: “Men̄e jejjab dedeļok, Anij ej iakwe kōj. Men̄e jejjab weepān, An iakwe kōj eweepān. Men̄e jemaron̄ in en̄jake jōbwābwe im ejjeļok kambōj, Iakwe an Anij ej jepooļe kōj” (Dieter F. Uchtdorf, “The Love of God,” Liahona, Nov. 2009, 22).

Jino m̧ōņōņō in bōjrak

Jekar āliktata kōņaan bōjrak n̄e metak eo an būrabōļōm̧ ej jino an nana ļo̧k jān metak eo in uwaak eo. Emōj ke am̧ tōpar jekjek eo? Eļan̄n̄e kwoj jan̄in im kwoj wōnmaanļo̧k ilo an̄ūrlep eo am̧, kwonaaj lukkuun tōpare jekjek eo kōnke an̄urlep ej juon būrabōļōm̧ eo ej eddekļo̧k. Ej juon nan̄inmej me ej kadikļo̧k an em̧m̧an ad kōjerbal maron̄ eo ad aolep raan.

Ilo jinoin, m̧ōttan men ko jej an̄uri emaron̄ pen ak kamijak n̄an kōj. Ak ilo ad wōnmaanļo̧k wōt in ron̄jake ro jet me raar lo lur im jeļāļo̧kijeņ eo jekar kōņaan n̄an kōj make, jekar jino in tōmak bwe kōj jemaron̄ bar ājmour.

Mokta jān ad maron̄ jino jerbal in ājmour eo, jekar moktata aikuj in kōņaan ājmour (lale Alma 32:27). Anemkwoj jān an̄ūrlep ej jino kōn juon kōņaan kōm̧m̧ane juon men edik. Eļan̄n̄e kōņaan eo am̧ edik im jab bwe rainin, jab ineepata. Ilo am̧ bōke im jerbale, enaaj eddekļo̧k! Jekar jeļā bwe juon iaan bun̄tōn ko rekajoor tata ej bwe jemaron̄ in bōke im jar im kajitūkin Anij bwe en kaļapļo̧k ad ikideelel in jitlo̧k kake.

Eļan̄n̄e kwoj jan̄in kar bōk juon ikideelel n̄an jino ājmour, komaron̄ kile am̧ jab kōņaan im ļōmņak bwe jon̄an am̧ an̄ūrlep. Kōlaajrak ta eo earoōk n̄an kwe. Ļōmņak kake jemdo̧o̧n eo am̧ ippān baam̧le im ro jeram, jemdo̧o̧n eo am̧ n̄an Anij, am̧ kajoor ilo jetōb, am̧ maron̄ in jipan̄ im kōjeraam̧m̧an ro jet, im ājmour eo am̧. Innem pukot oktak ko ikōtaan ta eo kwoj tōmak e ilo im kōjātdikdik kake im m̧wil eo am̧. Ļōmņake elmen an makūtkūt ko am̧ mōjņo ļo̧k. Jar n̄an Anij bwe en jipan̄ eok loe kwe make im mour eo am̧ āinwōt An loe—kōn aolepen maron̄ eo am̧ ekwojarjar—im ta eo kwoj joļo̧k ekauwōtata ilo wōnmaanļo̧k ilo an̄ūrlep eo am̧.

Kile ta eo kwaar joļo̧ke ilo kōtļo̧ke am̧ an̄ūrlep emaron̄ jipan̄ eok loe kōņaan eo n̄an bōjrak. Eļan̄n̄e komaron̄ loe men̄e juon kōņaan ediktata, kwonaj pojak in jino. Im ilo am̧ eddekļo̧k kōn bun̄tōn ko an būrookraam̧ in im loe oktak ko rej itok n̄an mour eo am̧, kōņaan ko am̧ renaaj eddekļo̧k.

Kakemeemej: Pedped wōt ioon paotok eo an an̄ūrlep eo am̧, komaron̄ aikuj in kajitōk jerbal in kōmadmōd nan̄inmej mokta jān jino ājmour eo am̧. Jouj im kōnono ippen juon eo etimjeļo̧k ilo lale nan̄inmej.

Pukot jipan̄

Iaļ in ļok n̄an ājmour im kōmour eaitok im pen, ak jejjab aikuj in make ļok iaad im kōm̧m̧ane. Mour ilo ājmour ej aikuj in lukkuun m̧ool eo. Kaarmejette, make mo̧ņe, im kōttoļo̧ke rej kōm̧m̧an an pen n̄an tōpare jemļo̧k in eddekļo̧k ilo ājmour. Ej menin aorōk n̄an ad kalaajrake jipan̄ eo an ro jet iien eo emōkaj tata. Elōn̄ armej rej kōņaan etetal ippād im jipan̄ kōj. Būreejtōn Spencer W. Kimball eaar ba: “Anij ekar kakemeemej kōj, im e ej lale kōj. Ijoke ej kōn bar juon armej me ej loe aikuj ko ad” (Teachings of Presidents of the Church: Spencer W. Kimball [2011], 82).

