Lesona 11

Ou Te Faafetai Mo I’a

Faamoemoega

Ia fesoasoani ia maua e tamaiti taitoatasi le agaga faafetai i le Tama Faalelagi ma Iesu Keriso mo i’a ma meaola i le vai.

Sauniuniga

1. Ia suesue ma le agaga tatalo le Kenese 1:20–23, Iona 1–3; Mataio 14:15–21, ma le Luka 5:1–11.

2. O Mea e faaaogaina:

   1. O se Tusi Paia.

   2. I’a pepa (vaai le faaa’oa’oga o lo o i le faaiuga o le lesona).

   3. “Ofe fagota”—se laau e nonoa ai se manoa ma se kilipa pepa, se fasi teipi pipii (sticky back tape), po o se maneta i le pito o le manoa. (Teu faalelei lenei ofe e faaaoga i lesona i le lumanai.)

   4. O se apa e tuu i ai i’a pepa.

   5. Afai e mafai, aumai ni ata o i’a po o isi meaola e mau i le vai.

   6. Ata tipi 1-5, i’a (e mafai foi ona maua ata tipi faapena i le Seti 4 O Ata Tipi O Fesoasoani Vaaia A Le Peraimeri).

   7. Ata 1-1, O Le Lalolagi (62196); ata 1-24, O Iesu ma Tagata Fai Faiva (Taga o Ata o le Talalelei 210;62138); ata 1-25, I’a; ata 1-26, Lane; ata 1-27, Laumei.

3. Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga E Faatosina Mai Ai:

Fai i tamaiti e mafaufau peiseai o la e tutu i luga o se auala laupapa ma tilotilo ifo i se vaitafe po o se vaituloto.

Gaoioiga E Faatosina Mai Ai:

• O le a le mea e te vaaia pe a e tilotilo i le vai?

Fai i tamaiti e tutu ma faafoliga o la e feausi i le vai e pei o ni i’a.

Sa poloaiina e le Tama Faalelagi Iesu Keriso e faia i’a ma isi meaola i le vai

Faaali le ata 1-1, O Le Lalolagi, ma toe faamanatu nisi o mea sa talanoaina i lesona ua mavae, na poloaiina e le Tama Faalelagi Iesu Keriso ia faia. Tau i tamaiti na faia foi e Iesu i’a (Tagai i le Kenese 1:20–23). O i’a o se vaega o le fuafuaga a le Tama Faalelagi i le fogaeleele. Faaali le ata 1-25, I’a, ma talanoa i le mea e nonofo ai i’a.

• Ua outou vaai i ni i’a?

Tuu le avanoa e faamatala mai ai e tamaiti i’a sa latou vaai i ai.

Faaali ata tipi 1-5 ma nisi lava ata o i’a sa e aumaia. Talatalanoa i ituaiga o i’a eseese, e pei o i’a auro, sesele (trout), tuna, malie, po o so o se ituaiga lava o i’a e masani ai tamaiti o le vasega.

• O a isi meaola e mau i le vai e ese mai lo i’a?

Faaali le ata 1-26, Lane, ma le ata 1-27, Laumei. Talanoa i lane ma laumei ma le mea e nonofo ai. Ia talanoa foi i tafolā, paa ma isi meaola o le vai. Faamatala atu o isi meaola o le vai e mau i le moana, o isi i vaituloto, a o isi i vaitafe.

Gaoioiga:

Fesoasoani i tamaiti taitoatasi e mafaufau i se meaola o le vai ona ia savali lea, musa, pe aau faapei o lena meaola.

Tala:

Tuu i luga le Tusi Paia ma faamatala atu e mafai ona tatou faitau e uiga i i’a i tusitusiga paia. Faamatala le tala ia Iona, e pei ona tusia i le Iona 1–3. Faamatala na saunia e Iesu se i’a tele lava e foloina Iona ina ia aua ne’i malemo o ia. Sa i ai galuega a Iesu e faataunuu e Iona. Atonu e te manao e faitau leotele se fuaiupu se tasi pe lua, pei o le Iona 1:17 po o le Iona 2:1, a o lo o e faamatalaina le tala. (Afai e te faitauina leotele se fuaiupu, faamalamalama o nisi taimi e ta’ua Iesu “o le Alii.”)

