“4: O Lou Faavae: Faaaoga Tatau le Taimi,” Mauaina o le Malosi i le Alii: Faafoisia Faalelagona (2020)
“4: O Lou Faavae: Faaaoga Tatau le Taimi,” Mauaina o le Malosi i le Alii: Faafoisia Faalelagona
O Lo’u Faavae: Faaaoga Tatau Le Taimi—Taimi Aofai: 20 Minute
Mafaufau loloto:
Aisea ua avea ai le taimi ma se tasi o meaalofa silisili a le Atua?
Maimoa:
“The Gift of Time,” maua i le https://churchofjesuschrist.org/study/video/self-reliance-videos [2:27]. (E lē maua le vitiō? Faitau le tusitusiga mo “O Le Meaalofa o le Taimi.”)
O Le Meaalofa o le Taimi
Afai e lē mafai ona e matamata i le vitiō, filifili matafaioi ma faitau le tusiga lenei.
Kofi:: Talofa, Tuafafine Benkosi. O a mai oe?
Tuafafine Benkosi: O e manuia, Kofi?
Kofi: Oi, Tuafafine Benkosi. Ua ou pisi lava. E tatau ona ou faigaluega, auauna atu ma fesoasoani i lo’u aiga … sosoo ai foi ma lau soka. E leai so’u taimi!
Tuafafine B.: Kofi, o loo ia te oe le taimi uma o loo i ai.
Kofi: Ea?
Tuafafine B.: Lau tama, ua tuuina mai e le Atua ia i tatou se meaalofa maoae—o lo tatou taimi. E tatau ona faaaoga lo tatou taimi e faia ai mea e sili ona tāua.
Kofi: Ae faapefea, Tuafafine Benkosi? E tele lava ni mea sa e faia. Ua faamanuiaina oe i lou aiga, ma lau pisinisi. Ua e auauna atu ma faamanuia le toatele o tagata, e pei o au. Ou te lē iloa pe faapefea ona e faia.
Tuafafine B.: E te manao moni lava ia iloa? Afai e te nofo filemu ma faalogo, o le a ou ta’u atu ia te oe la’u mealilo.
O taeao taitasi ou te ala ai e lei oso ae le la. E fai ou lavalava ma fufulu ou mata ma lima.
Ou te faitau i tusitusiga paia. Ona ou faia lea o se lisi o mea e tatau ona ou faia i lena aso.
Ou te mafaufau i se tasi ou te auauna i ai. Ou te tatalo ia iloa le finagalo o le Atua. Ma ou te faalogo.
O nisi taimi e oo mai igoa ma foliga o tagata i lo’u mafaufau. Ou te faaopoopoina i latou i la’u lisi.
Kofi: O le ala lena e te iloa ai i taimi uma le tagata e manaomia lau auaunaga?
Tuafafine B.: Ioe, Kofi. Ma ou te tatalo mo le malosi ma le poto. Ou te tatalo o le a “faapaiaina e le Atua [la’u] galuega.” Ua tau mai lena mea i le 2 Nifae 32.
Ou te faafetai ia te Ia. Ou te folafola atu e faia le mea silisili. Ou te ole atu e Na te faia mea e lē mafai ona ou faia.
Ona ou tilotilo lea i la’u lisi. Ou te tuu le 1 i talaane o le mea e aupito tāua, sosoo ai ma le 2.
Kofi: E faapefea ona e iloa mea e faamuamua?
Tuafafine B.: Ou te faalogo pe a ou tatalo! Ona ou alu lea ou te galue. Ou te tilotilo i le numera 1 ma taumafai e fai muamua, ona fai lea o le numera 2.
O nisi taimi e suia ai nei mea. E ta’u mai e le Agaga Paia ia te au e fai se isi mea. E lelei lena.
Ou te galue malosi, ae ou te maua le filemu. Ou te iloa o le a fesoasoani le Atua ia te au.
O lea la, faatasi ai ma la’u lisi ma le Agaga, ou te faia ai le mea e tāua, Kofi.
Kofi: E foliga mai e faigofie ma faigata i le taimi e tasi.
Tuafafine B.: E sao oe! Pe a oo ina ou sauni e moe, ou te tatalo. Ou te lipoti atu i le Tama Faalelagi. Ou te ta’u atu ia te Ia lo’u aso. Ou te faia ni fesili. Ou te fesili atu po o a mea e mafai ona sili atu ona ou faia. Ou te faalogo. E masani ona ou lagonaina Lona alofa. Ou te iloa e Na te faalautele mea ou te taumafai e fai. Ona ou maua lea o le filemu, Kofi, ma ou moe loa lea.
Kofi: Lelei tele, Mama Benkosi. Ou te manao i lenei filemu. Ou te manao e faaaoga lo’u taimi. Ou te manao ia sili atu ona ou galue ma auauna atu.
Talanoa:
O le ā se mea na e aoaoina mai ia Tuafafine Benkosi i le vitiō?
Faitau:
O fuaitau nei o mau ma saunoaga a taitai o le Ekalesia:
“Aua faauta, o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega” (Alema 34:32).
“O le taimi o le mea autu lava lea o loo i le fogaeleele. … Afai e faaaoga ma le faautauta, o le a aumai ai mea e faaopoopo i lo outou ola filemu, talafeagai, ma le faamalieina. Sei o tatou mafaufau i lenei mea, ma aua nei toe nofonofo ma piilima, faamaumau taimi” (Brigham Young, i le Discourses of Brigham Young, sel. John A. Widtsoe [1954], 214).
“E faigofie lava ona faatoilaloina i tatou i mea e masani ona fai i le olaga. O le moe, o le ‘ai, o le faiga o lavalava, galuega, taalo, faamalositino, ma le tele o isi gaoioiga masani e moomia ma e tāua. Ae o le iuga lava, o tagata e avea ai i tatou o le taunuuga lea o lo tatou malamalama ma le naunautaiga e aoao mai le Tama, o le Alo, ma le Agaga Paia; ua le na o se aofaiga o a tatou gaoioiga i aso taitasi i lo tatou olaga atoa” (David A. Bednar, “O Mea Silisili Ese ma le Taua,” Liahona, Nov. 2017, 93).
Tautino:
O le a ou faataitaia nei laasaga i aso uma e faaaoga tatau atili ai lou taimi, ma o le a ou lipoti atu i po taitasi i le Tama Faalelagi i au tatalo.