Kappukot jipan̄ jān Anij im ro jet ejjab letok wōt kōperan eo jej aikuji n̄an wōnmaanļo̧k wōt ilo iaļ in ak ej bareinwōt jipan̄ kōj kemeemej bwe jej aikuj jipan̄. N̄ej kwoj kajitōk jipan̄, komaron̄ jeļā dettan iakwe im aikuj eo kwoj pukōte. Elak ļapļo̧k am̧ ekkeijel ippān ro jet, eļapļo̧k iien ko rem̧man konaaj bōk n̄an iakwe im rie ilo etale im loe m̧ool in kōmour eo im ajmour eo.

Ļōmņak kōn oktakin kein jipan̄ ko rej peļļo̧k n̄an eok im ewi wāween am̧ maron̄ tōpare jipan̄. Jej elmakote kappukot im jerbal ippen juon eo ribōk eddo me eaar em̧m̧an an kar būki bun̄tōn ko 12. Juon eo ribōk eddo ejjab aikuj bwe en jittōn̄. Jej rōjan̄ eok n̄an niknik jar im ļōmņake wōn komaron̄ kajitōk bwe en am̧ ribōk eddo einwōt iien eo emōkaj tata. Juon jikin em̧m̧an n̄an pukōt juon ribōk eddo ej ilo kweilo̧k eo an ājmour. Kweilo̧k ko an ājmour rej juon jikin ejokane n̄a ad jeere im ekkatak kōn ājmour.

Kein jipan̄ ko jet ekoba ro uwaan baam̧le, ro jerad, ritōl ro an Kabun̄ in, im thereapist ro. Kein jipan̄ eo eļaptata ej Jemedwōj Ilan̄. Peeke wōn eo jej kajitūkini im n̄āāt jej kajitūkini kōn jipan̄ ej an juon armej make kāālōt. Ilo jet jekjek, emaron̄ jab jokane ak lukkuun jipan̄ n̄an kōj n̄an kwaļo̧ke ak kajitōk jipan̄ jen ro uwaan baam̧le ak ro jerad. Mekarta, eaorōk bwe jen bōk eļap jipan̄ jen elōn̄ kein jipan̄ ko n̄e emaron̄. N̄an meļeļe ko reļļapļo̧k, jouj im bar lale “Jipan̄ ilo Bōk Ājmour” jekjōn eo loe ilo appendix eo an unin tōl in.

Jemaron̄ in āliklik ak jook in kajitōk jipan̄ jān ro jet. Jemaron̄ in jab kōņaan bwe en jeļā kōn būrabōļōm̧ im jirilo̧k ko ad. Jemaron̄ in jab kōņaan bwe jen juon menin eddo ak maron̄ jab en̄jake ad kōņaan jipan̄. Ak emōj ad loe an armej jeraam̧m̧an n̄e jej kajitōk jipan̄ eo aer. Bun̄tōn 12 ej kōn jerbal in jipan̄ im jipan̄ ro jet. N̄e ro rej pād ilo ājmour rej karejar n̄an ro jet, rej bōk kajoor ilo aer make ājmour.

Ekkatak im Meļeļe

Eoon im enaan kein laajraki jān ritōl ro an Kabun̄ remaron̄ jipan̄ kōj ilo ājmour eo ad. Kōjerbal er n̄an kājekļo̧kjeņ, ekkatak, im jeje bwebwenato. Kemeemej in m̧ool im en alikkar ilo am̧ jeje.

Kadkad eo aō ekwojarjar

“Reilikļo̧k, keememej bwe kom̧ kar kwaļo̧k erreo eo ami ilo mour eo m̧okta. Kom̧ij juon ajri nejin Anij erreo, im kōn An jipan̄, kom̧ maron̄ anjo̧ ilo mālijjon̄ ko an laļ in ejerawiwi. Kom̧ kar kōm̧m̧ane menin m̧okta, im kom̧ maron̄ bar kōm̧m̧ane.

“Reim̧aanļo̧k. Jorāān ko im būroṃōj ko relukuun m̧ool, ijoke bōtaab rejjamin naaj n̄an indeeo” (Neil L. Andersen, “Ikkinejnej,” Liaona, Nob. 2018, 85; naan ko kar kobaiktok).

• Ļōmņak kōn juon men eaar waļok mokta, tariņae ta ko iaar irre ie im anjo?

• N̄āāt eo iaar bōk jipan̄ jān Irooj ilo mour eo aō?