Tala:

• O ai na auina mai le i’a tele e foloina Iona? (Tagai i le Iona 1:17.)

• O le a le mea sa fai e Iona ina ua folo o ia e le i’a? (Tagai i le Iona 2:1.)

• O le a le mea na fai e Iona ina ua sau i fafo mai le i’a? (Tagai i le Iona 3:1–3.)

• Na talitonu tagata ia Iona ma salamo? (Tagai i le Iona 3:5,10)

Tau i tamaiti o nisi i’a e lapopoa tele, e pei o le i’a na foloina Iona, a o nisi foi e laitī tele ma e mafai lava ona ola i se apa fafano.

Gaoioiga:

Fesoasoani i tamaiti e fai le tala lea e faaaoga ai tamatamai lima.

O Le I’a Auro

O lau tamai i’a auro e leai ni ona tamaitamaivae (tago i tamatamai vae)

E auau solo ma suesue ni ana mea e ai (tusi i le isu).

E le mafai ona ma taaalo i le mea e nofo ai, pe sau i le mea ou te i ai (fai taga aau)

A ou fai atu foi, “Sau ta taaalo,”

E foliga mai foi o la e fai mai, “Sau oe i lalo.” (fai taga talo mai lima).

Tala:

Toe faaali atu le Tusi Paia a o e faamatalaina le tala ia Simona Peteru o lo o maua i le Luka 5:1–11.

Faaali le ata 1-24, O Iesu ma Tagata Fai Faiva, i se taimi e talafeagai lelei.

Tala:

• Aisea na oo ai Iesu i le vaa o Simona Peteru? (Tagai i le Luka 5:3.)

• O le a le mea na tau e Iesu ia Simona Peteru e fai? (Tagai i le Luka 5:4.)

• O a mea na maua e Simona Peteru i lana upega? (Tagai i le Luka 5:6.)

Sa poloaiina e le Tama Faalelagi Iesu Keriso e faia i’a ma meaola o le vai mo i tatou

Faamatala na poloaiina e le Tama Faalelagi Iesu e faia i’a ma meaola o le vai tatou te faaaogaina mo a tatou meaai ma isi mea.

Tala:

Toe tagai i le Tusi Paia, faamatala le tala o lo o maua i le Mataio 14:15–21. Atonu e te manao e faitau leotele se fuaiupu se tasi pe lua, e pei o le Mataio 14:16–17, a o lo o e faamatalaina atu le tala.

Tala:

• O le a le mea na faia e Iesu ina ua fia aai tagata? (Tagai i le Mataio 14:15–16.)

• O a meaai na fafagaina ai e Iesu tagata? (Tagai i le Mataio 14:19.)

Gaoioiga:

Faaali atu i le vasega le ofe fagota lea sa e saunia, ma tofi se tamaitiiti e sau i luma e faataitai ona fagota. Tuu ni ata tipi o i’a i se apa, ae a tago le tamaitiiti e lūlū le manoa i luga o le apa, ona faapipii lea o se i’a i le kilipa pepa, teipi, po o le maneta ona toso lea i luga e le tamaitiiti. Fai ia tofu fagota uma tamaiti.

Tuu i tamaiti e faamatala ni taimi sa fagogota ai pe na latou aai ai foi i ni i’a.

Molimau:

Faamatala atu lou agaga faafetai mo i’a ma meaola o le vai.

O Isi Gaoioiga E Faamauoa Ai

Filifili nisi o nei gaoioiga e fai i le taimi o le lesona.

1. Ia valivali e tamaiti le i’a pepa lea na latou mauaina i le gaoioiga fagota (toe fai le gaoioiga pe a manaomia). Ia tusia upu ia “Ou te faafetai mo i’a” i tua o i’a a tamaiti.

2. Faanonofo tamaiti i se afa lio. Tuu i’a na valiina e tamaiti i o latou luma i luga o le fola o le fale. Faitau faatasi le fuaiupu lea:

   I’a laitiiti i le auvai,

   E le moomia se matau e pu’e ai.

   Tusi lou lima i se tamaitiiti ma tago le tamaitiiti e filifili lana i’a e manao ai e ala i lona faaaogaina o le ofe fagota po o le tusi foi i ai o lona lima. Ia fai e le tamaitiiti upu ia, “Sa ou mauaina se i’a ,” (tau le lanu o le i’a). Ia taofi e le tamaitiiti le i’a e ave i le fale. Ia fai pea seia soo uma tamaiti.

