E Fesoasoani Le Agaga Paia Ia Te Au

Faamoemoega

Ia fesoasoani ina ia malamalama tamaiti taitoatasi, e fesoasoani le Agaga Paia ia te i tatou.

Sauniuniga

Ia suesue ma le agaga tatalo le Ioane 14:16–17; 2Nifae 32:5; Moronae 10:4–5; ma le Mataupu Faavae ma Feagaiga 39:23; 130:22. Tagai foi i le Mataupu Faavae o le Talalelei (31110), mataupu e 7.
O Mea e faaaogaina:
1. O se Tusi Paia ma se kopi o le Mataupu Faavae ma Feagaiga.
2. O se mea faitino e masani ai tamaiti ma se taga e tuu i ai.
3. Ata 1-3, O Iesu Le Keriso (Taga o Ata o le Talalelei 240;62572); ata 1-4, O Le Uluai Faaaliga (Taga o Ata o le Talalelei 403;62470).
Ia faia sauniuniga e talafeagai ai mo so o se Gaoioiga E Faamauoa Ai e te manao e faaaoga.

Gaoioiga E Aoao Ai

Tofi se tamaitiiti e faia le tatalo amata.

Gaoioiga e faatosina mai ai:

Fai i se tamaitiiti e sau ia te oe. Musumusu i lona taliga se mea e uiga i le Agaga Paia, o se faataitaiga “E fesoasoani le Agaga Paia i le Tama Faalelagi ma Iesu.” Fai pea seia soo uma tamaiti o le vasega (e mafai ona e fai atu le mea lava lena e tasi i tamaiti uma). Fesili i tamaiti pe latou te iloa o ai lea o le a latou talanoa i ai i le aso. Faamatala atu i ai o le a outou talanoa e uiga i le fesoasoani o le Tama Faalelagi ma Iesu, o le Agaga Paia.

E Fesoasoani le Agaga Paia i le Tama Faalelagi ma Iesu

Faaali le ata 1-4, O Le Uluai Faaaliga. Tusi lou lima i le Tama Faalelagi ma Iesu, ma faamatala atu e i ai o la tino faaletino e pei lava o i tatou. Faamatala atu o le Agaga Paia e pei lava o le Tama Faalelagi ma Iesu i le tele o mea. E alofa ma fesoasoani ia te i tatou. Ae peitai, e leai sona tino faitino pei o le Tama Faalelagi ma Iesu. O ia o se agaga ma o le mea lea e mafai ai ona ia tuu mai filemu manatu i o tatou mafaufau ma aumaia lagona o le fiafia ma le toafilemu.

O le Agaga Paia e maua mai ai lo tatou faamafanafanaga ma le fesoasoani

Pe a e tiga pe faanoanoa, e faapefea ona fesoasoani lou tina po o lou tama e faamafanafana ma faafiafia oe?

Faaali le ata 1-3, O Iesu le Keriso. Faamatala i tamaiti na silafia e Iesu o le a faanoanoa ona soo, ona fesoasoani, pe a maliu o ia, o lea na ia tau atu ai ia te i latou o le a fesili atu i le Tama Faalelagi e auina mai se na te faamafanafanaina i latou ina ia aua nei lotovaivai (Tagai i le Ioane 14:16–17).

Tau atu i tamaiti o lea faamafanafanaga, o le Agaga Paia, ma e mafai foi ona ia faamafanafanaina i tatou. Faamalamalama afai tatou te faanoanoa pe le fiafia, o le a fesoasoani le Tama Faalelagi ia te i tatou i lona auina mai lea o le Agaga Paia e faamafanafanaina i tatou.

Tala:

Faamatala atu e mafai foi e le Agaga Paia ona lapataia ma taitaia i tatou pe a moomia se fesoasoani. Tau atu i au lava upu le tala lea e uiga ia Harold B. Lee a o laitiiti, o le na avea ma Peresitene lona sefulu ma le tasi o le Ekalesia:

“Masalo ua tusa ma le valu o’u tausaga po o le itiiti ifo foi, na aveina ai au e lo’u tama i se faatoaga e mamao ese atu. A o faia ana galuega, sa ou taumafai e faia mea e masani ona fai e tamaiti. Sa matua vevela ma pefua le aso ma sa ou taaloalo lava seia oo ina ou le lava. I le isi itu o le pa, sa i ai se fale malepe sa ou fia oo i ai. I lo’u mafaufau, sa ou manatu i lenei fale malepe e pei o se maota tele matagofie ou te fia oo i ai e vailiili. O lea sa ou alu ai loa i le pa ma amata ona ou ae i luga ina ia ou alu atu i le fale malepe. Na oo mai se leo ia te au ma sa faapea mai lenei faaupuga manino, “Harold, aua e te alu iina”.

