E Mafai E I Tatou Uma Lava Ona Fesoasoani I Le Lotu

Faamoemoega

Ia fesoasoani ia malamalama tamaiti taitoatasi e mafai e tagata uma o le uarota po o le paranesi ona fesoasoani i le lotu.

Sauniuniga

Ia aoao ma le agaga tatalo le 1 Nifae 17:7–15; 18:1–4.
Ia saunia se tusi faafetai (thank you card) faigofie mo tamaiti taitasi latou te valivaliina ma ave i le peresitene o le Peraimeri po o se isi tagata o lo o fesoasoani i tamaiti i le lotu. Atonu e te manao e tusia se fugalaau i luma o se pepa ua gaulua ma tusi ai upu Faafetai Lava i totonu.
O Mea e faaaogaina:
1. O se Tusi a Mamona.
2. Le ofe fagota ma i’a mai le lesona 11. Tusi se faamatalaga tau faaataata e uiga i le epikopo po o le peresitene o le paranesi, e pei o le “E nofo o ia i luga o le tulaga i le taimi o le lotu,” “E fesoasoani o ia i tagata o la tatou uarota [po o le paranesi],” po o le “E mafai ona avatu ia te ia a tatou sefulua’i.”
3. Se pusa vali po o penitala.
4. Ata 1-8, O le Tufatufaina Atu O Le Faamanatuga (62021); ata 1-67, O Se Vasega Faaaloalo; ata 1-71, O Le Fauina o le Vaa.
Ia faia sauniuniga talafeagai ai mo so o se Gaoioiga E Faamauoa Ai e te manao e faaaoga.

Gaoioiga e Aoao Ai

Tofi se tamaitiiti e faia le tatalo amata.

Gaoioiga e Faatosina Mai Ai:

Avane se nofoa i le ogatotonu o le potu ma taumafai e sii i luga i sona vae se tasi. Faamatala e tele mea e le mafai ona tatou fai vagana ua tatou galulue faatasi. Valaaulia ni tamaiti se toatolu e tofu le tamaitiiti ma le vae o le nofoa ona fesoasoani lea ia te oe e sii laitiiti i luga le nofoa mai le fola. Faamatala a galulue faatasi tagata uma, e tele mea e le mafai ona tatou faia na o i tatou, o le a mafai ona tatou faia.

E finagalo le Tama Faalelagi ma Iesu ina ia tatou galulue faatasi.

Tala

Faaali le ata 1-71, O Le Fauina o le Vaa, ma faamatala otooto le tala ia Nifae ma lona aiga i le fauina o le vaa, e pei ona maua i le 1 Nifae 17:7–15 ma le 18:1–4. Faamamafa atu sa manaomia e Nifae le fesoasoani mai le Alii ma lona aiga e fauina ai le vaa.

Tala

Aisea na le mafai ai e Nifae ona fausia le vaa e aunoa ma se fesoasoani?
Na faapefea ona fesoasoani le Alii ia Nifae? (Tagai i le 1 Nifae 17:8–10; 18:1.)
Na faapefea ona fesoasoani le aiga o Nifae? (Tagai i le 1 Nifae 18:1.)
O le a le mea e tupu pe a galulue faatasi tagata uma? (Tagai i le 1 Nifae 18:4.)

Faataga tamaiti e talatalanoa e uiga i ni mea na oo ia te i latou i lo latou galulue faatasi ma isi tagata.

Gaoioiga

Faamalamalama atu e tatou te galulue faatasi foi i le lotu. E fesoasoani tagata taitasi o le uarota (po o le paranesi) i isi. Ia e faafoliga e ala i au taga po o upu, faapea o oe o se tasi e fesoasoani i uso o lau vasega i le lotu i vaiaso taitasi, e pei o se taitai pese, ta laau, se faiaoga, po o le peresitene o le Peraimeri. Fai i tamaiti e mate mai po o ai lena e te faataitaiina ana taga. A uma ona mate e tamaiti po o ai oe, ona faamatala lea o tiute tauave o lena tagata. Pule oe pe fai faafia.

Faaali le ata 1-8, O Le Tufatufaina Atu O Le Faamanatuga.

Gaoioiga

O le a le mea o lo o faia e lenei tiakono?
E te iloaina se tasi na te tufatufaina le faamanatuga?

Faamatala atu o alii talavou o å ua umia le Perisitua Arona e mafai ona latou saunia, faamanuia, ma tufatufa le faamanatuga. O auala nei e mafai ai e alii talavou ona fesoasoani i le lotu.

Gaoioiga

Faamatala e i ai se tasi i la outou uarota o lo o fesoasoani i tagata uma lava i le lotu. Ua tuuina e le Tama Faalelagi i lea tagata se galuega taua na te faia. Auaua’i tamaiti e matau mai ia o lo o i ai faamatalaga tau fa’aataata. Ia faitau leotele faamatalaga taitasi. Ia faaauau pea seia maea ona faitauina uma faamatalaga, ona tuu lea o le avanoa i tamaiti e mate mai ai po o ai le tagata lea.

Gaoioiga

O ai le igoa o le tatou epikopo (po o le peresitene o le paranesi)?
O a mea taua na te faia e fesoasoani ai ia te i tatou?

Ia talanoaina galuega e faia e isi tagata i la outou uarota po o le paranesi, e pei o faiaoga o aiga ma faiaoga asiasi. Atonu e te manao foi e talanoaina valaauga o tagata o aiga o tamaiti.