3. Usu faatasi ma tamaiti le “Faafetai Lo Tatou Tama” (Tusi Pese a Tamaiti).

4. Fesoasoani i tamaiti e faatino le gaoioiga lea e faaaoga ai tamatamai lima.

   O Le Laumei Laitiiti

   E i ai la’u laumei laiitiiti

   O lo o nofo i le tapuvai i le taimi nei (faaofuofu lima).

   O le vaitafe e auau ai (taga aau)

   A o papa e a’ea’e ai (faatolotolo tamai lima agai i luga).

   E fia pue e ia le i’a laiitiiti (pati lima),

   E fia pue foi le lago e ia (pati lima).

   E fia pue e ia le namu (pati lima),

   Na te fia pue foi ia te au (pati lima)!

   Na maua e ia le tamai i’a (pati lima),

   O le lago foi na maua e ia (pati lima).

   Na ia maua foi le namu (pati lima),

   Ae na te le i mauaina au!

   (Vachel Lindsay, from Collected Poems of Vachel Lindsay. Copyright © 1920 by Macmillan Publishing Co., Inc., renewed 1948 by Elizabeth C. Lindsay. Used with Permission.)

5. Fesoasoani i tamaiti i le tauina o upu o le gaoioiga lenei. Faamatala atu o le alia o se vaitafe laitiiti a o le lafitaga o se mea e lafi ai.

   E Lima I’a Laiti

   Faatutū ni tamaiti se toalima i luma o le vasega, ia tofu ma le i’a e uu.

   E lima i’a laiti sa feausi i le auvai lanumoana,

   E tasi ua toe aau ese i si ona lafitaga (ia fai taga aau e se tamaitiiti e toatasi ma agai i lona nofoaga)

   I’a laiti, i’a laiti, ta’a’alo ma fiafia,

   I’a laiti, i’a laiti, feausi ai pea ia.

   Usu le isi fuaiupu e tau ai i’a e fa, tolu ma le lua. Ia aau ese se tamaitiiti se toatasi i fuaiupu taitasi. Afai ua totoe na o le tamaitiiti e toatasi, ona usu lea o le fuaiupu lenei:

   E tasi le tamai i’a sa auau i le auvai lanu moana;

   Sa ia aau ese i lona lafitaga.

   I’a laitiiti, i’a laitiiti, taalo ma fiafia,

   I’a laitiiti, i’a laitiiti, auau ai pea ia.

Gaoioiga Faaopoopo Mo Tamaiti Laiti

1. Faaali le ata 1-25, I’a; ata 1-26, Lane; ma le ata 1-27, Laumei. Faamatala i au lava upu le tala i le foafoaina o i’a ma meaola o le vai (Tagai i le Kenese 1:20–23). Faaali atu lou agaga faafetai mo i’a ma isi meaola o le vai.

2. Faamatala i tamaiti e tele meaola o lo o nonofo i totonu po o tafatafa o le vai. Ia mate mai e tamaiti po o le a le meaola lena e te mafaufau i ai a o lo o e tuuina atu faamatalaga faaataata nei:

   1. O lo’u pau e lanu meamata, lamolemole ma maseesee. Ou te osooso. Ou te nofo i tafatafa o vaituloto, vaitafe laiti, po o vaito’a. E mafai ona outou mate mai o ai au?

      (A mateia e tamaiti o le “lane” faaali i ai le ata 1-26, Lane, po o le tusia foi o se ata o se lane i luga o le laupapa.)

   5. O au e ese lo’u telegese. Ou te tauaveina se atigi malō i lo’u papātua. A ou fefe, ona ou faapupuu ai lea, o lo’u ulu, lima ma vae i totonu o lo’u atigi. O ai au?

      (A mateia e tamaiti o le “laumei”, faaali i ai le ata 1-27, Laumei, po o le tusia foi o se ata o se laumei i luga o le laupapa.)

   A uma ona mate uma e tamaiti meaola na e lua, ona musamusa solo lea pei o ni lane; a maea ona fetolofi lemu faataamilo solo lea pei o ni laumei.

3. Pepese faatasi ma tamaiti i le pese: “O A Au Mea E Fai I Le Taumafanafana?” (Tusi Pese a Tamaiti).