“Ilo peļaakin Kabun̄ in ij ron̄ an elōn̄ ro rej kakkōt ilo menin: “Ejjab bwe em̧m̧an eo ilo n̄a.” ‘Eļap aō likjab.’ ‘Iban tōpar jon̄an eo.’ …

“… Āinwōt ro nejin Anij, jej jab liaakeļo̧k ak jook kōn kōj make, āinwōt n̄e jej kōm̧ad ad ilo mour in im ekōm̧m̧an bwe jen āinwōt armej eo Anij ekōņaan bwe jen erom̧. Jaab!” (Jeffrey R. Holland, “Be Ye Therefore Perfect—Eventually,” Liahona, Nov. 2017, 40).

• Elmen aō maron̄ ekkatak jān bōd ko aō ke ij kemeemej wōt aō aorōk āinwōt juon ajri nejin Anij?

• Ta ļōmņak ko aō kōn an Būreejtōn Holland kōjerbal naan eo Naaj ilo taitōļ in kōņono eo an?

Ta kadkad eo aō ippān Jisōs Kraist

“Im raar kalimjek er make ilo wāween kanniōk eo aer, em̧ool dikļo̧k jān būn̄aln̄al in laļ. Im raar lam̧ōj kōn juon wōt ainikien, im ba: O Kwōn tūriam̧o, im kōjerbal bōtōktōkin pinmuur eo an Kraist bwe kōmin maron̄ bōk jeorļo̧k bōd in jero̧wiwi ko am̧, im būruōm̧ ren karreo, bwe kōmij tōmak ilo Jisōs Kraist, Nejin Anij, eo eaar kōm̧anm̧an lan̄ im laļ, im men otemjej; Eo enaaj wanlaļtak ilubwiljin ro nejin armej” (Mosaia 4:2).

Jerbal in ājmour ej waļo̧k n̄e jej mije uwaak eo im jab būrabōļōm̧ eo. Wōr tōmak ilo Jisōs Kraist enaaj letok n̄an kōj kajoor eo im aenōm̧m̧an eo jej aikuji n̄an jelm̧ae jabdewōt ļan̄.

• Ta kadkad eo aō ippān Jisōs Kraist? Ij ke lōke E n̄an jipan̄ n̄a?

• N̄e ij kile mōjņo ko aō make, iperan ke n̄an oktak n̄an aō Rilo̧mo̧o̧r jan kajoor in pinmuur eo An? Etke ak etke ejjab? Eļan̄n̄e jab, elmen aō naaj jino?

“Jeje ko rekwojarjar rej kwaļo̧k bwe katak ko an Kraist rej āinwōt tōmak ilo E im ilo Pinmuur eo An, ukweļo̧k, peptaij, bōk menin letok eo an Jetōb Kwojarjar, im niknik n̄an jemļo̧kin [lale 2 Nipai 31].

“Pinmuur eo an Kraist ekōm̧m̧ane jekjek ko bwe jen maron̄ pedped ioon “tōlloke, im turiam̧okake, im jouj eo an Messaia eo Ekwojarjar’ [2 Nipai 2:8], ‘weepān lo [Kraist]’ [Moronai 10:32]], bōk aolep men ko rem̧m̧an, im bōk mour indeo.

“Katak ko an Kraist ilo bar juon wāween rej iaļ eo—ial eo wōt—me jemaron̄ bōk aolep kōjeraam̧m̧an ko rededeļo̧k n̄an kōj kōn Pinmuur eo an Jisōs” (Brian K. Ashton, “The Doctrine of Christ,” Liahona, Nov. 2016, 106).

• Bun̄tōn ko 12 an ājmour rej jet iien kōnono kake āinwōt “bun̄tōn ajri” kōnke rej kakobaba in bun̄tōn ko ilo jerbal in bōk katak eo an Jisōs Kraist n̄an būrabōļōm̧ in an̄ūrlep. Elmen an “bun̄tōn dikdik” kein jipan̄ n̄a būki kōjeraam̧m̧an ko an Pinmuur eo an Jisōs Kraiast?

Kōņaan eo aō n̄an bōjrak jān an̄ūrlep

“Ilo am̧ kōm̧akūti jibadbad eo am̧ jān kareel ko an laļ in, jet men ko me remaron̄ āinwōt aorōk n̄an kwe kiiō naaj makunļo̧k ilo aorōk ko aer. Kwonaaj aikuj in ba jaab n̄an jet men ko, men̄e remaron̄ āinwōt rejjab kakkure eok. Ilo am̧ jino em̧m̧akūt ilo im wōnm̧aanļo̧k ilo mour in eaitok ilo jerbal in kokwojarjar e mour eo am̧ n̄an Irooj, oktak ko ilo kōļmenļo̧kjeņ eo am̧, en̄jake ko, im kajoor ilo jetōb renaaj kabwilōn̄ eok!” (Russell M. Nelson, “Mennin Aorōk ko ilo Jetōb,” Liaona, Nob. 2019, 77)

Kallim̧ur in, kar kōm̧m̧an jān juon rikaanan Anij, ej kalaajrake oktak ko rekabwilōn̄lōn̄ remaron̄ n̄e jej ukōt mije eo ad n̄an Irooj.