Sa ou tilotilo solo e vaai po o ai lea e tau maia lo’u igoa. E mamao lava i le isi itu o le fanua le mea sa i ai lo’u tama. E le mafai ona ia iloa mai lau mea lea e fai. Ou te le i vaaia se tagata iina. O lea na ou iloa ai o lo o i ai se tasi e le mafai ona ou vaai i ai, o lo o ia lapataia au ina ia aua nei ou alu iina. Pe o le a le mea o lo o i ai iina, o le a ou le iloa lava, ae peitai, sa ou aoaoina i lo’u laitiiti o lo o i ai i latou i tala atu o la tatou vaai e mafai ona talanoa mai ia te i tatou” (in Conference Report, Mexico City Mexico Area conference 1972, pp. 48-49).

Faamatala atu o nisi taimi e musumusu leotele mai le Agaga Paia, e pei ona ia faia ia Peresitene Lee, ae peitai, e masani ona ia aumaia se lagona i le mea e tatau ona tatou faia po o le le tatau foi.

O le Agaga Paia e Fesoasoani ia Tatou Iloa le Mea Sao

Faamatala atu e alofa mai le Agaga Paia ma fesoasoani ia te i tatou ina ia tatou filifili le mea sao. Fai i tamaiti e mafaufau i ni mea lelei sa latou faia, e pei o le usitai i o latou matua, fesoasoani i isi, ma le faia o a latou tatalo.

O le a sou lagona pe a e faia mea e sao?
O le a sou lagona pe a e faia mea e sese?

Faamatala atu o le Agaga Paia e fesoasoani ia i tatou ina ia tatou iloa le eseesega o le sao ma le sese i le aumaia lea o se lagona lelei ma le mafanafana pe a tatou faia se mea sao ma se lagona faanoanoa pe a tatou faia se mea sese.

Ia tau mai e tamaiti ni taimi na latou maua ai ni lagona lelei ma le mafanafana ona ua latou faia ni filifiliga sao pe fesoasoani ai foi i se tasi. Fesoasoani ia te i latou ina ia latou iloa le taitaiga a le Agaga Paia.

Pese:

Faitau faatasi ma tamaiti upu o le pese: “Faalogo, Faalogo” (Children’s Songbook, p.107).

Faalogo i le leo malu!
 Faalogo!
Pe a fai sau tonu.
Na te taitai oe.

E fesoasoani le Agaga Paia ia tatou iloa o le Tama Faalelagi ma Iesu Keriso o ni tagata moni lava.

Faamatala o le Agaga Paia e mafai ona fesoasoani ia i tatou e faasino mai pe moni se mea pe leai. Faaali atu i tamaiti se taga o lo o i ai se mea faitino i totonu. Tau i tamaiti o lo o i ai se mea i le taga, ae peitai, aua nei e faaali atu ia te i latou lena mea.

O i ai se mea i totonu o lenei taga?

Faamatala atu i ai, tusa lava pe le mafai ona vaai tamaiti i le mea o lo o i totonu o le taga, latou te iloa lava o lo o i ai aua ua uma ona tau i ai. Tusa lava pe toaitiiti nai tagata ua vaai tino i le Tama Faalelagi ma Iesu, e mafai ona fesoasoani mai le Agaga Paia tatou te iloa o tagata moni lava le Tama Faalelagi ma Iesu Keriso, ma e alolofa i laua ia te i tatou. Faamatala o lenei atamai ua taua o se molimau. O nisi taimi e tuuina atu ai e tagata a latou molimau i sauniga a le Ekalesia ma tau mai ai ia te i tatou, ua latou iloa o lo o soifua Iesu. O le Agaga Paia o lo o fesoasoani ia te i latou ia latou iloa e moni lenei mea.

E mafai ona tatou maua le meaalofa o le Agaga Paia

Faamatala atu le mea na e oo i ai ina ua papatisoina oe ma faamauina. Faamatala ou lagona ina ua faaee e ni alii e i ai le perisitua o latou lima i luga o lou ulu ma tuuina ia te oe le meaalofa o le Agaga Paia.

Faitau leotele le Mataupu Faavae ma Feagaiga 39:23 (faagata i le Agaga Paia). Faamalamalama afai e atoa le valu tausaga o tamaiti ma papatiso ma faamauina, o le a mafai e i latou ona maua le meaalofa o le Agaga Paia. O le meaalofa o le Agaga Paia o le a fesoasoani ia te i latou ina ia tausia folafolaga sa latou faia ina ua papatisoina.

Molimau:

Faaali atu lou agaga faafetai mo le Agaga Paia ma tau i tamaiti le faamafanafanaina o oe e le Agaga Paia ma le fesoasoani ia te oe ina ia e iloa le mea sao.

O Isi Gaoioiga E Faamauoa Ai

Filifili nisi o nei gaoioiga e fai i le taimi o le lesona.