E mafai ona tatou fesoasoani i le lotu

Gaoioiga

Faasalalau le pesini o vali po o penitala i luga o le fola. Fai i se tamaitiiti se toatasi e tago e taetae uma i luga ae tago oe e faitau le umi o le taimi o le a fai ai e lea tamaitiiti le galuega. Toe faasalalau le pesini vali ona fetagofi uma lea o le vasega e taetae i luga ae va’ai pe o le a le umi o le a fai ai. Faamalamalama a galulue faatasi tagata uma, o le a mafai ona sili atu ona lelei le faiga o le galuega.

Gaoioiga

O le a se mea e mafai ona e fai e fesoasoani ai i le lotu?

Fesoasoani i tamaiti e mafaufau i auala e mafai ona fesoasoani ai i le lotu, e aofia ai le faamamaina o le falelotu, o le agalelei i isi, fesoasoani i tamaiti o lo o faanoanoa pe fefefe, ma lå faaaloalo i le taimi o sauniga.

Gaoioiga

E mafai faapefea ona tatou fesoasoani e tausia le mama o lo tatou potu aoga ma le falelotu?
E mafai faapefea ona tatou fesoasoani i isi tagata i le lotu?

Faaali le ata 1-67, O Se Vasega Faaaloalo.

Gaoioiga

O faapefea ona fesoasoani nei tamaiti i le lotu?
E faapefea ona fesoasoani i uso o le vasega pe a tatou faaaloalo?
E faapefea ona fesoasoani tagata uma i le faiaoga pe a faaaloalo?
O a ni o tatou lagona pe a faaaloalo tagata uma?

Gaoioiga

Faamatala o se tasi auala e mafai ai ona tatou fesoasoani i le lotu o lo tatou fai atu lea “faafetai” i tagata o lo o faia mea mo i tatou. Fai i tamaiti e valivali le tusi faafetai sa e saunia, ma latou tilivaina i le taimi o le vasega pe afai e talafeagai.

Molimau

Faaali atu lou agaga faafetai mo tagata uma sa fesoasoani i la outou uarota po o le paranesi. Tau atu lou lagona e uiga i lou faia o le galuega a le Tama Faalelagi e ala i le avea o oe ma faiaoga o le Peraimeri.

O Isi Gaoioiga e Faamauoa Ai

Filifili nisi o nei gaoioiga e faaaoga i le taimi o le lesona.

Afai e talafeagai, savalivali ma lau vasega i le falelotu ma faasino i tamaiti le mea e nonofo ai le au epikopo (po o le au peresitene o le paranesi) i le taimi o le sauniga faamanatuga. Ia auauai tamaiti e nonofo i nofoa. A maea, ona faasino lea i tamaiti le ofisa o le epikopo (po o le peresitene o le paranesi).
Togi pe tuu atu foi se mea galemulemu e pei o se polo po o se taga o fatu pi i se tamaitiiti, ma fai i ai e ta’u mai se igoa o se tagata o le uarota (po o le paranesi) e fesoasoani i le lotu ma faamatala pe faapefea ona fesoasoani lena tagata. Ia faaauau pea seia soo uma tamaiti.
Ia maua se faatagaga mai le peresitene o le Peraimeri, ona valaaulia lea o se sui o le au epikopo po o se tasi o ta’ita’i o le uarota e asiasi atu i le vasega ma ta’u atu i tamaiti po o le a lana mea o lo o fai e fesoasoani ai i le lotu.
Ia tusia se ata faigofie o ni foliga i se ipu pepa po o se fasipepa lapotopoto mo tamaiti taitasi. Ave ni vali ma ni penitala i tamaiti e tago le tamaitiiti ia e faaopoopo i ai ni lauulu ia lanu tutusa ma lona lava lauulu. Faatonu tamaiti afai e tau atu se mea e sao e uiga i ala e mafai ai ona latou fesoasoani ai i le lotu, ona fetagofi lea e uu i luga ata o o latou foliga. Ae a le sao le faamatalaga, ona faataatia lea o ata i luga o o latou vae. Faaaoga faamatalaga e pei o-
- E tatau ona tiai pepa i lalo o lou nofoa.
- E tatau ona ou faafetai atu i tagata o lo o fesoasoani ia te au i le lotu.
- E tatau ona ou tamoe i lau vasega.
- E tatau ona ou faaaloalo i le lotu.

O Gaoioiga Faaopoopo mo Tamaiti Laiti

Fai faatasi ma tamaiti le taaloga o le “Mulimuli i le Taitai.” Faatutu tamaiti i se laina. O le tamaitiiti o lo o pito i luma o le laina e tamoe, musa, tafue pe fai foi se isi taga i le isi itu o le potu. Ia mulimuli isi tamaiti uma i le tamaitiiti o lo o muamua, ma fai le mea sa ia fai. Ona alu lea o le tamaitiiti na muamua i le siusiu o le laina, ae avea ma taitai le isi tamaitiiti lona lua. Ia faaauau seia tofu avea uma tamaiti ma taitai.

A maea le taaloga, ia faamanatu i tamaiti o le epikopo o le taitai o le uarota. E manao o ia ina ia tatou faia mea o le a toe taitaiina atu ai i tatou i le Tama Faalelagi.