• Ta jerbal ko aolep raan me inaaj būki n̄an mije Jisōs Kraist?

• Kein kamad rōt ko an laļ in me imaron̄ in ba jaab n̄ane, tōmak bwe renaaj makunļo̧k ilo aorōk.

“Im Irooj eba n̄an eō: Kwōn jab bwilōn̄ bwe aolep armej, aaet, m̧aan im kōrā, aolep laļ ko, nokwe ko, lo ko im armej, reaikuj bar ļotak; aaet, ļotak jān Anij, oktak jān jekjek in ļōn̄ im wōtlo̧k eo aer, n̄an jekjek eo ejim̧we, im bōk lo̧mo̧o̧ren jān Anij, im erom m̧aan im kōrā ro nejin” (Mosaia 27:25).

• Kōņaan eo aō n̄an oktak ej kii n̄an pimuur jān “jekjek eo enana” aō. Ewōr ke aō kōņaan bōjrak jān aō an̄ūrlep? Ij ke makoko? Eļan̄n̄e āindein, etke?

• Mōņōņō ej itok n̄e ij kājekļo̧kjeņ kōn ta eo an̄ūrlep ko aō rej kwaļo̧k n̄an n̄a im ro jet. Ta ko rej waļok jān aō an̄ūrlep?

• Ta eo ej waļo̧k n̄an ājmour eo aō

• Ta eo ej waļo̧k n̄an baam̧le eo aō? jemdo̧o̧n eo aō? maron̄ eo aō n̄an jipan̄ ro jet?

• Elmen an an̄ūrlep jelet jemdo̧o̧n eo aō ippān Anij?

Kappukot jipan̄

“Āinwōt rikaļoor ro an Kraist, jejjab kōjekdo̧o̧n men ko reppen im mellijon̄ ko ilo mour ko ad. Ekkā ad aikuj in kōm̧m̧ani men ko reppen me, eļan̄n̄e jej kajjieon̄i make iaad, enaaj ken̄taanan im bōlen pen. Ilo ad bōke kūr eo an Rilo̧mo̧o̧r n̄an ‘itok n̄an Ippa’ [Matu 11:28], Enaaj letok jipan̄, innem̧m̧an, im aenōm̧m̧an eo me remenin aikuj” (John A. McCune, “Itok n̄an Kraist—Mour āinwōt Armej ro Rekwojarjar ilo Raan ko Āliktata,” Liaona, Māe 2020, 36).

• Rilo̧mo̧o̧r eo eaar kōpooj juon jipan̄, innem̧m̧an, im aenōm̧m̧an, n̄an kōm̧m̧ane men ko reppen. Ia eo imaron̄ loe jipan̄ eo im kaenōm̧m̧an eo E eaar kallim̧ur kake?

• Ājmour ej ke einwōt ļap ak bōlen eban tōprak eļan̄n̄e ij ļōmņak in makeļok kake?

• Elmen jeļā bwe ejjeļo̧k ej ko jān ekajet ko ilo mour ko aer im bwe kōj wōj aolep aikuj jipan̄ eō joļo̧k makoko im āliklik n̄an tōpar ro jet kōn jipan̄?

• Emoj ke aō jar kōn wōn ro in kajitōk bwe ren aō ribōk eddo? Elōn̄ ke jabdewōt et ko raar itok n̄an ļōmņak e aō?

“Ejja āinwōt kōn jouj eo an Irooj me kajjojo armej, kōn tōmak ilo pinmuur eo an Jisōs Kraist im ukweļo̧k jān jerawiwi ko aer, rej bōk kajoor im jipan̄ n̄an kōm̧m̧ani jerbal ko rem̧m̧an me reban kar maron̄ kōm̧m̧ani eļan̄n̄e kar leļo̧k n̄an maron̄ ko aer make. Jouj in ej juon kajoor in jipan̄me ej kōtļo̧k bwe em̧m̧aan ro im kōrā ro ren bōk mour indeeo im mour āinwōt Anij ālkin aer kōdepakpakļo̧k kijejeto ko aer rem̧m̧an tata make.” (Bible Dictionary, “Jouj”).

• Ewōr iien ko n̄e ij maron̄ joļo̧k aō an̄ūrlep iumin jiddik wōt iien. Ekōjkan an aō pād wōt im anemkwoj jān an̄ūrlep, men̄e ij mōk ak ebweer?