Fesoasoani i tamaiti e usu pe fai upu o le pese: “O Le Agaga Paia” (Tusi Pese a Tamaiti.)
Faaali ata o tagata o lo o faia ni mea lelei, mo se faataitaiga, o lo o fetufaai ma fesoasoani le tasi i le isi.

Fesili i tamaiti po o a o latou lagona pe a latou faia ni mea lelei. Faamalamalama i tamaiti ni tulaga o nisi tagata latou te faia ni mea lelei ma ni mea leaga, mo se faataitaiga, fesoasoani i o latou tina, tauaimisa ma o latou uso ma tuagane, taaalo faatasi i mea taalo, ma le faalogogata i o latou matua. Fai i tamaiti e ataata pe a lelei le gaoioiga, ae faauu pe a le lelei.
I se leo malu lava, “O i latou uma lava e mafai ona lagona lo’u leo, tuu lou tamatamai lima i lou isu. O i latou uma e le mafai ona lagona lo’u leo, tuu lou lima i luga o lou ulu.” Fai pea ae tau isi vaega o le tino, seia faalogo uma atu lava tamaiti i lou leo malu. Faamatala atu tusa lava pe e te tautala lemu, a faalogo lava tamaiti, latou te lagona lava lou leo ma usiusitai i faatonuga. Faamatala atu e tautala mai le Agaga Paia ia te i tatou i se leo lemu. Afai tatou te faalogo ma le faaeteete, o le a ia tau mai ia te i tatou mea taua.
Faamatala atu i au lava upu le tala lea e uiga ia Peresitene Uilifoti Uitilafi, le Peresitene lona fa o le Ekalesia:

I se tasi po a o faia se faigamalaga a Peresitene Uitilafi, lona faletua, ma le la fanau e toafa, sa latou malolo i se fale o sa latou uo ma momoe ai. Sa momoe tamaiti e toatolu i totonu o le fale, a o Peresitene Uitilafi, lona faletua, ma le isi tamaitiiti e toatasi sa momoe i fafo i le taavale. Sa taua e Peresitene Uitilafi e faapea, “Sa ou moe, ae peitai ua na o sina taimi puupuu lava, ae ou faalogoina loa se leo o faapea mai: “Tu i luga ma tulei ese lau taavale.” E le o se faititili, uila po o se mafuie, ae o si leo itiiti ma le malu o le Agaga o le Atua-le Agaga Paia … Sa ou tu i luga ma tulei le taavale ma faatu i tafatafa ane o le fale. Ina ua ou toe foi atu i le moega, sa toe fai mai foi le Agaga lava lea ia te au, “Alu e aveese au miula mai le laau la e i ai”. … Sa ou alu atu ma aveese mai ma noanoa i nisi laaumuli. Sa ou alu loa o’u moe. Pe tusa ma le tolusefulu minute ae oso mai loa se asiosio ma liai le laau lea sa noanoa ai muamua au miula ma ave tusa ma le selau iata le mamao, ma faatamaia atu ai ni pa se lua ma faapalasi ifo ai i le mea tonu lava sa tu ai muamua lau taavale. … O lo’u usitai i le faaaliga a le Agaga o le Atua ia te au, na ou faasaoina ai lo’u ola, ma ola o lo’u toalua ma lo’u atalii, faapea foi au manu” (“Leaves from My Journal,” Millennial Star, 12 Dec. 1881, pp. 790-91).

Gaoioiga Faaopoopo mo Tamaiti Laiti

I le vaiaso a o lumanai le lesona, faafesootai matua o tamaiti taitoatasi e aumai se mea e fiafia i ai le tamaitiiti ia. Se mea pei o se palanikeke mafanafana, po o se meataalo, po o se pese faapitoa e usu. Ia e aumaia foi nisi mea ne’i i ai se tamaitiiti e galo ona aumai.

I lau vasega, talanoa ma tamaiti e uiga i mea e maua ai e i latou mai nei mea le mafanafana ma le alofa. Faamatala atu e mafai e se tasi o fesoasoani o le Tama Faalelagi ma Iesu ona faafiafia ma faamafanafana i tatou. O lenei tagata e taua i nisi o taimi o le Faamafanafana, aua ua auina mai o ia e le Tama Faalelagi e mafuta ma i tatou pe a tatou faanoanoa pe popole foi. O lea tagata o le Agaga Paia, o se uo matagofie!
Faifaatauloto laina o le “O Le Leo Filemu Itiiti” (Children’s Songbook, p.106) ma fesoasoani i tamaiti e fai taga faatonuina:

Faalogo, faalogo (faaofuofu lima i taliga)

I le Agaga Paia (tuu le limatusi i laugutu).

Faalogo, faalogo (faaofuofu lima i taliga)

I si ona leo manaia (tuu le lima i le fatu).